Connect with us

Division Honor

RCA ta gana Riverplate 4-0 den e derbi di Playa

E expectativa pa e “derbi di Playa” den siman 17 tabata mas halto cu nunca debi na e implicacion riba e scenario di play-off. RCA y Riverplate ta den e careda pa clasifica como cuarto riba tabla di posicion hunto cu Bubali y Britannia, e diferencia entre nan ta minimo y na e momento aki den campeonato regular practicamente ta victoria so ta conta! RCA a yega e siman 17 aki cu 25 punto, Riverplate cu 24, compara cu Bubali cu 26 na di cuarto luga y Britannia cu 25 punto tambe! E derbi a cuminsa cu hopi dinamica di biaha, Riverplate ta conoci pa ta un ekipo cu por ataka, RCA ta un ekipo di forsa combina cu planteamento tactico riba tereno. Por wak cu mientras River ta tira den atake, RCA pa medio di nan medio campo ankra pa Jean Luc Bergen di biaha ta purba controla midveld hunto cu Jeamir Howell-Brokken. Una bes cu nan establece e muraya di contencion den midveld unda hopi atake ta wordo neutralisa, Bergen ta orchestra distribucion pa su volantenan di creacion mane den e caso aki Erik Santos, pa despues yega na e delanteronan mane Jean Pierre Fingal y Frederick Gomez. Tin hopi rotacion andando den e wega di e Tricolornan, bo ta mira Santos y Gomez ta baha y subi constantemente pa busca bala patras, den e wega aki por ehempel Santos a core full veld, hasta pa bay defende si ta necesario. RCA su wega a duna fruta na minuut 5 caba, un deleite pa nan ya cu normalmente nan wega ta un cu ta bay di menos pa mas den transcurso di wega (un “build up”), e gol a wordo anota pa Erik Santos, un bala for di Frederick Gomez despues di a gana un ‘pressing’ halto, 1-0 RCA. Den e hugada di gol tambe e portero di River, Gikay Croes, a sufri un mal caida y mester a bandona e wega pa lesion, den gol di River a bay hunga e veterano portero Eugene Tromp. Den e siguiente diesdos minuutnan Riverplate a tira duro den atake cu bon yegada pero RCA cu sa defende a sabi di wanta e “razzia” aki di e oncena di Playa Pabou, hasta Erik Santos na minuut 12 ta salba su ekipo bariendo un bala casi riba linea na caminda pa gol. Siguientemente ta RCA a bolbe controla e bala y nan a haya hopi yegada cla cla riba hala drechi cu bon penetracion di Gomez y Santos net su banda, RCA por a aumenta e score akinan. River cu a sigui purba tambe den un wega di banda pa banda a bolbe haya un chens ‘morto’ na minuut 28 den un escape di delatero Carlos B. Quandt su so cu portero cu a sali di biaha unda Carlos por a ‘loft’ e bala riba su cabes, pero ya, gran salida di Raizel Jansen. RCA cu mas control y salida awo na minuut 38 ta haya un tiro liber net pafo di area penal y Jean Luc Bergen ta anota den un manera sensacional cu un tiro den skina na halto pa hasi e wega 2-0 pa RCA. River ta contesta y ta bay den atake tambe pero nan a faya di ‘sera e deal’ den e wega aki, pa nan desapunte ta RCA mes a anota atrobe na minuut 45+3 pa medio di Fredrick Gomez despues di un pifia grandi di e portero di River hasiendo e wega 3-0. Un anotacion cu na e punto ey tabata hopi duro pa River paso e anotacion ey no a refleha cu River a bataya hopi duro y nan tabatin chens nan mes tambe, asina halftime a bay aden.

E segundo tempo RCA a sigui cu nan wega di dominio y forsa pero awo nan por a warda atras y hasi contra-golpi ora e oportunidad yega. River a purba cu algun cambio den atake, e veloz hoben Shakame Stamper a drenta pero no tabata efectivo den e wega aki, mientras cu nan goleador Fladimy Francois tabata keto bay riba banki di suplente. Yegada River tabatin, concreta gol tabata nan debilidad den e wega aki. RCA tambe a baha nan intensidad di wega, a cuminsa hunga mas conservativo, claro cu e bentaha di 3-0 ta logico, nan a hasta saka algun hungado clave pa nan proteccion pa e ultimo wega cu ta sumamente importante cu lo ta bay ta contra di Dakota. Riverplate alfin a trece Fladimy Francois den wega na minuut 67, kizas un poco laat? Cu tur esey ta RCA mes a logra penetra pa via di Digion Ras y su pase skerpi pa Frederick Gomez riba hala robes pa e anota su di dos gol di e wega pa e bentaha di 4-0 pa RCA. Despues Gomez ta haya ainda mas chens pa score pero sin resultado, kiermeen RCA por a hasta amplia e anotacion. River perdiendo asina grandi mes a sigui purba, un ekipo cu a bay abou bringando, sin duda, pero na pitazo final e anotacion tabata 4-0 pa RCA, ganado di e ‘derbi di Playa’, en cambio Riverplate un ekipo cu a entretene nos cu bunita futbol t’awor oficialmente elimina for di play-off, jammer, pero esey ta futbol. Nos ‘man of the match’ pa e wega aki ta Erik Santos. RCA awo tin 28 punto, mesun cos cu Britannia (despues cu nan tambe a gana nan wega di siman 17), pero pa diferencia di gol ta temporariamente den di cuarto luga riba tabla, pero tene cuenta cu Britannia tin un weg menos hunga tambe. E ultimo siman nan di campeonato ta bay ta “al rojo vivo” manera ta bisa, keda pendiente.

Click to comment

Leave a Reply

Your email address will not be published. Required fields are marked *

More in Division Honor

Division Honor