Connect with us

Division Honor

Siman 4 den Division di Honor a trece sorpresa hopi grandi

E di cuater weekend den e top futbol di Aruba a promete hopi. Cu RCA y Dakota den comando riba tabla di posicion cu Britannia hopi serca trei nan, a keda di wak ken lo establece nan mes como puntero absoluto, ken lo hasi e “move” grandi for di a parti abou di e tabla y con e top cuater lo mustra na final di Diadomingo anochi.

 

RCA vs Britannia

 

E partido di RCA vs Britannia, un partido cu tur hende a spera cu lo bai ta hopi Interesante, e ekipo rank number 1 y e number 3 riba tabla. E ex-campeon di Solito cu tin hopi pa proba y e ekipo cu ta hopi ambicioso e anja aki despues di casi ocho anja sin titulo.

 

Un partido tenso den e prome tempo, cu algun yegada di ambos ekipo, RCA cu un bentaha leve den posesion di bala y mas yegadan skerpi den e ultimo 16.

 

Halftime a bai aden sin anotacion.

 

E partido a bira hopi bon mes den e di dos half c’un “tèmpo” mas halto y mas yegadanan di e dos ekiponan unda cu e porteronan mester a traha un poco mas.

 

Un di dos tempo basta atractivo pero sin cu ningun di dos por a concreta, hasta ora cu RCA a keda cu 10 hungado despues cu Jefferson Lopea a bandona cancha despues di a haya su di dos carchi geel na minuut 68, RCA a sabi di wanta e resultado, e partido un poco “aspero” y hopi tenso te final.

 

Resultado final RCA 0 – Britannia 0. “King of the Match” ta Marc Jacobs di RCA

Den siman 5 RCA ta hunga contra Nacional y Britannia contra La Fama.

Dakota vs Estrella

 

Den mitar di anjanan 60 y pa algun decadanan despues, esaki tabata e ‘gran rivalidad’ den e futbol arubano, “helaas” den e ultimo anjanan e ‘derbi di Aruba’ aki a man’e perde su “mojo”.

 

Dakota ta invicto, cu mesun cantidad di punta cu RCA pero debi na “doelsaldo” ta den di dos lugar riba tabla, y Estrella, cu un ekipo hoben cu na su turno ta batayando pa no keda den bom y mester di mas punta pero urgentemente. 

 

E “amarillonan” ta un ekipo fisicamente bon prepara, di experiencia y cu hopi velocidad, asina mes sorprendentemente nan a cuminsa e partido aki mas bien tocando y rotando e bala hopi bon, y esaki nos a mira mas di nan tambe te cu awor den e campeonato aki.

 

Cos no por a cuminsa peor pa Estrella cu e gol trempan di Sebastian Montoya na minuut 7 caba pa duna Dakota e bentaha, Montoya ta sigur un di e mihor “adquisicion” p’e campeonato aki te cu awor. Dakota 1 – Estrella 0.

 

Despues e partido a sigui cu Dakota hopi mas den control, teniendo e bala for di Estrella, pero no a sa di probecha di e yegadanan di peliger, Estrella a defende bon ora mester, pero ora nan lansa den atake, den contra-golpi ta cu poco hungado, Anwar Kock a traha duro dilanti pero tabatin mester di mas ayudo, pero ya, e schema tabata diseña pa wanta e atakenan di Dakota.

 

Halftime asina mes a bai aden 1 – 0 so p’e Dakoteronan.

 

Den e di dos tempo no a tarda mucho pa Dakota score atrobe, na minuut 55 ta Sebastian Montoya mes, un biaha mas, ta anota su di 6 gol den e campeonato pa hasi e wega Dakota 2 – Estrella 0.

 

Pa ora cu Estrella a cuminsa tira mas dilanti, ya cu nan tabatin mester di hasi esey abou 0-2 den marcacion, nan tabata laga oportunidad atras pa un Dakota cu awor a sinta warda pa contra-ataka cu hopi velocidad. Ta Joshua Gross a anota na minuut 70 pa aumenta e bentaha p’e abehanan, Dakota 3 – Estrella 0.

 

Pa ora cu minuut 84 a yega den un otro penetracion di Dakota den box, Jean Ullyse cu a bataya duro den defensa, ta comete un infraccion y un penalty otorga na Dakota y su mesun exodo tambe di e partido. Fernando de Sousa ta anota pa hasi e wega Dakota 4 – Estrella 0.

