Connect with us

Division Honor

Siman 8 – E ‘Clasico’ a bin y bai, y apesar cu e tabla no a cambia mucho, cos a bira mas preta awor

'E Clasico' - Nathan Richards/ Futbol Aruba

Siman 8 – un resumen

E siman aki a promete hopi, y apesar cu e focus tabata riba ‘e clasico’, unda RCA y Dakota a bataya pa 90 minuut pa despues culmina den un resultado cu un diferencia minimo den e wega y tambe asina riba tabla. E ekipo cu a duna mas di papia e siman aki tabata Caravel, e ekipo di Angochi. La Fama ta bayendo “viento en popa”, Estrella tambe a lanta cabes un poco atrobe, mientras cu Nacional cu Devis Oliveros ta bek despues di un muestra di poder.

 

Caravel vs Britannia

Riba Diabierna anochi, Caravel, e ekipo revelacion den e campeonato aki a midi forsa cu Britannia, un ekipo cu ta promete hopi pero cu ainda falta pa demostra mas.

E dos ekiponan aki ta den ‘top cuater’ y ta buscando pa consolida nan mes ey den p’asina yega playoff, tin hopi presion biniendo di posicion nan 5, 6, y 7 riba tabla.

E partido bou di un awacero pisa. Caravel atrobe cu’n wega di pasenshi y disciplina den nan planteo, fisico sin duda, a hasta duna Britannia un poco cancha pa hunga nan wega (te na un punto), despues cu nan mes a tuma bentaha trempan den wega, semper defendiendo bon ora tin mester.

Na minuut 4 caba anto e piratanan ta sorprende Britannia cu un gol trempan pa medio di Gabriel Alvarez, ta net loke nan tabata kier pa impone nan ritmo y plan di wega. Caravel 1 – Britannia 0.

En bes di responde debidamente, Britannia ta mas bien cai den un lapso mental y na minuut 21 ta otorga un tiro liber peligroso, na rand di area penal, unda cu Joel Geerman ta lansa un tiro descumunal unda (su tata) Carlos Geerman ta hasi un di e mihor salbadanan di e campeonato, spectacular, Geerman ta blok e bala den aire, e bala ta bai di su dedenan dal riba e tubo na halto, pero, na mesun tempo su ekipo no a cubri p’e rebote, apesar di tin mas homber den area penal n’e momento ey, e bala ta pika y encontra cu e cabes di Mairon Gutierrez cu tabata drentando pa busca e bala p’asina hasi e wega 2-0 p’e oncena di Angochi.

Caravel ta sigui cu nan pressing y “blitz” y ta haya un otro tiro liber y otro gol dinter di 3 minuut, un bala cu ta pasa na rand di e banda robes di e barera bai den gol, tiro perfecto di Rauly Wiersma. Caravel 3 – Britannia 0.

Al fin Britannia ta reacciona y despues di varios intento, na minuut 44, Daniel Linscheer ta lansa un tiro di mas o menos 30 meter pa un bunita gol ‘den 90 graden’, un “sambombaso” man’e ta bisa na Spanjo. Caravel 3 – Britannia 1.

Halftime a bai aden, hopi a pensa cu e pumanan lo a bai reacciona mas den di dos tempo despues di e gol potente di Linscheer, pero, apenas na comienso di e di dos tempo, na minuut 52, ta Theo Texeira ta hasi e wega 4-1, pero p’e piratanan, un pase skerpi for di den profundidad, foi nan mesun half, di Hugo Robert.

Britannia for di e punto aki tabata mas bien hungando mas desespera, toch nan ta haya un otro gol, pero te na minuut 74, for di Ethan Tromp, unda e mes ta penetra den area penal y den un “hustle’ ta gana e bala, bai laga dos defensa y los un tiro foi banda robes crusando p’e otro banda, fusilando portero Raizel Jansen. Caravel 4 – Britannia 2.

