Connect with us

Division Honor

Den siman 5 – cinco ekipo a distancia nan mes for di e otronan, pero tin bataya grandi pa ‘top cuater’.

Despues cu RCA a perde a liderato di e campeonato aki siman pasa debi na e empate contra e number tres Britannia, nan a midi forsa e biaha aki cu e campeon di Torneo AVB 2021, Nacional. E lider actual riba tabla, Dakota, a topa cu Bubali, un ekipo cu a cuminsa reacciona. Riverplate mester a proba cu nan victoria riba Nacional den siman 4 no tabata un “fluke”, hungando e siman aki cu Estrella, y tin un ekipo cu ta subiendo riba tabla sin cu hopi ta realisa, nan ta yama e piratanan di Caravel.

 

Caravel vs United

 

E siman a habri cu e partido entre Independiente Caravel y Sport Club United.

E piratanana di angochi, un ekipo di hopi experiencia y bon disciplina riba cancha ya tabata den top 4 riba tabla di position, hungando contra United cu ainda ta en busca di punta.

 

Ainda nos ta corda cu tres anja pasa Caravel, un ekipo ainda den Division Uno e tempo ey, a sorprende tur hende y a yega hopi leuw den Copa Betico, pa eventualmente perde contra Dakota den final.

 

E partido aki a cuminsa cu United saliendo “en busca” di nan prome puntanan den e campeonato aki, y trempan caba nan a sorprende cu un gol na minuut 4 pa medio di Daniel Perez. Caravel 0 – United 1.

 

Caravel no a reacciona di biaha, pero nan no a cai den “paniek” tampoco, nan ta mas bien un ekipo metodico, cu pasenshi, kedando fiel na nan ‘plan di wega’, esey nan ta caracteristicanan importante den cualkier ekipo competitivo.

 

Al fin ta na minuut 46, net prome cu hafltime, e prome gol pirata a cai, Devin Eman, e puntero cu “olfato” di gol, un batayador cu semper ta busca di un manera of otro pa hasi un diferencia dilanti, a anota for di un pase di Hugo Robert cu tambe a traha duro den e wega aki, Caravel 1 – United 1.

 

Den e segundo tempo ta man’e e trabou metodico ey di Caravel a cuminsa paga dividendo. Mas golnan a cuminsa cai y Caravel a cuminsa domina e wega. Ta man’e cos nan a ‘pasa e prome tempo ta planta y den di dos tempo a cuminsa cosecha’.

 

E di dos gol di Caravel den e wega a bin na minuut 67 pa medio di un “sambombaso” di casi 35 meter di Ezra Bosnie, e goleador di e piratanan te cu awo den e campeonato. Caravel 2 – United 1.

 

Na minuut 76 ta Ezra Bosnie mes ta facilita un bala, dunando Gabriel Alvarez un p’ase solido den area penal, p’e anota pa hasi e wega Caravel 3 – United 1.

 

Caravel dominando, portero Adrian Donayre di United cu masha hopi trabou, a preveni hopi mas gol di Caravel, pero, t’asina hopi so e por hasi.

 

E gol pa cementa e resultado pa Caravel a cai na minuut 82 pa medio di Meldrick Dabian. Caravel 4 – United 1, e score final.

 

‘King of the Match’ ta comparti entre Ezra Bosnie pa su gol y asistencia y su wega solido den medio campo y tambe Wveimar Galeano, e capitan y defensa central di e piratanan, e anker den defensa.

 

Den siman 6 Caravel lo hunga contra Bubali y United contra Britannia.

Britannia vs La Fama

 

E pumanan di Piedra Plat buscando na keda consistente den nan wega p’asina competi pa “top cuater” e anja aki, consistencia ta algo cu tabata hasi falta pa nan den e torneonan pasa den e ultimo anja. La Fama ta buscando na haya bek nan ritmo cu a hibanan hopi leuw den e torneonan previo. Pero ya, no ta facil ora cu bo perde un di e  goleadornan di e torneo pasa, Jaydon Dania, e talentoso hoben delantero, pero, tambe tin falta di Valdo Leocadio, apesar di su veterania, un hungado cu cabes, e tabata piesa clave den medio campo, unda e tabata comanda y combina perfectamente cu Claudio Cavalcante y tambe otro ausente grandi, Jeyson Mundarain.

 

Un partido cu a cuminsa prometedor, dos ekipo cu kizas conoce otro hopi bon mes, ya cu hopi den Britannia a yega na milita den La Fama, entre otro, Daniel Linscheer y  Pieter Susebeek, y no lubida cu coach Breinburg a laga La Fama tambe pa bai Britannia. 

