Connect with us

Division Honor

Siman 6 den Division di Honor – E top cuater nan a consolida nan mes mas pero ainda falta hopi

Den e fecha seis di futbol Division Honor a keda demostra cu e supuesto “ekiponan chikito” ta mas competitivo cu nos ta pensa. Den un manera di bisa, niun ekipo ta bai den un wega pensando cu nan lo bai tin’e facil, niun coach lo permiti e pensamento ey. E campeonato aki, apesar cu a cuminsa cu algun resultadonan “abulta” awor a man’e sera, despues cu e ekiponan a “settle down” y esnan cu a cuminsa cu resultadonan adverso a sabi di mehora nan mes – poco poco.

 

United vs Britannia

 

Riba papel, esaki lo tabata un bon chens pa Britannia, e di tres ekipo riba tabla di clasificacion, pa haya nan tres puntanan y drecha nan ‘diferencia di gol’.

Sport Club United, un ekipo batayador apesar di ta limita, ainda ta buscando punta y mester di esey urgentemente.

 

Britannia tabata den control di e wega foi cuminsamento, cu posesion di bala y yegadanan, pero, atrobe tabata falta “punteria”, yegada tin, esey no ta un problema. Portero Adrian Donayre di United cu hopi trabou a wanta e wega na cero pa un tempo cu bon atrapadanan. 

 

Toch na minuut 22, Britannia tabatin un “momento di magia”, di bon toke di bala den ‘wega di ekipo’ bayendo dilanti. Cuminsando cu Ethan Tromp, cu ta trece e bala mei mei di cancha, net na rand di e circulo central, e ta hasi un pase largo pa Daniel Linscheer na rand di area penal di United, Linscheer ta pasa bek largo p’atras pa Tromp mes, di biaha Tromp ta hasi un pase largo y skerpi atrobe, e biaha ki pa Jonathan Ruiz, tambe na rand di box, unda e ta hasi un toke cortico pa Linscheer cu na su turno ta loft e bala pa Juel Balentien cu tabata penetrando caba for di banda robes den e area penal, Balentien ta haya e bala ful na su banda drechi unda e ta rek su pia completemente y den un “media buelta” den aire, ta lansa  un volley pon’e den skina contrario pa banja e portero Donayre. United 0 – Britannia 1.

 

Siguientemente Britannia ta sigui ataka y domina, pero, sin por a concreta, hopi debi na portero Donayre, pero, tambe debi na nan mesun fayonan. Asina tambe halftime a bai aden.

 

United a bataya “todo por todo” y ta haya un di nan poco chensnan, pero nan a sa di probecha. Na minuut 58, Britannia, den un ‘pifia’ purbando di saka un bala foi nan area penal, unda Antonio Fawcett di United ta hinka pia y desvia e bala cu ta cai dilanti di su compañero Denrick Lopez, na rand di area penal mes, Lopez un goleador nato no ta basila ni un seconde y ta pone e bala den net p’e 1-1.

 

Sin Luis Estrada y Carlos Geerman den wega aki, y tambe sin Jonathan Ruiz cu un lesion prome cu halftime caba, ta Ethan Tromp y compania mester a keda bon organisa den medio campo y alabes sali en busca di un gol pa salba tres punta.

 

Tabata parce cu e wega hasta por a caba empata na un gol pa banda. Pero, despues di hopi insistencia unda e bala djies no kier a drenta p’e pumanan, alfin na minuut 82, foi un tiro di skina cobra perfectamente pa Ethan Tromp, ta Marcel Kock cu a drenta pa Jonathan Ruiz, ta anota un gol di cabes, y un gol di alivio mas bien pa su ekipo. United 1 – Britannia 2. Esey tambe tabata e resultado final. Britannia a merece e victoria aki, pero United tambe a hera haya un punta.

 

“King of the Match” ta comparti entre Juel Balentien pa su bunita gol y esfuerso constante y Ethan Tromp p’a tuma e timon di su ekipo cu bon wega den medio campo den un situacion adverso y asina preveni un perdida di punta pa Britannia.

 

Den siman 7, United lo topa cu Nacional Diasabra anochi y Britannia lo enfrenta Bubali Diadomingo atardi.

La Fama vs Nacional

 

E dos ekiponan aki a sobresali den e torneo anterior, e sub campeon y campeon, ni mas ni menos. Ambos ekipo awor en busca di algun positivo y “restart” nan campanja, mas bien ya cu tur dos ta den mitar di tabla, bastante aleha di ‘top cuater’.

 

Nacional a bin di perde 1-3 contra RCA den ‘e mihor partido di fecha 5’. La Fama tambe a perde cu anotacion minimo contra Britannia den nan wega previo.

 

E partido aki no tabata falta gara ni esfuerso, ta precision, creatividad y ehecusion falta den ambos ekipo.

