Connect with us

Division Damas

SV Britannia, campeon un biaha mas ganando SV La Fama 4-0 den final di torneo “Festival Damas”

DAVYNE CROES/Futbol Aruba via DAC Image

E ekipo femenino di futbol mas dominante di Aruba den e ultimo decada aki, e “Lady Pumanan” di Piedra Plat, ta un biaha mas den top di e deporte rey, e biaha aki nan a gana e torneo ‘Festival Damas 2021’.

 

Un torneo cu a atrae hopi ekiponan femenino di rond di nos isla. E weganan a tuma lugar den un formato di mitar veld cu ocho hungado cada banda, cu dos mitar di 20 minuut cada un, un sistema cu di berdad a resulta di ta hopi atractivo y a fomenta un futbol di bastante bon calidad. “Kudos” na AVB p’a organisa un torneo asina y promove e futbol femenino riba nos isla, ta tempo pa nos “catch up” cu otro islanan rond Caribe cu ya ta bastante avansa caba den e genero aki.

 

Britannia a yega e final ganando di RCA den semi-final cu anotacion di 3-0, mientras cu La Fama a gana Estrella 1-0.

 

E partido final di Britannia vs La Fama a cuminsa di biaha, net 27 seconde di wega, cu un auto-gol pa duna e Lady Pumanan un bentaha tempran di 1-0.

 

Toch e ekipo Speransa Berde di Savaneta a sigui e wega cu miho toke, control y posesion di e bala, despues di e gol tempran pa Britannia. Mas bien e campeonan di Aruba a haya nan den bastante descontrol, cu pasenan eratico, hungando primordialmente “bala largo” buscando na sorprende La Fama, pero envano.

 

Mientras cu La Fama a keda toka bala bon, hayando yegada trei bon futbol di nan estelar Shadira Croes, pero tabata hasi falta e calidad den e ultimo “touch” pa anota e gol cu por a duna merito na nan bon trabou, man’e tabata e caso na minuut 13 di wega, nan a perde un chens cla pa empata e wega, cos por tabata diferente den e caso ey.

 

Na un dado momento e Lady Pumanan a haya nan den un frustracion y hasta por a scucha e gritonan entre nan hungadonan, tambe di nan capitan Mylene Croes, un hungado cu sa duna bon ehempel cu su mes wega, tratando na lanta su ekipo foi sonjo y encontra cu nan wega cu a duna nan asina hopi trofeonan.

 

E curason di campeon a cuminsa bati atrobe y na minuut 17 e gol pa aumenta bentaha a yega den persona di Jennifer Henao pa hasi e wega 2-0 pa Britannia.

 

Casi na final di e prome half Britannia a haya otro chens cla pa aumenta e score, unda Jimena Borja a hera pon’e bala den net, pero asina e prome tempo a yega na su fin, Britannia ariba 2-0, apesar cu La Fama tabatin un mihor prome tempo den tur sentido di palabra, except den e anotacion.

 

Pa cuminsa e di dos tempo e Lady Pumanan a bin mas organisa den medio campo, ganando y wantando bala cu bon combinacion entre Croes, Henao, Douglas y Borja, creando situacionan di peliger tras di bon yegadanan, unda e portero balente di La Fama, nan capitan Hadassah Kock, mester a traha hopi duro pa evita cu Britannia a aumenta nan bentaha ainda mas.

Asina mes Mylene Croes na minuut 25, cu su pia links di oro, den un bunita tiro di distancia a anota e gol pa Britannia bai ariba 3-0, nos ta papiando kizas di e mihor pia links den futbol di Aruba, y mi kiermeen den tur division di e deporte rey riba nos isla, ken no ta corda su gol olimpico den e final di Division Damas di tres anja pasa?

 

Britannia, e mihor ekipo den di dos tempo, a domina e wega cu miho posesion y mas yegada, La Fama a perde nan control di e prome tempo, hungando awor den contra-golpi, cu algun yegada pero atrobe sin concretisa.

 

E golpi fulminante a yega na final di wega na minuut 40, unda Jennifer Henao mes a bolbe anota pa hasi e wega 4-0 p’asina cementa e titulo aki pa SV Britannia, cu un biaha mas ta campeon!

 

E dos hungadonan cu a sobresali den e partido aki ta Jennifer Henao mes y Mylene Croes.

 

Prome cu e partido final aki den e prome tanda; RCA a gana Estrella 3-0 den e partido p’asina keda cu medaya di brons cu golnan di Christy-Ann Brete (‘07), Josrine Saladin (‘40) y Jealine Angela (‘41).

 

E premio di goal-getter (Sapato di oro) den e torneo aki a bai pa dos hungado cu a keda empata cu 5 gol cada un, Ashley Douglas di SV Britannia y Shadira Croes di SV La Fama.

 

E premio pa miho portero (Golden Glove) a bai pa Lyxienne Loopstok di SV Dakota.

 

E premio di MVP (e mihor hungado di e torneo) tambe a bai pa Shadira Croes di SV La Fama.

 

Un premio special a wordo entrega na Jennifer (Amy) Henao di SV Britannia pa su curashi y balentia pa recupera y bolbe hunga futbol despues di lesionan hopi grave debi na un accident.

Masha pabien na Britannia cu nan titulo di campeon, La Fama como sub-campeon, y tambe na tur e ekiponan di futbol femenino cu a participa den e torneo aki.

Click to comment

Leave a Reply

Your email address will not be published. Required fields are marked *

More in Division Damas