Nacional ta finalista di ABC Cup 2019, Aruba ta presente den final contra FC Vesta di Corsow.

E Dragon nan di Nacional ta den final di Copa ABC 2019 despues di a gana e campeon di Aruba, RCA, den semi final, unda e partido mester a wordo dicidi pa penalti ora cu e ekiponan a keda empata na cero gol den tempo regular y tambe den e tempo extra di “proroga” di 15 minuut cada banda.

E partido tabata duro for di e prome quarto di wega caba, cu poco yegadanan di hopi peliger, un “stalemate” mas bien, unda cu halftime a bai aden sin anotacion.

Den e di dos tempo e partido a subi un poco di nivel, pero, no locual nos a spera, y sa spera di e rivalidad entre e dos clubnan aki. 

RCA a convense den nan ultimo partido contra Scherpenheuvel unda nan a gana 4-1 den un partido yen di drama, unda cu e Tricolornan mester a bataya te den tempo di descuento unda un gol di empate hopi laat di Steven Melchor a manda e wega den tempo extra, pa despues gana e wega den “proroga”.

Nacional a hunga contra e campeon di Boneiro, Real Rincon, na Kralendijk, unda nan a perde 1-2 den un bon partido, e gol di Nacional den e partido ey a facilita nan inclusion den e top cuater ekiponan den ABC Cup y un plazo den e semi final aki.

E dos ekiponan aki conoce otro hopi bon, nan ta e dos protagonistanan di e playoff final di campeonato pasa. Den e partido aki tambe tabata presente e tres finalistanan di e premio Ballon D’Or 2019, Devis Oliveros y Edward Clarissa di Nacional y Ronald Gomez di RCA.

Dos di e finalistanan pa e “Golden Glove”, premio pa e miho portero di Division Honor, tambe tabata den e partido aki; e dos porteronan di RCA; Raizel Jansen y Eric Abdul. E otro finalista, mane ta conoci, ta Marvin Irausquin di Brazil Juniors.

E partido a tuma un rumbo scur y complica banda di minuut 80, unda despues di algun golpi duro y momentonan extra curicular y anti-deportivo, referee Salamatin no a haya otro opcion cu duna tres carchi cora, na Edward Clarissa y Leonardo Pulido di Nacional y Raizel Jansen di RCA. E partido a sigui den e mesun rumbo te cu final di tempo reglamentario.

Den e “proroga” RCA no a sabi di probecha cu nan tabatin un homber mas riba cancha, mientras cu Nacional a hunga nan wega tactico na perfeccion, hasta cu algun yegada di na mes den contra-golpi, cu Devis Oliveros den bo alineacion, esey semper ta un factor, sin duda!

E empate na final di e tempo extra a conduci na tiro di punto penal pa dicidi ken ta e ganador, y finalista di ABC Cup 2019, pa bai hunga contra FC Vesta di Corsow den e siman entrante.

Den e tironan di penalti ta unda Nacional a demonstra nan superiodad riba e anochi aki. 

Claudio Cavalcante, e capitan di e Dragon nan, cu e prome gol, bunita tiro unda cu Eric Abdul no por a yega, pa hasi e wega 1-0. 

Jean Luc Bergen a cobra e prome tiro di RCA, unda cu Jose Cruz a brilla cu un salbacion na su banda robes, e wega a keda 1-0 pa Nacional.

Josua Aguire, cu tabatin un tremendo partido e anochi aki, tambe a anota su gol di penalti, pa hasi e wega 2-0 pa Nacional.

Steven Melchor na su turno, a purba anota pa tene RCA den wega, pero, Jose Cruz tabatin otro idea, y a para e tiro di Melchor na su banda drechi, un salbacion spectacular pa mantene Nacional den bentaha di 2-0.

Ricky Hodge a hasi e wega 3-0 pa Nacional ora cu el a bati Eric Abdul cu un tiro duro na banda robes di Abdul, unda e portero Tricolor a hasta touch e bala, pero envano.

Yanuel Kelly a anota su gol di penalti cu un tiro bon posiciona cu Jose Cruz no por a wanta, salbando RCA momentariamente di e derota, 3-1 pa Nacional.

Leonardo Colmenares, e defensa central di Nacional, “al fin al cabo”, a dicidi e partido cu su tiro penal, unda Eric Abdul, un biaha mas tabatin man riba e bala, pero e potencia di e tiro a logra e gol di victoria pa Nacional 4-1.

Nacional ta bai final! Nacional ta pa Aruba, pabien na e pueblo di Nort, pabien na e Dragon nan!

Keda pendiente cu FutbolAruba pa confirmacion di unda e partido final lo tuma lugar y e dia tambe.