Connect with us

Division Honor

Siman 9 – Ultimo fecha di e prome rond di campeonato – speransa tin ainda pa algun ekiponan, Bon Pasco!

Bataya pa top cuater - Raizel Jansen y Devis Oliveros - Photo: Nathan Richards

Den resumen:

RCA, cariciando e liderato di e campeonato, cu ‘momentum’ bou nan halanan despues di nan victoria den ‘e clasico’. Ta keda di wak con Dakota lo reacciona den siman 9, despues di perde nan invicto den e fecha previo. Con lo sigui cu e ekiponan sorpresa? E bataya pa ‘top cuater’ ta intenso awor, pero, tambe e bataya pa ‘sobrevivencia’ den Division di Honor. Nos ta den un campeonato cu hopi golnan y algun di calidad hopi halto, e careda pa ‘goalgetter di campeonato’ tambe ta interesante pero al fin al cabo ta ‘team-work’ lo trece gloria en bes di prestacion individual den e deporte rey, e ‘team-sport’ futbol.

 

RCA vs La Fama

E prome partido di e siman nobo tabata entre RCA y La Fama. E tricolornan biniendo di nan victoria den e clasico unda nan a gana Dakota cu diferencia minimo di 1-0, p’asina yega mas cerca di e liderato di e campeonato cu momentum trei nan. La Fama cu ta den bon caminda despues di un comienso un poco complica, a cuminsa mustra speransa p’e parti final di e campeonato pa purba alcansa playoff.

 

E partido aki tabata bastante balansa entre e dos ekiponan aki, ta man’e un wega di ahedres,  no lubida cu ultimo biaha e dos akiponan aki a topa cu otro ta e ‘speransa berde di Savaneta’ a sali victorioso y elimina RCA den e semi final di e Torneo AVB 2021. Niun di e dos ekiponan a domina e otro den e prome half di e wega, un partido sera, hopi tenso, ambos cu algun yegadanan.

 

RCA sin nan capitan Jeamir Howell Brokken den alineacion pero si cu refuerso di e estelar Steven Milchor Rua, ken tabata mesun skerpi cu semper den su hugadanan. 

 

E prome gol a wordo anota pa RCA pa medio di Albert Francis na minuut 30, “killer” ta haya e bala foi Marc Jacobs na rand di area penal di La Fama, un poco na banda drechi, unda Francis ta hasi un media buelta y los un tiro duro di distancia cu ta banja e portero Gilbert Bautista di La Fama. RCA 1 – La Fama 0.

 

Despues di e prome gol, e tricolornan a man’e tene e bala mas y a cuminsa domina e wega un poco, cu bastante yegadanan, pero, sin por a concreta. Un partido cu no a mira gol mas p’e siguiente 89 minuut di e wega, un wega aspero, cu bastante carchinan y e no tabatin e lustro cu el a promete.

 

Na minuut 89, e wega a haya un tono di drama, despues cu La Fama a sali tur cu tur pa busca e empate, pero, net ora cu La Fama tabata hungando hopi bon, ta toka turno na Juan Villaraga di RCA pa anota y hasi e partido 2-0 p’e ekipo capitalino, un tiro di Evander Nedd cu ta bons for di un pia defensivo di La Fama, pero e bala ta bai cai net dilanti Villaraga, cu ta deposita e bala den net. RCA 2 – La Fama 0.

 

La Fama ainda no a baha cabes, e partido hopi “spannend” n’e punto ey (compensando p’e partido blando net momentonan prome), e Savaneteronan buscando tur avenida pa anota y busca un chens pa haya siquiera un punta pa nan esfuerso, cu poco tempo kedando den e wega. 

 

E bataya a sigui te na final, y den tempo extra na minuut 90+2, Claudio Cavalcante, cu a bin ta e homber clave di e Savaneteronan den medio-campo, ta hasi un pase for di profundidad pa Sylvester Schwengle, ‘a hasimi corda e pase di Maradona pa Buruchaga anota e gol di victoria pa Argentina den e final di mundial 1986′, e capitan di tres pulmon ta anota pa corta e bentaha di RCA den un momento critico, pa hasi e wega RCA 2 – La Fama 1, cu algun minuut mas pa bai.

