Connect with us

Division Honor

RCA ‘ekipo di destino’ ta campeon di Division Honor di Aruba ganando Nacional 1-0 den partido dramatico

Foto: Davyne Croes /Futbol Aruba

E partido decisivo entre RCA y Nacional, p’asina dicidi e campeonato di AVB Division Honor di Aruba 2018-2019, a tuma lugar den stadion GP Trinidad bastante yen cu fanaticonan di ambos club.

E partido final aki a bin despues cu e ekiponan a bataya den dos ocasion previamente, unda ambos oncena a gana un partido. Den e campeonato regular caba e ekiponan aki a split resultado, mescos cu tabata e caso den e prome rond di Playoffs, globalmente cada ekipo cu tres victoria, mas igual nan no por a yega den e partido aki pa dicidi e titulo.

E wega a cuminsa cu ambos oncena cu bastante posesion y tirando dilanti, un wega cu bon toke y hopi yegada apesar di e nervionan cu ta parti di un partido final. RCA cu toke y posesion poniendo presion tempran riba e defensa di Nacional, e Dragonnan na nan turno tambe a aplica nan mes wega, cu presion halto y contra-golpi riba RCA.

 

E prome yegada di peliger den e wega a yega na minuut 12 pa Nacional unda e defensa central di RCA, Nathan Loe-A-Nioe, mester a rechasa e bala, di un tiro di Javier Jimenez, cu cabes riba linea di gol, pa net un minuut despues ta toka turno na Erik Santos, e hungado versatil y di full cancha di e Tricolornan, pa tambe salba un bala, atrobe, riba linea di gol, impresionante.

Na minuut 17 ta Deffrey Banton, e homber di hopi esfuerso y pulmon di Nacional ta salba su ekipo, tambe rechasando un bala riba linea di gol pa salba Nacional.

 

Na minuut 24 ta RCA atrobe cu yegada di peliger pero Jean Pierre Fingal ta lansa un tiro cu ta bai net halto riba e gol defendi pa Jose Cruz.

 

Na minuut 33 ta Nacional cu bon chens, un tiro descumunal di Javier Jimenez, pero e bala ta dal den palo di gol y despues ta wordo salba pa e portero Raizel Jansen, salbando RCA, manteniendo e wega 0-0 te na e punto ey.

 

Na minuut 34 ta RCA cu bon chens ora cu Ronald Valderrama ta haya su mes dilanti porta di gol di Nacional pero ta faya cu un tiro na halto.

 

Te na e punto aki, nos tabata observando un partidazo cu hopi yegada di ambos ekipo, un wega di banda pa banda, apesar di tabata sin marcacion ainda, un wega digno di un final entre dos ekipo poderoso asina.

 

Na minuut 36, otro atake di RCA y tiro potente di Stiven Melchor Rua, pero otro biaha mas salba pa Jose Cruz, cu tabatin hopi trabou e anochi aki, mescos cu Raizel Jansen, su “homologo” di RCA.

 

Net prome cu halftime ta Ronald Valderrama atrobe cu un chens cla dilanti gol defendi pa Jose Cruz, pero e tiro tabata stret den man di e portero Dragon.

 

Despues di halftime e yegadanan y e intensidad di e partido a baha en general, un partido tenso y dramatico si, pero RCA cu un poco mas dominio di bala y yegada, mane na minuut 56, unda cu Jean Pierre Fingal cu bon chens, pero ta lansa un tiro na banda di e gol di Nacional. E hugada aki a sigui cu mas presion di RCA, e Dragonnan en cambio no tabata hasi nan pressing mes efectivo mas, ta manera RCA tabata “a punto” di porfin kibra e dijk y cambia e destino di e wega aki.

 

Despues di mas dominio di RCA, apesar cu e partido ainda tabata un di hopi hugadadan duro, un bataya feros, cu tabata mas bien mustra cu lo bai keda den un “stalemate”, kizas bai tempo extra y ken sa, hasta tironan di penalti pa dicidi e campeonato. Pero, no, no tabata asina “afterall”.

 

Na minuut 63 RCA ta pone e destino den nan mesun man, ora cu Frederick “Ronald” Gomez, e capitan di hopi bataya, ta haye cu un bala riba su cabes, crusa perfectamente den area penal pa e defensor Miguel Gonzalez, cu ta haya Gomez net riba e punto penal y ta deposita e bala, sin basila cu precision, net na banda drechi, unda cu Jose Cruz no por a alcansa nunca, dal den palo bai den net. Gomez tirando su mes y su companjeronan, y e fanaticada Tricolor den un euforia total y tambe hopi alivio. Alfin nan a logra kibra e muraya casi impenetrabel di e Dragonnan di Noord, pa bai ariba 1-0, y kizas…kizas, gana e titulo atrobe pa Solito y otro barionan di Playa.

 

Pero, ainda tabata falta hopi tempo den e wega aki, esey ta sigur, especialmente contra un ekipo di mente duro mane Nacional, e Tricolornan sa esey, nan no a subestima. Cu Nacional tur cos ta posibel y cada momento ta conta ora bo hunga contra nan, teniendo cuenta cu nan tin Devis Oliveros dilanti.

