Connect with us

Division Damas

Britannia Damas ta bons bek den e di dos tempo pa vence Sv Arsenal Aruba 3 – 2

E campeonato di futbol femenino di Arubaanse Voetbal Bond – AVB a continua diahuebs anochi den stadion Guillermo Prospero Trinidad ora cu e lidernan di e campeonato cu ta Britannia a topa cu e ekipo cu ta bringando pa su clasificacion esta Arsenal.

Un wega sigur interesante mirando cu Britannia tabata falta varios hungador clave mientras entrenador Jeanpierre Fingal a opta pa purba diferente hungador riba un otro posicion cu nan ta custuma hunga. Mester bisa cu Britannia a cuminsa e wega bon poniendo hopi presion riba Arsenal pero asina mes a defensa di Arsenal tabata bon planta y no tabata duna mucho espacio pa e hungadornan di Britannia por hasi nan hugada serca di gol. Di otro banda Arsenal tabata purba sali lihe cu a bala buscando nan delanteronan lihe. Na dos ocasion riba dos counter hopi bon ehecuta e delantero Andrienne Monica Morillo ta sorprende e portero Mirianne Gomez di Britannia anotando den ambos ocasion pa e 2 – 0. Di otro banda Britannia a sigui hunga su wega y net prome cu e final di e prome tempo e delantero Tarianna Doornkamp ta los un tiro duro cu portero di Arsenal Morillo Natalie no por a para y asina corta e ventaha na 2 – 1.

Den e di dos tempo cosnan a bolter completo unda Britannia a cuminsa na hunga mas sigur y a crea varios oportunidadnan di gol. Asina mes nan ta probecha na dos ocasion unda e hungadornan Jurraine Maduro y Jean-Nira Croes ta anota pa asina e wega bira 3 – 2 na fabor di Britannia. E trio arbitral pa e anochi aki tabata Elton Ignacio Peer Bastiaans y Simon Dorothal

Asina tambe Britannia y Arsenal a hunga nan di ultimo partido e campeonato aki. E lady puma nan di Piedra Plat a termina na di prome lugar y lo bay prepara nan mes pa e playoff mientras pa e ekipo di Angochi, Arsenal no lo logra yega playoff e anja aki. Temporada pasa Arsenal a termina e campeonato den e prome cuater ekiponan.

Click to comment

Leave a Reply

Your email address will not be published. Required fields are marked *

More in Division Damas