 

Esey tambe tabata e resultado final. “King of the match” ta Sebastian Montoya, cu awor ta number dos riba tabla di goleador. Den siman 5 Dakota ta hunga contra Bubali y Estrella contra Riverplate

Sporting United vs Bubali

 

United y Bubali a resulta di ta un bon partido, “spannend”! Ban yam’e e ‘mini derbi di Nort’. United ainda en busca di punta den campeonato aki y Bubali cu a caba di haya nan prome punta den fecha 3 despues di un empate dramatico cu La Fama, awor e ‘orguyonan di Nort’ ta hambra pa mas.

 

E wega a cuminsa ‘igual-igual’, cu ambos ekipo saliendo pa busca gol. Despues di basta intercambio den atake y defensa ta United a haya un free-kick na minuut 23, unda cu Denrick Lopez a anota un hoya di gol cu bala para, di berdad cu ta manera ‘un pitcher di baseball tirando un curva pero cu pia’. United 1 – Bubali 0.

 

Despues di e gol y banjo di awa friew, toch Bubali ta sigui cu iniciativa, awor buscando e gol di empate y nan momento a yega na minuut 37 unda nan puntero Ethan Gumbs ta haya un bala un paar di meter p’afor di e area penal, y den un bira di heup, un “media vuelta” man’e ta bisa na Spanjo, e ta saka un tiro cu ta banja e portero Adryan Donayre p’e gol di empate, otro beyesa di gol. United 1 – Bubali 1.

 

Na Halftime e partido tabata empata na 1-1, pero den di dos mitar ta Bubali a sali mas determina pa ataka y bai cu tur tres puntanan, ta man’e cos United kier a hunga p’e punta di oro ey, defendiendo “todo por todo”.

 

E gol di bai ariba di Bubali a yega na minuut 56 pa medio di Sjon David Pieters.

E gol a drenta despues di un “fast-break” y un pase skerpi dilanti riba pia di Pieters cu a encontra e portero saliendo y e ta loft e bala, di sombre, pa deposita e “esferico” den net pa e bentaha di 2-1 pa su ekipo.

 

Bubali a sigui hambra pa mas gol, cu United awor basta cansa despues di hopi esfuerso pa contene e Orguyonan di Nort y alabes busca na counter pa purba yega n’e gol di empate, pero, “en vano”.

 

E gol pa pon’e e weg riba ijs a cai na final di wega, minuut 98, unda Michael Shawn Figaroa a haya un “foul” den su contra den area penal y e mes ta deposita e bala den net foi punto penal p’e “contundente” 3-1 pa Bubali gana e partido, un partido yen di drama sin duda.

 

Nos King of the Match ta Michael Tromp, e defensor central di Bubali.

Den siman 5 United ta hunga contra Caravel y Bubali contra Dakota.

Riverplate vs Nacional

 

Riverplate a haya un invitation pa hunga den Division Honor e anja aki (for di Division Uno) y nan ta capitalisando riba e oportunidad aki bou tutelahe di e hoben director tecnico Jomar Boekhoudt, cu a rebiba e ekipo di Playa p’abou, nan a hunga hopi bon tambe den tur e prome weganan di a campeonato aki te cu awor.

 

Riba e dia aki nan ta topa cu e campeon di e torneo AVB 2021, Deportivo Nacional.

 

Nacional ta un club di ‘top cuater’ y e unico ekipo cu a bai tur final di campeonato den e ultimo cuater anjanan aki, incluyendo e final di Copa ABC 2019 unda nan a titula campeon tambe.

 

E partido aki a cuminsa den un energia “ferviente”, yen di tension y bon hugadanan. River a mustra trempan caba cu nan ta sin miedo, …sin miedo di e poderoso campeon di Nort.

 

E prome gol a cai na minuut 4 caba, River a sorprende Nacional cu e gol trempan di Carlos B Quandt. Riverplate 1 – Nacional 0. 

 

Hopi lo a pensa cu esey ta cos cu por pasa, un pifia, un lapso mental, pero, Nacional lo bai responde duro toch, y nan a responde!

 

E gol di empate a cai na minuut 22, pa medio di e semper peligroso Devis Oliveros, nan capitan. Riverplate 1 – Nacional 1.

 

Hopi a kere cu Nacional lo a tuma control di e wega “al fin al cabo”, pero, River tabatin otro idea, y a sorprende atrobe, despues di un contra-golpi, net na final di e prome tempo, na minuut 45, Carlos B Quandt ta anota su di dos gol (y cuarto di e campeonato), Riverplate 2 – Nacional 1.