 

Cu ambos ekipo tirando dilanti, un wega habri inicialmente cu despues a cai di biaha asina den e ‘tormenta di inconsistencia’. Hopi bala perdi, pasenan malo, hopi fayonan dilanti gol, di berdad un partido no mucho bistoso p’e mironesnan. 

 

Daniel Linscheer, un hungado fisico y velos, cu hopi “doorzet vermogen” man’e ta bisa na hulandes, a haya su gol na minuut 18, pa hasi e wega Britannia 1 – La Fama 0.

 

Di akinan tur dos ekipo a tuma turno pa lansa den atake, pero, no mucho efectivo.

Pa La Fama, Claudio Cavalcante a purba, pero e medio campo di La Fama no ta mesun cos man’e ma bisa, sin Valdo Leocadio y Jeyson Mundarain, ta nan tres tabata e “command center” di La Fama anja pasa, niun bala contrario tabata pasa facilmente mei mei di cancha, librando Cavalcante pa mas creatividad atakando, combinando cu e delanteronan .

 

Britannia a sali victorioso 1-0 y ta promete hopi, pero, tene cuidow cu “inconsistencia”. E delanteronan a traha duro, pero traha duro no ta tur cos. E medio campo tin un bon entendimiento entre Jonathan Ruiz y Ethan Tromp, nan a hunga basta bon den e wega aki, hasta sin bala, ganando bala y controla e “middenveld”, pero, tabata falta e motor mes, Luis Estrada! (apesar cu el a drenta den di dos tempo), pero, toch Britannia ta depende asina hopi di Coco? Den e partido aki e hungador mas efectivo y consistente di Britannia ta e hoben defensor Marcus Portier, e ta e ‘King of the Match”.

 

Den siman 6 Britannia ta hunga contra United y La Fama contra Nacional.

Nacional vs RCA – nos “Partido Di Siman” cu analysis

 

Den e ultimo decada esaki ta e dos ekiponan mas exitoso na Aruba, un rivalidad hopi grandi, kiermeen ora nan topa ta “candela”.

 

Den e campeonato aki e actual campeon di e Torneo AVB 2021, Nacional, a cuminsa e ciclo aki cu basta incoveniencia (apesar cu Nacional sa bira mihor segun campeonato progresa, tene cuidow!). Nan a bin di perde 1-4 contra Riverplate e siman prome, y nan ta ainda den “mid table” mas bien, basta p’afor di top 4, unda nan semper ta miembro fiho. RCA na su turno ainda ta sinti e ‘sumpinja’ di a keda elimina pa La Fama den semi final di e Torneo AVB recien, despues cu a pasa casi dos anja sin perde un solo partido! nan ta riba un mission awor, te n’e punto aki den di dos lugar trei Dakota debi na nan empate sin gol contra Britannia den siman 4.

 

E partido a cuminsa digno di un rivalidad man’e esaki, “candeloso” ta un bon descripcion, p’aso ta “vuurwerk” mes e dos protagonistanan aki a sende pa nos.

Nacional sorpresivamente a bai den atake di biaha, purbando na ‘sorprende’ e tricolornan trempan. RCA a reacciona bon,  nan a recupera di e “surprise” aki y a reorganisa di biaha, caracteristica di un bon ekipo, pero bon strategia di e Dragon nan tambe, ya cu atakando RCA ta mihor cu defende contra nan.

 

E unico problema ta cu; haciendo e ‘blitznan’ aki trempan, Nacional tabatin mester di un gol trempan tambe, p’e plan funcciona y pon’e RCA bou presion, “desequilibrando” nan y e ora ey despues pa Nacional por hunga nan wega di contra-golpi. Pero, e gol di Nacional no a yega promer, p’aso ta RCA a cuminsa intercepta e bala den algun momentonan clave, RCA awor nan mes a cambia pa bai den un rol di contra-golpi, e wega ey bon organisa pa Jeamir Howell-Brokken den medio campo, primordialmente un recuperador di bala cu sa distribui bon tambe, cu bon vision di cancha, y cu Jhon Silva dilanti den atake, un goleador di rasa, ta hopi cos por pasa.

 

E momento ey a yega na minuut 7 caba, unda Juan Villaraga, un hungado number shete! hopi atrasa den medio campo, a wak un chens y a hasi un pase dilanti pa Jhon Silva bai den un sprint unda cu niun hende por a core cu n’e, asina e prome gol a cai, Nacional 0 – RCA 1.