 

Nacional a reacciona y ta bringa bek, pero tin biaha e deseonan y “will” ta mas grandi cu e realidad mes, bo ta contesta, bo ta ataka bek, pero, e precision, e exactitud, no t’ey mas, ta mane un boxdo cu ta bringa bek pero no necesariamente ta box mas, e man nan a bira pisa!

 

 

RCA, awo mas trankilo, ta warda pa wak kiko Nacional ta bai hasi, e Tricolornan bon calcula, cla pa saca probecho y haya un momento pa probecha y anota e gol di “knockout”. Ironicamente e mesun wega cu Nacional sa hunga hopi, un wega cu a hiba nan tres final sigui den e ultimo tres anjanan, un “powerhouse” di futbol di Aruba.

 

Pero e anochi aki, poco poco tabata birando e destino di RCA. Na minuut 71 ta RCA mes, atrobe pa medio di e legendario Ronald Gomez, cu un chens mortal den area penal, pa aumenta e bentaha y cementa un titulo mas pa e club Rubiano cu mas titulo di campeon, pero, Gomez ta faya e gran chens aki, manteniendo e speransa di Nacional na bida.

 

Nacional cu menos yegada di calidad awo, pero toch por a sinti cu nan nunca a “give up” y no lo hasie nunca, cu menos chens di gol, pero toch na minuut 83 e hoben Edward Clarissa, e motor di e ekipo nortero, sigur un prospecto grandi p’e futbol di nos isla, ta lansa den atake den un sprint poderoso, pero e bala ta wordo salba pa e portero Jansen.

 

Despues ta sigui un avalanche di yegada y tiro nan di Nacional, den desesperacion, pa purba empata e wega aki, pero encontrando un RCA defendiendo hopi bon. Nacional na final ta haya tres tiro di skina consecutivo, pero cu bon rechasenan semper di e oncena di Solito.

 

Den e ultimo minuutnan Nacional ta bolbe lansa den atake, pero sin precision y sin pia fresco, pero, nada lo a bai stroba RCA cu nan momento di destino, den nan di 85 anniversario, un anja cu nan a haya nan ta cambia di director y staff tecnico na mita di e campeonato, unda nan tabata flota entre e di cinco y cuater posicion riba tabla, sin mucho speransa di gana algo e anja aki. Pero, e decision ey a cambia e momentum y e rumbo di e club, unda Omar Tromp a sabi di convence su ekipo cu nan por y nan lo bai sali campeon, nan ta RCA.

 

Ata nos aki den e ultimo minuutnan di e partido aki, e momentum nunca lo a bai cambia, RCA ta parce cu no lo permiti un gol di Nacional, e destino di nan ta scirbi, nada no por cambia esaki mas, te cu e pitaso final di Refree Ricardo De Leca, e realidad awo ta bai sink; RCA ta campeon di Aruba! e titulo di AVB Division Honor ta di nan atrobe, nan di 17 biaha…increibel, un team di destino.

 

 

Na final RCA ta campeon, alfin nan a domina e Dragon poderoso di Noord, algo cu no ta facil, un ekipo bon maneha pa Dreyer Bracho. Esey ta hasi e campeonato di RCA mas apreciable, mas dushi, paso, nan mester a bataya mane nunca, apesar cu e sentimiento sigur ta cu nan tabata un ‘ekipo di destino’, pero prome cu e campeonato a bai den rust na luna di December di anja pasa y despues di nan derota den semi final di Copa Betico na cuminsamento di anja, na e punto ey, keremi nan no tabata parse cu nan lo a bai logra mucho, hasta despues di a perde e prome wega di e Playoff final aki 1-3, pero, con cosnan por cambia tin biaha, esey ta destino, ta dificil pa splika!

 

Pabien RCA, Pabien Aruba, futbol a gana, asina nos lo sigui avansa pa mehora futbol na Aruba, RCA ta un ehempel di con por hasi esey, ora cosnan no ta bayendo bon p’abo, un cambio den pensamento, un direccion nobo, por ta e secreto.

 

Nos mencion special den e partido aki y den e Playoff final ta pa e hoben talentoso y tin biaha hasta ‘trei cortina’, Glenbert Croes, e rightback di RCA cu tabata mane un ‘catalyst’ pa su ekipo, su bataya epico cu e talento grandi di Nacional, Edward Clarissa, tabata un storia hopi grandi di e Playoff Final aki.

 

E premio di MVP di AVB pa henter e Playoff final aki cu a tuma tres wega pa dicidi e campeon di Aruba ta Stiven Melchor Rua, un hungado cu a bin RCA como refuerso pa e Playoff final aki y a duna dividendo for di prome instancia cu el a pone pia riba e cancha di Stadion Trinidad.

 

Te aki nos a yega e anja aki den Division Honor, nos kier mas futbol, nos kier mas drama, pero prome cu nos cuminsa un campeonato nobo mas den e anja aki, nos lo bai premia e ‘hungado di futbol’, e protagonista cu a duna nos e bunita storia nan aki e anja aki, keda pendiente pa e premionan ‘Ballon D’Or’, unda nos ta bai duna danki na e ‘hungado di futbol’.

Click to comment

Leave a Reply

Your email address will not be published.

More in Division Honor