 

La Fama a laga tur cos riba tereno den e ultimo minuutnan, pero, “jammer” e gol di empate ey no a yega, dunando RCA e victoria cu a duna nan e liderato di e campeonato n’e punto ey. 

 

‘King of the Match’ ta Marc Jacobs, un hungado versatil, un defensor cu por hunga riba hala como atakante, un velocista cu por crea wega tambe si mester, cu pasenan aserta, e por hasta hunga den defensa central ora mester.

 

Nacional vs Caravel

Nacional vs Caravel  – bataya pa top cuater

 

E partido aki, un masha importante mes, ya cu Nacional ta buscando na drenta den e bataya pa e cuarto posision riba tabla, un victoria contra Caravel den e wega aki lo trece nan hopi cerca mes (3 punta so) di e puesto codicia ey. Caravel c’un chens pa distancia nan mes mas di La Fama y Nacional, nan rivalnan mas cerca.

 

Nacional a cuminsa ta domina e wega aki, hungando bon, pero, ainda nan ta sin Jose Leonardo Pulido, nos no tin informacion ainda di e status di e hungado clave aki. En cambio, Nacional tin awor refuerso di Glenbert Croes, un bon hungado hoben di seleccion, di regreso den Division Honor for di Venezuela unda el a hunga den e di dos division cu Academia Rey di Barquisimeto. 

 

Caravel a hunga nan wega, man’e nos tur sa, nan ta cuminsa trankil, studia e wega, reacciona debidamente, ahusta, cu pasenshi, wanta e resultado den un planteo defensivo, bon para riba cancha, buscando e contra golpinan di sorpresa, y poco poco drenta den e wega y “build up” pa e parti final di wega, un ekipo efectivo sin ta “flashy”.

 

Toch Nacional a hunga e wega cu nan tabata kier, dominado den posesion y cu yegadanan, apesar cu e no a cristalisa den e prome tempo ya cu e wega a keda empata na cero na halftime.

 

Den e segundo tempo Caravel a cuminsa gana y tene bala mas y mihor, rotando bala, y lansando dilanti cu hopi confiansa, y na mesun tempo teniendo e bala for di Nacional, bon iniciativa di e piratanan trei e esfuersonan di entre otro Jackson Theophile, Melrick Dabian y nan capitan Jean Marc Farro.

 

Asina mes ta Nacional ta habri anotacion pa medio di un gol di penalti di Devis Oliveros ora cu Charles de la Cruz a wordo tumba abou den area penal, Nacional 1 – Caravel 0.

 

Tur cos tabata mustra bon pa Nacional apesar cu Caravel tabata haya mas yegada den area penal di e dragonnan awor, esey ta te na minuut 59, unda Nacional ta keda cu diez hungado riba cancha debi cu Glenbert Croes, den su debut, ta haya dos carchi geel sigui pa protesta y ta word expulsa for di e partido.

 

Nacional toch ta keda tira dilanti man’e nada un cambia, kizas cu e strategia di ‘bo ofensiva ta bo mihor defensa’, incluyendo pressing halto na algun ocasion, y nan ta anota un otro gol, ora cu Devis Oliveros ta intercepta un bala net p’afor di area penal di Caravel y hasi un pase pa Joshua Aguirre cu ta pon’e bala den net. Nacional 2 – Caravel 0.

 

Caravel ta sigui hunga nan wega y ta aumenta e intensidad den ofensiva, man’e a spera c’un homber mas cu Nacional, mas ainda cu e entrada di dos di nan hungadornan clave, cu mente ofensivo, Hugo Robert y Ezra Bosnie, a cambia nan fortuna den e partido aki.

 

Nan gol di corta bentaha ta yega na minuut 81 pa via di penalti ora c’un tiro di Ezra Bosnie ta dal den man di un defensor di Nacional, Bosnie mes ta anota pa hasi e wega Nacional 2 – Caravel 1.

 

Nacional ta reacciona y ta sorprende anotando un gol mas na minuut 83 pa medio di Belzius Pudens, un delantero cu a drenta den wega net un minuut prome, un pase masha largo mes y skerpi di Leonardo Colmenarez p’e “assist”. Nacional 3 – Caravel 1.

