Connect with us

Division Honor

Siman 10 – Division Honor a cuminsa atrobe – den di dos rond tur wega ta crucial

Derwin Donato di Dakota y Sylvester Schwengle di La Fama - photo courtesy of Hubert De Cuba

 

Division Honor a ‘start-sali’ e weekend aki un biaha mas despues di e receso di dianan di fiesta di fin di anja, sigui p’e torneo Copa Betico 2022 unda RCA a sali campeon, y tambe e bunita festehonan di e ‘90 Aniversario di Arubaanse Voetbal Bond’ incluyendo e “All Star Game”. Tin un bon ambiente ta reinando den nos futbol, e clubnan ta motiva y determina pa bataya duro y saka e mihor resultado posibel, apuntando p’e titulo di campeon di futbol, ken lo yega playoffs? ken lo degrada? y ken lo sali campeon? Di awor en adelante tur wega ta crucial, tur resultado ta conta, tur hungador ta importante.

 

Riverplate vs Bubali

E prome partido di e rond final di e campeonato aki tabata entre Riverplate, un ekipo den ascendencia cu a sorprende hopi e anja aki hungando bon futbol, y Bubali, un ekipo tradicional, e orguyonan di Nort, cu e anja aki ta mas bien renobando y bringando pa sobrevivencia den Division Honor.

Riverplate a cuminsa e partido aki poniendo hopi presion riba Bubali, ta man’e nan a tira un net grandi riba e defensa nortero, sofocando nan foi cuminsamento di e wega. Tur esey a duna resultado tambe y na minuut 5 caba unda Johndrick Kelly ta anota un gol y cuminsa un anochi inolvidabel pa su persona. Riverplate 1 – Bubali 0. 

Asina mes River a sigui domina, practicamente bibando den teritorio di Bubali, haciendo un semi pressing di zona cu e orguyonan no por a decifra. Pero, tin biaha ora cu tin dominio asina, mester sa concreta tambe, algo cu no a pasa, hasta despues di a controla e wega p’e prome 20 minuut nan di e partido.

Bubali alfin a haya un salida, pero ki salida, na minuut 21, den un “counter” di dos pase, saliendo for di pia di Jian Franco Burgos for di patras den defensa, ta hasi un pase largo pa John Zarra riba banda robes cu ta crusa na su drechi pa Jonathan Leest cu ta fusila portero Whilmerd Croes pa empata e wega, Riverplate 1 – Bubali 1.

Foi e punto ey e partido un poco mas balansa ya cu River a haya nan ta retrocede un poco mas pa evita hugadanan di sorpresa cu a causa e gol di Bubali, pero a parce tambe man’e cos River tabata “regroup” pa cuminsa busca cosnan mas grandi.

Na minuut 35 ta Johndrick Kelly mes ta bolbe haya e net despues di varios asalto di e team di e ‘franja cora’ y asina pon’e su ekipo bek den bentaha. