Division Honor – “Power Ranking” despues di siman seis

Na final di seis fecha den Division Honor, na e punto di e “international break”, ta basta cos a pasa despues di algun weganan clave.

Pero realidad ta cu e actual campeon RCA ta keto bai comandando e tabla di posicion, apesar di a hunga un wega menos, sigui pa Nacional, Dakota y Britannia cu a subi y drenta den e prome cuaternan pa prome biaha e campeonato aki despues di algun victoria clave, apesar cu Estrella, cu tabata den e top cuaternan anteriormente, y Bubali, ambos cu dos punto menos, tin un wega menos hunga cu e Pumanan.

Den e ultimo cuaternan, e bataya pa sobrevivi den Division Honor, La Fama ta comandando y por ta mas cerca realmente di e bataya pa “top cuater”, prueba di esey ta nan victoria contundente di 4-2 den e ultimo fecha contra Bubali. Caravel tambe a cuminsa acumula punto y ta sigui La Fama di serca cu un punto menos so, ta parce cu nan dos por bataya pa evita promocion/degradacion te na e punto aki, of hasta mas, mientras cu Brazil y United ta den bom di tabla cu un punto y cero respectivamente.

E ‘highlightnan’ di e ultimo tres siman nan sigur tabata e clasico entre Dakota y RCA cu a termina den victoria di e Tricolornan di 2-1, tambe e partido unda cu La Fama a wanta e poderoso oncena di Nacional na un empate di 0-0, e Dragonnan, e ekipo cu ya a anota 35 gol den 6 wega te cu awo den e campeonato, no a logra anota gol den e wega di fecha 5 aki contra e Savaneteronan. E partido clave entre Britannia y Estrella, cu a termina den empate di 2-2 den un bon partido, y Devis Oliveros cu 14 gol anota den 6 wega! (no ta un type fout!)

E ‘FutbolAruba.com Power Ranking’ nobo den Division Honor ta como lo siguiente;

1. RCA – e oncena di Solito ta keda na top di e tabla despues di nan dramatico victoria contra Dakota den e ultimo siman. RCA, cu un wega menos hunga cu nan seguidornan, tin 15 punto den 5 partido, invicto, cu solamente 1 gol den contra! Den e partido contra un ekipo top man’e Dakota, nan e demonstra nan capacidad mental den weganan grandi. E “inhaal wedstrijd” pendiente di RCA vs Estrella lo ta riba 11 di December.

2. Nacional ta un punto tras di RCA, pero, cu un wega mas hunga, apesar cu Nacional a anota 35 gol den 6 partido, ta e empate di 0-0 contra La Fama y e 2-2 contra Bubali a perhudicanan masha hopi mes riba e tabla. Ta keda di wak ta kiko ta bai pasa ora cu e Dragon nan cuminsa hunga contra ekiponan top cuater. Nan goleador un bes mas, Devis Oliveros, ta comandando e ‘tabla di anotador’ cu 14 gol den seis partido.

3. Dakota den nan ultimo partido contra RCA tabatin tur chens di saca punto y hasta bai cu un victoria contra e campeonan, te ora cu nan mes a ‘auto-destrui’ despues di un expulsion costoso di nan defensa central y hungado clave na minuut 55. Dakota toch tabatin un bon victoria vs Estrella di 2-0 den siman 5. E ‘Amarillonan’ ta solido cu 13 punto den di tres luga cu 16 gol anota y solamente 6 gol den contra den 6 wega.

4. Britannia a cuminsa hasi movimiento riba tabla di posicion (awo cu 10 punto), despues di dos victoria contundente contra Brazil Juniors y La Fama y e empate contra Estrella. Un ekipo cu hopi talento, por spera hopi di nan, y awo nan ta den bataya pa top cuater. Ta di remarca si cu Britannia por anota hopi gol (16 den 6 partido), pero, a permiti 13 gol tambe.

5. Bubali no ta mal para riba e tabla, apesar di a hunga un wega menos, nan tin 8 punto, dos so tras di Britannia pa e di cuater posicion, pero, den nan circulo nan no ta masha contento di a permiti 3 gol den e wega contra SC United y tambe a perde nan ultimo wega contra La Fama cu anotacion di 2-4. Despues di a cuminsa e campeonato solido, awo a permiti 7 gol den nan ultimo dos weganan.

6. Estrella tambe tin 8 punto, den di seis luga, debi na diferencia di gol (+2). E derota di 0-2 contra Dakota a pisa hopi y e empate contra Britannia tambe tabata clave. E ‘Naranhadanan di Santa Cruz’ tambe tin un wega pa “haal in” contra RCA dia 11 di December. Un ekipo cu ta anota gol pero ta permitiendo basta gol tambe te cu awo den e campeonato.

7. La Fama, un ekipo cu te cu awo ta un cu ta duna tremendo bataya, cu 5 punto den seis wega, pero, ta e unico ekipo cu ya a enfrenta e top 6 ekiponan riba tabla, y a saca algun bon resultado; man’e e empatenan contra Nacional y Estrella, y tambe e victoria contra Bubali den nan ultimo fecha. La Fama, un ekipo bon para riba cancha ta beneficiando di e veterania di Valdo Leocadio den volante di contencion e anja aki.

8. Independiente Caravel, cu 4 punto ta un so tras di La Fama den di ocho lugar, pero cu un wega pa “haal in” ainda, dia 8 di November contra Bubali. Nan a bin di perde 0-1 so contra RCA y tambe un contundente victoria di 5-0 riba SC United den e ultimo fecha, un ekipo compacto y organisa cu por ta e sorpresa di e anja aki y por evita promocion/degradacion y hasta competi pa mas.

9. Brazil Juniors, ta keda e gran desapunte den Division Honor e anja aki. Un ekipo cu a hasta haya algun refuerso di veteranonan, y tur cos tabata parce cu nan lo por competi man’e tabata e caso anja pasa, pero, cu solamente 1 punto den seis wega, permitiendo 28 gol den contra, awor ta candidato serio pa promocion/degradacion si nan no bolter nan rendimiento riba cancha.

10. SC United ta keto bai sin punto den e campeonato aki te cu awo, nan a permiti tambe 35 gol den 6 wega, ta un deficit hopi grandi mes pa evita promocion/degradacion e anja aki, locual nan por hasi ta purba evita descende automaticamente si evita keda den ultimo lugar y en cambio hunga play-off di promocion/degradacion p’asina tin un “outside chance” ainda.