Connect with us

Futbol Aruba

La Fama ta domina Juventud TL

Den siman 15 SV La Fama a cuminsa cu 13 punto den di 8 lugar riba tabla, te ainda candidato pa bay play-off di promocion-degradacion. Juventud Tanki Leendert cu 1 punto so den e temporada aki ta den ultimo luga, ta destina pa degradacion automatico, pero ban pone cosnan den perspectiva! Juventud ta 4 punto so tras di Caiquetio pa evita decenso automatico y en cambio di hunga playoff promocion-degradacion, unda ainda tin chens di sobrevivi dependiendo ta cu ken ta bay hunga play-off. Cu un victoria na lo por suma 4 punto, pa ta 1 punto so tras di Caiquetio cu tres wega pendiente, y enfrenta Caiquetio mes den e ultimo wega di e temporada, matematicamente ainda cu chens, pakiko no? Pa colmo den e wega aki, Juventud ta yega stadion sin ningun suplente, niun hungado riba banki. Nan a lubida cu nan a hera saka un punto algun siman atras for di Nacional, e campeon nan di Aruba? Tur cos ta posibel cu determinacion, pero asina aki no! La Fama cu te cu awor ta den playoff di promocion-degradacion ta buscando ainda pa evita esey, apesar cu nan rival mas serca, River Plate, ta alehando nan mes hungando bon futbol, por lo menos La Fama ta preparando nan mes pa keda den Division di Honor ‘sea lo que sea’.

La Fama a practicamente domina e wega aki for di cuminsamento, nan tabatin cinco chens ‘morto’ pa bay ariba, promer cu nan capitan Sylvester Schwengle a anota e promer gol na minuut 14 di e wega pa duna nan bentaha di 1-0. Apesar di e dominio completo, La Fama no por a anota gol atrobe te cu net prome cu halftime na minuut 43, pa medio di Davidson Kaarsbaan pa hasi e wega 2-0 pa e oncena di Savaneta.

Den di dos mita La Fama a sigui cu dominio y na minuut 51 caba Jeison Mundarain a hasi e wega 3-0, Juventud cu no tabatin reaccion algun cu poco yegada y nada di peliger, a para warda pa La Fama ataka cu tur forsa y anota e biaha aki pa via di un tiro di skina door di Ciaran Arends na minuut 56 pa hasi e wega 4-0. Na minuut 76 La Fama ta amplia nan bentaha atrobe pa hasi e wega 5-0 pa medio di Jeison Mundarain atrobe, ken por cierto, tabata nos ‘man of the match’ pa su trabou duro y e dos golnan tambe pa e victoria contundente di su ekipo. La Fama a faya hopi golnan facil, por lo menos tres mas promer cu pitazo final husto na minuut 90, referee a dicidi cu no tabatin mester di tempo addicional den un wega di caliber hopi abou mes.

La Fama ta keda awo cu 16 punto, cinco so menos cu Riverplate cu tin un wega pendiente cu Caiquetio. Juventud, cu 1 punto so, ta awor si hopi cerca di decenso automatico for di division di honor cu tres wega so mas pendiente.

 

Click to comment

Leave a Reply

Your email address will not be published. Required fields are marked *

More in Futbol Aruba

Division Honor