Connect with us

Division Honor

Resumen di siman 2 di Division Honor – clash di dos titan di nos futbol

Davyne Croes/Futbol Aruba via DAC Image

Riverplate vs Caravel

E di dos siman di futbol a habri cu e partido entre ASV Riverplate y SV Independiente Caravel.

E oncena di Playa p’abou a bin di un victoria convincente di 5-0 contra Bubali den siman 1, unda cu Carlos B. Quandt y Shakame Stamper cada un cu un “brace”( dos gol cada un) y unda cu e capitan Carlos L. Quandt a sobresali den medio campo di River.

 

Caravel na su turno a empata na tres gol den nan partido inicial contra Estrella den e derby di Santa Cruz. E Piratanan di Angochi a duna bataya na Estrella unda cu e Naranjadanan mester a lucha te cu den tempo adicional y ta te den minuut 93 a empata e partido p’asina parti punta.

 

Den e partido aki Hugo Robert a anota na minuut 16 pa Caravel tuma bentaha inicial, Riverplate 0 – Caravel 1.

 

Shakame Stamper na minuut 25 ta anota su di tres gol di e campeonato den dos wega pa empata e partido, Riverplate 1 – Caravel 1.

 

Prome cu halftime a bai aden ta Caravel ta bai ariba atrobe na minuut 40 cu e gol di e medio campista Rauly Wiersma, Riverplate 1 – Caravel 2.

 

Despues di un “toma y dame” pa gran parti di e di dos tempo, cu Riverplate buscando e empate, ta Caravel mes ta amplia bentaha despues di e gol agonico na minuut 82 di Devin Eman, cu a busca y bataya pa al fin logra e bentaha suficiente pa sigura e tres puntanan pa e Piratanan.

 

Pero pa Riverplate e wega nunca a caba ainda y a sigui busca na corta e bentaha di Caravel y tambe un ultimo suspiro pa por lo menos parti punta, y al fin a logra nan di dos gol di e wega na minuut 88 den persona di Jason Carolina, faltando ainda algun minuut mas pa bai den wega, Riverplate 2 – Caravel 3.

 

Pero “helaas” no tabata asina ya cu Caravel a wanta te final pa gana e wega 3-2 y tres punta, bon desempeño di ambos oncena.

 

Mencion special pa Raizel Jansen atrobe, despues di su hazaña den siman 1 bou di e tres latanan y tambe Hugo Robert, nos “King of the Match” ta Devin Eman, no solamente p’e gol di victoria casi na final pero tambe pa un trabou incansabel dilanti, practicamente su so batayando e defensornan di River, gana bala, wanta bala, y semper un peliger ey dilanti apesar di no a cuminsa e partido riba cancha.

 

Den siman 3 Riverplate ta bai hunga contra Britannia y Caravel contra RCA.

 

RCA vs Bubali

RCA cu a keda foi final den e ultimo campeonato na un manera inespera, kibrando asina e racha sin perde di mas cu dos anja largo, awor cu staff tecnico nobo, di berdad “echt” algo di RCA, “standard, expectativa y exigencia” n’e club tricolor ta halto, y kizas ta p’esey nan ta e club mas ganado di Aruba, awor cu Maurice Escalona na mando. Hopi hungadonan clave a bai, pero e club aki nunca tin etapa di renobacion, ta gana mester gana semper.

 

Bubali si ta den un etapa dificil, nan a perde hopi hungadonan clave, y ta practicamente hungando cu un cuadro hubenil cu algun veteranonan. Despues di a perde 0-5 den nan prome partido contra Riverplate, un ekipo cu a haya un invitacion pa join Division Honor foi Division Uno, awor mester a lanta cabes di biaha pa enfrenta RCA, un ekipo hambra y rabia.

 

Sorpresivamente RCA ta keda cu dies homber riba cancha despues di e carchi cora trempan pa Chito v/d Biezen, na minuut 4 caba. Asina mes no a dura mucho pa RCA habri anotacion den e partido, na minuut 7 den un di e blitz nan impresionante, ta Jhon Silva, e ex di Bubali y e actual goleador di Division Honor, cu su di cuater gol di campeonato, despues di su “hattrick” den siman 1, unda el a parti honor di “King of the Match” den e partido ey cu Jeamir Howell Brokken. RCA 1 – Bubali 0.

