Connect with us

Futbol Aruba

Antesala di play-off Britannia vs Estrella

Britannia lo enfrenta Estrella den e partido inicial di play-off AVB Division Honor 2017- 2018. Un wega sigur yena cu anticipacion despues di un campeonato regular cu no tabata hasi falta ‘paridad y sorpresa’. Na hopi oportunidad tabata dificil pa predeci ken lo gana entre e top seis ekiponan riba tabla di clasificacion. Entre e top seis ekiponan aki ta tur por gana e otro riba un dado dia, pero awo ta play-off, ta un otro nivel di wega atrobe, ya cu e ekiponan conoce otro mas miho, esey combina cu un nivel y presion mas halto cu campeonato regular, lo bay ta hopi interesante, awo si cos a bira serio. Britannia a clasifica pa play-off debi na e gran victoria riba e campeon di Aruba Nacional den e penultimo siman di e campeonato regular, e wega ey hunto cu e victoria riba e lider di e campeonato actual, Dakota, den siman 5, tabata e “highlight” nan di e campanja aki pa e Pumanan. Un anja unda nan tabata hopi competitivo, vooral ora ta toka pa nan hunga cu e ekiponan grandi den top, un indicacion di kiko Britannia lo por hasi den play-off? Britannia riba papel ta ‘rank’ como number cuater entre e cuater miho ekiponan di Aruba su top futbol bayendo den play-off, cu un saldo di gol di +11, un poco abou compara cu e otro tres ekiponan, door di e suma di golnan anota di 36 versus un total di gol permiti di 25 (un so mas cu Nacional realmente), Britannia por tin posesion di bala, y nan por rota, kizas ta cu just nan por tira mas riba e porteria contrario p’asina incrementa nan chensnan di anota. Britannia lo tin e label di ‘underdog’ den play-off no tin duda, pero, esey por hunga den nan man. Ta importante pa Britannia mantene disciplina cu fe den nan sistema, cu ta rekeri pasenshi, p’asina hunga nan wega di posesion, toke, pase di bala, teniendo e bala for di nan rival, na un manera di bisa, sconde e bala, pero nan mester por anota tambe. Britannia por anota, esey no tin duda, pero mester di mas gol, mas hungado cu lo por yuda Sebastian Montoya y Luis Estrada (cu entre nan dos tin mita di tur e golnan di Britannia) den e departamento ey, vooral tambe considerando cu Estrada, importante tambe den volante di e Pumanan, pero, e ta necesario tambe pa anota gol pa su ekipo den e rol di volante ofensivo, mester por cubri p’e den medio-campo den e caso ey. Britannia mester prueba cu nan ta mas cu just Montoya y Estrada den e play-off aki, nan dependencia riba nan dos ta grandi, futbol ta un wega di ekipo di diesun hungado riba cancha, si solamente nan por explora e opcion ey, nan lo por sorprende!

Estrella mane nos a yega di bisa tabata consistente henter e campeonato aki, esey tambe a yudanan consagra como campeon di “Copa Betico”, e ekipo tambe ta bon balansa for di e posicion di portero te cu e delantero nan. E ekipo aki tambe ta uno di un bon “spirit”, nan ta hunga cu hopi motivacion, nan defensor central y capitan Francois “Pancho” Croes ta e ehempel di esey, e inspiracion pa cu e resto di e ekipo. Estrella su ‘doel saldo’ e anja aki ta un di e mihonan, mas balansa esey ta sigur, nan a anota 44 gol (di dos miho) y a permiti solamente 20 gol (di dos miho tambe) pa un +24, impresionante. Estrella ta un ekipo cu ta bon establece riba cancha, nan ta traha for di patras pa dilanti cu control di bala y bon pasenan. Nan linea di defensa no ta move hopi, ocasionalmente Pancho sa bay den atake y efectivo, lagando David Dubero den e rol di lider di defensa, mayoria biaha nan ta defende den zona, nan ta keda bon para riba nan linea, na un manera di bisa Estrella ta conservativo, nan ta hunga un wega solido, disciplina cu poco risico innecesario. Phaedrick Baromeo ta bay ta clave den medio campo pa distribucion di bala pa Hugo Robert y e otro delanteronan, pero tambe pa subi y busca gol su mes, mas ainda cu e ausencia di Norvianel Naar, e di dos goleador di e Naranjadanan despues di Robert, apesar cu toch Naar tabata tambe un riesgo den e departamento di disciplina cu algun biaha por a desbalansa e “team-spirit” di e club di Papilon. Parce cu toch awor e refuerso di Jeanpierre van der Linden a bira un realidad pa Estrella, un bon noticia pa nan sin duda pa nan wega ofensivo, cu e noticia aki nos por bisa cu Estrella por wel di ta un gran favorito pa bay final, pero, ban wak prome kiko nan ta bai hasi contra Britannia den e wega inaugural aki.

 

Click to comment

Leave a Reply

Your email address will not be published. Required fields are marked *

More in Futbol Aruba

Division Honor