Connect with us

Division Honor

Siman 7 –  Dakota ta sigui ‘lider riba tabla’, e bataya pa top cuater y decenso a intensifica, pero, mara faha, e ‘Clasico’ ta na caminda

Dakota lider riba tabla - potret di archivo
Dakota ta lider di campeonato - potret di archivo - Davyne Croes

Siman 7 – un resumen

Un siman cu a produci un total di 27 gol den 5 partido, e tabla di goleador a cambia den top 5. Mientras cu Dakota a amplia nan bentaha riba RCA e siman ki, e siguiente siman e gran clasico entre e amarillo y e tricolor-nan lo tuma lugar. Riverplate, La Fama ta acercando Caravel pa e di cuater puesto, pero, Nacional no ta mucho lew tampoco, y e bataya pa evita decenso pa Division Uno ta awor entre Bubali, Estrella y United.

Estrella vs La Fama

Estrella cu a bin ta cococha den e campeonato aki y te awor cu solamente un punta so den seis partido, hasta a yega n’e punto cu mester a termina areglo cu nan director tecnico Alejandro Avila net prome cu comienzo di e siman 7 aki, nan mester ayudo y urgente p’aso nan t’awor den bataya pa evita decenso. La Fama ta poco poco hayando nan mesun caminda atrobe y cu un victoria den e wega aki nan por drenta den bataya pa top cuater.

E partido a cuminsa pareuw, Estrella lansando dilanti, rotando bon, cu hopi promesa, hasta nan ta haya chensnan ‘morto’ pa habri marcacion, pero, ta faya increibelmente. Sa bisa cu ‘eseynan ta chensnan cu bo no ta haya mas’, pa colmo, despues di e oportunidad nan perdi n’ey, nan a man’e cuminsa frustra di biaha, esey sa pasa cu ekiponan den nan situacion, cu ta cuminsa cai alabes den “paniek”.

La Fama mas bien hungando nan wega, parse e wega cu nan a hunga asina bon den e torneonan previo unda nan tabatin hopi exito. Un wega di pasenshi, wardando pa wak kiko e oposicion ta hasi pa despues contra-aresta, y mientras Estrella a cuminsa frustra, La Fama a cuminsa recupera y wanta bala, defende bon y tira dilanti na un manera economico, sin compromete nan linea defensivo, bon compacto y organisa, ‘semper dominando den medio campo’.

La Fama tabata sin nan hoben delantero, Ransey Trimon, mientras cu Estrella di berdad cu un elenco bastante limita, sin Pancho Croes ainda, sin Jean Ullyse, Anuar kock, Naibert Elisabeth, hopi nombernan grandi falta p’e narahadanan.

Den un di e atakenan ey mes, na minuut 13, La Fama ta haya un penalty unda Davidson Kaarsbaan ta anota pa pon’e su ekipo ariba 1-0 den marcacion.

Estrella den shock caba (apenas 13 minuut di wega), La Fama atakando y na minuut 22 Raul Morales ta anota pa amplia bentaha di e Savaneteronan, Estrella 0 – La Fama 2.

Cosnan a bai di ‘malo en peor’ pa Estrella na minuut 31 unda cu Trevor Faro, nan speransa di gol, a wordo expulsa pa conducta violento, Estrella awor cu 10 hungado so.

Ni modo, La Fama a keda hunga nan wega, Estrella simplemente no tabatin manera pa yega dilanti y anota gol pa drenta den e wega. E partido a keda den mesun situacion faborabel pa La Fama unda cu nan bentaha numerico a casi cementa e resultado aki pa nan, pero, no lubida cu hasta prome cu e carchi cora, La Fama tabata den control di e wega caba,

Den e segundo tempo na minuut 65, ta Kendreck Kock ta anota pa La Fama, practicamente poniendo e wega riba ijs, y despues ta dijes warda e tempo pasa pa bai cas. Estrella 0 – La Fama 3.

Esey tambe tabata e resultado final unda La Fama a demostra cu nan ta biniendo bek despues di un wega bon organisa y cu bon resultado, nan ta awor oficialmente den bataya pa e di cuater lugar riba tabla.

