Siman 3 a defini e tabla di clasificacion di torneo AVB, nos tin un lider absoluto.

Un fin di siman cu a brinda nos varios weganan sumamente interesante y atractivo cu masha hopi gol, siguientemente e resumen di siman 3.

Estrella vs Bubali

Den e prome ora Diasabra Estrella a topa cu Bubali y a produci un bunita wega di futbol, un ehempel di kiko deportivismo ta representa.

Estrella tratando di encontra e magia cu nan a presenta den e segundo mitar di e wega contra Dakotan den siman 1, y Bubali na su turno en busca di nan prome puntanan pa sali foi sotano di e tabla di clasificacion.

Un partido bon nivela unda e orguyonan di Nort a bin c’un futbol dinamico, cu mas presencia y control den medio-campo, sigur un progreso grandi for di siman 1 di e torneo unda nan a perde 1-7 cu e campeon di Aruba RCA. E ekipo nortero ta haciendo mas y mas uso tambe di nan talento hoben, na paar cu Estrella cu tambe ta den un fase similar sacando fruta di e futuro di futbol rubiano.

E partido di ‘banda pa banda’ a produci e prome gol na minuut 23 den pia di ken mas? Trevor Faro, e goleador di e torneo aki te n’e momentonan aki, cu dos wega sigui cu “hat-trick”, awor ta anota su di shete gol den tres wega pa duna Estrella e leve bentaha.

Bubali no ta ‘perde pa gana’ y ta press y encontra nan mes cu nan gol net prome cu halftime pa medio di e hoben Roland Tromp cu ta deposita e bala den net for di un pase di Sjon Pieters den un contra-golpi efectivo.

Den e etapa complementario e partido a keda mesun atractivo y deportivo, un wega cu hopi ritmo, llegada y mas gol.

Ta Bubali ta pika bai ariba den e marcacion na minuut 69 despues di e gol di Edmar Tromp cu apenas a caba di subi riba tereno algun minuut nan prome.

Estrella ta responde insistiendo y tirando dilanti cu bunita futbol di e talentonan hoben cu a drenta den wega man’e Maximilian Lopez, hunto cu Xion y Egbert Tromp, pero no a logra haya e gol di empate, tur cos tabata parce cu ta Bubali lo hasta bai cu e tres puntonan pa subi riba tabla, pero e dam a kibra alfin na minuut 86 unda cu Xion mes ta empata e wega pa e ekipo “oranje”.

Despues di un bataya campal pa logra e victoria, toch e partido a termina den un empate, unda tur dos ekipo a merece nan punto, un resultado husto despues di un exhibicion di bon futbol, sigur un candidato pa e wega di siman.

E “King of the Match” ta comparti entre Rensley Tromp di Bubali pa su wega impecabel, un muralla den defensa di Bubali cu hasta sa yuda den atake, y Trevor Faro e goleador hoben cu ta core ariba abou pa ataka y tambe yuda defende p’atras ora tin mester.

Score final: Estrella 2 –  Bubali 2

Estrella lo midi forsa cu Britannia dia 13 di Juni pa 6:00pm y Bubali lo hunga contra Nacional dia 13 di Juni pa 8:00pm den e “Derbi di Nort”.

RCA vs Britannia

E Tricolornan a bin di un partido “opaco” contra Nacional e siman prome unda nan a perde e liderato riba tabla na man di La Fama despues di e empate di 0-0 y lo kier a bai cu tur tres punto pa un biaha mas recobra e puesto number un.

Britannia cu a sa di logra nan prome tres puntonan den siman 2 contra Caravel den un wega hopi accidenta cu varios carchi cora y awor kier competi pa top cuater.

RCA tempran ya a mustra nan poderio y superioridad riba Britannia apesar cu esey ainda no tabata refleha den e anotacion. Britannia a haya masha dificil pa penetra den zona di peliger y los tironan peligroso riba e porteria di Eric Abdul.

RCA mes a cuminsa “build up” momentum y ‘bai di poco pa mas’ gradualmente segun e tempo tabata core, atakando di p’atras for di un defensa bon ancra pa Mark Jacobs y Jean Pierre Fingal, di berdad nada mes, ni biento, por a pasa entre nan dos.

E prome gol a cai na minuut 33 pa medio di Ronald Gomez for di un pase di Jhon Silva cu tabatin un partido excepcional  A+.

Despues un momento di frustracion a causa un clash riba cancha y a resulta den un carchi cora pa cada ekipo, e incidente tabata mas bien un peso negativo mas p’e Pumanan.

Den segundo tempo ta Jhon Silva mes a encarga pa hasi e score 2-0 pa e campeon nan di Aruba na minuut 53 pa practicamente sera e wega ya cu Britannia djies no tabatin suficiente municion pa bataya cu RCA cu tabata riba un “cruise control”.