 

Asina mes RCA dominando e wega cu posesion di bala y llegada trei llegada riba porteria di e Orguyonan di Nort no a anota atrobe te cu minuut 28 unda e incansabel Albert “Killer” Francis a anota pa hasi e wega RCA 2 – Bubali 0, asina halftime a bai aden.

 

RCA a sigui ataka y Bubali sin contesta, mester a wanta mas ola tricolor. Na minuut 59 y 63 ta Jhon Silva mes ta anota su siguiente dos golnan pa otro “hattrick” atrobe p’e puntero di RCA, increíbel! RCA 4 – Bubali 0.

 

Jefferson Lopes ta cementa e victoria pa RCA na minuut 77 pa hasi e partido; RCA 5 – Bubali 0.

 

Otro victoria pa RCA cu awor ta comanda e tabla di e campeonato cu 6 punta y “doel saldo” di +10, niun gol den contra ainda.

 

Ta logico cu e “King of the Match” ta bai pa Jhon Silva pa su “hattrick” (di dos den dos wega), pero, mencion special tambe pa e liderasco y wega di Jeamir Howell Brokken den medio campo di RCA, un biaha mas.

 

Dakota vs Nacional

Nos “partido di siman” tabata entre e dos gigantenan aki di nos futbol, e campeon nan di Aruba, Deportivo Nacional, y e di dos club cu mas campeonato na Aruba, SV Dakota.

 

E campeon nan a cuminsa e campeonato cu un empate na dos gol contra Britannia den siman 1, unda cu e Dragon nan a demonstra forsa apesar di tin un banki cu no ta mucho profundo, Britannia mester a lucha te den tempo di descuento pa logra e empate, Nacional tabatin tur chens pa wanta e resultado y bai cu tur tres punta, pero, e Pumanan tabata hopi hambra.

 

E partido aki a cuminsa hopi tenso, cu hopi velocidad pero poco precision den e prome instancianan, un partido igual – igual. Despues di hopi atake y contra-atake, ta Sebastian Montoya, den su prome anja cu Dakota, na minuut 34, ta anota pa hasi e wega Dakota 1 – Nacional 0.

 

No a dura mucho pa Nacional responde, y responde duro, cu nan gol na minuut 41, nada mas y nada menos di Fladimy Francois, e hungador di momento di e Dragon nan di Nort, Fladimy ya a sali e “King of the Match” den e siman anterior unda el a score dos biaha pa su ekipo.

 

Net dos minuut despues na minuut 43 ta Ricky Hodge cu su gol ta manda Dakota ariba net prome cu halftime, Dakota 2 – Nacional 1.

 

Despues di halftime e wega a man’e coi un ritmo, pero un ritmo hopi atractivo mes, un futbol di banda pa banda, hopi competitivo mes, claro, tabatin hopi carchi tambe, incluyendo un carchi cora pa Charles de la Cruz, pero casi na final di e wega, e wega no tabata sushi, djies hopi intenso, hopi fisico, pero e golnan tabata piesanan di joya.

 

Na minuut 62 Nacional ta empata e partido, un gol di Fladimy Francois atrobe, su di cuater gol di e campeonato. Fladimy a sa di probecha di e situacionan. Cu e astro y capitan di Nacional, Devis Oliveros, hayando hopi “man-dekking”, man’e tabata e caso den e wega aki unda Nickenson Paul a practicamente lijm su mes na Devis, pero Devis halando defensa ta crea oportunidad p’e otronan den e ekipo Dragon.

 

E wega ta sigui empata te na minuut 82 unda cu Sebastian Montoya ta anota un “bellesa” di gol di tiro liber pa duna e victoria pa su ekipo “Amarillo” (cu awe a hunga na blanco cu preto cu meya hel). Dakota 3 – Nacional 2.

 

Dakota a proteha e bantaha aki te cu pitaso final di referee De Leca pa e gran victoria aki cu a duna nan 6 punta pero den di dos luga riba tabla pa via di “doel saldo” (+3 contra +10 di RCA).

 

Nacional ta keda un ekipo peligroso cu semper ta bai bataya te final, pero, no lubida ainda falta hopi pa bai den e campeonato, y e Norteronan sa di ‘bai di menos pa mas’.

 

Mencion special pa e hoben portero Jahmani Eisden, Ricky Hodge di Dakota, Fladimy Francois y Leo Pulido di Nacional, pero nos “King of the Match” ta comparti pa Sebastian Montoya y Nickenson Paul di e abehanan di Dakota.

 

Den siman 3 Dakota lo hunga contra United y Nacional lo hunga contra Estrella.