Nos “King of the Match” ta Raul Morales pa su trabou incansabel riba cancha, semper habriendo caminda pa su ekipo lansa den atake cu yegada, cu bon asistencia pa su compañeronan.

Den siman 8 – Estrella lo topa cu United Diadomingo anochi y La Fama contra Riverplate Diasabra anochi.

Riverplate vs RCA – Partido di Siman – un analysis

E ‘Derbi di Playa’ of man’e otronan ta yam’e ‘Derbi di Capital’ of tambe ‘Derbi di Oranjestad’, enfin, con cu bo yame, e anja aki si e tabata un derbi hopi competitivo mes, despues di hopi anja cu e evento aki a bai mas bien sin fanfaria. Ok, p’e wega importante aki RCA, ekipo rank number dos net trei e lider Dakota, tabata sin algun hungadonan estelar man’e Ronald Gomez, Albert Francis y Jeamir Howell-Brokken. River ta un di e ekiponan sensacion e anja aki den Division di Honor y nan ta den bataya pa drenta top cuater riba tabla, nan a bin di duna bataya na Dakota pa mas cu 90 minuut largo e siman prom’e.

E partido a cuminsa cu RCA dominando cu bala den e prome 25 minuut nan di wega, cu algun yegada pero sin por a probecha. Riverplate en cambio a tene pasenshi, nan a purba algun bon ‘counters’ pero sin exito.

Ta man’e cos River a laga RCA ten’e bala, tratando na decifra nan wega, sigur ta cu nan a defende bon ora tabatin mester bou di liderato di Carlos L Quandt nan capitan y Eugene Tromp cu a para den gol pa Riverplate en bes di e hoben revelacion, e portero Whilmerd Croes, a hasi un tremendo trabou bou di e tres latanan den e wega aki.

Ora cu ya e partido tabata andando, na di 15 minuut, den cayente di wega, mester a para e accion un rato pa e ekipo di RCA bisti un vest geel, ya cu nan a cuminsa e partido cu un top blauw scur y pa colmo Riverplate tabatin un top preto, dus, causando confusion riba tereno, pa colmo e color di e vest tambe tabata parecido awor n’e color di shirt di e referee. Algo asina mester wordo regla di antemano. Ban bisa cu tur ekipo mester tin dos uniform, un “home” y un “away”, cada set mester ta dos colornan diferente (cu contrast, dus un licht y un scur). Por lo menos un dia prome cu e wega e ekipo “home” ta manda nan uniform desea pa e coordinador (por hasta husa social media), y esaki ta “geef door” (avisa) na e ekipo “away” cu na su turno mester scohe nan uniform cu ta den un contrast cu esey y asina evita e cosnan aki (un sugerencia).

Bayendo bek n’e wega; te na minuut 25 nei, RCA tabata domina cu River un poco conservativo, mas bien prudente, buscando algun contra golpi. Tabatin un “feeling” si den aire cu River a warda energia, pa bin bek duro, algo cu nan a demostra tambe den e ultimo 15 minuut di prome tempo. RCA a keda un poco desinfla, of kizas sorprendi cu Riverplate a wanta nan bon, apesar di nan dominio cu posesion di bala, sin por a anota gol. Halftime a bai aden empata na cero, pero un bon partido cu bon tempo y tension, man’e un derbi mester ta.

Den e di dos tempo River a trece den wega Jason Carolina, un hoben cu talento y hopi brillo, cu a cuminsa traha bon cu otro hoben, e medio campista Bernard Smolders. RCA na su parti apesar di e ausentenan tabatin bon wega den medio campo pa e versatil Mark Jacobs, un hungador completo por cierto, RCA bon tambe den defensa y cu portero Eric Abdul hopi skerpi mes. E partido a haya un elemento di “toma y dame” for di e punto ey te cu halftime.