 

Despues di e gol di RCA, Nacional a sigui insitisti toch cu nan strategia di comienso, y a sigui bai en busca di gol, awor mas ainda ya cu nan a cai atras. Na minuut 9 ta Camilo Romero di Nacional a haya e bala den nan mes un medio campo y a pon’e un bala ‘precies’ riba cabes di Fladimy Francois na rand di “box”, unda Fladimy a gana e bala den aire contra portero David Abdul cu a sali, ta pars’e un movimiento di basketball di Francois, cu ta pone e bala dilanti e pia di Belzius Pudens, su so cu gol, y ta pon’e  bala den net, Nacional 1 – RCA 1.

 

E festeho di Nacional cu e empate no a dura mucho ya cu net 1 minuut despues, den un pressing halto unda Howell-Brokken y Silva ta rondona e hungado di Nacional y pon’e hopi presion riba nan salida, Silva ta intercepta e bala na rand di “doel-gebied” di Nacional y ta ‘dribbel’ drenta y anota di biaha p’e hasi e score Nacional 1- RCA 2.

 

Nacional no a baha man completamente y a sigui cu un wega ofensivo, tirando dilanti pero awor cu mas cautela, pa no laga buraco p’atras den defensa. RCA a sinta warda y defende bon, pero, asina mes a duna un penalty na Nacional na minuut 29.

 

Despues di hopi wardamento alfin na minuut 32 Devis Oliveros, cu no ta basila, ta anota e gol foi punto penal pa empata e wega. Nacional 2 – RCA 2.

 

Ambos ekipo a sigui ataka na nan turno, RCA un tiki mas conservativo a man’e yena e medio campo na cierto momentonan y ta forsa Nacional pa ataka riba e flank nan. Den un di momentonan ey na minuut 38 Nacional purbando na pasa mei mei, unda inicialmente Howell Brokken ta kibra e atake, despues Mark Jacobs ta haya e bala y ta pasa pa e hoben talento Ludgensen De Cuba, unda e ta hasi un pase perfecto pa Ronald Gomez mei mei di e circulo central y e area penal di Nacional, Gomez ta kop e bala pa John Silva na banda robes, Silva ta “trek” e defensornan di Nacional, pasa bek pa Gomez na banda drechi y Gomez ta hasi un “fake” cu su pia drechi riba Jose Cruz, cambie bala pa su pia robes y push’e den gol, Nacional 2 – RCA 3. Halftime a bai aden asina.

 

Ambos ekipo toch a haya nan chensnan den di dos tempo, pero sin por a concreta. Nacional mester a sigui insisti pa ataka riba e dos bandana, ya cu mei mei RCA tabatin ‘Firi y compania’ pa corta atake y busca e contra-golpi fulminante, pero, e atakenan riba e flank nan no tabatin precision, ni velocidad tampoco y Devis Oliveros a haye ta bataya cu ‘dobbel-team’ ora nan pasa e bala p’e den area di peliger. Eynan tabatin mester di un hungador man’e Edward Clarissa, cu ta hasi hopi falta p’e Dragonnan, tabatin mester di mas sorpresa y atakenan “desequilibrante”.

 

Na minuut 62, Mark Jacobs, un defensor cu por sali den atake man’e ta ‘lamper’, a haya su mes cu bala 40 meter for di area penal di Nacional for di un pase di Ronald Gomez. Jacobs a wak un ‘oportunidad di oro’, a sprint drenta den area penal cu gran velocidad y “schijn” un defensor y despues e portero tambe, y deposita e bala den net p’e gol di “knockout”. Nacional 2 – RCA 4.

 

Esey tambe tabata e score final. Ta hopi hungadornan a brilla den e wega hopi bon aki, sin duda, nos “partido di siman”. RCA a hunga un bon wega y a contra aresta e wega ofensivo cu Nacional a tira riba nan, ya cu Nacional no kier a para warda RCA atakanan, e tricolornan di nan a ahusta nan wega trempan y asina desifra e wega di e Dragon nan, nan a hunga cu pasenshi, ganando e batayanan den medio campo, tirando den contra-golpi cu e poderoso Jhon Silva dilanti (e lider riba tabla di goleador hunto cu Sabastian Montoya di Dakota, cu 10 gol anota den djies 5 wega). “King of the Match” ta comparti entre Jeamir Howell-Brokken y Mark Jacobs p’e ehecusion formidable aki di nan plan di wega.

 

Den siman 6 Nacional ta hunga contra La Fama y RCA ta bai contra Estrella.

Bubali vs Dakota

 

Riba papel e partido aki lo ta facil p’e “amarillonan”. E ekipo ‘geel cu preto’ ta invicto te awor den e campeonato cu cuater victoria y comandando e tabla di posicion. Bubali, un ekipo den renobacion, a cuminsa a campeonato cu dos derota cu anotacion di 0-5. Awor nan ta den un “comeback” despues di un empate y un victoria den nan ultimo dos weganan.