 

Awor si e oncena di Angochi ta haya nan ta tira ‘tur cu tur’ dilanti pa salba siquiera un punta y si no pa hasta gana e wega mes cu nan bentaha nunerico. Na minuut 86, Jean Marc Farro ta hasi un pase largo den area penal net riba pia di Jackson Theophile cu a sa di pone e bala de net pa corta e bentaha atrobe, Nacional 3 – Caravel 2.

 

Caravel insistiendo y Nacional awor no ta keda cu otro opcion cu hala patras y defende e resultado, y e tres puntanan. Na minuut 90+3, Melrick Dabian den un atake ta wordo tumba abou den area penal di Nacional y ta haya un penalti, Ezra Bosnie ta anota atrobe poniendo e bala den ‘nobenta graden’, Nacional 3 – Caravel 3.

 

Esey mes tabata e resultado final, e ekiponan a parti punta. “King of the Match” ta comparti entre Jean Marc Farro di Caravel y Joshua Aguirre di Nacional.

Joshua Aguirre di Nacional y Jean Marc Farro di Caravel

 

Britannia vs Dakota

Esaki ta di bai ta un test duro pa Dakota despues di a perde nan invicto den e clasico e siman prome. Britannia c’un chens grandi pa mustra kiko nan por hasi den un wega grandi y impone nan mes den e campeonato aki unda nan ta den top cuater, pero, semper tabatin un “feeling” cu nan por mas.

 

Luis “Coco” Estrada a cuminsa den e partido aki y Jonathan Ruiz ta ausente for di e elenco di e pumanan di Piedra Plat, y Ricky Hodge ta bek p’e Dakoteronan, pero nan ta sin Joshua Gross y Derwin Donato.

 

Un partido balansa den e prome tempo, pero, Britannia a duna bataya, Dakota cu mas yegada y chens pa anota, algo hopi importante, e hecho cu nan no a sa di probecha no ta necesariamente debi na fayonan di punteria, e ta mas bien “mala suerte”, bala ta dal den tubo, un pia di un defensor net den caminda, bon intervencion nan di e portero Carlos Geerman, hopi factornan cu a preveni e gol di Dakota. 

 

Dakota ta e ekipo cu mas gol anota den e prome rond di competencia (35 gol den 9 wega, average di ‘6 pa wega’). RCA ta e ekipo cu a permiti menos gol (6 gol so den 9 wega, average di menos cu un gol (0.66 pa cada wega).

 

Halftime a bai aden empata na cero gol. Den e di dos tempo Britannia a cuminsa hopi bon, na minuut 47 caba, den un hugada di dos pase so, foi nan mesun banda, Daniel Linscheer ta duna Luis Estrada e bala den “doelgebied” di Dakota, cu Nickenson Paul riba dje, y c’un agulo di tiro hopi dificil, portero Jahmani Eisden ta semi sali pero sin “commit” completamente, pero toch: ta con Coco a los e tiro ey anyway y haya e “angulo”? ta anota e gol di bai ariba. Britannia 1 – Dakota 0.

 

Dakota ta reacciona bon, of mas bien a sigui hunga nan wega cu nan tabata hungando caba den e prome tempo, cu tabata crea hopi chens pa nan. For di un tiro di skina Nickenson Paul ta kop e bala cu ta dal den tubo horizontal cai dilanti of patras di linea, nos no sa (no tin goal technology ainda akinan), despues un rechaso cu ta bai cai y pika dilanti Sebastian Montoya na rand di area penal, e ta los e tiro den un volley y empata e wega. Britannia 1 – Dakota 1.

 

Na minuut 58, Britannia ta haya un tiro di skina unda Luis Estrada ta tuma esaki masha liher mes, sorpriendendo Dakota cu tabata preparando p’e tiro di leu, un toke chikito el a hasi, “smart”, hayando Daniel Linscheer cu ya tabata banda di dje, na banda robes di e penalty box di e amarillonan, cu ‘niun’ defensa rond, sin presion, Linscheer a drecha e bala, hasta cambi’e pa su pia drechi y “shoot” e  bala riba gol unda portero Eisden a haya su mes cu David Dubero y su mesun defensor Nickenson Paul den un “enredo” dilanti dje, blokeando su bista, bala a gewoon banja tur hende bai den net. Mi tin un “feeling” cu e cos aki tabata bon diseña, nos tin cu puntra Coco. Britannia 2 – Dakota 1.