 

Nacional cu bon posesion di bala trempan pero sin por pon’e bala den net, pa colmo mester a sucumbi tambe na un gol di e hoben goleador di e savaneteronan, Ransey Trimon, na minuut 30, La Fama 1 – Nacional 0.

 

La Fama a sigui ehecuta nan plan di wega, sin riesga mucho, conservativo.  Mas e tempo pasa mas Nacional a cuminsa ‘desinfla’ y den un momento di frustracion, net prome cu halftime bai aden, pa hasi cos mas “moeilijk”, Devis Oliveros, ta haya un carchi cora lagando su ekipo cu 10 hungado so y un sero pa subi.

 

Si La Fama a choka e wega di Nacional den e parti complementario di prome tempo, vooral despues di nan gol, den di dos tempo cos a bira mas duro ainda p’e dragon nan.

 

Apesar di mas esfuerso ainda, Nacional no por a solucion e wega aki y sin Oliveros nan chens di gol a somenta completo tambe.

 

Asina mes e partido a termina, La Fama 1 – Nacional 0. “King of the Match” ta Claudio Cavalcante, e brasileiro ex Nacional, tabata den control di medio campo y e centro unda e atakenan ta cuminsa tambe, bon trabou.

 

Den siman 7, La Fama lo bai contra Estrella Diabierna anochi y Nacional lo midi forsa cu United Diasabra anochi.

Dakota vs Riverplate – ‘Partido di Siman’ – un analysis

 

E duelo entre e ekipo lider di e campeonato y e ekipo sorpresa e anja aki den Division Honor.

 

E partido di biaha tabata sinti man’e un wega clasico, e tabata sinti man’e un derbi, Playa p’ariba vs Playa p’abou, tabatin e cierto tension, un “verboor” den aire, un bon ambiente sin duda.

 

Un partido unda Dakota a cuminsa ta domina cu posesion, sin nan goleador Sebastian Montoya den alineacion pa cuminsa e wega, un Dakota cuidadoso, rotando y tokando bala bon. River tabata peligroso henter e wega, cada bes cu nan haya e bala y sin miedo di lansa den atake, y nan a haya yegada, pero nan tabata topa cu un defensa di Dakota cu tabata bon organisa, cu Nickenson Paul y Ferdinand Robert den control.

 

Halftime a bai aden cu e score empata na cero gol.

 

Apenas cu e di dos tempo a cuminsa, na minuut 46, den un momento di confusion, debi na un pifia, Riverplate buscando salida foi nan mesun “doelgebied” den un mal pase, bala ta wordo intercepta pa Ricky Hodge, ta man’e un ‘wolf’ hambra buscando e momento pa ataka, na rand di e area penal, e no ta basila y ta pon’e e bala den net pa Dakota bai ariba 1-0.

 

River no ta perde cabes y ta sigui purba den atake, bou guia di nan capitan Carlos L Quandt y e hoben “brain” den medio campo, e incansabel Bernard Smolders, y apesar di menos posesion di bala cu Dakota, pero, nan ta hasi tur conta, cu insistencia y por cierto nan bon condision fisico tambe (na par cu Dakota).

 

Na minuut 56, River tabatin nan “momento di magia”, unda cu Baten Quandt ta bai te p’atras den defensa pa intercepta (horta) un bala foi Dakota na rand di su mesun area penal, e ta lansa e bala den profundidad te den e mitar di Dakota p’e talentoso Jason Carolina, cu ta transporta bala cu “dekking” di Nickenson Paul y ta hasi un pase pa su compañero Severino Darnell, pa deshasi di e marcacion, cu na su turno ta dun’e bala bek den un ‘un-dos’ na rand di area penal unda Carolina ta lansa un bunita bala pa banja e portero Jahmani Eisden na banda robes di e tres latanan (si, na Aruba nos por wak cosnan asina!), empatando asina e wega, Dakota 1 – Riverplate 1.

 

E partido a keda empata p’un bon rato, un partido balansa, cu hopi bon “tèmpo” tambe. Pero, Na minuut 72, George Tromp, e defensor di Dakota ta blaas un bala foi banda robes di cancha, net p’afor, riba e skina robes di e area penal, unda cu portero Whilmerd Croes no por a block e bala, pero, di berdad un bala di cayon pa bora net, Dakota 2 – Riverplate 1.

 

Pa un rato na minuut 90 hopi di nos a kere cu Riverplate lo a empata e partido den un momento agonico, na deleite di e fanaticonan di Playa p’abou, pero, arbitro principal a indica cu tabatin un “carga” riba e portero Eisden di Dakota, net prome cu e bala drenta gol, despues di un tiro liber di Siljean Vrolijk. Despues di basta protesta y tambe clarificacion, a keda cla cu esey mes tabata e caso.

