Connect with us

Division Honor

Resumen di siman 3 den Division Honor, ‘un siman di paridad’

Apesar cu e siman a habri cu un partido cu anotacion abulta den e prome fecha, e resto di e fin di siman tabata bastante pareu, unda ekiponan den bom di tabla a cuminsa resona cu nan wega y a duna hopi bataya y a produci weganan hopi competitivo. E campeonato aki a bira bastante interesante, apesar cu e dos poderosonan di nos futbol RCA y Dakota ta keda invicto cu tres victoria den tres wega y a cuminsa amplia bentaha riba tabla di clasificacion, pero e bataya p’e top 4 y degradacion ta bastante cayente awor.

 

United vs Dakota

Den e prome partido di siman 3, United, un ekipo cu a caba di bolbe den Division Honor, un club cu ta buscando nan caminda den e top liga di Aruba, no ta algo facil, ta enfrenta Dakota, un ekipo cu ta casi semper den top cuater riba tabla y ta un “shoe-in” pa bai playoffs tur anja. E “amarillonan” despues di nan prome gol mester a bataya duro y ta te na minuut 69 pa por a amplia e bentaha pa medio di un penalty y carchi cora pa United. Despues e dam di United a kibra y e partido a caba den un derota grandi p’e ekipo, cu awor ta ainda sin punto den e campeonato aki.

 

E gol inicial a cai na minuut 19 pa Dakota pa medio di Joshua Gross y asina mes e prome tempo a termina tambe cu e score di United 0 – Dakota 1.

 

Den comienso di e di dos tempo Dakota a hay’e ta bataya duro contra un United hopi terco mes cu a wanta e abehanan te cu minuut 69 unda Dakota a haya un penalty y unda tambe Miguel Suarez di United mester a bandona cancha despues di un carchi cora. Fernando de Sousa den su wega di regreso a anota e gol di penalty pa hasi e partido United 0 – Dakota 2.

 

Despues ta te na minuut 81 cu Joshua Gross ta bolbe anota den un contra golpi pa su dupla den e partido aki, United 0 – Dakota 3.

 

E ultimo 10 minuut di wega ta unda e Dakoteronan a demonstra nan forsa fisico pa anihila United, cu golnan un trei otro di Ricky Hodge, cu un gol clinico na minuut 84, sigui pa golnan di Sebastian Montoya, e top golero di Dakota, na minuut 86 y 89 pa su dupla, y e ultimo gol na minuut 90 pa medio di e hoben Clyvenson Grandin, p’e resultado final di e partido aki,

United 0 – Dakota 7. 

 

Dakota asina ta mantene nan invicto cu 9 punta den tres wega cu un Diferencia di Gol di +9.

 

Nos ‘King of the Match” ta e incansabel batayador den medio campo di Dakota y ademas tambe pa su paar di gol ta Joshua Gross. Den siman 4 Dakota lo topa cu Estrella y United cu Bubali.

Caravel vs RCA

Caravel ta un ekipo di hopi experiencia, bon para riba cancha cu a sabi di acumula 4 punta den e dos prome weganan di e campeonato aki. 

RCA ta un ex campeon cu ta riba un mision serio despues di a keda foi final den e torneo anterior den un manera sorprendente kibrando nan racha sin perde cu ta bai bek mas cu dos anja atras.

 

E prome gol di wega tabata pa RCA na minuut 16 pa medio di e lider di goleador di e campeonato aki, un delantero cu ta na candela, e talentoso Jhon Silva. Caravel 0 – RCA 1.

 

Albert “Killer” Francis, cu a hunga un bon partido dilanti, unda cu el a bataya, recupera y mantene posesion di bala pa su ekipo tricolor, sigur un hungado clave pa nan, a anota e di dos gol na minuut 24 pa hasi e wega Caravel 0 – RCA 2. 

 

Despues tabata turno di Jefferson Lopes pa anota na minuut 34 pa aumenta e bentaha ainda mas, Caravel 0 – RCA 3.

 

Caravel no a baha man apesar di tabata abou den marcacion y na minuut 45+1 ta haya un gol di Theo Texeira pa corta bentaha, Caravel 1 – RCA 3 net prome cu halftime.

 

E partido a sigui bastante competitivo y ta te den minuut 66 RCA ta anota atrobe den persona di e goleador Jhon Silva, un biaha mas, pa hasi e wega Caravel 1 – RCA 4.

 

Mester remarca cu Jhon Silva awor tin 8 gol den 3 wega, impresionante! Un promedio di gol di 2.6 gol pa wega. Ultimo biaha cu nos a wak algo asina tabata Devis Oliveros di Nacional den e campeonato 2019 – 2020, unda e tabatin 14 gol den 6 partido! (2.33 gol promedio pa wega), net prome cu Covid 19 a para e campeonato ey.

 

4-1 pa RCA tambe tabata e resultado final. Nos “King of the Match”, apesar cu e no a anota gol, su rol cu ta mas bien un di recupera, mantene y distribui bala for di “middenveld”, trei un mentalidad dynamico, ta Jeamir Howell Brokken.

Caravel ta enfrenta La Fama, y RCA contra Britannia den siman 4.

Britannia vs Riverplate

Britannia ta un ekipo cu ta en busca pa cosnan grandi e anja aki, cu bastante refuersonan di caliber e anja aki, pero  asina mes mester emfatisa mas bien e regreso di Luis “Coco” Estrada p’e ekipo Puma, kizas esey ta nan “move” mas importante e anja aki.

Riverplate na su turno ta un revelacion den e campeonato y merecidamente ta bolbe bek den e top division di Aruba, un ekipo bon prepara cu hopi promesa cu ta bai duna dolor di cabes na hopi ekiponan grandi si cos sigui asina.

