Dakota a domina y a gana Bubali na un manera convencente cu anotacion di 3-0

E campeonan di e temporada pasa, SV Dakota a cuminsa e campeonato actual cu un empate forsoso contra e subcampeonan Deportivo Nacional den e prome fecha e siman ultimo.
Esey tabata di spera entre dos ekipo cu semper a bataya otro duro. E siman aki a toca turno na SC Bubali, cu a bin di un derota fulminante contra Britannia, Dakota tabata faborito grandi pa gana e wega aki sin duda.

Dakota a cuminsa e wega den ful dominio di bala, cancha y tur lo demas. E ekipo nortero a pone hopi hungado atras den defensa, un schema defensivo hungando di contra-golpi. Bubali no a logra formula niun atake serio pa e prome 20 minuutnan di wega, por hasta bisa cu e wega tabata mas bien wordo hunga riba nan banda di tereno. Dakota a ataka, penetra y los hopi tiro, algun a a wordo salba pa portero Dolfi Benita, cu tabatin un wega hopi bezig. E duo di Keano Maduro y Albert Francis a duna e defensa berde hopi dolor di cabes. E prome gol di wega a cai na minuut 13 caba cu un cabesaso di Francis mes for di un tiro di skina.

Despues di e gol inicial Dakota a acelera un poco mas ainda, y por a anota hopi gol mas. Ta te na minuut 25 Bubali a penetra un poco den area-penal di Dakota y a forsa un tiro di skina pero sin por a concretisa, despues a sigui algun yegada mas pero sin gran peligro. Aunque e wega a sigui 1-0 so pa Dakota, e mester tabata hopi mas. Ta promer cu halftime Dakota a baha nan intensidad un poco pero semper a keda ta domina toch. Na minuut 41 Francis (Killer) di Dakota a anota un bunita gol di chalaka pero a wordo anula pa un off-side, Fernando de Sousa tambe por a amplia e score na minuut 45 si e a logra domina e bala, kedando su so na banda drechi den area-penal di Bubali, pero envano. Asina halftime a bai aden Dakota 1 Bubali 0.

Den e di dos tempo Dakota a sigui cu mesun intensidad, atakando na gusto, hasta cu bon tironan, algun salba pa portero Benita di Bubali. E ‘orguyonan di Nort’ a hasi varios cambio na tres cuarto di wega pa purba mehora nan wega anemico. Algun bon yegada di entre otro Edmar Tromp riba hala drechi a duna Bubali speransa, pero, ta net na e momentonan ey Dakota a amplia bentaha anotando nan di dos gol den pia di Jesus Villamizar for di un pase di Albert Francis y un pifia den salida di e portero di Bubali na minuut 63, Dakota ganando awo 2-0.

For di minuut 66 Bubali a haya un “revival” y a cuminsa penetra mas den area-penal di Dakota, pero atrobe Dakota cu un yegada rapido den area penal di Bubali a haya un penalti, cu a wordo cobra pa Daniel Briceno na minuut 70 pa hasi e wega 3-0 pa e Abehanan. Ta den e ultimo cinco minuut di wega Bubali ta haya dos chens marginal pa anota gol pero no ta concretisa, Dakota tambe a haya mas chens pa amplia e score pero t’asina mes ela keda, dus, 3-0 pa Dakota. Asina e wega a termina den un ambiente tenso y duro den e ultimo 10 minuutnan. Nos ‘Man Of the Match’ ta Albert Francis pa su trabou incansabel, asistencianan y gol. Dakota awo ta provisionalmente lider di e tabla di campeonato cu 4 punto door di mihor “doelsaldo” cu Brazil Jrs. Bubali ta keda sin punto y sin gol te cu awor den e campeonato actual.