Nacional ta gana RCA 2-0 y asina sacudi e standing riba e tabla di Playoffs di Division Honor

Foto: Hubert de Cuba /Vision Images

E partido entre Nacional y RCA pa cuminsa e di dos rond di Playoff a promete di bira hopi interesante mes, considerando cu RCA a gana Nacional 3-0 den e prome rond, pero, desde e punto ey, Nacional a bin di menos pa mas.

Den e partido previo contra Dakota, un bataya epico den nos futbol, Nacional y Dakota a hunga un “stalemate” di 1-1, pero, e partido ey a demostra tambe cu si e dos ekiponan menciona hunga e wega cu nan a hunga e dia ey, lo ta bai ta hopi dificil pa no considera nan dos pa yega final.

Nacional a cuminsa e wega di biaha ta press RCA den medio campo, hasiendo e wega dificil pa e creadornan di wega di RCA, causando falta di yegada skerpi den e ultimo 16 di e oncena Tricolor. Nacional en cambio a demonstra hopi velocidad den nan wega pa horta e bala y lansa den atake den un manera di “Blitz”, creando chens tempran pa anota.

Nacional hungando sin nan director tecnico, Dreyer Bracho, na banda di cancha debi na un supension pa carchi cora den e wega anterior contra Dakota, Bracho mester a wak e partido foi tribune, dependiendo riba su asistent nan pa maneha e ekipo.

Nacional a anota tempran, na minuut 4 caba! Un gol di e velos atakante Javier Jimenez, cu a pone RCA den un situacion duro tempran. Nacional 1 RCA 0.

E presion grandi di Nacional no a para eynan, creando mas situacion di peliger pa e porteria di RCA defendi pa Raizel Jansen, cu mester a hunga un di su miho weganan pa mantene su porteria liber di mas gol Dragon.

RCA alfin a logra calma e tormenta di Nacional y a cuminsa hunga nan wega den e di dos mita di e prome tempo, sakando nan lateralnan den atake, en especial Glenbert Croes, forsando Nacional pa retrocede un poco, creando chensnan pa empata e wega. Despues di hopi ocasion di peliger y oportunidad pa anota gol, RCA simplemente no a probecha di nan mesun bon ‘momentum’ pa cambia e resultado. Asina mes halftime a bai aden cu e score di 1-0 pa Nacional.

Den e di dos tempo, hopi a spera cu RCA lo a sigui cu e bon momentum ey cu nan a gana bek for di Nacional prome cu halftime, pero, atrobe apesar di algun bon chens, nada no a pasa cu e resultado, mas chens perdi, Nacional defendiendo hopi bon, mientras cu e Dragonnan, cu un di dos aire, a bolbe subi intensidad di nan wega, y a cuminsa haya nan mesun chensnan pa aumenta e bentaha.

Nacional, hopi eficiente atras, tabata lansa den atake asina cu nan haya un apertura riba cancha, di un RCA cu a sali pa busca e gol di empate, asina nan mes Nacional haya nan mesun oportunidad pa amplia bentaha na minuut 60. Chito v/d Biezen, for di net dilanti di su linea defensivo, ta hasi un pase largo na banda robes pa Leonardo Pulido cu ta domina e bala den un tremendo prome toke, lagando Christian Sinestera atras y penetra den area penal pa encontra cu Raizel Jansen cu ya tabata saliendo for di su box pa purba sorprende Pulido, cu a pone un bunita sombre riba e portero pa e di dos gol pa su ekipo, Nacional 2 RCA 0.

RCA no a baha cabes, nan a sigui purba y bataya contra e Dragonnan, perdiendo mas chens pa anota, e balanan no por a drenta gol, djies cu e anochi aki no tabata di nan. Nacional a defende duro y bon p’asina mantene e resultado na nan fabor, hasta cu 10 homber riba cancha debi na e carchi cora otorga na Charles de la Cruz na minuut 83, nan a logra wanta RCA y e anotacion di 2-0, e resultado final.

Asina ta cu Nacional a yega 7 punto cu e victoria aki, emptando cu RCA riba top di e tabla, apesar di e “doel-saldo” similar, pero, debi cu e Dragonnan a anota un gol mas cu RCA, nan a bai cabesa e tabla provisonalmente, wardando e resultado di Dakota vs Estrella.

Nos “Man of the Match” sin duda tabata Leonardo Pulido, cu a core henter cancha, bataya tur bala, y a anota tambe e bunita gol pa sigura e wega aki pa Nacional y tur tres punto.