 

Luis Estrada di Britannia y Nickenson Paul di Dakota

 

Na minuut 81, Britannia ta demostra cu futbol, casi den su mayoria, ta un deporte di “momentonan di oportunidad”, y no semper ta importa si bo ekipo tabata domina e wega of no. E pumanan ta haya un freekick simpel den nan mesun teritorio, David Dubero, defensa central, cu tabatin un bon desempeño den e wega aki ta ‘wak un oportunidad’, e ta lansa un tiro hopi largo dilanti, hayando Coco Estrada coriendo n’e banda robes, e ta sprint bai laga Nickenson Paul, un stap dilanti e velos defensor, ta tur loke e tabatin mester, bentaha di ta na e bon banda tambe, kiermeen Paul a hay’e ta core n’e banda drechi di Coco (e banda menos desea), e bala ta cai perfectamente na rand di area penal unda Eisden ta sali bin pa blokea Coco, y esaki ta loft e bala cu su pia robes, riba cabes di Eisden, gol p’e pumanan, fenomenal! Britannia 3 – Dakota 1.

 

Dakota, sorprendi, ta reacciona apesar cu tempo a cuminsa bira cortico, y na minuut 87 ta haya un penalty cu Sebastian Montoya ta lansa pero Carlos Geerman ta tapa, pero, den e rebote Fernando de Sousa ta logra anota e gol di corta bentaha pa Dakota. Britannia 3 – Dakota 2.

 

Ainda Dakota a keda cu’n chens chikito, masha chikito si, debi na tempo, pa por lo menos haya un punta den e wega aki, y na minuut 91, ‘un biaha mas’ e tubo a preveni otro gol di Dakota, un tiro di Ricky Hodge a dal den bara horizontal. Helaas anto, e no tabata scirbi den e streanan pa Dakota e anochi aki. Score final Britannia 3 – Dakota 2.

 

Carlos Geerman, David Dubero, Daniel Linscheer y e hoben capitan Marcus Portier, entre otro, tabatin wega solido p’e pumanan. “King of the Match” ta Luis “Coco” Estrada, un homber di henter cancha, e motor den ofensiva, un hungado cu “tino”, e gran oportunista, algo asina importante den cualkier deporte.

 

Britannia 3 – Dakota 2

 

Estrella vs Bubali

Partido aki tabata crucial pa sali foi zona di decenso (degradacion), ambos ekipo a sufri hopi te cu awor den e campeonato aki. Ambos ekipo tambe cu un elenco basta hoben y cu talento, cu ta algo bon pa futuro, pero den corto tempo awor?

 

E partido competitivo trempan, cu poco yegadana den zona di peliger. E oncena di Santa Cruz a anota y habri marcacion na minuut 15 unda Annuar Kock den un sprint te den area penal di Bubali ta los un tiro den careda, e bala ta touch levemente e pia di un defensor di Bubali y ta hasi un spin pa banja e portero Zymion Loopstok, Estrella 1 – Bubali 0.

 

Bubali toch ta demostra cu nan kier bringa p’e victoria, tokando bala, buscando manera, toch sin yegada skerpi den e ultimo 16, ta man’e cos cu Ethan Gumbs, cu a traha hopi duro, semper tabata su so dilanti p’e orguyonan.

Estrella tabata constantemente un peliger den contra-golpi, vooral ora cu e naranhadanan hasi pressing den medio campo, nan a sa di probecha den e zona di peliger.

 

Na minuut 36 Estrella ta aumenta bentaha cu un gol di cabes di Trevor Faro, foi un pase di Egbert Tromp. Estrella 2 – Bubali 0.

 

Estrella tabata parce ta den “cruise-control”, pero hopi ta bisa cu un anotacion di 2-0 den prome mitar semper ta un score peligroso p’e ekipo den bentaha, ya cu ainda falta hopi tempo di wega, bo ta cuminsa confia di mas, y e ekipo cu ta den desbentaha ta cuminsa bringa mas duro prome cu e wega slip foi nan por completo.

Bubali ta haya un gol di corta bentaha net prome cu halftime na minuut 43, un gol di distancia, p’afor di area penal, di John Zara, cu a caba di drenta den wega. Estrella 2 – Bubali 1, Bubali ta bek den e wega.