Den di dos tempo na minuut 49 e oncena di Madiki ta haya un tiro liber net na rand di e area penal di RCA – na e tip di e “media luna”. Luis Franken ta lansa e tiro aki, lastra, na banda drechi, e ta dal den pia di un hungado di RCA den barera, e bal ta coi un “spin” p’e otro banda y ta ganja portero Eric Abdul cu a lansa na su banda drechi pero asina mes ta blok e bala cu su pianan, e bala ta “spin” un biaha mas y ta keda lora riba e linea di gol (bayendo aden lentamente) unda cu Siljean Vrolijk di River na mesun tempo cu Abdul (cu a lanta pa bula scapa e gol) ta bai p’e bala, un encontronaso duro, unda Vrolijk ta pusha e bala riba linea p’e gol, Abdul ta keda lesiona pero e gol ta conta “afterall”. Riverplate 1 – RCA 0.

RCA a tira ‘tur cu tin’ en busca di gol pa empata e partido foi e punto ey, pero Riverplate tabata hopi peligroso mes den nan contra golpinan. Na algun momentonan RCA tabata semper hopi serca di empata e wega, pero, na mesun tempo por a bisa tambe cu River tabata hopi serca mes di aumenta nan bentaha, e wega tabata di banda pa banda.

Asina cosnan a sigui te na final di 90 minuutnan, y tur cos tabata parce cu River sorprendentemente lo bai kibra e invicto di RCA y duna nan e prome derota di a campeonato aki.

Den e di tres minuut di tempo extra (90+3), Edwin Diaz di RCA ta hasi un pase desespera mas bien den area penal di Riverplate, e defensa di River no ta conecta e bala bon pa rechas’e, unda cu Evander Nedd cu a hasi su debut e anochi aki p’e tricolornan di Solito, ta haya e bala riba su pia drechi foi un rebote, no ta basila, y ta fusila portero Tromp di River pa empata e partido, un gol agonico, Riverplate 1 – RCA 1.

Despues di e gol y cu dos minuut mas pa bai, RCA a cuminsa “blitz” cu atake tras di atake y chensnan di gol, pero, no por a probecha, te ora cu alfin e pitaso di referee Matos a zona p’e final di e derbi.

E ekiponan a parti punto e biaha aki. Nos ‘King of the Match” di e wega aki ta comparti entre Carlos L Quandt, e capitan di e oncena di Playa p’abou, cu di berdad a hasi tur cos bon un biaha mas, niun hende ta perfecto, pero Quandt tabata serca e anochi aki, un consistencia barbaro, y tambe Mark Jacobs di RCA, Jacobs tabata un hungador di full cancha e anochi aki, el a defende, hasi pasenan y bataya den medio campo, y hasta a lansa den atake man’e ta un delantero, pabien na tur dos!

Den siman 8 – Riverplate lo hunga contra La Fama y RCA contra Dakota den e ‘Clasico”.

Nacional vs United

E partido aki, e ‘Mini Derbi di Nort’ ta un “must win” pa ambos ekipo; Nacional pa cuminsa acumula punta y sali foi zona di decenso y alabes drenta den e bataya pa e posicion cuater riba tabla. United tin mester di cualkier punta pero urgentemente pa sali foi bom di tabla y alfin haya un victoria.

Nacional sin Devis Oliveros debi na suspension, lo mester purba logra resultado sin nan goleador. Por cierto, ainda Nacional ta tambe sin nan defensa central, e estelar Leonardo Colmenarez p’e temporada aki.

E campeon di e ultimo torneo AVB a cuminsa purbando mas bien di tene y rota bala, tene pasenshi den un wega cu riba papel nan ta faborito pa gana, pero, un t’asina facil den Division Honor. E dragon nan alfin a haya nan prome gol na minuut 14 pa medio di e velos Belzius Pudens, cu foi un rebote ta haya un bala na rand di area penal di United, dribbel laga tres defensa y anota e gol pa habri marcacion, Nacional 1 – United 0.

Net dos minuut despues ta Charles de la Cruz, ta anota for di distancia largo, net p’afor di e area penal di United y banja e portero Adrian Donayre, e ex Nacional, cu tabatin hopi trabou e anochi aki. Nacional 2 – United 0.