Asina e partido a termina den un solido victoria p’e Tricolornan di Solito cu awor a sera 6 punto pa tuma over e top di tabla, apesar cu tabata provisional p’e anochi ey.

Nos “King of the Match” ta Mark Jacobs cu a sorprende cu un wega perfecto den e rol di defensa central, na un dado momento e tabata cuminsa atakenan y tambe sali bai den atake su mes pa regresa liher y defende atrobe, un tipo di “Libero”, sensacional.

Score final: RCA 2 – Britannia 0

RCA lo enfrenta La Fama pa e top di tabla di posicion dia 12 di Juni pa 6:00pm y Britannia lo hunga contra Estrella dia 13 di Juni pa 6:00pm.

Dakota vs Nacional

Un partido cu semper ta saka e mihor di e hungadonan den e rivalidad aki no a defrauda.

E partido a cuminsa di biaha cu e dos ekiponan midiendo otro, preparando pa hasi nan moveshon di un ora pa otro. Toch gran parti di e prome mitar tabata ‘di banda pa banda’ despues di e comienso un poco timido y calcula.

Ora cu tur hende a kere cu halftime lo bai aden empata na cero, na minuut 45 Randell Gross di Dakota ta sali den un sprint for di bastante atras den su mesun area pa yega na e rand di e area penal di Nacional y ta cambia e bala pa su pia drechi y los un tiro den nobenta grado unda Jose Cruz no por a yega, un joya di gol pa pon’e Dakota ariba 1-0.

Den di dos tempo Dakota cu mas insistencia ofensivo ta haya un penalty na minuut 61 unda Fernando de Sousa ta pon’e bala den net pa e 2-0.

Nacional no ta baha man y ta sigui insisti y na minuut 78 ta Leonardo Pulido ta hasi su magia atrobe y ta anota e gol di corta bentaha for di un tiro liber na rand di area penal, bai den 90 graden tambe pa hasi e wega 1-2.

Despues di un “toma y dame” entre e dos rivalnan e wega ta keda 2-1 na e pitaso final di referee Matos.

Dakota ta bai cu e victoria y tres punto pa acumula un total di 6 punto pa drenta den e top 3 riba tabla. Nacional ta keda cu 4 punto na di cuarto lugar.

Score final Dakota 2 – Nacional 1.

E “King of the Match” ta Randell Gross pa su joya di gol y tambe pa su desempeño como e “spark plug” di e dakoteronan.

Siguientemente Dakota lo enfrenta Caravel dia 12 di Juni pa 8pm y Nacional lo hunga contra Bubali dia 13 di juni tambe pa 8pm.

La Fama vs Independiente Caravel

E speransa berde di Savaneta cu dos victoria consecutivo pa pon’e nan den top di tabla cu 6 punto a enfrenta Caravel cu ainda ta sin punto den e torneo.

E partido a cuminsa y pa gran parti di e prome tempo tabata bastante igual, hopi competitivo mes.

Halftime a bai aden 0-0 y cualkier cos por a pasa.

Un cos si cu a resalta ta e hecho cu Caravel tabata falta hopi hungado riba banki den rol di suplente, importante, mas ainda den un partido fisico man’e esaki.

Na minuut 63 ta Jaydon Dania, e hoben talento, e sensacion di momento den nos futbol, hunto cu Trevor Faro di Estrella, a habri anotacion p’e 1-0.

Caravel no ta keda man crusa y ni dos minuut despues na minuut 65 ta empata e partido pa medio di un gol di Gabriel Alvarez p’e 1-1.

La Fama cu awor a cuminsa domina den e aspecto fisico ta haya un gol na minuut 77, atrobe di Jaydon Dania, pa su “brace” di e anochi (su di shete gol den tres wega), p’e 2-1 pa duna La Fama e bentaha y tambe a victoria final pa nan 3 puntonan y e derecho di yama na mes e ‘lider di e torneo AVB 2021’ aki.

Jaydon Dania ta nos “King of the Match” pa su dos golnan cu ta pon’e awor cu un total di 7 y empata cu Trevor Faro, como lider di goleador. Remarkabel cu dos talento hoben “homegrown” ta e “goalgetternan” di nos futbol di nivel mas halto.

Score final La Fama 2 – Caravel 1

Siguientemente La Fama lo enfrenta RCA p’e number un riba tabla dia 12 di Juni pa 6pm y Caravel lo hunga contra Dakota dia 12 di Juni pa 8pm.

E tabla di lider di Torneo AVB 2021 ta como lo siguiente: La Fama ta comandando cu 9 punto, sigui pa RCA cu 7, Dakota cu 6, Nacional cu 4 (GD 0), Estrella cu 4 tambe (GD -1), Britannia cu 3, Bubali cu 1 y Caravel cu 0.