Britannia cu victoria contundente di 6-1 riba Caiquetio den e ‘Derbi Paradera-Piedra Plat’

E derbi di e bisinjanan di Paradera y Piedra Plat no a yega na concretisa den un wega apto pa un derbi. E rivalidad t’ey pero riba cancha e bataya tabata di un banda so. Por bisa cu e wega aki a cuminsa, en general, sin fervor y cu poco dedicasion. Britannia no a yuda na e causa aki tampoco ya cu ni 4 minuut drechi nan ta anota pa tuma bentaha y pone e wega aki mane riba un ijs, por lo menos pa e prome mita di wega. Un bentaha tempran di Britannia ta net loke Caiquetio no tabatin mester, pero, e gol a drenta debi na basilacion y slordigheid den e defensa Indjan, Francis van der Linden ta anota pa Britannia p’e 1-0.

E wega ta sigui pa gran parti di e prome mita den un forma hopi ‘manso’ y nada atractivo di ambos banda, Britannia, hungando nan di tres wega den seis dia, algo insolito, tabatin mas yegada y varios chens pa anota, dunando portero Henriquez di Caiquetio hopi trabou, pero nan no tabata por a anota mas. E “fatique” sea mental of fisico di Britannia tabata presente, esaki no tabata e Britannia cu a derota Nacional den e mesun siman aki.

Den e di dos mita ta Britannia a lanta cabes atrobe pa duna animo na e wega aki cu tabata mas bien anemico. E golnan di Britannia a cuminsa cai mane e awacero cu ta andando riba nos isla den e temponan aki. Na minuut 53 pa medio di Derwin Donato di cabes pa amplia e marcacion na 2-0. Despues a bin e di tres gol net dos minuut despues di e capitan Jonathan Ruiz unda cu el a penetra riba hala drechi, laga algun defensor Indjan atras mane ta wega di mucha y hasta e portero Henriquez pa cana drenta cu e bala den gol, 3-0 y “ainda tabata falta”.

Na minuut 60 ta Daniel Linscheer ta los un tiro di distancia pa banja e portero pa hasi e wega 4-0. Luis “Coco” Estrada tambe ta anota su gol na minuut 69 despues cu el a penetra riba e flank drechi pa encontra un Henriquez cu tabata saliendo pa chip e bala riba e portero pa anota un bunita gol sin duda pa hasi e wega 5-0. Britannia no tabata cla ainda; na minuut 70 ta Daniel Linscheer ta penetra atrobe, facilmente, y ta los un tiro pa anota e 6-0.

Caiquetio for di e punto aki tabata hunga solamente pa wanta e wega 0-6 of pa haya e gol di honor, nan a sali en busca, cu e wega ya den saco di Britannia y ta logra e gol anhela na minuut 86 den un yegada na rand di area penal di Jefferson Lopes unda e ta los un tremendo tiro di distancia pa hasi e wega 6-1.

Asina mes e wega a caba mei mei di un diluvio di gol y awacero di berdad tambe, referee Dirks no mester a anjadi niun tempo extra pa motibo di e resultado y tambe e torencial awacero cu tabata cayendo riba stadion. Nos ‘man of the match’ ta Daniel Linscheer di SV Britannia cu ta keda cu 15 punto den di dos luga riba tabla despues di Dakota pero cu un wega mas hunga. Caiquetio ta keda cu 5 punto den di octavo lugar den e clasificacion.