Leonardo Pulido ta anota pa Nacional atrobe na minuut 29, den un 1-2 cu Pudens e ta hay’e bala den area penal y fusila e portero Donayre pa hasi e wega Nacional 3 – United 0.

United no ta ‘tira e serbete blaco’ ainda si, ya cu na minuut 38, Denrick Lopez, e goleador di United ta haya un tiro liber hopi p’afor di e area penal, unda cu e ta deposita e bala den net pa hasi e wega Nacional 3 – United 1, un bunita gol atrobe di Lopez, hasi nos corda su gol magico foi tiro liber di Lopez den siman 4 contra Bubali, un momento di magia sin duda.

Gol nan ta sigui cai y na minuut ta toca turno na Belzius Pudens di Nacional un biaha mas, pa anota pa su ekipo, haciendo e wega Nacional 4 – United 1.

Di biaha despues di halftime, Fladimy Francois ta anota su prome gol den e partido pa amplia bentaha di Nacional na 5 -1. Y ta Francois mes ta anota atrobe na minuut 66, su di dos gol, pa hasi e wega Nacional 6 – United 1.

Denrick Lopez di United tabata sendí e anochi aki, na minuut 68 e ta anota su di dos gol den e wega pa corta e bentaha di e dragon nan, Nacional 6 – United 2.

Awor ta e Denrick show mes a sigui, unda cu e ta anota otro gol mas, su di dos “fast-break” sigui, pa un hattrick, na minuut 74 pa hasi e wega Nacional 6 – United 3.

Fladimy Francois no ta keda atras y ta anota otro gol mas na minuut 83, pa su hattrick tambe, p’asina hasi e anotacion Nacional 7 – United 3.

Denrick ainda no tabata cla tampoco cu anotacion di gol pa su ekipo United, p’aso na minuut 86 e ta anota un beyesa di gol, di chalaka, foi un pas’e di Daniel Perez den area penal, unda Lopez c’un defensor riba dje ta haya e bala, “loft” e cu su pia robes, y cu e mesun pia e ta remata haciendo un buelta den aire y anota e gol increíble aki, su di cuater gol di e anochi.

Nacional 7 – United 4.

Esey tambe tabata e resultado final unda Nacional a bai cas cu tur tres punta y awor ta acercando mas e ekiponan net bou top cuater.

“King of the match” ta comparti entre Fladimy Francois di Nacional pa su “hattrick” y Denrick Lopez di United pa su “poker” (cuatro gol den un solo partido) y probablemente un di e mihor gol nan di e campeonato aki (e gol di chalaka na minuut 86).

Den siman 8 – Nacional lo enfrenta Bubali den e ‘Derbi di Nort’ riba Diasabra atardi y United lo enfrenta Estrella Diadomingo anochi.

Britannia vs Bubali

Britannia ta solido den di tres lugar riba tabla, pero ainda no a yega nan peak, tin hopi cos cu por mehora ainda. Bubali a cuminsa malo den e campeonato aki, despues nan a man’e lanta cabes, pero, recientemente nan a perde consistencia atrobe, nan ta den bataya pa decenso.

E pumanan a cuminsa e wega aki sin Luis Estrada, Jonathan Ruiz y Ethan Tromp. Asina mes nan a logra wanta bala y controla e tempo di wega, nan a hasta haya algun chens tambe den comienso di e wega. Asina mes ta te na minuut 23 e ekipo di Piedra Plat a haya nan gol, for di un pifia den defensa di Bubali, un mal rechase, unda cu e bala a bons cai riba pia di Marcel Kock den area penal y e no ta faya. Britannia 1 – Bubali 0.

Asina mes niun gol mas a cai den e prome tempo den un partido bastante opaco.

Den di dos tempo, apesar di constante dominio di Britannia, pero Bubali cu mas energia y e ocasional yegada den area di peliger, ta na minuut 57 Britannia mes ta aumenta nan bentaha debi na un autogol di Jean Luc Oduber, pero prome cu esey un bon atake riba flank robes di Brian Dorothal cu a bai laga tur hende, penetra den area penal unda cu el a los e tiro cu a bons bai den gol foi e pia di Oduber cu a purba defende e tiro. Britannia 2 – Bubali 0.