 

Pa ora e partido ta casi na final, wardando e pitaso final di referee De Leça, cu River tirando ‘tur cu tur’ dilanti pa busca e empate y un glorioso punta, Dakota ta hasi un “counter” devastador pa likida e partido tambe, un otro gol mas di Ricky Hodge (cu awor a yega 5 den e campeonato). Resultado final tambe, Dakota 3 – Riverplate 1. Ambos fanaticada a duna nan ekiponan e merecido aplausonan p’e gran partido aki, mientras cu e hungadonan di ambos oncena ta brasa otro, un deleite pa wak, un momento deportivo – nos tur ta anhela p’e esey.

 

“King of the match” ta comparti entre Ricky Hodge, pa su golnan n’e momentonan oportuno pa sigura victoria pa su ekipo, y tambe Nickenson Paul, un hungador cu ta hopi mas cu un defensor central, hopi valioso mes.

 

Den siman 7, Dakota lo hunga contra Caravel Diadomingo anochi y Riverplate lo topa cu RCA den e ‘derbi di capital’ Diasabra atardi.

RCA vs Estrella

 

Un di e partido clasico nan di Aruba, un tempo un di e partidonan mas importante di nos isla, un rivalidad cu ta bai bek den anjanan 60, tempo cu Estrella a bira un club importante, ganando hasta e Copa Antiyano na 1970, den paar cu RCA cu tambe a logra e titulo ey, e promer di Aruba cu a logr’e, na anja 1965.

 

Awendia Estrella ta buscando e gloria ey atrobe, pero, actualmente ta recoriendo un caminda duro p’e meta ey. RCA ta mas bien interesa den gana e wega ‘como sea’ pa keda net trei Dakota (dos punta atras) riba e actual tabla di posicion, riba un caminda solido den top cuater y playoff.

 

RCA a cuminsa domina di biaha, nan control di medio campo ta algo significante y determinante. Estrella tin falta di presencia fisico den mei mei, nan tin hopi hungadornan cu abilidad y creatividad, pero ta con ta cuminsa na haya bala, con ta recupera bala?

 

Na minuut 23, Albert “Killer” Francis ta anota e prome gol di wega. Francis ta haya un bon pase den aire foi Jeamir Howell-Brokken den area penal, Francis ta baha y domina e bala bon, mantene control apesar di e pressing (man’e Diego Costa asina), despues di basta bataya p’e bala ta hasta anota entre 3 defensor y e portero tambe, RCA 1 – Estrella 0.

 

Na minuut 34 for di un tiro di skina efectivo di Xion Tromp, Estrella ta anota e gol di empate, un gol cu a drenta despues di a haya un “punta pie” di Anuar Kock, e bala sigur ta rasca un defensor di RCA y e portero tambe, pero e bala ta sigui bai stret den net p’e 1-1. Un gol pa Kock sin duda.

 

Estrella a haya un esperansa akinan, y hopi a spera cu esaki e partido lo a cuminsa sera un poco y bira mas competitivo, y di berdad Estrella a anima y a lansa dilanti, pero toch sin presencia den medio-campo ta un problema. Con por spera Anuar Kock lansa den atake, y el a core hopi y traha duro, pa despues bin bataya contra e medio campistanan di RCA?

 

Den un di e momentonan aki mes, na minuut 39, unda Estrella a lansa dilanti, pero no por a trek bek pa defende drechi. Mark Jacobs, rechtsback di RCA, a wak un habri y a tira su mes dilanti, pa hasta pasa rond di e hungador di Estrella cu a bai yuda defende den urgencia, man’e ta nada, pa hasi un centro den area penal pa haya e cabes di Ronald Gomez, asina facil RCA a bai ariba atrobe. RCA 2 – Estrella 1.

 

Na minuut 44, e storia a sigui mesun cos, Mark Jacobs, rechtsback tricolor ta lansa dilanti atrobe, schijn defensa bai na linja y hasi su centro facilmente atrobe, un mal rechase di un defensor di Estrella, net riba pia di Ronald Gomez, e capitan leyenda di e tricolornan, cu ta ehecuta na un manera “clinico” pa su “doblete” di e anochi. RCA 3 – Estrella 1.

 

Despues di halftime, Estrella cuminsa e wega tokando bon, mescos cu den e comienso di e prome tempo, pero, si nan por keda toka y mantene bala, teniendo e bala foi RCA lo ta “great”, pero, toch a resulta imposibel. RCA cu mas chens pa anota no a sabi di probecha den algun instancia.

