Connect with us

Division Honor

Britannia ta gana Nacional 2-1 den un wega dynamico y ta serka di clasifica pa play-off

Den un wega “frenetico” di banda pa banda Deportivo Nacional a clash cu Britannia, partido sumamente importante pa Britannia cu no por perde ningun punto den nan ultimo dos weganan di e campeonato aki, ta victoria so ta deseabel pa e oncena di Piedra Plat, pa nan tin chens pa bay play-off. Nacional ta matematicamente clasifica caba pa play-off ya cu nan no por cai pafor di e prome cuater miho ekiponan riba tabla di clasificacion di Division Honor. Britannia ta den un duro bataya cu RCA y Bubali pa e di cuarto luga riba tabla, e diferencia entre e tres ekiponan aki ta di 1 y 2 punto so.

Britannia di biaha a sali bay den atake den gran iniciativa, t’esey tabata nan pensamento tambe den e transcurso di e wega, y ta crea basta chens tempran caba, pero Nacional siendo Nacional ta para duro y ta responde di biaha cu nan mesun atake y wega fisico, buscando control di e partido. Al fin al cabo ta e presion di Britannia a cobra dividendo pa medio di e gol tempran di Reinier Paraez di cabes na minuut 9 caba. E gol tempran ey a yuda Britannia sinta bon den nan strategia di wega ya cu esey a forsa Nacional pa sali busca gol hasiendo pressing halto, cual tin su risico nan. Britannia su wega di toke y velocidad a match bon cu e strategia di Nacional, nan a logra pasa rond di e pressing ey, causando problema pa Nacional su defensa constantemente.

Den e wega aki Nacional toch no tabata e Nacional cu nos conoce, e Nacional asina dominante den e ultimo lunanan, e miho ekipo den e di dos parti di e campeonato te cu awo, campeon nan di anja pasa “afterall”.  E viaje pa e “Caribbean Club Shield” na Republica Dominicana tabata un reto grandi, cinco wega den ocho dia tabata brutal, hungando cu algun di e miho ekiponan den ‘regio’. Nacional a duna bon prestacion, p’awo bin hunga tres wega den un siman despues di poco descanso, ta duro, hasta pa un ekipo mane Nacional. Nos a nota tambe cu den e wega aki tabatin falta di Kenroy Ranger den delantero y Deffery Banton den defensa, dos hungado clave. E wega di pressing halto ta rekeri hopi energia, por a realisa cu Devin Oliveros tabata traha (ainda) hopi mas duro cu normal, pero e no ta superman, mesun cos cu Valdo Leocadio den volante, y e defensa cu tabatin man yen cu Britannia, den un scenario normal, mayoria atake ta wordo corta na mid-veld caba. Nacional mes lo no usa esey como excusa pero na nos vista nan tabata parce hopi cansa, fisicamente y mentalmente.

Britannia a sigui ta responde bon na e strategia di Nacional, y a duna nan hopi dolor di cabes. E ekipo nortero cu usualmente ta duro mentalmente tambe a mustra momentonan di frustracion, a haya carchi sin mester, coach despues wordo manda pa tribune, en fin, e disciplina a falta un poco den e wega aki, cansancio sa causa esey. Despues cu wega bira duro cu hugadanan un poco bruto dunando e referee hopi trabou, toch a logra mantene calmo pero semper cu tension, un partido ‘volatile’ cu hopi energia entre dos ekipo grandi, kizas un poco mas dunamento di carchi por a yuda un tiki mas den e wega hopi dificil y agresivo aki cu den algun momento por a explota negativamente. E wega tabata un toma y dame pero no cu mucho precision den mayoria di caso den e prome tempo. Na minuut 21 na un momento cu bala tabata bons den area penal di Britannia, Devis Oliveros a mira un chens y a sprint bay te gol despues di un interception na rand di ‘doelgebied’, y a fusila e portero di Britannia pa empata e wega 1-1. E wega ta sigui di banda pa banda, duro na algun momento cu hopi infraccion pero un wega dynamico toch.

Britannia a logra haya un penalty na minuut 30, pero pa suerte di Nacional, Luis Estrada a slip ora di tira y e bala a bay halto riba gol.

Despues di un gol anula di Britannia pa off-side, un poco dudoso, treciendo protesta, wega ta sigui cu un tempo enorme, desgaste fisico di ambos banda cu hopi yegada mes, hopi fayonan incomprendibel tambe, manera esun di Oliveros na minuut 43, chens grandi perdi, asina halftime a bay aden 1-1.

E di dos mita a sigui cu e mesun ‘tempo’ di wega, cu hopi intensidad, wega fisico y duro. Nacional en busca di e gol pa bay ariba, kizas un poco impaciente, ya cu ta Britannia tabata tin mester di e victoria y lo a tuma iniciativa con que sea toch. Nacional por a warda Britannia hasi nan move pa contra ataka kizas? Contrario na pensamento, Nacional den atake apesar di nan desgaste fisico, ta perde e bala den un di nan salida for di atras, un pifia di defensa, y asina permiti Britannia un ‘break’ relampago na minuut 49 cu ta caba den un gol di Sebastian Montoya pa hasi e wega 2-1 pa Britannia. Oliveros di Nacional, a core hopi den e wega aki, y a purba hopi cos den atake, a bolbe haya un chens grandi na minuut 61, kizas un Kenroy Ranger lo por a yude mas den delantero. Asina e wega ta sigui di banda pa banda, mi ta pensa ta di unda, vooral Nacional, ta haya e energia aki, pasobra ta riba forsa di boluntad so nan a sigui duna bataya na un Britannia dicidi pa gana y keda den careda pa clasifica. Nacional ta haya mas chens pero no ta logra concreta, Britannia tambe, pero nan tabata hungando for di un posicion di bentaha siendo ariba 2-1. Cu man na heup pa basta hungado di Nacional despues di a bringa todo por todo, ta Britannia a hera hasi e wega 3-1 na minuut den un contra atake ‘fast break’.

Na final e wega a caba 2-1 pa Britannia, un victoria grandi, mereci pa nan strategia cu a funcciona contra un ekipaso mane Nacional. ‘Man of the Match’ ta Sebastian Montoya. Britannia awo cu 31 punto a bula RCA y Bubali pa bay den di cuarto luga, pero, Bubali cu tin 26 punto tin un wega menos hunga, esey lo bay ta contra e mesun Nacional aki y lo tuma luga Diaranson awo dia 2 di Mei na CDFF na Noord, e ‘Derbi Nortero’ por dicidi hopi cos. Un victoria pa Bubali lo pone nan cu 29 punta, dos so tras di Britannia bayendo den e wega final entre nan dos, Diasabra 5 di Mei pa dicidi ken ta bay play-off. Un derota of empate pa Bubali contra Nacional lo nifica cu nan lo no “make” e play-off mas. Nacional a keda cu 32 punto den di tres luga riba tabla, cu dos wega pa hunga ainda no por cai mas abou cu cuarto luga mas, nan clasificacion ta sigur, pero, nan lo kier clasifica pa play-off di ‘chiripa’? Keda pendiente!

 

Click to comment

Leave a Reply

Your email address will not be published. Required fields are marked *

More in Division Honor

Division Honor