 

E gol di Quandt a drenta net n’e momento cu niun ekipo ta gusta haya gol contra nan, net prome cu halftime, momentum anto di Riverplate.

 

E di dos half a cuminsa cu Nacional cu hopi determinacion y energia, cu posesion di bala, wantando y haciendo tur locual nan mester pa busca e empate, pero e River aki no ta baha man, y despues di varios intento, e Dragon nan no por a horta e momentum bek foi River.

 

Nacional a tira tur cos riba e oncena di Madiki, esfuerso nan no tabata falta, mi ta sigurabo esey. E portero di River, Whilmerd Croes, e hoben cu tabata e pilar cu a preveni mas gol di Nacional, y alfin a kibra nan tambe, nan a dal den un muraya.

 

Mas Nacional no logra den e parti ofensivo, mas peligroso River a bira, unda nan a hasta cuminsa gana mayoria di e siguiente duelonan individual…eynan nos tabata sa caba cu algo significante tabata pasando.

 

E hoben, Jason Carolina, un di e tanto hoben nan den e oncena di Riverplate, a sink Nacional mas ainda na minuut 82 cu su gol pa aumenta bentaha y cuminsa cementa e victoria extraordinario aki. Riverplate 3 – Nacional 1.

 

Pero e stacada final mes a yega na minuut 94, ora cu ta Jason Carolina mes atrobe a anota e gol final y asina manda un salvo pa tur otro ekipo den Division Honor, pa tene cuenta cu Riverplate.

 

E resultado final aki, den e ‘mihor partido di e siman’ 4 a keda Riverplate 4 – Nacional 1. Nos King of the Match ta “sin lugar a duda” e portero hoben di Riverplate, Whilmerd Croes.

 

Den siman 5 Riverplate ta hunga contra Estrella y Nacional contra RCA.

 

La Fama vs Caravel

 

E siman 4 di futbol a yega na su fin cu e partido La Fama contra Caravel. Dos ekipo den mitar di tabla buscando un “spark” pa nan temporada y competi pa e ‘top cuater’.

 

E partido di berdad, bastante pareu hasta riba papel y tambe riba cancha. Dos ekipo cu 4 punta riba tabla n’e momento ey. La Fama e subcampeon di Torneo AVB 2021 y tambe Copa Betico 2021, Caravel un ekipo di experiencia cu bon planteo riba cancha.

 

La Fama cu mihor desempeño trempan den wega a sa di capitalisa di nan mihor yegadanan y na minuut 15 caba ta anota pa medio di Ransey Trimon, e hoben “artillero” cu a anota tambe den e partido previo contra Bubali. La Fama 1 – Caravel 0.

 

Na halftime La Fama tabata ainda den bentaha y apesar cu nan tabatin un mihor prome tempo, e experiencia di Caravel semper ta keda un factor den cualkier wega.

 

E di dos tempo tabata un bastante balansa, cu ambos ekipo cu yegada y chens pa anota, pero, La Fama a desperdicia mas oportunidad cla di gol, mientras cu Caravel a mas bien cuminsa “build up” cu posesion y tokamento di bala, un cierto wega di pasenshi mas bien.

 

Na minuut 64 Caravel alfin ta empata e wega pa medio di Ezra Bosnie, cu ya tin 3 gol den e campeonato aki. La Fama 1 – Caravel 1.

 

Despues di e gol ey di e Piratanan di Angochi, La Fama a man’e cai un poco, nan a perde focus y a cuminsa perde bala mas ainda, e experiencia, pasenshi y energia di Caravel a cuminsa impone.

 

Ora cu tur hende a pensa cu e partido lo a keda empata na un gol pa banda, Caravel a haya un ultimo suspiro cu un atake formal unda Jais Angela atakando foi e flank drechi ta anota un bunita gol agonico, dunando Caravel tur tres punta. La Fama 1 – Caravel 2.

 

E “King of the Match” ta Jais Angela pa su trabou grandi defendiendo y tambe atakando pa su ekipo Pirata, y claro culminando cu e tremendo gol di victoria casi na final y asina Caravel ta drenta tambe den top 4 riba tabla.

 

Siguientemente den siman 5 La fama ta bai contra Britannia y Caravel contra United.

Te otro siman!

 

Click to comment

Leave a Reply

Your email address will not be published. Required fields are marked *

More in Division Honor