RCA ta sorprende Nacional y ta bay cu un contundente victoria den e di dos partido di Playoffs

RCA y Nacional riba papel tabata mustra di ta un “match-up” hopi pareu y tur cos tabata parce cu e encuentro aki lo ta bai ta hopi nivela y dificil di predici. Den campeonato regular Nacional a gana RCA 2-0 den prome rond, y RCA a gana Nacional 2-1 den e di dos rond, tur dos tabata partidonan hopi sera.

Riba e anochi aki, RCA a bin cu hopi otro intencion y a cuminsa di biaha na pone presion riba e defensa Dragon. Ta manera un “blitz’, RCA a tira dilanti for di e pitaso inicial, sorprendiendo un defensa Nacionalista cu no tabata full cla pa e iniciativa aki, y a cuminsa pifia lagando hopi buraco atras pa e Tricolornan probecha. Nacional, sorprendemente a cuminsa e partido sin nan hungado estelar, Devis Oliveros, cu aparentemente no a logra yega na tempo for di exterior, apesar cu si lo mester tabata den e wega aki.

E prome gol ya a cai na minuut 3 caba ora cu den un “un-dos-tres” di contra-golpi, for di un pase full na banda drechi, Jean Luc Bergen a hasi un pase den profundidad pa Glenbert Croes cu tabata sprint riba e hala, a haya e bala y crusa den area penal pa Roan Petronia cu ta chip e bala pa un Jean Pierre Fingal full liber na su man robes y ta deposita e bala den net, RCA 1 Nacional 0.

E di dos gol di RCA a bin na minuut 11 caba pa medio di un tiro liber liber cobra pa Erik Santos, cu ta deposita un bala net riba cabes di e defensor Christian Sinesterra cu ta anota asina e di dos gol, hopi tempran pa e oncena Tricolor. RCA 2 Nacional 0.

Nacional no tabata sa ta kiko a dal nan y a perde tur sentido di kiko nan strategia di wega lo tabata, tabatin desesperacion den nan wega, unda nan a cuminsa tira bala dilanti, sin plan, sin construi adecuadamente, apesar cu tabata hopi tempran ainda.

Mientrastanto e hungado Oliveros a yega stadion y tabata calentando, y alfin a drenta na minuut 25 den basta desesperacion, y momentariamente tabatin un sentido di speransa pa e Dragonnan, pero desafortunadamente pa nan, e wega preciso cu efectividad nunca a yega. RCA en cambio a sinta warda nan chens pa aumenta e marcador, y e stocada final!

Na minuut 43 e golpi fulminante a bin pa RCA, apesar cu ainda den prome tempo so, unda Jean Pierre Fingal a ricibi un bala for di medio campo, lansa den atake na banda drechi atrobe, hala defensa cu ne, pa hasi un pase perfecto pa Ronald Gomez cu a haya su mes liber na banda robes, ta anota pa hasi e wega RCA 3 Nacional 0.

Nada no a cambia pa Nacional den di dos tempo, e resultado a keda mescos. RCA a djies warda patras, hasi nan contra-golpinan efectivo y peligroso de bes en cuando y a controla e situacion te cu e final di e partido. Devis Oliveros tabata inefectivo, Nacional a capitula hopi tempran caba, un wega cu sigur nan lo kier lubida mas pronto posibel.

Cu e victoria aki RCA ta bai comanda e tabla di posicion di Playoffs cu tres punto y miho diferencia di gol cu Dakota, cu igual cantidad di punto, ta den di dos luga, sigui pa Estrella y Nacional sin punto. Dakota vs RCA y Nacional vs Estrella, lo ta e encuentronan den e di dos siman di Playoffs.