Estrella a empata cu Bubali den partido crucial y dramatico, e batayanan pa play-off ta sigui

E bataya pa e di cuarto posicion riba tabla di Division Honor entre Estrella y Bubali a alcansa su climax e weekend cu a pasa. Den un partido yen di drama e dos ekiponan a keda empata, Estrella abou 0-2 a logra remonta e resultado y na final a parti punto cu e Orgullonan di Noord, e wega a keda 2-2. Pero cu e empate aki tambe nada ta scirbi ainda, paso tur dos tin chens pa gana e puesto ey faltando dos wega mas pa bai den e campeonato. Debi na e resultado aki, Britannia tambe a keda cu bida y tin un chens chikito ainda pa clasifica pa play-off, “believe it or not”!

E partido mes a cuminsa hopi nivela den e prome minuutnan, un partido cu hopi energia, desempenjo y lucha, pero ta Bubali a sabi di lansa den atake (of contra-atake) na minuut 18, unda e lateral, Mark Jacobs, a scapa riba hala robes, transportando e bala te na rand di area penal y a wak un oportunidad pa hast penetra y lansa un tiro fulminante pa anota e prome gol di e wega , sorprendiendo un Estrella cu tabata tratando di hunga un wega di control di bala. Bubali a sigui pone hopi presion riba e Naranjadanan di Santa Cruz, primiendo e salida di Estrella, forsando hopi “turnovers” y tirando den atake na un manera relampago.

Halftime a bay aden 1-0 pa Bubali, pero, net den e prome minuut di e di dos tempo den un atake di sorpresa ta e capitan di e Norteronan, Maurice Escalona, ta pone e bala den net pa hasi e wega 2-0 na minuut 46. Estrella tabata parce mas bien un ekipo bon golpea y tambaleando, y ta Bubali tabata hasta mas serca di un di tres gol, considerando tambe cu e lider emocional di Estrella, Pancho Croes, no tabata presente den e wega, un desafio grandi pa e ekipo oranjo.

Hopi biaha ta bisa cu 2-0 ta un bentaha hopi peligroso, y asina mes tabata e sitacion den e wega aki. E oncena Santacrucero a cuminsa bataya bek, un tiki cada bes, ganado un bataya chikito aki y aya. Na minuut 53, Joel Geerman ta habri e marcacion pa su ekipo pa e 1-2. Estrella cu awor a gana “momentum” a logra horta e bala y cancha for di Bubali.

Na minuut 64 ta e talentoso hoben, Trevor Faro, den un bunita hugada di contra-golpi di Anuar Kock na banda drechi, a logra hasi un cruce di bala den area penal pa Faro cu tabata drentando e zona cayente na “full speed”, pa encontra e bala y fusila e portero Bernardo Maduro, cu tabata mustra inbatibel den porteria den e prome mita di wega, djies asin e wega a bira 2-2.

Cu hopi drama te na e ultimo seconde y chens pa ambos oncena, e partido toch a caba empata. Un bon chens pa Bubali a bai perdi, e tabata mas bien un miho resultado pa Estrella cu a keda cu 27 punto, manteniendo e di cuarto posicion riba tabla, keto bai cu dos punto mas cu Bubali, cu dos wega so mas pa hunga.

Nacional vs River Plate

Den e prome partido di e fecha, Nacional a gana River Plate 3-2 den otro partido yen di drama. River a mantene un bentaha di 2-1 te na minuut 85 cu golnan di Mario Da Silva na minuut 52 y Peterson Guerrier na minuut 68, e gol di Nacional te na e momento ey a wordo anota pa nan capitan Claudeone Cavalcante na minuut 48. Cu e bentaha ey, River Plate tabata riba caminda pa tres punto pa empata den puntuacion cu Caiquetio den nan bataya pa evita degradacion for di Division Honor, y sigui bataya te final pa scapa di esey.

Pero, desafortunadamente y sorprendentemente pa River Plate, e astro di e Dragonnan, Devis Oliveros, tabatin otro intencion, y a anota dos gol den e ultimo cinco minuut di wega pa hasi e wega 3-2 pa Nacional, un banjo di awa frieu pa River, cu a hunga un tremendo partido, pero awo nan chens pa keda den Division Honor ta chikito, pero no imposibel ainda.

E resultado di e otro partidonan den siman 16;

Caiquetio vs Britannia 2-2

RCA vs La Fama 3-1

Dakota vs La Fama 3-0

Esaki ta e scenario di play-off y tambe degradacion

Dakota ta liderando e tabla di posicion di division Honor cu 37 punto, igual na punto cu Nacional, pero, Dakota tin un miho averahe di gol, +28 vs +17 di Nacional. Dakota y Nacional ta clasifica pa play-off caba, e bataya ta, ken lo keda den di prome puesto bayendo den play-off, corda cu e prome clasifica ta hunga cu e di cuater clasifica. RCA (tambe clasifica caba) ta cu 32 punto den di tres puesto, tambe ta den e bataya pa caba prome, pero nan tin di spera cu Dakota y Nacional perde nan ultimo weganan, y nan tin cu gana nan dos weganan restante.

E bataya pa e di cuarto puesto y clasificacion pa play-off ta hopi duro! E situacion por a wordo clarifica den e wega di Bubali vs Estrella, pero e “stalemate” a causa cu tin hopi drama pendiente entre e dos clubnan aki ainda den e ultimo dos weganan di campeonato, pero, Britannia tambe ainda ta matematicamente den wega, pero, nan mester spera cu Estrella y Bubali lo perde nan ultimo weganan y nan mester gana tur dos di nan mesun weganan, p’asina drenta play-off. Tur e tres ekiponan aki ta bay enfrenta ekiponan hopi fuerte den e ultimo stretch, vooral Estrella y Bubali.

Estrella tin dos wega pendiente cu Nacional y Dakota, mientras cu Bubali tin cu midi forsa cu RCA y Nacional. Britannia lo tin cu hunga cu Brazil Juniors, un ekipo cu tabata fuerte den e prome mita di campeonato, pero a cai bastante den e di dos half, pero, a yega di gana Britannia den e prome rond, e otro partido di Britannia ta contra RCA.

Brazil Juniors ainda ta core peliger di perde e puesto shete cu 17 punto contra La Fama cu ta net tras di nan cu 13 punto den di ocho luga, Brazil lo enfrenta La Fama riba fecha 18, e por dicidi e situacion ey, si Brazil no gana nan wega contra Britannia y La Fama gana Caiquetio riba fecha 17.

River Plate ta den ultimo luga riba tabla cu 7 punto, tres menos cu Caiquetio cu ta den e penultimo posicion, si nan no gana nan dos ultimo weganan contra Dakota y Caiquetio nan lo degrada automaticamente, e ora ey ta Caiquetio y La Fama, of Brazil Juniors, lo hunga play-off promocion/degradacion contra e di dos y tres clasifica den division uno.

Keda pendiente cu Futbol Aruba pa mas cobertura di kiko lo bay pasa drentando den e recta final di e campeonato hopi interesante aki, mas informacion di weganan benidero y resultadonan ta disponibel riba e website FutbolAruba.com tambe.