Connect with us

Copa Betico

La Fama a sacudi Britannia pa hunga final di Copa Betico 2021 contra RCA

DAVYNE CROES/Futbol Aruba via DAC Image

E di dos semi-final di Copa Betico 2021 entre La Fama y Britannia tabata riba papel un partido cu por a favorece e Pumanan di Piedra Plat.

 

Britannia a gana tur tres di nan weganan den fase di grupo; tres victoria sigui, entre otro riba Nacional y Estrella, p’asina gana e grupo facilmente pa clasifica di biaha pa kwart-final, unda nan a destrona Jong Aruba 10-0 y asina yega e semi-final aki, pues, cuater victoria sigui y un doel saldo di +13 tras di bon actuacion di entre otro e hoben nan David Castro y Francis v/d Linden.

 

La Fama na su turno a cococha den fase di grupo unda apenas nan a logra e di tres luga den grupo A, cu solamente tres punta den tres wega, pero, nan a logra clasifica toch pa e di dos rond. Den di dos rond La Fama a sorprende Estrella ganando 2-1 y despues den kwart-final a gana FC San Nicolas den e ‘derbi di p’ariba di brug’, den e ultimo minuut di wega cu e mes un anotacion di 2-1 cu e gol di Andre Kelly.

 

Den e wega di semi final aki, den e prome mita tabatin hopi inconsistencia; mal pasenan, fout nan mental y cu masha poco llegada y chens pa anota pa ambos oncena. Britannia cu un poco mas “balbezit” pero esey no a yuda cu mucho.

 

Britannia, un ekipo cu basta talentonan hoben bou direccion di Coach Reinhard Breinburg, e ex coach di La Fama por cierto. Un ekipo di hopi velocidad hungando contra un ekipo man’e La Fama, cu tin hopi veterania y tino, incluyendo entre otro hungadonan man’e Sylvester Schwengle, Valdo Leocadio, Claudio Cavalcante y e propio Andre Kelly.

 

Britannia simplemente no por a hunga nan wega cu a duna nan hopi exito te cu awo den Copa Betico, pero no ta question cu nan no a purba, pero, mas bien ta La Fama tras di un planteo “smart” di coach Roderick Rodriguez, cu no a permiti e Pumamanan hunga nan wega, futbol t’asina!

 

E di dos mita tabata mesun storia unda cu e incansabel Jeyson Mundarain y compania a bataya tur bala den medio campo, kitando e bala for di Britannia y hasta logra tira dilanti un poco mas cu den prome mita, y na mesun tempo defendiendo bon patras.

 

Na final no tabatin gol den e wega. Despues di a keda empata 0-0 na minuut 90, a bai direct pa tironan di penalty pa dicidi ken ta bai final pa hunga contra Racing Club Aruba.

 

Den e tironan di penalty Britannia a cuminsa ta faya nan dos prome tironan tras di un bon actuacion (heroico por cierto) bou di e tres latanan di e portero Savanetero Joshua Farro.

 

La Fama na su turno tambe a faya nan prome tiro, pero, despues niun di dos ekipo a faya mas y na final e marcador a keda 4 – 2 na fabor di La Fama y asina gana e derecho di hunga e gran final e Diaranson aki contra RCA pa 7pm na CDGT.

Click to comment

Leave a Reply

Your email address will not be published. Required fields are marked *

More in Copa Betico