Despues si Bubali no a wak mucho di e bala, pero asina mes den contra–golpi tabatin algun chens toch. En general Britannia por a tuma tur nan tempo pa lansa den atake, pero ainda cu inconsistencia ora cu nan haya nan mes dilanti e gol contrario, nan por tabatin un bentaha mas amplio.

Jeffrey Rolston ta anota pa Britannia na minuut 67 pa hasi e wega Britannia 3 – Bubali 0. Pa despues Juel Balentien hasi e wega 4-0 p’e pumanan na minuut 73. Daniel Linscheer ta anota e ultimo gol pa Britannia pa hasi e wega 5-0 net un minuut despues di e gol di Balentien, Linscheer a haya un pas’e di defensor central Marcus Portier for di full p’atras den defensa, un bala poni riba “teblachi” unda Linscheer no ta blas net.

Asina mes e partido a termina, un victoria facil pa Britannia y a haya nan tres puntanan pa asina sigura nan mes den di tres lugar riba tabla, cuater punta mas cu Caravel cu ta den posicion 4.

“King of the Match” ta e defensor central Marcus Portier di Britannia, un hungado cu bon instincto di futbol y vision di cancha, cu bon dominio di bala, hopi calmo, y e pas’e largo ey p’e gol number 5 tabata ‘top class’, Portier no ta bo defensor central typico, pero, no laga e falta di ‘corpulencia’ ey ganjabo, e ta solido.

Den siman 8 – Britannia lo hunga contra Caravel Diabierna anochi y Bubali ta bai contra Nacional den e ‘Derbi di Nort’ Diasabra atardi.

Caravel vs Dakota

E ultimo partido di siman 7 tabata entre Caravel y Dakota, e number 1 contra e number 4 riba e tabla di posicion di e campeonato aki. Dakota ta invicto te ainda unda nan a gana tur nan weganan cu un diferencia di gol di +24. Caravel ta e ‘ekipo revelacion’ te cu awor den a campeonato aki (ami lo yama Riverplate e ‘ekipo sorpresa’), e oncena di Angochi ta den top cuater.

Dakota a haya nan ta enfrenta un ekipo di Caravel cu hopi experiencia mes, bon para riba cancha cu hopi disciplina den nan wega, nan sa kiko pa hasi y nan tin pasenshi pa hungabo ful 90 minuut, pero Dakota no ta lider por nada.

Caravel a sorprende cu nan wega den comienso, nan a press Dakota net riba midden veld, no mucho halto, pero net suficiente pa desekilibra e Dakoteronan cu a haya nan mes ta pasa bek p’atras y ‘regroup”, tratando na circula bala, pero hayando dificultad pa lansa dilanti, y ora nan lansa dilanti, Caravel a defende bon y Raizel Jansen cu algun bon salbada net na tempo.

Caravel sin Joel Geerman y Devin Eman entre otro den e partido aki, no a lansa hopi dilanti, pero, ora tabatin mester nan tabata basta bon y cu chens pa gol, pero, Gikay Croes cu a start den gol pa Dakota en bes di Jahmani Eisden, tabatin un bon desempeño den e wega pa proteha e gol. Dakota toch a sigui insisti si, teniendo e bala, sin perde pasenshi, sabiendo cu Caravel lo bai ta bon para riba cancha, y lo no otorga espacio facilmente, lubida riba esey.

E apertura y chens cu Dakota a haya den e wega y cuminsa tuma bentaha tabata via un penalty foi un falta cometi contra Sebastian Montoya drentando den area penal di Caravel. Montoya mes ta anota for di punto penal pa habri marcacion, su di 11 gol pa bira e lider absoluto riba tabla di goleador di e campeonato aki. Caravel 0 – Dakota 1.

