Connect with us

AVB

AVB lo celebra nan di 90anja aniversario cu un All Star Game

Dia 29 di Januari proximo, e federacion di futbol, AVB lo cumpli 90 anja. Y mas cu claro mester celebra e fecha aki engrande. Pa basta tempo caba un comision instala a pensa riba un All Star Game pero uno den formato unico. Lo bay tin 3 wega e dia ey pa deleita esnan presente(AVB ta deliberando cu Gobierno di Aruba, DVG y Crisisteam riba e posibilidad pa tin publico presente).

WEGANAN Y ORARIO
Manera indica lo bay tin tres wega mientras cada wega lo tin un duracion di aproximadamente 1 ora. E prome wega entre Coaches y AVB Office lo ta pa 6:00pm mientras e di dos wega den Damas lo pa 7:00pm y por ultimo e wega di Division Honor/Division Uno lo ta 8:00pm.

Trempan lo inicia e atardi cu e encuentro amistoso entre Coaches y AVB office sigui pa e wega di futbol den Damas entre seleccion A y seleccion B. Por ultimo lo sera e anochi cu e wega den Division Honor/Division Uno entre seleccion A y seleccion B.

DAMAS
E wega entre e dos seleccion nan femenino lo ta den e siguiente formato. E seleccion A ta consisti di e hungadornan di e ekiponan di Britannia, Arsenal, Riverplate y La Fama. E entrenadornan lo ta Roberto Geerman y Siljean Vrolijk. E seleccion B ta consisti di e hungadornan di e ekiponan di RCA, Bubali, Estrella y Dakota. Aki e entrenadornan lo ta Veron Albertsz y Laura Alvarez.

HOOFDKLAS/DIVISION UNO
E wega entre seleccion A y seleccion B ta forma pa e ekiponan di Division di Honor y e 3 prome nan di Division Uno. E entrenador nan na cabes di tanto RCA y Britannia(Escalona y Breinburg) como Dakota y Caravel(Lake y Leerjan) ta esnan encarga pa forma e seleccion nan A y B. Esaki sigur ta bay ta un wega hopi anticipa ya cu nos ta papia di e mihor hungadornan di Aruba cu lo enfrenta otro e dia aki. E elenco cu a presenta diahuebs anochi na entrenamento ta nombernan di taya den nos futbol actual y bunita pa mira cu algun di nan pa prome biaha lo hunga hunto den un ekipo.

FANATICO DEN STADION y PREMIO
Den un combersacion sosteni cu presidente di AVB e la conta nos cu e federacion ta den deliberacion cu Gobierno, DVG y Crisisteam pa por acepta 200 persona drenta stadion e dia di All Star Game. No ta sigur ainda pero den e dianan cu ta bini lo anuncia esaki. Mester bisa cu e prome 200 hendenan cu drenta so lo wordo acepta pa ta den stadion. Corda cu e reglanan stipula pa DVG/Crisisteam ta keda vigente den stadion esta tapaboca, handsanitizer y 1.5 meter di distancia.

Pa e All Star Game aki, AVB a pone super bon premio disponibel manera pasashi pa 1 pa Miami, pasashi pa 1 pa Corsow y mucho mas. Pa gana esaki mester ta presente den stadion.

LIVESTREAMING
Por ultimo e weganan lo transmiti via e pagina di Arubaanse Voetbalbond y tambe pasa na television via Canal 48 esta Diario TV.

Click to comment

Leave a Reply

Your email address will not be published. Required fields are marked *

More in AVB