 

Despues di halftime, Bubali awor cu “momentum”, ta bataya duro, dominando trempan, y ta probecha di nan esfuerso, gol na minuut 51 di Jose Monsalve, pa empata e wega, Estrella 2 – Bubali 2, y bo ta wak, djies asina e bentaha di Estrella a somenta.

 

Bubali a bira hopi hambra despues cu nan a empata e wega, y a hera haya un gol mas ora cu Zarra mes ta faya un chens hopi grandi. Estrella na su turno a reacciona bon, y a cuminsa hunga un mihor futbol atrobe despues di a laga Bubali horta e momentum foi nan despues di a bai ariba 2-0 trempan den e prome tempo.

 

Estrella ta bolbe bai ariba den anotacion, mei mei di un awacero riba e veld di stadion Trinidad. Na minuut 78 ta Aldrin Lampe ta anota pa duna e santacruseronan bentaha atrobe den e partido. Estrella 3 – Bubali 2. Un tiro descumunal di p’afor di area penal.

 

Djeynan tambe ta man’e Bubali a perde focus un biaha mas, Estrella awor cu hopi chensnan di peliger, ta man’e e condicion fisico di Bubali a laga nan na caya. E golnan di Estrella a cuminsa bin un trei otro. Aldrin Lampe ta hera haya su di dos gol ora cu e ta “schaak” varios defensor di Bubali penetra den area penal hayando su mes cu portero Loopstok, cu ta salba e hugada, den e rebote Trevor Faro ta pone e bala den net, esey ta na minuut 84, Estrella 4 – Bubali 2, Faro su di dos gol di e wega (su di 5 gol den campeonato).

 

Aldrin Lampe mes atrobe ta bolbe anota na minuut 90 pa hasi e wega 5 -2 pa Estrella. Y net na final di wega ta Darvin Franken ta pon’e e “broche final” pa e 6-2 y un victoria importante pa Estrella cu awor a suma 7 punta y en bes di wak abou pa decenso por hasta wak ariba p’e bataya p’e “mei mei di tabla” y ken sa, hasta c’un chens chikito p’e puesto number cuater y playoff, ken sa.

 

“King of the Match” ta Aldrin Lampe, cu un bon desempeño general y su golnan den e partido aki (casi un hattrick).

 

Riverplate vs United – Partido di Siman

Riverplate tabata e ekipo sorpresa den e prome mita di e campeonato aki sin duda, un ekipo cu tabata den Division Uno y a haya un invitacion pa participa den e nivel mas halto di nos futbol. United te cu awor no a sera ni un punta riba tabla y desesperadamente ta buscando algo pa sobrebibi den Division Honor.

 

E partido a cuminsa hopi bon mes, United hungando sin nan goleador Denrick Lopez,  bringando y hayando chensnan pa anota, sorprendiendo River cu no tabata cu mesun focus man’e ora cu nan a hunga contra Dakota of RCA. United ta un ekipo bastante bon “plantea” den e wega aki, cu disciplina riba cancha, y ademas hambra y ta “buscando algo di come”.

 

Un partido di “ida y buelta” trempan, pero ta United ta habri marcacion na minuut 12, ora cu for di un tiro di skina, despues di un “rebound” e bala ta haya pia di Cederick Lopez na rand di area penal, e bala ta pika y Lopez den un media buelta ta anota e gol p’e ekipo nortero. Riverplate 0 – United 1.

 

River ta contesta bayendo den atake despues di e gol den nan contra, ta man’e River a wordo sorprende trempan, pero kizas no tabata un sopresa mirando cos foi punto di bista di United. Den un counter ta United mes ta hera haya un otro gol un paar di minuut despues, unda Antonio Fawcett y Andrew Croes ta hasi ‘tironan mortal’ riba gol, un trei otro, unda e portero hoben Whilmerd Croes, a bolbe salba su ekipo cu un “double safe”, cu peliger di bai abou 0-2, sensacional.

