Connect with us

AVB

Awe AVB ta celebra 90 aña di existencia

Arubaanse Voetbal Bond (AVB) awe diasabra 29 di januari 2022 ta celebra nobenta aña di existencia.
Tabata nuebe decada pasa cu a funda e organisacion oficial, aunke cu e historia di futbol a start bastante
aña prome. Presidente di AVB, Sr. Egbert Lacle y henter e directiva, ta felicita tur club miembronan, staf,
hungadornan, coachnan, boluntarionan den AVB pero tambe tur fanaticonan di e deporte Rey.
Yega 90 aña no ta facil. Ta hopi sacrificio a bay pasobra no semper tabatin tur e ekipo, fondo y
experiencia cu nos ta conta riba dje awendia. A tuma hopi aña prome cu por a percura pa profesionalisa
e federacion y move for di trabounan boluntario pa trabou profesional y den servicio directo. Pero awe
por mira e frutonan, den cual Aruba ya conta cu mas hungador y entrenadornan bon prepara pa sigui
carga e futbol pa e siguiente nobenta añanan.

Con futbol a nace na Aruba
Na aña 1909 Sr. Gerard de Veer, e tempo ey un comerciante conoci, a mira un potret di un bala di futbol
den un catalog y a manda busc’e pa su dos yiu hombernan, esta Eddy y Geffy. E mesun aña, Dominee Ds.
Gerrit Eybers a funda, hunto cu e rumannan de Veer y otro hobennan di Playa (Oranjestad), e prome
club di futbol. E nomber cu nan a scoge tabata Aruba Voetbal Vereniging, popularmente conoci como
A.V.V. E tereno cu nan a haya pa traha e prome veld di futbol riba nos isla tabata na unda awendia e
edificio di Corte ta situa, esta panort di Emanstraat y pabou di Hendrikstraat. Como cu e tereno a tabata
yen di mata di kwihi, tuna y cadushi, e hobennan hunto cu Dominee Eybers mester a traha duro pa por a
kita tur esakinan.
Un ingles cu tabata traha como accountant na Aruba Phosfaat Maatschappij na Seroe Colorado tabata
yuda nan cu entrenamiento y e reglanan di wega. Como cu e prome añanan no tabatin mas club, a dicidi
pa parti A.V.V, den dos team, un blauw y un cora pa hunga contra otro. E fraternan di Tilburg, cu a
cuminsa duna les na scol di mucha hombernan na 1915 tambe a yuda den desaroyo di nos futbol.

E prome bond di futbol
Na mas o menos 1920 of 1921 a funda e prome bond pa futbol. E nomber ni e dirigentenan di e bond aki
no ta conoci. Nan a organisa e prome campeonato na 1921 y Wilhelmina a bira e prome club campeon
di nos isla. E siguiente aña a funda e Club Vitesse cu durante añanan 20 a bira e club mas popular di nos
isla y cu a sali campeon varios biaha. Na 1924 a tuma luga e prome wega interinsular ora cu Sparta di
Corsou a bin Aruba pa hunga contra Vitesse.

Futbol a crece rapido na Aruba
Cu apertura di Lago y mas despues e refinerianan Eagle y PanAm, futbol a cuminsa plama riba nos isla y
na 1927 nos a haya e prome club pafo di Playa, na Savaneta, yama Roozendaal y mas despues a bini
Trappers na Santa Cruz y tambe na Noord clubnan a lanta. Na April 1930 e seleccion di Aruba a bishita
Corsou pa prome biaha. Tres luna despues e team di Lago a hunga e prome wega internacional na
Maracaibo, Venezuela.

Con AVB a nace
E mesun aña aki na october a funda un bond nobo, Aruba Voetbal Bond y Dr. J.R (Coco) Arends a bira e
prome presidente, Captain Rodger, e presidente di Lago a pone un escudo como premio pa e club
campeon. E siguiente aña AVB a organisa su prome campeonato y Hollandia a titula campeon. Na fin di e
aña ey e “Equipo Brond” di Peru a bira e prome club stranhero pa bin hunga na nos isla. Pa por a obtene un pida tereno pa traha un sportpark AVB mester a wordo funda oficialmente y esaki a sosode dia 29 di
januari 1932.

Futbol a crece den guera
E mesun aña a cuminsa e di dos guera mundial na Europa pero nos isla mes a wordo envolvi ora cu
Alemania a invadi Hulanda na luna di mei 1940. Durante guera, a pesar di e atake riba Lago y tambe
"blackout”, futbol a bira masha popular riba nos ista pero masha poco club tabata miembro di AVB. Na
1944 Aruba pa prome biaha a logra un victoria contra Corsou.

Reorganisacion
Na 1947 a eligi un presidente y un directiva nobo cu a reorganisa AVB y ya na e campeonato di e aña ey
a participa 17 club. Na november di e aña ey tabatin inauguracion di e luznan na e tereno di Lago
Heights cu a bira e prome veld pafo di Lago Colony pa haya luz artificial. Na 1951 Wilhelmina Sport Park
a wordo basha abou y na april 1952 a inaugura e stadion nobo cu a haya e nomber di Wilhelmina
Stadion.

Pais Aruba
Na aña 1986 Aruba a haya su Status Aparte y na 1988 a acepta nos como miembro di FIFA. Na 1994
tabatin apertura di stadion nobo cu a hava e nomber di Compleho Deportivo Guillermo P. Trinidad. Na
1996 Aruba a participa den su prome wega di cualificacion pa un mundial contra Republica Dominicana y
na 2000 Aruba a gana su prome wega di cualificacion contra Puerto Rico.

Plannan grandi
Entretanto, hopi aña a transcuri y awo tin inversionnan grandi pa haci atrobe na infrastructura di futbol
pa nos isla. Hunto cu FIFA y Gobierno di Aruba, ta uniendo esfuerso y fondo pa drecha e stadionnan na
standardnan aceptabel pa e federacionnan internacional. Pa esey mester, no solamente fondo pa
renobacion, pero un compromiso serio pa aloca fondo pa mantencion. E directiva di AVB ta convenci cu
pronto lo yega na acuerdo cu gobierno pa por mira “bala lora” atrobe!

Click to comment

Leave a Reply

Your email address will not be published.

More in AVB