Connect with us

Division Uno

Jong Aruba ta topa Real Koyari den wega crucial

Real Koyari contra Jong Aruba ta topa den un wega crucial y cu tin sabor di un Classico. Aunque no mesun glamoroso manera un Dakota vs RCA of mesun intenso manera un Bubali vs Nacional, e wega entre Real Koyari y Jong Aruba ta priminti candela. Jong Aruba mihor conocí cómo e diablo rojo nan di noord den su bon tempo nan a dicidi e anja aki di bin cu un uniform roos, algo cu no a caí mucho bon den su fanatico nan fiel. Mester bisa si cu e uniform nobo a bin cu basta fortuna pa e team di Sero Janchi ya cu Jong Aruba a cuminsa e campeonato comandando e tabla di posicion, pero a bin ta perdiendo terreno durante e luna di November. E diablo rojo nan tin solamente 4 punto di nan ultimo 4 wega nan y nan ultimo victoria tawata riba 3 November caminda nan ta dal sporting 3-2. E Bon noticia pa e mucha nan di Ibi Albertus ta cu Jong Aruba ta yega e derby na di 6 lugar cu 11 punto y un victoria por catapulta nan bek den e promer lugar nan. Otro punto interesante pa e team di Jong Aruba ta cu nan ta e team mas goleador di Division Uno cu 21 gol y nan dos maximo artillero nan Gregory Gomez cu 10 gol y Jasóry Giel cu 5 gol ta den e top 4 goleador di División uno. Den nan dos nan tin mas gol anota cu full e team di Real Koyari.


Di otro banda mester bisa cu Víbora nan di Real Koyari ta mantene nan tradicional Manchester United look den nan uniform posiblemente tratado di confundí y/ of intimida otro team nan, algo no a ser logra den nan partido nan inicial, pero e team dirigí pa Rafi Rodriguez ta biniendo di 3 victoria den nan ultimo 4 wega nan. E viboranan tin 10 punto y ta ocupando e di 8 lugar y cu un victoria riba nan eterno rival nan por bai para te na di 4 lugar. Real Koyari no tin un goleador di referencia pero di un manera of otro ta sacando nan resultado nan. Históricamente no ta importa con un team ta yega na un Classico. Esaki ta un wega cu ta wordu junga cu un sabor di un final y Aki nada ta wordu regala. Mamamento di gay ta na ordu di dia y loke e wega Aki Por carece di nivel y creatividad  e lo gana bek di e intensidad, agresividad y gana di salí victorioso. Fanaticada di ambos team ta ser invita pa ta na Stadion frans Figaroa dia 7 December. Bala ta cuminsa lora pa 8 or di anochi. Sinterklas ta Bin den December. Awor ta di wak ta pa ken e ta trece regalo !!!

Click to comment

Leave a Reply

Your email address will not be published.

More in Division Uno