Brazil Juniors ta sigui impresiona ganando e number tres riba tabla Britannia cu score di 2-0

SV Brazil Juniors ta sin duda e revelacion di e campeonato actual di Division Honor, un ekipo cu e anja aki a ascende pa e division mas halto, ta batayando ‘igual igual’ cu e miho ekiponan di Division Honor. Den siman 8 a toca nan hunga contra SV Britannia, un ekipo den top 3, un ekipo cu tabata lidera e campeonato hopi recien.

E wega a cuminsa cu Brazil Juniors lansando den atake di biaha, probechando di nan velocidad. Britannia ta sabi di contesta bek tambe y di pronto nos tin un ‘wega di banda pa banda’, prometiendo di bira un partido candente manera a spera. Pa banda di e prome quarto di wega ta Brazil tabata cu mas dominio di bala y tereno, den e bataya tempranero di ofensiva, nan wega a sabi di pusha Britannia bek atras sin cu nan por tabatin bon salida.

Den un momento unda Britannia a purba tira dilanti, buscando pa haya bentaha nan a sabi tambe di permiti Brazil intercepta e bala y lansa den contra-golpi unda e relampago capitan Brazilenjo, Owen Van Der Wijne a sabi di penetra profundo den area di e Pumanan y hasi un pase perfecto pa Nathan Lacle cu no a basila y ta pone e bala den net pa e 1-0 pa Brazil Juniors.

Britannia, conoci pa ta un ekipo cu bon ofensiva a contesta adecuadamente, pero Brazil a demostra di tin un hopi bon defensa tambe y a sabi di neutralisa e atakenan Britanico, si en caso Britannia penetra den profundo mes ainda nan mester a “deal” cu e bon wega den porteria di Marvin Irausquin cu tabata en busca di su di cinco “clean-sheet” den e campeonato aki. Britannia a haya hopi falta tambe di Luis “Coco” Estrada den nan medio-campo, e motor y creador di e Pumanan no tabata presente den e wega aki. E wega ta bai den halftime cu e marcador di 1-0 pa Brazil Juniors.

Den e di dos mita Brazil ta sigui cu nan wega ofensiva y ta sigui domina na un manera “agobiante”, ta mane nan a mara Britannia patras sin duna nan salida. Trei atake y mas atake Brazil a cuminsa domina atrobe cu bala y cancha. Den un momento di frustracion Derwin Donato di Britania ta haya expulsion debi na su di dos carchi geel den e wega. Hungando cu dies homber cosnan a bira mas complica pa e oncena di Piedra Plat, sin duda.

Cu e dominio aki Brazil a haya hopi mas yegada di hopi peliger, Kenroy Ranger den combinacion cu Owen Van Der Wijne a cuminsa crea hopi dolor di cabes pa e Pumanan, Carlos Geerman, portero di Britannia tabatin su mannan yen den di dos tempo di wega.

Kenroy Ranger, un goleador di rasa, por a pone e wega 2-0 den varios ocasion, pero malasuerte tabata perhudicando e gran puntero di Brazil Juniors. Alfin na minuut 87, ta Ranger mes ta penetra y ta wordo tumba den area penal pa un penalty laat den wega pa e “Uptown Boys” nan. Ranger mes ta efectua e tiro for di punto di penalty y ta anota e gol di seguridad, e 2-0 tan mereci pa e ekipo y tambe pa Kenroy Ranger mes, cu a traha intensamente pa e gol hopi valioso aki. Britannia no tabatin contesta mas y asina mes e partido ta finalisa pa e victoria di 2-0 di Brazil Juniors, un resultado husto y convincente p’asina Brazil, awo cu 14 punto, subi bai den top cuater riba e tabla di campeonato di Division Honor. Britannia ta keda cu 15 punto, un punto so mas cu Brazil Juniors, den di tres luga. Nos ‘Man Of the Match’ ta Kenroy Ranger, pa su gran desempenjo fisico y e gol di siguransa pa su ekipo bai cu e victoria aki.