Un partido bastante igual, apesar cu Dakota cu mas posesion di bala, pero, no tabatin dominio riba Caravel te na e punto ey. E gol tempran di Dakota a mas bien saka Caravel for di nan plan original, ya cu mester a sali pa busca un gol pa empata e wega.

Na minuut 25, foi un bon tiro di skina di Ricky Hodge, e bala ta haya cabes di Fernado de Sousa cu no ta faya, pa hasi e wega Dakota 2 – Caravel 0, cu e gol aki de Sousa ta drenta den top 10 di goleadornan cu su gol number cuater di campeonato.

Net despues di e gol aki, na minuut 26, den un incidente, Ricky Hodge y Miguel Gutierrez ta haya carchi cora y expulsion, cada ekipo awor cu dies hungado. Asina mes e partido no a cambia mucho, un lo a pensa cu esaki lo a favorece Dakota mas, pero, a keda proba cu Caravel tin bon condicion fisico y tambe suficiente velocidad y empuhe pa sera espacio y sigui bataya Dakota “igual igual”. Di berdad, apesar cu e score ta refleha un cos, Dakota mester a bringa duru den e wega aki pa keda den bentaha, un partido bastante fisico.

Na minuut 39, den un contra-golpi fulminante, Jackson Theofille ta anota e gol di corta bentaha pa Caravel, un bon pase di Jean Marc Farro na banda drechi di cancha. Caravel 1 – Dakota 2. Asina tambe halftime a bai aden, un partido hopi sera.

Den di dos tempo conan a sigui mescos, un partido hopi balansa, cu Caravel mas den atake y cu chens. Pero den Caravel su mesun iniciativa pa busc’e empate, na minuut 50 Dakota a logra exploita un buraco chikito, unda nan a lansa den contra-golpi, Joshua Gross cu a cuminsa un “one-two” cu Fernando de Sousa den Dakota su mitar, de Sousa ta sprint na banda robes, hala defensa, y haya Gross ta sprint su mes na banda drechi, duna Gross e bala den area penal, unda Gross ta deposita e bala den gol, bunita gol den careda (Gross su di shete gol den campeonato). Caravel 1 – Dakota 3.

E carchi cora pa Meldrick Dabian di Caravel, cu tabatin un hopi bon partido por cierto, na minuut 60, a caba di sentencia e destino di Caravel den e partido aki, kedando cu nuebe hungado so, lastima, p’aso Caravel asina mes a sigui bataya y busca pa anota. Djeinan Shemar Monticeuex ta anota na minuut 75 p’e 4-1, un gol di distancia largo di mas cu cuarenta meter, un bunita gol di berdad, otro hoya di gol mas den siman 7 (hunto cu edun di Denrick Lopez).

Dakota a pone e ‘cherry riba e bolo’ cu nan di cinco gol pa medio di Reiner Paraez, cu tabatin un partido sublime. Esey tambe tabata e resultado final, Caravel 1 – Dakota 5.

Sebastian Montoya, Joshua Gross y Reiner Paraez a brilla den e partido aki pero awe nos “King of the Match” ta Ferdinant Robert, e capitan di e “amarillonan” cu tabatin un tremendo partido, no solamente pa su liderato, pero tambe pa su desempeño incansable, defendiendo y tambe coordinando riba cancha, ta cuanto biaha Robert a toka e bala? pabien.

Dakota asina a consolida nan mes como lider absoluto riba tabla di posicion, distanciando nan mes awor cu 4 punta di bentaha riba RCA cu a perde punta nan mes debi n’e empate cu Riverplate, pero, siman 8 ta e siman di e ‘Clasico’, unda Dakota lo enfrenta RCA, ta kiko lo pasa? RCA lo por haya tres punta y corta e bentaha di Dakota riba tabla, of Dakota lo distancia nan mes mas ainda?

Den siman 8 – Caravel lo midi forsa cu Britannia Diabierna anochi, y Dakota lo topa cu RCA den a ‘Clasico’ Diadomingo atardi.

Te otro siman anto!

Click to comment

Leave a Reply

Your email address will not be published.

More in Division Honor