 

Dakota no a “blitz” Bubali di biaha, nan a keda disciplina cu un wega di posesion y control en bes di tira “todo por todo” na prome instancia caba. Bubali a responde y a wanta Dakota y na nan turno a sali dilanti tambe, apesar di menos posesion di bala.

 

E abehanan a warda te cu minuut 32 pa celebra nan promer gol, pa medio di nan goleador, Sebastian Montoya. Bubali 0 – Dakota 1. 

 

Despues di e promer gol ey, e portanan a habri pa Dakota, e golnan a cuminsa cai un trei otro. Na minuut 36 a toca turno na e otro ‘hungador di momento’ di Dakota, Joshua Gross, cu a anota pa hasi e wega 2-0 p’e dakoteronan.

 

Net tres minuut despues na minuut 39 ta Joshua Gross mes atrobe ta anota pa hasi e partido 3-0 cu su di seis gol den cinco wega.

 

Prome cu halftime, na minuut 42,  ta toca turno na Sebastian Montoya un biaha mas, cu su di dos gol di e wega, Bubali 0 – Dakota 4.

 

Dakota no a baha man, y a sigui insisti pa anota mas gol den di dos tempo. Na minuut 50 Sebastian Montoya ta bolbe anota pa hasi e wega Bubali 0 – Dakota 5.

Despues ta Derwin Donato su turno, e rechtsback di Dakota ta anota pa hasi e wega 6-0 na minuut 53.

 

Na minuut 85 Sebastian Montoya, cu ainda no a caba cu su tarea, ta anota atrobe pa su di 10 gol den cinco partido, lider riba tabla di goleador di e campeonato aki (empata cu Jhon Silva di RCA). Bubali 0 – Dakota 7.

 

Fernando de Sousa alfin tambe ta anota un gol mas na minuut 90 pa hasi e partido Bubali 0 – Dakota 8, y esey tambe t’e resultado final.

Un victoria facil pa Dakota, cu ainda ta lider riba e tabla di e campeonato aki cu 15 punta den 5 wega, invicto te cu awor.

“King of the Match” ta Sebastian Montoya, pa su energia cu e ta “desplaza” y tambe pa su cuater gol nan den e partido.

 

Den siman 6 Bubali lo enfrenta Caravel y Dakota ta bai contra Riverplate.

Estrella vs Riverplate

 

Estrella no ta “per se” hungando mal futbol, mas bien nan ta competitivo, pero, nan ta anemico tambe den anota gol, nan tambe ta un ekipo den renobacion, cu hopi talento hoben cu ainda ta madurando, ganando experiencia. Riverplate ta e ekipo sensacion e anja aki, hunto cu Caravel, cu ta haciendo un cos, den silencio, y ta sorprendiendo hopi hende. Ambos ekipo ta batayando pa top cuater riba tabla, pa yega playoff.

 

E partido aki bastante pareu pa gran parti di e prome tempo, ta te na minuut 34 Riverplate ta anota e prome gol di wega pa medio di Mario Da Silva, e defensor central di e oncena di Playa P’abou, foi un pase di Jayson Carolina.

 

Despues di halftime, un bon partido, hopi deportivo, y asina mes hopi competitivo tambe. Estrella tambe tabatin su chensnan, pero ta kiko a pasa cu nan punterianan e anochi aki?

Anuar Kock, cu su esfuerzonan incansabel sin duda cu un bon actuacion pa e “naranhadanan” di Santa Cruz, pero, no tabata suficiente.

 

Riverplate si tabata “clinico” ora nan a haya nan chensnan grandi. E di dos gol di River a cai te na minuut 79, un biaha mas den persona di Mario Da Silva, gol di cabes foi un tiro di skina. Estrella 0 – Riverplate 2.

 

Esey tambe tabata e anotacion final den e partido aki. Pa River, tabatin bon actuacion di nan capitan Carlos L Quandt, cu su liderasco, tambe di su ruman Baten Quandt dilanti, Bernard Smolders, un excepcional talento hoben cu hopi bon condicion fisico y iniciativa den medio campo, y tambe un biaha mas, Whilmerd Croes, e portero di Riverplate. Pero, nos “King of the Match” ta Mario Da Silva, e defensor central di Riverplate cu su dos golnan. Cu e resultado aki, Riverplate ta sigura e di “quinto” posicion riba tabla cu 9 punta, un punta so for di e top cuater.

 

Den siman 6 Estrella lo midi forsa cu RCA y Riverplate lo enfrenta Dakota.

Te aki e resumen di siman 5, te otro siman!

 

Click to comment

Leave a Reply

Your email address will not be published. Required fields are marked *

More in Division Honor