 

Luis Estrada ta habri marcacion den wega aki, su di 5 gol (den 3 wega) caba den e campeonato aki pa duna Britannia bentaha na minuut 10, Britannia 1 – Riverplate 0.

 

E bentaha di e Pumanan di Piedra Plat no ta dura mucho ya cu e ekipo di Playa P’abou pa medio di Shawn Every ta anota, net 6 minuut despues, pa Riverplate empata e partido. Britannia 1 – Riverplate 1.

 

Despues di hopi “toma y d’ame”, un bataya feros tin biaha pero deportivo sin duda, Britannia ta logra anota pa bai ariba den marcacion na minuut 26, un gol di e talento hoben, nan medio campista, Ethan Tromp. Britannia 2 – Riverplate 1.

E partido ta sigui hopi competitivo mes den e di dos tempo te final, unda Britannia tabatin chens di aumenta bentaha, pero, Riverplate tambe na su turno tabatin hopi chens pa empata e wega, un bataya te final, un poco polemico tambe, pero enfin e ta nos ‘partido di siman’!

 

Britannia ta enfrenta RCA, y Riverplate ta hunga contra Nacional den siman 4.

Nacional vs Estrella

E ekiponan aki semper ta brinda nos partidonan excitante, no ta importa den ki nivel cada un ta, algo tin entre e dos ekiponan aki cu cada biaha nan hunga tin “vuurwerk”. E biaha aki e partido a resulta di ta competitivo pero mas bien tenso y hopi bataya.

 

Nacional ta e actual campeon di Aruba, semper nan ta bou di radar den comienso di campanja, pa despues bai “todo por todo”. Nan a bai cuater final caba den e ultimo cuater anjanan. Estrella, un ekipo tradicional y ganado n’Aruba, ta buscando nan gloria bek, e anja aki e edad average di ekipo ta net riba 20, falta ainda e regreso di Pancho Croes, nan lider inspirativo.

 

E prome gol a cai pa Nacional na minuut 11 caba pa medio di Joshua Aguirre. Nacional cu un poco mas dominio den prome tempo mester a bringa hopi pa aumenta nan bentaha, esey a bin na minuut 48 pa medio di nan capitan y heroe di hopi bataya p’e ekipo Dragon di Nort, Devis Oliveros.  Nacional 2 – Estrella 0.

 

Estrella a sigui insisti si, apesar cu Nacional a desperdicia hopi oportunidad di gol, hopi mes, cual a duna Estrella respiro y “believe” cu nan por competi cu e campeon di Aruba. Nacional a perde nan puntero Fladimy François tempran den prome tempo caba pa lesion.

 

Estrella ta haya un penalty na minuut 59 unda Trevor Faro, e goleador hoben di Aruba den e campeonato pasa, ta anota pa hasi e wega Nacional 2 – Estrella 1.

 

Cu hopi tempo ainda Estrella a lansa den atake, pero, Nacional a sabi di wanta e resultado, danki na e tremendo wega bou di e tres latanan di Joshua Muñoz, cu a salba Nacional na algun ocasion pa sigura un victoria mereci y importante pa nan keda den top 4 riba tabla despues di e siman aki.

 

Nos “King of the Match” den e partido aki ta Joshua Muñoz, e portero di e Dragonan di Nort, su bala salba na minuut 53 for di un cabesaso di e hungado di Estrella te cu awor ta e ‘salbada di e campeonato’.

 

Den siman 4 Nacional ta midi forsa cu Riverplate y Estrella ta enfrenta Dakota den e “Clasico di Aruba”. 

Bubali vs La Fama

E ultimo partido di siman 3 a brinda un bon partido, hopi “spannend” entre Bubali, cu ainda ta en busca di punta den un campanja di renobacion y La Fama cu ainda ta buscanda pa cuminsa emula nan hazañanan di e campeonato anterior.

 

Bubali a yega den e siman 3 aki cu un tono hopi diferente mes despues di a perde ambos di nan prome dos weganan cu anotacion di 5-0.Trempan na minuut 10 caba nan sorprende La Fama cu un gol di Jose Monsalve. Bubali 1 – La Fama 0.

 

Ransey Trimon ta empata e partido pa La Fama na minuut 29, Bubali 1 – La Fama 1.

 

Despues e partido ta sigui di banda pa banda, pero ta Bubali ta bolbe bai ariba despues di e gol di John Zarra na minuut 53, Bubali hungando “igual-igual” cu e actual sub campeon di Aruba.

Bubali 2 – La Fama 1.

 

Pero, La Fama bou di liderato di e incansabel Sylvester Schwengle, cu ta parce ta haya un extra pulmon den e di dos tempo, y ta pusha su ekipo dilanti pa busca e empate “at any cost”.

 

Alfin na minuut 88, atrobe despues di un iniciativa di Schwengle foi patras den nan mesun teritorio, ta haya nan salbabida y un punta di oro despues di e gol di Nigel Fingal. Bubali 2 – La fama 2. 

 

E partido ta sigui di banda pa banda, hungadonan sin pulmon, sin pia, un desgaste fisico enorme, asina mes e partido ta termina den un empate y e ekiponan partiendo punta.

 

E “King of the Match” den e partido aki ta comparti entre Michael Tromp, defensa central di Bubali y e motor di La Fama, Sylvester Schwengle.

Den siman 4 Bubali ta enfrenta United y La Fama lo hunga contra Caravel.

Te otro siman!

 

1 Comment

1 Comment

Leave a Reply

Your email address will not be published. Required fields are marked *

More in Division Honor