Esey mes tabata e resultado final, unda cu Caravel a consolida nan mes den top cuater y ta solamente un punta trei Britannia pa tercer puesto riba tabla. Donaldo Quintero y Jackson Theophile tabatin hopi bon wega, hopi elogio pa nan. ‘King of the Match’ ta Jean Marc Farro, e capitan di e piratanan e anochi aki, un desempeño extraordinario den e linea defensivo di e ekipo di Angochi.

Den siman 9 – e ultimo siman di e prome rond di e campeonato aki – Caravel lo hunga contra Nacional y Britannia contra Dakota, tur dos wega riba Diasabra.

 

Bubali vs Nacional

E ‘derbi di Nort’ version 2021 a cuminsa cu hopi promesa pero a wordo dicidi hopi trempan caba. E derbi aki cu a nace den anjanan 70 y cu semper tabata grandi, pero a perde lustro den e ultimo tempo.

Devis Oliveros ta bek p’e wega aki despues di un suspension y Leonardo Colmenarez tambe a aparece, despues di hopi tempo, den e “line-up” di e dragonnan, y Bubali ta hunga sin nan estelar defensa central, Michael Tromp.

Nacional a cuminsa di biaha cu dominio di bala y control di e wega, Bubali, di berdad casi no por a haya e bala. Esaki tabata un Nacional mas trankil, dijes haciendo bon pasenan, sin hasi pura pa yega na gol, dictando e tèmpo di e wega.

E prome gol ya a cai na minuut 14 pa medio di Devis Oliveros, cu a bin corda nos den e wega aki ta ken ta e ‘top goleador di Aruba’ den e ultimo anjanan, foi un pase masha largo mes di Charles de la Cruz cu tabatin un hopi bon partido. Bubali 0 – Nacional 1.

Na minuut 30 ta Devis Oliveros mes ta lansa un tiro liber ‘den 90 graden’ pa aumenta e bentaha di su ekipo, Bubali 0 – Nacional 2.

Net un minuut despues ta Fladimy Francois ta bolbe haya e caminda di gol y ta hasi e anotacion Bubali 0 – Nacional 3, un pase skerpi di Joshua Aguirre cu tabata casi perfecto e anochi aki.

Despues di halftime Bubali a cuminsa insisti mas, of mehor dicho, bataya mas, pero toch envano. Ta Devis Oliveros mes ta anota su “hattrick”, pero ki sort’i “hattrick”, un gol di ‘”medio-Chilena”! foi un pase di Joshua Aguirre, su di dos assist den e partido, pa hasi e wega Bubali 0 – Nacional 4.

N’e punto ey ya e ‘Derbi di Nort’  tabatin un nomber, e nomber di Nacional. Na minuut 69 Devis Oliveros mes ta hasi e wega 5-0, un otro assist di Joshua Aguirre foi un tiro di skina, perfectamente pon’i riba cabes di Oliveros, Aguirre su di tres assist den e wega y Oliveros su “poker” (cuater gol), pa emula e hazaña di Denrick Lopez di United e siman anterior (contra Nacional mes). Asina tambe Oliveros ta acumula 7 gol total den e campeonato pa keda empata den di cuarto lugar riba tabla di goleador.

Na minuut 83 ta toka turno na Joshua Aguirre mes pa anota su gol den e partido aki, pa bai hunto cu su tres assist nan, sensacional partido di Aguirre. Bubali 0 – Nacional 6.

Esey tambe tabata e score final den e partido aki. Aguirre tabatin un tremendo partido, hasi nos corda di su talento y “work-rate”, e mesun cu el a demostra den e final di ‘ABC Cup 2019’ unda Nacional a keda como campeon y e a keda como mihor hungado den e wega final ey contra Vesta, e campeon di Corsow e tempo ey. Nos ‘King of the Match’ p’e partido aki ta Devis Oliveros pa su cuater golnan den e partido aki, “poker” ta algo di celebra di berdad.

 

Devis Oliveros di Nacional – potret di archivo

Den siman 9 – Bubali lo hunga contra Estrella riba Diadomingo, un partido crucial pa sali di zona di decenso, y Nacional lo bai contra Caravel Diasabra atardi.

