Connect with us

AVB

Pumanan di Britannia ta sigui despues di a elimina Caiquetio

Copa Betico Croes 2022 a inicia den stadion di Frans Figaroa na Noord unda dos ekiponan bisina di bario Caiquetio y Britannia a topa otro. Un wega mas cu claro cu a bay sin su publico, pues hopi keto.

Mester bisa cu den e prome tempo Britannia a domina e wega creando algun bon oportunidad di gol pero no por a sorprende portero Erasmus. Di otro banda e portero Eduardo Loefstop no a haya mucho resistencia di e delanteria di Caiquetio faltando un tres minuut promr cu halftime. Dado momento Caiquetio mester a hasi dos cambio unda portero Brian Erasmus y delantero Gerald Vries ta lesiona. Britannia ta ahusta riba tereno y sigui buta presion unda nan ta logra habri e marcador. Na di 35 minuut, e alero Pieter Susebeek di Britannia ta haya un bon pase unda e ta bay laga e defensor Rafael y cu un bon tiro e ta bati portero Marlon Lampe pa e 1 – 0. Ni cinco minuut despues riba un cruse di e bolante Juel Balentin e delantero Roderick Lampe ta anota e 2 – 0.

Den e di dos tempo, Caiquetio a sali bon den e prome binti minuutnan unda nan a crea varios peliger dilanti e porteria di Britannia. Na di 51 minuut, Caiquetio ta corta ventaha unda e delantero, Emigene De Cuba ta anota cu un tiro diagonal cu ta laga portero Eduardo Loefstop sin chens di reacciona pa e 2 – 1. Un rato despues un tiro di Glembert Kock ta ser bon tapa pa portero Loefstop. 

Segun e wega ta transcuri tanto Britannia como Caiquetio a ataka e gol di otro pero no por anota e gol. Caiquetio ta haya un bon oportunidad via un tiro liber pero portero Loefstop ta para esaki den gran forma. Caiquetio sin duda tabata bon den e di dos tempo pero tabata falta e homber gol padilanti. Na ultimo e cansancio a hunga un rol y aki Britannia a probecha bon. Na di 84 minuut un tremendo hugada individual di Pieter Susebeek kende ta kita dos hungador y portero Lampe for di su curpa ta pone e bala den teblachi pa Juel Balentin cu ta anota facil e 3 – 1.Un wega bon controla pa arbitro Matos cu na dos ocasion mester a saca carchi. 

Mucho mas no a pasa den e wega cu Britannia pasando pa e proximo buelta otro siman.

Click to comment

Leave a Reply

Your email address will not be published.

More in AVB