 

La Fama vs United

Den e ultimo dia di partidonan di Division Honor, e sub campeonan di Aruba (y tambe di Copa Betico 2021), SV La Fama, a midi forsa contra Sport Club United.

 

La Fama a bin di perde un wega agonico y controversial contra Dakota den siman 1, United na su turno a haya derota grandi na man di RCA.

 

Crister Cicilia ta habri marcacion pa La Fama na minuut 28, La Fama 1 – United 0.

 

Na minuut 44 ta Enzon Parra ta aumenta bentaha pa e club di Savaneta, La Fama 2 – United 0.

 

Atrobe dos minuut despues, net prome cu halftime, Enzon Parra mes ta anota atrobe pa su “brace”, La Fama 3 – United 0.

 

Esey tambe tabata tur e golnan di La Fama den e partido. Den e di dos tempo United a sigui busca y nan a anota nan prome gol na minuut 60 pa medio di Daniel Perez, La Fama 3 – United 1.

 

Despues ta Juan David Geerman ta anota pa United na minuut 82, hasiendo e wega hopi interesante cu un poco di tempo ainda pa busca e empate y un punta. La Fama 3 – United 2.

 

Un bon desempeno di United den di dos tempo pa duna la Fama un spanto, pero e partido ta termina cu e anotacion di La Fama 3 – United 2, pa nan tres prome puntanan den e campeonato hoben aki.

 

Mencion special pa Enzon Parra pa su dos golnan, nos “King of the Match” ta Sylvester Schwengle pa su liderasco y trabou incansable p’e Speransa Berde di Savaneta.

 

La Fama siguientemente ta hunga contra Bubali y United ta bai contra Dakota den siman 3.

 

Estrella vs Britannia

Estrella mester a bataya duro cu Caravel den e derbi di Santa Cruz den siman 1 pa logra un punta, mientras cu Britannia tambe mester a bin di atras te den tempo di descuento pa empta cu e campeon Nacional, pa un punto di oro.

 

Estrella cu un ekipo hoben den renobacion y Britannia cu a reforsa masha hopi mes p’e anja aki y tur cos ta parce cu nan tin hopi ambicion mes pa yega leu den e campeonato.

 

E partido tabata un “stalemate” den gran parti di e prome tempo, golnan no tabata cai pa nada.

 

Na minuut 32 Estrella ta keda cu dies homber despues di e expulsion trempan di Travis Faro, pero e Naranjadanan a keda den wega y ta te na minuut 44 e prome gol di partido ta cai pa medio di Daniel Linscheer pa hasi e wega Estrella 0 – Britannia 1, y asina halftime a bai aden.

 

Apesar cu Estrella a wanta mas cu nan por cu dies hungado, e dam a cuminsa kibra despues di halftime, e golnan di Britannia a cuminsa cai un trei otro cuminsando na minuut 50 pa medio di e motor di e Pumanan, Luis “Coco” Estrada pa hasi wega Estrella 0 – Britannia 2.

 

Despues e “diluvio” ta sigui cu gol di Ethan Tromp na minuut 52, Estrella 0 – Britannia 3.

 

Juel Balentien ta anota net un minuut despues na minuut 53 pa hasi e wega Estrella 0 – Britannia 4.

 

Luis Estrada ta bolbe anota pa su “brace” na minuut 55, Estrella 0 – Britannia 5.

 

Roderick Lampe ta anota na minuut 70 pa hasi e wega Estrella 0 – Britannia 6.

 

Na minuut 74 Juel Balentien tambe ta bolbe anota pa su “brace”, Estrella 0 – Britannia 7.

 

Na minuut 86 Estrella ta haya su gol di honor den persona di Norwin Werleman, Estrella 1 – Britannia 7.

 

Esey tambe tabata e resultado final di e partido aki, cu tabata promete hopi pero a resulta den un derota grandi p’e Naranjadanan di Santa cruz. Cu e resultado aki Britannia ta subi bai den di tres lugar riba tabla cu cuater punta.

 

Mencion special pa Jonathan Ruiz pa su desempeño consistente riba cancha y tambe Juel Balentien pa su dos golnan. Nos “King of the Match” ta Luis “Coco” Estrada pa su “brace” y tambe pa su wega incansable.

 

Den siman 3, Estrella lo topa cu Nacional y Britannia cu Riverplate.

 

Te otro siman.

Click to comment

Leave a Reply

Your email address will not be published. Required fields are marked *

More in Division Honor