 

La Fama vs Riverplate

E partido entre La Fama y Riverplate a promete di bira un evento interesante debi cu bo ta haya un La Fama cu tabata e revelacion di e torneonan previo unda e ‘speransa berdenan di Savaneta’ a sali sub-campeon den tur e dos torneonan importante den 2021, sub-campeon di Copa Betico y tambe di e Torneo AVB 2021, un gran logro sin duda y mi kier keda corda esey te ora cu e campeon y sub-campeon nobo wordo dicidi na 2022. Riverplate, cu a haya invitacion pa participa den e division mas halto, nan ta e ‘ekipo sorpresa’ awor (Caravel mi ta considera e ‘ekipo revelacion’ te cu awor den e campeonato actual). E ekipo di Playa P’abou a duna bataya na tur e grandinan y ta den e “race” pa top cuater y playoff.

La Fama a cuminsa haya nan “mojo” cu nan tabatin campeonato pasa, nan a cuminsa haya nan mes, stabilisando despues di un comienso poco traba, un ekipo bon compacto y peligroso cu bon condicion fisico. Den e partido aki nan a duna River dolor di cabes, pero River tambe a bataya bek. Den un dado punto den e wega, e tabata un ‘di banda pa banda’, tenso y hopi competitivo.

E wega tabata un di full 90 minuut, e ekiponan aki a bataya tur cu tur, e porteronan a sa di mantene nan golnan inbatibel pa mayoria di e di dos tempo, e partido a sigui cu tension y tabata atractivo.

Den e di dos parti di e di dos tempo e ekipo di La Fama a man’e cuminsa gana y mantene e bala mas, semper buscando solucion pa hasi un diferencia, y e momento ey a yega casi na final di e wega unda nan a haya un penalty ora cu tabatin un infraccion contra Kendreck Kock den area penal. Raul Morales ta anota e gol di penalty casi na minuut 90 caba, euforia pa La Fama y agonia pa Riverplate.

Riverplate a tira ‘tur cu tin’ den e ultimo minuutnan den tempo extra, pero “helaas”e gol no a yega p’e oncena di Madiki.

Esey tambe tabata e resultado final, La Fama 1 – Riverplate 0.

Claudio Cavalcante di La Fama tabatin un gran partido te ora cu el a keda lesiona y mester a bandona e wega na minuut 40 caba, Joshua Farro tambe tabata solido bou di e tres latanan pa La Fama. King of the Match ta Kendreck Kock, e hoben delatero cu a bataya casi tur bala rond di dje y tabata e “desequilibrio” pa La Fama den ofensiva.

Den siman 9 – La Fama lo midi forsa cu RCA riba Diabierna anochi y Riverplate ta bai contra United Diadomingo anochi.

 

Dakota vs RCA – e Clasico – ‘Partido di Siman’ cu analysis

E Clasico di e anja aki, a lo menos, esun di e prome rond di e campeonato (dos tin den cada campeonato), a lanta hopi expectativa. Dakota ta e lider invicto riba tabla cu tur wega gana te cu awor. RCA, e ekipo mas campeonil di Aruba, tampoco a perde ainda, pero, a perde punta debi na empate na dos ocasion den e rond aki. E partido aki, number 1 vs 2, RCA cu chens pa corta e bentaha of Dakota cu chens pa amplia bentaha riba tabla, “afterall” ta un partido clasico entre dos ekipo grandi di nos isla, e dos nan cu mas campeonato, dos bisinja den e capital di nos isla.

Dakota a cuminsa e partido cu hopi vigor, hopi empuhe, determina pa bataya. RCA a defende bon for di comienso, un planteo hopi organisa, diseña pa para e velocidad di Dakota, tambe pa “slow down” nan contra-golpi nan fulminante. E forsa di RCA ta keda den medio campo, ‘contal cu bo tin Firi y su “posse” eynan, ta rond mes bo tin cu bai purba suerte’, p’aso mei mei ta e epicentro di nan bataya.