 

E lateral nan di RCA, Mark Jacobs y Alexon Simmons a domina den e partido aki, conjuntamente cu Jeamir Howell-Brokken den medio campo cu bon asistencia di e hoben Ludgensen de Cuba, un biaha mas, man’e tabata e caso den e partido previo. Hasta despues cu Firi a bandona partido lesiona, RCA a sigui hasi nan wega, e elenco ta profundo.

 

Na minuut 68, Jeferson Lopez, cu a caba di drenta wega, a hasi un pase profundo for di banda drechi, un bala halto den area penal, cu Albert Francis “somehow” ta mik e bala entre algun defensor “oranje”, y bou presion ta anota un gol, un hoya di gol, sin laga e bala touch tera, den volley cu pia drechi, pa hasi e wega 4-1 pa RCA, sensacional!

 

Djeinan tambe tabata RCA riba “cruise-control” pa yega n’e pitaso final pa bai cu e victoria y tur tres punta, p’asina keda net trei Dakota riba tabla di posicion, dos punta aleha for di e liderato di campeonato.

 

“King of the Match” ta Albert “Killer” Francis di RCA, e puntero trahado cu a anota dos gol totalmente diferente, un gol di trabou duro y persistencia, y e otro ta un gol di magia, di talento.

 

Den siman 7 RCA lo topa cu Riverplate den e ‘derbi di capital’ Diasabra atardi y Estrella lo enfrenta La Fama Diabierna anochi.

Bubali vs Caravel

 

E ultimo partido di e siman 6 interesante aki tabata entre Bubali, cu a bin di perde den un manera abulta contra Dakota den siman 5, apesar cu e ‘Orguyonan di Nort’ tabata riba un “come-back” despues di a habri e campeonato hopi complica mes.

Caravel ta eigenlijk e ‘ekipo sensacion’ e anja aki, nan ta den top cuater, un ekipo veterano, silencioso, y metodico den nan wega, nan ta pirata, pero nos por bien yama nan e “silent assasins”, ya cu hopi hende no a realisa con nan a subi riba e tabla. Nan por para cualkier ekipo, nan sa hasi nan trabou.

 

E partido a cuminsa na e style di Caravel, nan ta lagabo hasi bo wega, dunabo un tiki espacio, pa poco poco, cu pasenshi cuminsa descifra bo wega, y busca manera pa contra aresta y exploita adecuadamente, e wega di caravel man’e ma bisa anteriormente, ta un wega di pasenshi. Nan por tuma full 90 minuut mes, pa na final haya e solucion y un gol kizas pa cementa tres punta. Bubali no a falta desempeño, ni fortalesa, nan a bin pa hunga bala.

 

E wega balansa y di igual forsa, un “stalemate” cu a sigui pasando di halftime, sin gol, y tur cos tabata parce cu e partido por caba empata, no comprendemi malo, un partido competitivo toch. Pero man’e ma menciona, Caravel ta hunga un wega di 90 minuut, fisico y mental. 

 

Na minuut 75 e hungador Monsalve di Bubali, den un lapso di 5 minuut ta haya dos carchi geel, e di dos den un momento hopi confuso mes, y ta word expulsa, faltando 15 minuut ainda di wega. Caravel ta hasi loke nan mester hasi y exploita e situacion, irespecto di e decision dudoso di e referee. Ya nan a cuminsa planea pa un final di atake “anyhow”, cu nan ekipo ofensivo riba cancha, ta net anto, nan momento a yega.

 

E piratanan a cuminsa bai en busca di un gol, Bubali tambe, apesar cu nan tabatin un homber menos. Pero, esey por a hunga den contra di e norteronan. Despues di basta intentonan, y cu un Bubali bastante desgasta awor despues di a wanta e wega henter tempo, y awor pa colmo cu un homber menos, ta permiti e gol di e oncena di Angochi, un gol di Joel Geerman foi un asistencia di Theo Texeira na minuut 86 pa lanta nan fanaticonan. Bubali 0 – Caravel 1.

 

Caravel a sigui insisti pa mas gol pa sigura e victoria. Na minuut 92, ta Theo Texeira ta anota e di dos gol pa Caravel, for di un pase di Hugo Robert. Mester bisa cu tur e cambionan di Caravel a duna hopi resultado. Esey tabata e resultado final tambe, Bubali 0 – Caravel 2.

 

Pa Bubali, Michael Tromp, e defensor central, atrobe tabatin un wega excepcional, pero e no por a wanta e resultado pa su ekipo. Pa Caravel y tambe nos “King of the Match” ta Mairon Gutierrez, pa su desempeño y su trabou duro riba cancha p’asina pusha su ekipo dilanti y bai cu e victoria.

 

Den siman 7, Bubali lo enfrenta Britannia Diasabra atardi y Caravel lo hunga contra Dakota Diadomingo anochi,

 

Te otro siman!

 

 

 

Click to comment

Leave a Reply

Your email address will not be published.

More in Division Honor