Connect with us

Copa Betico Croes

Atletico Santa Fe ta sigui pa e proximo buelta den e Copa Betico 2022

Diabierna anochi den stadion Guillermo Trinidad a tuma lugar un solo wega valido pa e Copa Betico 2022 unda e debutante nan Atletico Santa Fe a logra nan prome victoria contra S.V Estudiantes Aruba. Ta pa prome biaha e ekipo di Meiveld, Atletico Santa Fe militando den Division Prome ta hunga e torneo aki. Nan prome salida tabata uno sigur un bon unda tur cos tabata Santa Fe. E delanteronan Anthony Maduro y Litmar Lacle a luci dilanti pa SV Atletico Santa Fe.

PROME TEMPO
Den e prome tempo Atletico Santa Fe a domina e wega por completo y mientras nan delanteronan tabata un berdadero pesadiya pa e linea di defensa di Estudiantes henter e anochi aki.
Ya na di 3 minuut di e prome tempo, Santa Fe ta bay ariba den e marcador cu un gol anota for di un tiro di skina. E hungador Anthony Maduro ta lora e bala y aki portero Molina no por a pusha esaki manda afor y ta mira esaki cay su tras den gol, un gol Olimpico. Santa Fe a sigui ataka usando nan liherez y na di 15 minuut ta amplia e marcador, ora cu den un error defensivo di Estudiantes, e delantero Litmar Lacle ta haya e bala su so dilanti gol y ta deposita esaki facil pa e 2 – 0. Mester bisa cu portero Molina di Estudiantes sin duda a traha super duro y a saca bala for di tur skina. Pero na di 41 minuut e propio portero Molina ta haya carchi cora ora e ta sali for di area 16 meter y para e bala cu su man strobando e wega di sigui. Aki referee ta sake for di wega unda cosnan ta complica mas ainda pa Estudiantes. E hungador Zhayron Davelaar ta bay para den gol pa Estudiantes. Despues di e carchi aki Santa Fe a presiona bon sigur via nan aleronan y a haya varios oportunidad pero tabata falta e acabada riba gol.

DOS TEMPO
Den e di dos tempo nos por a mira e mesun patronchi di wega unda Santa Fe a sali brabo pa amplia e marcador. Na di 52 minuut, Anthony Maduro ta anota su di dos gol ora den un paso largo e ta bay laga su defensa directo y cu un tiro lastra e ta anota e 3 – 0. Apesar di ta hungando cu un hungador menos Estudiantes tabata wanta bon defensivamente y hasta a ataka algun biaha e gol di Santa Fe pero sin resultado. E aspecto di condicion dado momento a cuminsa pisa y aki Estudiantes a opta pa defende cu hopi hende patras y purba sali riba e counter. Santa Fe no por a penetra facil door e linea di defensa aki mientras tabata falta creatividad padilanti. Mas cu claro mester a bini cu e tiro di leu y aki Litmar Lacle ta mustra su grandesa unda net na area penal e ta los un bon tiro cu ta pasa riba cabes di portero Davelaar pa e 4 – 0. Un rato despues tabata Anthony Maduro cu ta anota su di tres gol di e anochi y e 5 – 0 pa Atletico Santa Fe cu un tiro duro di serca.
Mucho mas no a pasa den e wega cu Atletico Santa Fe logrando nan prome victoria den Copa Betico Croes 2022 y ta sigui pa e proximo ronda.

DIASABRA
Awe diasabra lo tin dos wega unda Caravel lo enfrenta Sporting den stadion di Frans Figaroa na Noord mientras den stadion Guillermo Trinidad nos lo tin e clash di bario ora cu Nacional lo midi forza contra Bubali. Ambos wega lo ta 8or di anochi.

TUMA NOTA
Tuma nota cu no mag tin publico presente mientras e wega Nacional vs Bubali tin livestream via e pagina di Arubaanse Voetbal Bond – AVB.

Click to comment

Leave a Reply

Your email address will not be published.

More in Copa Betico Croes