Pero, Dakota tin velocidad pa bai rond toch? ta p’esey nan a purba cu e delantero Shermar Monticeuex riba e flank drechi, cu e ausencia di Ricky Hodge debi na carchi cora den e partido previo, y Fernando de Sousa riba robes. Pero, no t’asina facil! p’aso de Sousa y Monticeuex no tabatin hopi exito bayendo contra Mark Jacobs y Alexon Simmons na e bandanan, unda ambos por defende bon y tambe lansa den atake si bo hera keda mucho dilanti. Den defensa central Nathan Loe-A-Njoe y Chito van der Biezen (te ora cu el a sali lesiona di wega), a sera casi tur yegada di Dakota.

Dakota tabatin e iniciativa den e promer half, nan a insisti riba e flank nan toch, man’e a spera (nan a wordo forsa mas bien) y leu leu ta aplica otro variantenan, cu poco yegada di calidad toch den area penal, pero tambe tabatin falta di punteria y pasenshi den e ultimo 16, yega nan por a yega banda di e area penal di RCA, pero den area penal tabata falta hopi. Ta Joshua Gross tabata e mihor variante pa Dakota na dado momentonan, pero, asina mes tambe sin resultado.

Kiermeen RCA a man’e duna Dakota cierto parti di e cancha, pero a sofoca nan yegada den e ultimo 16. Ora cu Dakota no a logra mas, frustracion a cuminsa drenta. Pa colmo Jonathan Lake (coach di Dakota) a haya expulsion (for di banda di veld), y na minuut 37 a toca turno tambe na Derwin Donato pa haya su di dos carchi geel y expulsion automatico. Dakota ta keda sin coach na banda y sin un rechts-back riba cancha.

Djeynan Dakota su plan di wega a bai perdi, vooral ora cu Jeamir Howell Brokken a anota un hoya di gol na minuut 41, ora cu e mes ta cuminsa un atake for di net dilanti e circulo central, den e half di Dakota, e ta combina cu Jhon Silva y Ronald Gomez, e ta sprint bai na banda drechi drentando e area penal di Dakota, haya e bala bek foi Gomez, over di su cabes, unda e no ta laga e bala cai mes, y den un volley ta fusila portero Jahmani Eisden ne banda contrario di e porteria, un bunita gol p’e 1-0 pa RCA.

Asina e halftime ta bai aden cu RCA den bentaha y Dakota c’un hungado menos, y tur cos ta mustra cu RCA lo bai exploita tur esaki pa aumenta e bentaha y sigura nan victoria den e Clasico.

Den e di dos tempo, man’e a spera, RCA cu mas control y toke di bala, pero, sorpresivamente Dakota a duna bataya y a cuminsa lansa den atake, en bes di sera patras, apesar di tin un homber menos, e iniciativa aki a causa un “stalemate” unda e ekiponan a mas bien tuma turno pa ataka y defende, ambos sin exito.

Un wega tenso pero no mucho bistoso, RCA a mas bien want’e resultado, apesar, cu Dakota a purba, sin mucho yegada skerpi, RCA tampoco no a probecha mas pa aumenta e resultado. E Clasico mas bien a bira un wega di hopi tactica, wardando e tempo pasa, Dakota simplemente no tabata por mas, RCA a hunga e wega pa bai cu e tres puntanan.

Esey mes tabata e score final, RCA cu e victoria y e puntanan, p’e “bragging rights” y Dakota cu un ‘victoria moral’ mas bien, pero, ta keda hopi mas wega pa hunga, ban wak kiko ta kiko den e siguiente Clasico den e di dos rond. RCA awor ta un solo punta trei Dakota p’e top di tabla y e tricolornan ta keda invicto.

Mencion special pa Marc Jacobs y tambe Nathan Loe-A-Njoe pa nan desempeño den e wega aki, e velocidad di Dakota no tabata por cu nan. “King of the Match” ta un biaha mas e capitan tricolor, Jeamir Howell Brokken, e epicenter di RCA su wega, y su fabuloso gol pa gana e clasico.