 

No ta cu Riverplate no a bataya bek, esfuerso no tabata falta, pero nan no tabatin claridad den nan yegadanan, nan no tabata skerpi man’e United, vooral unda ta conta mas, den zona di peliger, dilanti gol. United tabatin comando di medio campo unda cu Ludwig Molenaar a hasi un bon trabou, y ora nan haya bala nan tabata hopi peligroso unda cu Miguel Suarez y Antonio Fawcett tabata hasi hopi cos dilanti, Riverplate no por a desifra e atakenan aki.

 

Husto ora cu River a cuminsa “build up” y hayando yegadanan, ta United ta bolbe anota, man’e un baño di awa friew p’e oncena di Playa p’abou. Na minuut 72 ta Miguel Suarez, ta man’e un recompensa pa su bon trabou, ta cuminsa un “one-two” cu Antonio Fawcett na banda robes, te den area penal di River, den final Fawcett ta lansa un bala riba gol, e bala ta banja e portero Croes pero ta dal den palo di gol, e ta bons sali riba pia di Suarez unda e ta anota e gol pa aumenta nan bentaha. Riverplate 0 – United 2.

 

United cu un bon bentaha awor, pero cu un desgaste fisico enorme, cu solamente dos hungado riba banki di suplente, y bastante tempo ainda den e wega. Na Minuut 78 t’e mesun director tecnico di United, Antonio Fawcett Sr. ta bisti uniform y drenta wega na lugar di Andrew Croes cu tabata basta golpea cu lesion, un tabatin otro manera, United tabata dicidi di wanta duro n’e tres puntanan aki “sea lo que sea”.

 

Pa hasi cos mas complica ainda, pa colmo Riverplate ta haya un penalty ora cu Luis Franken ta wordo tumba abou den doelgebied na minuut 84. Mario Da Silva ta anota e penalty pa Riverplate pa corta e bantaha di United, 1-2. E wega a bira hopi mas dramatico awor.

 

Na minuut 90+1 ora cu Riverplate tabata batiendo riba porta di gol di United, e norteronan ta lansa dilanti, United a kere mas den “bo ofensiva ta bo mihor defensa” y den un atake y yegada di Fawcett Jr. hunto cu Suarez, e bala ta bons sali fei area penal di River, encontra cu Ludwig Molenaar cu ta skop man’e t’un cayon, di distancia largo, bai den net via e ’90 graden’ pa sacudi e tres palonan di Riverplate, e gol agonico aki a duna United e bentaha di 3-1 cu masha poco tempo kedando den e wega.

 

River ainda a sigui bringa te final y na minuut 90+5 ta nan capitan, e incansabel Carlos L. Quandt ta anota un bunita gol di volley for di rand di area penal di United, pa trece River bek den wega den e ultimo parti di e drama aki. Riverplate 2 – United 3. Pero, lastimamente no tabatin tempo suficiente pa Riverplate hasi mas. Un victoria contundente di Sport Club United, nan prome puntanan di campeonato pa tene un poco speransa ainda pa sobrebibi den Division Honor. 

 

United a hunga nan wega di anja contra Riverplate y a sali victorioso, ta hopi “uitblinkers” tabatin p’e oncena di Noord; Andrew Croes, Igmar Dirksz den defensa, Adrian Donayre den gol, Miguel Suarez, entre otronan. Nos “King of the Match” ta comparti entre Antonio Fawcett Jr. pa su wega dilanti, un teror pa River e anochi aki, y Ludwig Molenaar pa su wega den medio campo, su temperamento, y su gol fantastico pa “sella” e victoria aki pa United, bon mereci!

 

Te aki anto den 2021, nos campeonato ta bai den un receso cortico y mientras cu e ultimo druppel nan di sudor di futbol a wordo dispersa rib’e cancha di wega, cu esfuerso y dedicacion, batayando pa sali victorioso,  alfin realisando tambe cu ainda falta hopi futbol pa hunga, nos ta apenas na mitar caminda di e campeonato aki. Awo ta tempo pa reuni cu famianan, pa celebra amor y pas den ‘e simbolo di un nacemento’, pa tambe habri un anja nobo cu optimismo pa un mihor mayan. Futbol lo bolbe bek pronto, p’awor nos kier desea bosonan, nos fiel siguidornan di ‘Futbol Aruba’, hopi bendision den e dianan di fiesta aki.

 

 

 

Click to comment

Leave a Reply

Your email address will not be published.

More in Division Honor