Connect with us

Division Honor

Caiquetio a duna bataya duro pero Britannia toch a sali victorioso cu anotacion di 2-0

Den siman 17, SV Caiquetio a topa cu SV Britannia den un wega sumamente importante pa e club di Piedra Plat. Caiquetio cu 8 punto ta den di nuebe luga riba tabla, ya ta destina pa bay hunga play-off di promocion- degradacion, Britannia en cambio, cu 25 punto ta den un feroz bataya pa bira e di cuater ekipo pa clasifica pa play-off conforma pa e miho cuater ekiponan di e campeonato aki. Un derota of empate pa Britannia den e wega aki lo tabata catastrofico pa nan chens pa bay play-off, en cambio un victoria lo pone nan bula Bubali pa bay mas cerca di play-off faltando poco pa e campeonato regular termina.

Pa e prome minuutnan di e wega, e dos ekiponan a hunga hopi cauteloso mes, sperando pa wak kiko e otro ta hasi prome. Britannia obviamente no kier a cai den e trampa cu Riverplate a cai den dje den siman 15 of e contra-tempo cu Dakota tabatin cu e oncena di Paradera den siman 16. Caiquetio no a hasi mucho pressing halto den wega aki, mas bien nan a pone hopi hende den medio-campo y a defende bon, a logra interumpi e fuides di hunga di Britannia den mayoria di e wega. Britannia a traha duro, mantene bala, circula bon, cu hopi posesion, cu varios yegada pero no hopi skerpi y peligroso. Caiquetio tabata bon para riba cancha, cu hopi disciplina y a defende bon, pero, no tabatin bon salida pa hunga e wega di counter, especialmente cu dos atakante so dilanti pa gran parti di e wega. Un wega bastante monotono y predicibel na hopi ocasion, Caiquetio a sabi di hunga pa un resultado pero Britannia mester a sali pa gana, no tabatin otro. Britannia a purba y a lucha, al fin nan a haya un bon chens te den minuut 40 unda cu Sebastian Montoya ta pone e marcacion 1-0 pa e ekipo geel. Caiquetio ta reacciona di biaha y a bay den atake pero envano, y asina halftime a yega.

E di dos mita a cuminsa mas balansa ya cu Caiquetio a cuminsa manda mas hende den atake atrobe, hopi biaha den counter, nos a mira un Jeferson Lopes cu mas subida den atake, pero Britannia a sabi di mantene nan mes calmo riba tereno y a haya nan ta defende, cul a bay bon. Bastante carchi geel a wordo parti den e transcurso di e wega, mayoria pa Caiquetio, un wega competitivo y duro pero sportief, futbol ta ‘afterall’ un “contact-sport”, contal cu e ta keda sin mal intencion y deportivo. E referee a mira cu tabata importante pa parti carchi y asina percura pa e wega no bay foi man. Tabatin tambe un carchi cora pa Caiquetio casi na final di wega, esey tabata husto, no tabatin protesta p’esey. Na dos of tres ocasion por a nota tambe cu referee mester a cambia decision di su linesman y por bisa hopi aserta. Britannia a traha duro pa preserva e victoria, nan no por a concretisa mas gol pa sigura e tres puntonan aki.
Ta te na final di wega, Caiquetio hungando cu dies hungado, ora cu referee mester a fluit pa final di wega caba (ya cu a pasa di e “stoppage time”), Britannia ta haya un penalti, cu a wordo bon cobra pa Montoya, nos ‘man of the match’, pa su di dos gol di wega pa sigura tres punto clave pa Britannia. Score final 2-0 pa Britannia, cu awor ta sigur den careda pa clasificacion cu 28 punto, den di cinco luga tras di RCA (tambe cu 28 punto) p’awo pa via di average di gol so, pero cu un wega menos hunga, ta nifica cu nan tin un miho carta cu RCA y Bubali pa clasifica pa play-off. Esey lo wordo dicidi den e ultimo siman di e campeonato aki.

Click to comment

Leave a Reply

Your email address will not be published. Required fields are marked *

More in Division Honor

Division Honor