Den siman 9 – Dakota lo hunga contra Britannia Diasabra anochi y RCA contra La Fama Diabierna anochi.

 

United vs Estrella

E partido aki no ta e clasico pero sin duda tabata hopi importante si, ya cu e dos ekiponan aki ta den bataya pa evita decenso. Estrella sin nan ‘peliger di gol’ Trevor Faro y ainda sin hopi hungadornan clave. United tin Dendrick Lopez, e goleador cu a bin di anota cuater gol den e partido previo contra Nacional.

Estrella, di comienso a cuminsa man’e un ekipo nobo. Nan postura tabata “rustig” pero alabes den focus, cu posesion di bala, buscando y hayando espacio, husando nan talento hoben cu bon toke y velocidad ora tin mester.

E prome gol a cai trempan caba, net algo bon pa Estrella, pa calmanan mas ainda y sigui hunga nan wega. Norwin Werleman ta anota na minuut 8, United 0 – Estrella 1.

E iniciativa di Estrella ta sigui mesun cos, y nan ta probecha atrobe, na minuut 10, ta Travis Faro ta anota pa hasi e wega United 0 – Estrella 2.

Tur cos tabata mustra bastante facil p’e naranhadanan, hasta por a spera mas gol.

Pero, United alfin a cuminsa sera mihor, nan a wanta bon, apesar cu Estrella tabatin mas posesion di bala semper, pero, mas importante, United a logra preveni e gol di amplia bentaha, esey ta conta!

E gol number tres ei di Estrella nunca a yega, y no ta p’aso nan no a purba, nan no a ni baha intensidad, pero djies cu United a defende bon, tirando den contra-golpi ora nan haya chens, wantando y buscando oportunidad pa anota y drenta den e wega.

E chens ey alfin a yega na minuut 77 unda cu United ta lansa den atake pa medio di Denrick Lopez, na banda robes, Lopez ta hasi un pase pa Antonio Fauwcet na su banda drechi, Fauwcet ta debolbe e bala pa Lopez cu t’awor na rand di area penal di Estrella (banda robes), y den un ‘habri y sera di wowo’, den un espacio reduci, cu tres defensor dilanti di dje, e ta lansa un bala pa bati e portero Pieter de Vries di Estrella na su banda drechi, niun hende a wak Lopez saca e tiro aki. United 1 – Estrella 2.

Asina ta cu di nada, United t’awor den e wega. Estrella mester a worry cu despues di tur e wega cu nan a hunga, awor nan ta na punto di perde nan bentaha y e tres puntanan. Estrella a hasta cambia portero pa e ultimo parti di e wega unda cu Gioshua Maduro a drenta pa yuda mantene e bentaha minimo aki y e tres puntanan.

Na minuut 85 United a hera keda cu diez hungado or cu Woodthes Paulus a haya un carchi cora pa wega peligroso, pa algun minuut despues e arbitro principal cambia su decision y a cambia e carchi cora pa un carchi geel, despues cu Paulus ya a bandona cancha. United a keda insisti y bai “todo por todo” pa empata e wega, Denrick Lopez casi a anota un gol di chalaka atrobe, entre otro intentonan, e ekipo nortero casi a empata e wega.

Na final, Estrella a logra want’e resultado, cu hopi sodo, p’aso United a tira dilanti y duro den e ultimo parti di e wega, y sigura e tres puntanan di oro, asina ta hasta pasa Bubali (pa diferencia di gol) y bai den di ocho lugar riba tabla, pa huy un poco for di e zona di decenso.

Tur dos portero di Estrella a hasi un bon trabou pa wanta United. “King of the Match” den e wega aki ta Gioshua Maduro cu drenta pa contene United den e ultimo 20 minuut di e partido aki y salba Estrella.

Den siman 9 – United lo bai contra Riverplate Diadomingo anochi y Estrella contra Bubali Diadomingo atardi.

Te otro siman!

 

Click to comment

Leave a Reply

Your email address will not be published.

More in Division Honor