Den un wega cu tabata pinta riba papel cu Nacional lo gana na un manera facil, debi na e momento dificil cu e Naranhadanan ta pasando aden den e prome mita di e campeonato aki, Estrella ta bin ta pasando den hopi dificultad cu lesionnan di hungadonan clave, incluso e lesion serio di nan puntero Hugo Robert den e wega anterior, ademas cu ainda Phaedrick Baromeo y David Dubero ta incapacita for di campeonato pasa, Estrella ta hunga e wega aki tambe sin su capitan Pancho Croes.
Pero, e realidad ta cu e bala ta rondo y cualkier por pasa den e deporte aki riba cualkier dia. E wega tabatin momentonan interesante, claro, ta dos ekipo grandi, pero, Nacional tabatin mas dominio di bala y tereno, asina mes e resultado tabata mas sera cu a spera.
E partido ta cuminsa cu un Nacional di biaha den atake “agobiante” unda Estrella no tabatin salida. Den mei mei di dominio teritorial e Norteronan ta haya un tiro liber na minuut 6 caba y den e rebote cu ta sigui, Edward Clarissa ta anota e prome gol di wega, Naciona 1 Estrella 0.
Ta te banda di e prome mei ora di wega ta unda Estrella a cuminsa haya mas yegada, pero esey tambe a permiti Nacional counter y yega den area di peliger di Estrella y e wega tabata mas bien un di banda pa banda den e ultimo cuarto di ora te cu halftime.
Den e di dos mita Estrella a sali cu mas vigor, cu mas intencion pa empata e wega, Nacional cambiando di strategia a hunga mas den contra-golpi na un manera hopi eficaz y ta haya mas hugada di peliger cu Estrella mes, vooral den pia di Devis Oliveros cu ta ‘mortal’ ora cu e haya su mes “one on one” serca di e area penal contrario, ademas di ta “zig zag” e cancha buscando e bala constantemente. E atakenan di Estrella no tabata sostenibel, y situacion di peliger tabata poco.
Te cu minuut 65 ainda Estrella tabata ‘cococha’ pa drenta den area penal contrario y causa situacion cla di gol. Pa colmo ta Nacional ta anota e siguiente gol pa hasi e weg 2-0 na minuut 78, unda Deffery Banton ta lansa den atake riba hala drechi penetra te bandi area penal di Estrella pa hasi un pase perfecto na unda Sjon Pieters ta haya e bala den area chica pa anota e gol di volley, bunita gol por cierto, Nacional ariba 2-0.
Na minuut 85 porfin tabatin un ‘break’ pa Estrella, unda e talentoso hoben Trevor Faro a “schijn” tres hungado Dragon pa despues hasi un pase mane ta riba teblachi pa su companjero Anuar Kock cu ta anota e gol di descuento pa e oncena di Santa Cruz, Nacional 2 – Estrella 1.
Wega diripiente a bira tenso, ya cu ta 5 minuut so tabata falta y Estrella a tira duro dilanti, e momentum tabata di nan den e 5 minuut nan cu a pasa, unda nan tabata full e wega? Pero toch e empate tabata serca! Te ora cu Ichair Kock ta perde cabes den un momento di locura y ta haya carchi cora na minuut 86, net ora cu su ekipo tabata buscando e empate, lastima. Estrella asina mes a lansa den ofensiva paso un tabatin nada di perde mas, e wega a bira un ‘toma y dame’, pero ta den esey, den un momento, Nacional ta hasi contra-golpi y ta haya un penalty debi na falta riba Devis Oliveros cu tabata den anota un gol den area penal. Oliveros ta tuma e penalty pero Jesus Fria ta para e tiro, dunando Estrella un bida nobo pa busca e empate, y nan a lansa ‘todo por todo” dilanti, pero holoshi tabata contra nan y wega a caba 2-1 pa Nacional denter di situacionan polemico y anti-deportivo unda carchinan a cai hasta despues cu e partido a termina!
Nacional na e momentonan ey a pasa pa comanda e tabla di clasificacion den forma provisional cu 19 punto, Estrella a keda cu 12 punto den di seis luga di Division Honor. Nos “Man Of the Match” ta Devis Oliveros di Nacional.
