Connect with us

Copa Betico

RCA ta den final di Copa Betico Croes 2021 despues di a derota Nacional 2-0

DAVYNE CROES/Futbol Aruba via DAC Image

E ultimo campeon y sub campeon di Division Honor, e dos rival nan grandi den e top futbol di Aruba den e ultimo temponan, a topa otro den e prome semi-final di Copa Betico Croes 2021, un final anticipa.

Nacional cu a haya nan forma den e fase di knockout di Copa Betico, eliminando Dakota prome y despues Riverplate tambe den kwart final, a yega e partido aki hungando un futbol efectivo y bon organisa, y apesar di e falta grandi di nan hungado estelar Devis Oliveros, e ekipo a sa di keda den focus y hopi disciplina bou mando di nan director tecnico Dreyer Bracho.

RCA cu a pasa bai man’e ta nada den e “group stage”, por cierto den e grupo di morto (grupo A), unda nan a derota Dakota, Bubali y La Fama pa gana e grupo na un manera basta facil pa despues elimina SV Caiquetio den kwart final cu anotacion descumunal di 8-0.

E partido den prome tempo tabata un mas bien di futbol sera, strategico, cu tactica y disciplina. Ambos ekipo cu poco yegada di peliger apesar cu RCA, sin e estelar di medio campo Erick Santos, tabatin mayoria posesion di e bala. Nacional na su turno purbando cu algun contra-golpi husando e velocidad di Kenroy Ranger y Edward Clarissa.

Na halftime e partido tabata ainda sin gol y tur cos tabata parce cu e wega por tabata bayendo pa tironan di penalty pa dicidi e clash aki.

Den di dos tempo Nacional a hisa nan wega y a cuminsa di biaha cu bon yegadanan despues di e pitaso inicial. Nan a sorprende RCA den e prome parti di e di dos tempo, pero, RCA a keda calmo y a cuminsa hunga nan wega tambe, buscando oportunidad.

Ta Nacional awo cu e iniciativa den e partido, pero, saliendo en busca di atake y llegada, rekisitonan pa sali victorioso, a duna RCA chens pa nan mesun proposito tambe. Ta dos choice peligroso tin; “warda RCA atakabo of sali ataka pa evita husto esey?” Pero, saliendo pa busca gol tin biaha ta hunga den man di RCA, cu no ta un ekipo “per se” di contra-golpi, pero, semper un ekipo ‘pensado’ cu sa logra decifra e rivalnan n’e momento oportuno.

E tricolornan di Solito a cuminsa aplica un pressing “brutal” den medio campo door di Jeamir Howell, Jean Luc Bergen y Walter Bennet, ganando e bala na momentonan clave, y den un hugada asina di transicion alfin nan a logra anota e prome gol di e wega den pia di Jhon Silva na minuut 63.

Nacional a keda hunga un partido disciplina y a sigui yega den area penal di RCA despues di e prome gol y na minuut 83 por wel a haya un penalty ora cu Edward Clarissa a wordo deriba, pa hopi wowo, den area penal, pero na ultimo momento referee a constata cu tabata net p’afo, na rand di e zona di peliger pa un tiro liber. Den e hugada ey tambe Jefferson Lopez di RCA a haya carchi cora, poniendo mas presion ainda riba e campeonan di Aruba den e ultimo minuutnan di wega.

Pero ‘alfin al cabo’ no tabata e anochi di Nacional, un ekipo batayador, ya cu den tempo di descuento, net ora cu Nacional tabata bati na porta di gol pa empata e wega y forsa tironan di penalty, Ronald Gomez ta anota e gol di knockout pa RCA despues cu Carlos Melchor Rua a lansa un tiro duro cu a dal den palo di gol y bons bai cai riba pia di Gomez.

Un partido hopi bon, duro, strategico y inteligente; ta man’e ta un ‘Boca vs River’ mi ta wak; dicon ainda nos no por aplica e mentalidad aki den nos seleccion nacional? E legendario Johan Cruyff a yega di bisa cu “futbol bo ta hunga cu bo mente y bo pianan t’ey pa yudabo”. Ken ainda ta corda e logronan di RCA y Nacional den ABC Cup 2019? tin biaha esaki ta pasa den mi cabes, p’aso nos por hunga bon futbol n’Aruba.

Asina tambe RCA ta e prome ekipo den final, buscando na ripiti como campeon di Copa Betico, awor ta keda di wak ta contra ken nan lo hunga, La Fama of Britannia.

Click to comment

Leave a Reply

Your email address will not be published. Required fields are marked *

More in Copa Betico

Division Honor