Connect with us

Futbol Aruba

Antesala di Siman 16 – Futbol Division di Honor


Siman 16 den futbol Division di Honor ta mustra di ta bay ta decisivo considerando cu tin tres ekipo cu 32 punto riba top di e tabla di posicion di e campeonato actual aki. Nacional ta lider p’awo pa medio di miho diferencia di gol (+23) cu Estrella (+17) y Dakota (+16). E bataya pa keda den prome luga ta sigui ta importante cu tres wega so pa hunga pa culmina e campeonato promer cu play-off cuminsa. Tin cuater ekipo ta luchando pa e di cuarto puesto riba e tabla, Bubali cu ta di cuater tin 26 punto, un bentaha hopi chikito di un punto so riba e siguiente riba tabla cu ta Britannia, cu por cierto no ta hunga e siman aki ya cu nan rival riba schedule Nacional como actual campeon lo ta representando Aruba den 
Concacaf Caribbean Club Shield. RCA ta sigui Britannia riba tabla cu 22 punto, just cuater so for di clasificacion, y River Plate ta awo cu 21 punto, despues di e sorpresa grandi na man di Caiquetio den siman 15, unda nan a faya pa acumula punto den derota, pues, 5 punto so tras di Bubali pa e posicion number cuater cu ta nifica bay play-off.

Diabierna River Plate tin chens di bons bek pa haya tres punto importante pa keda den lucha pa yega play-off, un victoria lo nifica cu nan lo acumula 24 punto. Juventud, matematicamente ainda ta den wega pa purba alcansa Caiquetio pa evita degradacion automatico y en bes di esey hunga play-off di promocion- degradacion, nan ta 7 punto tras di e ekipo di Paradera.

Diasabra ta brinda nos e wega di Caiquetio, cu despues di e gran sorpresa cu nan a dal siman pasa, contra Dakota, cu ta purbando di recupera nan prome puesto riba e tabla dependiendo claro di loke Estrella hasi den nan wega cu Bubali, y Nacional ora nan ‘haal in’ e wega pendiente contra Britannia. Caiquetio ta keto bay destina pa hunga play-off di promocion-degradacion hunto cu La Fama y dos otro ekipo cu lo cualifica for di division uno, tur wega pendiente di nan ta “fogeo” pa mehora nan mes pa keda den division di honor, si nan hunga manera den e wega di River Plate den siman 16, nan ta bay tin hopi chens mes. E di dos wega Diasabra ta entre RCA y La Fama. RCA un ekipo cu a rebota bon den e dos parti di e campanja aki pero cu un poco di mala suerte den haya miho resultado, tin te cu awor 22 punto, cu un victoria na lo ta hopi mas cerca di e cuarto puesto, claro dependiendo di otro resultadonan. E contrincante di RCA cu ta La Fama ta te cu awor den play-off promocion-degradacion cu 16 punto, cinco so tras di River Plate, cu por cierto no mag pifia mas, La Fama ainda tin chens chikito pa scapa e play-off indesea ey si River Plate “flaquea”.

Diadomingo nos lo por wak Estrella midi forsa cu Bubali, e unico wega e dia ey, un wega clave pa tur dos. Estrella, cu un victoria lo purba recupera e prome luga despues di a perde e puesto ey contra Nacional den siman 15, pero pa diferencia di gol so, dependiendo di e resultado di Nacional vs Britannia ora nan enfrenta otro eventualmente. Bubali mester gana e wega aki pa libra nan mes for di e otro tres ekiponan cu ta halando rosea duro riba nan lomba, y keda cu 29 punto den e di cuater posicion riba tabla y pa bay play-off! Ban wak kiko ta pasa, suerte na tur, ban spera cu e fanaticada yega stadion pa sostene nan ekiponan den e ultimo weganan crucial di e campeonato aki.

 

Click to comment

Leave a Reply

Your email address will not be published. Required fields are marked *

More in Futbol Aruba

Division Honor