Connect with us

Division Honor

Resumen siman 2 torneo AVB 2021

DAVYNE CROES/Futbol Aruba via DAC Image

E siman dos di e torneo AVB a regala nos weganan cu hopi gol y futbol atractivo pero tambe weganan sera y hopi fisico cu a bai foi man. Esey ta futbol, e ta sigui ta un ‘deporte di contacto’ y cosnan sa pasa.

Ata ki nos resumen di e partidonan.

Nacional vs RCA

E dos ekiponan aki ta representa e gran rivalidad di Aruba su futbol den e ultimo decada. Den e wega aki den siman 2, RCA y Nacional a bataya pa 90 minuut pero sin cu niun di dos oncena por a yega na anota un gol.

Un partido “aspero” y fuerte tacticamente entre dos ekipo cu conoce otro hopi bon, pero e partido no tabata loke a spera di e dos clubnan aki y na final a keda den un “stalemate” cu e anotacion di 0-0.

Un partido mas bien traba y cauteloso na mesun tempo, unda ambos ekipo a yega cerca algun biaha pero sin anota gol. E ekiponan a parti punto y asina tambe keda cu 4 punto cada un riba tabla di clasificacion tras di e lider La Fama.

Nos “King of the Match” p’e wega aki ta comparti entre Mark Jacobs di RCA y Emerson Leocadio di Nacional.

Nacional 0 – RCA 0

RCA lo enfrenta Britannia riba Diasabra 8pm y Nacional lo enfrenta Dakota 6pm riba e mesun dia.

Nacional

Bubali vs Dakota

Un partido unda Bubali a yega cu mas ‘intencion’ cu den e partido previo pa busca e tres puntonan y na cuminsamento di e partido a bai igual igual cu e “Amarillonan” apesar di menos posesion di bala.

Toch ta Dakota mes a habri marcacion na minuut 28 unda cu nan a toca bala hopi bon haciendo 15 pasenan sin interupcion for di p’atras cuminsando cu Daryl Nelson den defensa y a termina cu Daniel Briceño combinando cu Fernando de Sousa den un ‘un-dos’, unda den e ultimo pase e bala a cai net riba pia robes di De Sousa den area penal pa fusila portero Bernardo Maduro p’e 1-0, un bunita desempeño di ekipo, e gol di siman.

Na minuut 49 Deion Geerman ta conecta cu Fernando de Sousa atrobe unda e ta scapa bai den area penal pa hasi e wega 2-0 pa Dakota.

Pero e partido no a sigui mucho facil pa Dakota for di e punto ey ya cu Bubali a cuminsa bataya mas duro y na minuut 65 Rensley Tromp, cu tabatin un bon partido, a hasi un pase largo net riba cabes di Ruben Escalona cu ta kop y anota asina e gol di corta bentaha, 1-2.

Na final Dakota a logra wanta e resultado di 2-1 pa nan tres punto. Nos “King of the Match” ta Fernando de Sousa sin duda.

Bubali 1 – Dakota 2

Bubali lo enfrenta Estrella Diasabra awor 6pm y Dakota lo enfrenta Nacional Diadomingo 6pm.

Bubali

6Ethan Tromp 87'
8Lionel Webb 90+2'
30Raul Morales 30'
34Ruben Escalona 65'
  1 2 1

Dakota

7Fernando de Souza 28', 49'
22Jesus Villamizar 84'
  2 1

La Fama vs Estrella

E dos ekiponan cu a causa sensacion e siman prome a topa otro den un partido hopi interesante atrobe.

La Fama ta un ekipo efectivo, bon forma cu hungadonan di hopi experiencia, inteligencia, cu bon maneho di bala, apesar cu e velocidad no t’ey necesariamente, pero ken ta conta esey? nan sa caricia bala!

Estrella, un ekipo hoben, cu hopi talento, no por a hunga na paar di La Fama pa mayoria di e wega, nan a wordo “maneha” mas bien, nos no a mira e “magia” cu e ‘Naranhadanan’ a mustra contra Dakota (den di dos tempo) e siman prome (of kizas den e ultimo kwart di e wega aki).

Valdo Leocadio, miembro di e muraya berde den volante hunto cu Claudio Cavalcante y Jeyson Mundarain, ta habri marcacion pa La Fama na minuut 12 caba, pa asina dicta e ritmo di e partido aki.

