Dakota y RCA a parti punto den un partido di Playoff hopi tenso pero sin gol

E ‘derbi di Aruba’ entre e Amarillonan di Dakota y Tricolornan di RCA semper ta crea hopi expectativa, mas ainda den Playoffs, unda cada punto ta bal masha hopi. E biaha aki no tabata excepcion.

E partido riba su mes no tabata e gran clasico cu nos a spera, pero no “cabe duda” cu e tabata un duelo hopi tenso y dramatico na cierto ocasion nan. Fanaticonan di ambos banda a yega stadion pa sostene nan ekipo, tabata un ambiente digno di Playoffs.

RCA a cuminsa e partido na mesun manera cu esun contra Nacional den nan prome partido di Playoff, unda nan a domina y a gana 3-0. Dakota si a responde di biaha tirando dilanti den e prome minuutnan di wega, pero pa banda di 10 minuut ta RCA a cuminsa ta haya mas yegadanan di peliger riba e porteria Dakotero, y esey a sigui pa e siguiente 20 minuut, un ofensiva efectivo protagonisa pa Jean Luc Bergen, Ronald Gomez y Andrew Martinez, RCA cu mas yegada y mas peliger y bon contencion ora tin mester, hopi debi na e gran labor tambe den medio campo di Erik Santos y e defensor lateral Ronaldo Martinez.

Dakota cu hopi posesion pero sin yegada significante den area penal, nan medio campo a laga nan un poco na caya na e ocasion aki. Asina mes e Tricolornan no por a concretisa y tuma bentaha, tambe debi na e bon actuacion bou di e tres latanan di Eric Abdul di Dakota y e defensa Dakotero.

Den e ultimo cuarto di ora e wega tabatin mas balans, Dakota tambe cu mas chens pa habri anotacion, pero halftime a bai aden 0-0.

 

Den e di dos mita e wega a sigui bastante pareu, pero, e yegadanan di calidad den “box” tabata mas pa e ekipo di Solito. Dakota a hasi bastante cambio den alineacion purbando di cambia e formula di nan wega, claro, cu un banki hopi profundo nan por “afford” di hasi esey. E entrada di Ricky Hodge y Shermar Monticeuex den e partido a duna Dakota mas empuhe y yegada den area penal di RCA, pero, e defensa Tricolor y nan portero Raizel Jansen a sabi di controla e situacion tur biaha.

Dakota a sigui purba, haciendo mas cambio ofensivo, mane treciendo Juel Balentien y Robert Francis den wega, pero e “stalemate” no a cambia. Un partido tenso y duro na algun ocasion, cu varios carchinan geel, a yega den e ultimo minuut cu RCA cu un “freekick” peligroso, pero unda Ronaldo Bruges ta lansa un tiro halto y asina mes e partido ta termina, 0-0, tur dos ekipo ta haya un punto pa acumula 4 en total. Dakota mester ta contento cu punto ey, RCA mas bien lo sinti cu nan por a bai cu tur tres punto. RCA asina empata cu Dakota den punto riba e tabla pero ta lider di Playoffs pa medio di miho diferencia di gol. Nos Man of the Match ta Erik Santos di RCA.

E siguiente partido di Playoffs lo ta riba Dialuna 13 di mei, entre Estrella y Nacional.