RCA t’e poderoso campeon di Copa Betico Croes 2021, e club di Solito no por stop di gana titulo

E wega final di Copa Betico 2021 entre e actual campeon, e Tricolornan di Solito RCA y e Speransa Berde di Savaneta SV La Fama, a cuminsa pareu den hopi aspecto y tur cos tataba pinta cu nos lo bai wak un partido hopi competitivo.

Inicialmente La Fama a hunga RCA bon sin mester di a “replega” nan mes atras wardando p’e Tricolornan ataka, mas bien a defende bon ora tin mester, por cierto bon trabou den defensa central di Gregory Maduro, y a controla bala tambe den medio campo via Valdo Leocadio y Claudio Cavalcante hasiendo su pasenan buscando e “fast break” di Jean Octavius na un banda y Jaydon Dania e otro banda, e ultimo aki cu un bon actuacion e anochi aki p’e oncena Savanetero.

RCA mes no tabatin yegada di peliger den e prome 20 minuut di wega, descontando tambe e hugada di penalty pa RCA na minuut 19 cu referee De Leca a “trek terug” despues di a consulta cu su linesman, mientras cu La Fama mas bien tabata penetra sin problema den e area di peliger di RCA, pero no por a probecha, y te ey tambe.

Na e punto aki RCA a cuminsa controla e medio-campo, hasiendo nan pasenan mas liher y efectivo, cambiando ritmo y direccion, y hayando aperturanan p’e pasenan dilanti pa Jhon Silva y Ronald Gomez, mientras cu Mark Jacobs y Miguel Gonzalez tambe a cuminsa ataka for di p’atras rib’e halanan y e incansabel Walter Bennet practicamente for di tur direccion.

Na minuut 24 ya e iniciativa aki a paga dividendo ora cu RCA a haya un penalty cu a resulta den e gol di Jean Luc Bergen pa habri e marcacion, RCA 1 La Fama 0.

Despues di e gol aki, RCA a tuma e iniciativa di e wega, apesar cu ainda La Fama a tira algun biaha mas dilanti, buscando na empata e wega y na minuut 30 por wel di ta cu a anota e gol ey den pia di Jaydon Dania, cu eventualmente a wordo cancela debi na un “off-side” hopi dudoso. E wega mester tabata empata n’e momento ey.

Con cu bai cu bin RCA a sigui cu e iniciativa di wega y a hasta cuminsa domina y poniendo basta presion riba e porteria defendi pa e portero hoben y talentoso Joshua Farro. E atakenan di La Fama, awo menos, cu practicamente solamente dos atacante a bira casi imposible pa yega na anota e gol cu nan mester.

Asina mes e prome tempo a termina cu RCA ganado apenas 1-0, pero nan tabata dominando e wega, pues e resultado parcial ey di 1-0 tabata djies un comienso di cosnan grandi p’e oncena capitalino.

E di dos tempo a cuminsa man’e e prome a caba, RCA den nan ritmo cu yegadanan di hopi peliger, La Fama defendiendo heroicamente pa nan bida, pero cu tanto presion “e dam mester ta kibrando”.

E prome sla duro den di dos tempo a cai na minuut 50 ora cu Walter Bennet a anota e gol pa RCA pa hasi e wega 2-0. Cu e gol aki practicamente e wega a wordo sentencia, ya cu La Fama awor mester a sali den atake cu mas hungadonan pa busca e gol di corta bentaha y drenta den e wega p’asina tin un chens ainda, pero, cu consequencianan.

Na minuut 52, cu RCA awor cu mas espacio y velocidad ta lansa den atake unda cu Jhon Silva (e gran refuerzo hunto cu Mark Jacobs e anja aki pa RCA for di Bubali) ta anota pa hasi e wega 3-0.

Na minuut 63 despues di un combinacion ‘un-dos’ cu Jhon Silva, Walter Bennet ta anota un hoja di gol unda el a deposita ‘man’e ta cu un “pinsel” di un artista’ e bala for di banda robes di veld den skina di gol na man drechi, pa hasi e wega 4-0.

E siguiente gol di RCA a wordo anota pa Juan Villarraga, ni dos minuut despues cu el a subi cancha na minuut 66 p’asina hasi e wega 5-0.

E golnan di RCA a sigui yega un trei otro; Jhon Silva a hasi e wega 6-0 na minuut 68 despues di un contra-golpi fenomenal cu hasta seis hungado hunto.

Na minuut 71 ta Juan Villaraga atrobe ta anota gol despues di un otro bon contra-golpi finalisando cu un otro hoja di gol pa duna RCA e bentaha di 7-0.

Asina mes RCA a sigui hunga bala sin baha man, semper buscando mas gol, y nan a haya mas chens ainda sin por a concreta (dos tiro di Silva den pal’i gol), claro, ta p’esey ta hunga sport y p’e deleite di e fanaticada di futbol, te na final di wega!

Husto esey mes ta ilustra RCA tambe, un club ganado, e mas ganado di Aruba y no ta pa casualidad; por hempel na minuut 82 cu RCA comfortabel den bentaha, na un dado momento a bira un tiki slordig, ora diripiente mi a tende nan exitoso DT Giovanni Thode claramente gritanan duro for di banda di veld pa nan “organisa mas liher!” Shonnan, esey ta e formula pa yega na excelencia; door di organisacion y disciplina, gana y passion, garra y hopi “spirit”.

Pa ora cu De Leca a fluit p’e final di e wega, RCA cu un otro titulo mas, nan di dos titulo Copa Betico consecutivo bou tutelage di Thode y su team tecnico, por cierto e ekipo no a perde un wega den tempo reglamentario for di casi dos anja pasa cu nan a hunga den ABC Cup 2019 (nan a perde cu Nacional den semi final pa medio di tironan penal), despues a cuminsa e campeonato regular 2019-2020, sigui p’e Copa Betico 2020, continuando despues cu e di dos rond di e campeonato regular (te ora Covid a yega), RCA tabata top di tabla invicto permitiendo un gol so den 11 wega, y awor full e torneo Copa Betico 2021, sin perde!

Nos por bisa cu ful e ekipo Tricolor a hunga bon awenochi, ta hopi tin pa menciona den un artikel cortico asina; mencion special pa Mark Jacobs y Jhon Silva, pero mi ‘hungadonan di e wega’ aki ta e dupla di Carlos Melchor Rua pa su creatividad y Walter Bennet, un hungado cu a core henter cancha, henter wega, anotando un hoja di gol tambe riba dje, entre otro.

Pabien na La Fama pa alcansa e final sorprendiendo hopi hende pa keda como sub campeon y pabien grandi na Racing Club Aruba cu otro titulo campeonil mas, e Tricolornan ta keda den top.