Na minuut 31, apesar di e dominio di La Fama, e goleador di e club di Santa Cruz, Trevor Faro, ta empata e wega pa Estrella, pero net tres minuut despues a toka turno na e goleador di La Fama, Jaydon Dania, pa aumenta bentaha p’e savaneteronan, 2-1.

Na minuut 38 ta Jaydon Dania atrobe ta anota pa La Fama aumenta e score na 3-1, sigui pa su gol di penalty despues di halftime na minuut 53 pa hasi e wega 4-1 pa su “hat-trick”.

Estrella a cuminsa reacciona toch, unda na minuut 61 Naibert Elizabeth ta anota e gol pa nan corta bentaha di La Fama na 2-4.

Ora cu nos a pensa cu un otro “comeback” di e santacruseronan a cuminsa, ta La Fama mes ta anota na 70, pa medio di Occean Samson, pa hasi e wega 5-2 y ta Samson mes ta anota atrobe net 2 minuut despues pa hasi e wega 6-2.

Toch Estrella ainda no a baha cabes, purbando tur posibel, tiki laat, na minuut 90+2 unda Trevor Faro ta anota pa hasi e wega 3-6 y na minuut 90+4 Faro ta anota di punto penal pa su di dos “hat-trick” consecutivo den e torneo aki pa hasi e wega 4-6, un gran reaccion di Estrella pero sin suficiente tempo.

E goleador di La Fama, Jaydon Dania, ta e “King of the match”.

La Fama 6 – Estrella 4

Siguientemente La Fama ta hunga contra Caravel Diadomingo 8pm y Estrella contra Bubali riba Diasabra pa 6pm.

La Fama

10Valdo Leocadio 11'
57'
25Jean D. Octavius 55'
29Jaydon J.R. Dania 33', 38', 53'
21Samson D. Occean 70', 74'
  6 2

Estrella

10Trevor Faro 31', 90+2', 90+4'
15Naibert Elisabeth 61'
74'
17Daniel Geerman 80'
21Francois Pancho Croes 64'
  4 3

Britannia vs Caravel

E ultimo partido di siman tabata entre Britannia y Caravel, dos ekipo cu ta busca pa sali for di bom di tabla.

E Piratanan di Angochi ta un ekipo organisa, compacto y hopi fisico, no ta nada facil pa gananan, esey a keda demostra den e wega anterior contra Nacional. Britannia un ekipo cu ainda ta buscando nan “flow” despues di un bon Copa Betico 2021 unda nan tabata hopi bon te cu den kwart-final (nan perde den semi-final contra La Fama).

E partido a cuminsa cu hopi bon toke y velocidad di ambos banda y tabata promete hopi.

Na minuut 17 e hoben delantero Wesley Illes ta manda Britannia ariba 1-0. Despues e accion nan a sigui basta balansa, tur dos ekipo hungando nan wega man’e a spera, pero cu un cierto tension den aire.

Na minuut 37 un incidente entre dos hungado, un hugada normal di foul a caba den conducta violento unda cu referee a parti cuater (4) carchi cora den un solo biaha!

Apesar cu e arbitro a cumpli cu su deber, e wega a wordo afecta masha hopi mes den calidad y cantidad. E partido a sigui dilanti cu hopi espacio y desgaste fisico descumunal.

Britannia a probecha di nan juventud y velocidad y na minuut 44 ta e defensor William Pardo a aumenta e bentaha di e Pumanan cu su gol net prome cu halftime.

E partido mes a sigui bon sin mas incidente serio, mi ta kere cu e hungadonan mes tabatin miedo di hunga cu menos hende ainda. En total a wordo otorga 4 carchi Cora y 4 carchi Geel den e wega.

Den tempo adicional na minuut 90+5 ta Thionne Oduber a pone punto final n’e wega pa e victoria di Britannia.

E “King of the Match” ta e hoben batayador y trahado di full cancha, Marcus Portier.

Britannia 3 – Caravel 0

Den siman 3 Britannia lo hunga contra RCA Diasabra anochi pa 8pm y Caravel na su turno lo hunga contra e lider La Fama Diadomingo 8pm.

Britannia

2Ericson Croes 37'
6Johnatan Ruiz 90+2'
8Moises Castro 37'
14Wesley Illes 17'
21William Prado 44'
84'
18Thionne Oduber 90+5'
  3 2 2

Caravel

Click to comment

Leave a Reply

Your email address will not be published. Required fields are marked *

More in Division Honor