Connect with us

Futbol Aruba

Juventud TL enfrentando Riverplate, den un wega di un solo banda

Siman 16 di Division di Honor a cuminsa cu e partido Juventud Tanki Leendert enfrentando River Plate, den un wega di un  solo banda. Juventud no tabatin niun chens den e wega aki, pa colmo nan a presenta sin suplente alguno riba banki. River tabatin mester di e wega aki despues di e shock contra di Caiquetio siman pasa, un derota fulminante cu a sorprendente hopi hende den futbol. E wega aki tabata net loke River tabatin mester pa ‘bons bek’ y acumula punto pa sigui den e lucha pa clasifica number cuater pa bay play-off. Juventud a mustra mane un ekipo cu awo si a baha man y acepta cu nan ta degradando automaticamente. Toch Juventud a presenta cu e delantero Andres Caicedo atrobe den nan line-up, Andres ta conoci pa e hazanja di a anota un ‘hat-rick’ den siman 13 contra Nacional, awe si su wega no tabatin efect.

Di cuminsamento caba River Plate a bay di biaha den atake cu hasta cinco hungado y a cuminsa aplica un pressing bastante halto, asina bon cu Juventud no por a haya e bala ni pasa midveld pa un largo tempo. Un dominio absoluto di e cuadro di Madiki, pero apesar di e dominio ey, River toch no por a concretisa den hopi ocasion. Na minuut 10 porfin e gol a drenta for di un tiro liber di Siljean Vrolijk. River ta sigui ta e ekipo dominante y ta sigui purba, despues di hopi atakenan peligroso incluyendo un palo di gol na minuut 16, River mester a warda te cu minuut 24 atrobe pa anota nan di dos gol, apesar tambe di e bentaha numerico debi na un lesion den cuadro di Juventud sin por a substitui debi na e ausencia di hungadonan di reserva. E di dos gol tabata pa medio di e goleador di River, Fladimy Francois, su di 11 gol di temporada. Un juventud hopi debilita no tabatin contesta pa e atakenan di River debi tambe na algun lesion mas riba tereno. Kenderik Paulina ta hasi e wega 3-0 na minuut 30, sigui pa un otro gol pa hasi e wega 4-0 net cuater minuut despues pa medio di Jannick Tromp. Fladimy Francois ta culmina e “blitz” di atake aki cu e di sinco gol pa River Plate na minuut 39, un 5-0 contundente. Asina tambe Francois ta empata Devis Oliveros riba e tabla di goleador cu 12 gol, tres bou Kenroy Ranger cu su 15 golnan. Asina tambe halftime a bay aden, River Plate 5 Juventud TL 0.

Den e di dos tempo cosnan a sigui mesun cos, cu River Plate atakando sin limite, cu hopi chens atrobe sin por anota. E ingreso di Shakame Stamper den wega a duna River mas yegada, e velocidad relampago di Shakame ta sigui ta un positivo grandi, net bon pa River ya cu ta Shakame mes a anota un gol na minuut 61 pa hasi e wega 6-0. Ya na e punto aki Juventud tabata bek cu 11 hungado atrobe debi na yegada di un subsituto pa reinforsa e cuadro. Despues di varios fayo cla di golnan, e di siete gol a yega toch den pia di Fladimy Francois atrobe pa su ‘hat-rick’ di e anochi, asina tambe Fladimy a pasa pa e di dos luga riba tabla di e goleador di Division di Honor cu 13 gol. Cu hopi mas atake di River Plate te culminacion di wega pero atrobe sin cristalisa e wega ta yega su final cu e marcador di 7-0 pa River Plate riba Juventud TL, e resultado mester tabata mas grandi ainda. Cu e prestacion aki River Plate ta hunta 24 punto, kedando cu speransa pa clasifica, dos so for di e cuarto puesto pa yega play-off. Juventud, cu un solo punto den e campeonato, ta keda den mas miseria cu dos fecha so mas pendiente, poco poco yegando den e final di e campeonato di Aruba. Nos ‘man of match’ ta Fladimy Francois cu su hat-rick e anochi aki, mencion special ta bay tambe pa e wega incansabel di full tereno di e defensor y capitan di River, Carlos L. Quandt.

 

Click to comment

Leave a Reply

Your email address will not be published. Required fields are marked *

More in Futbol Aruba

Division Honor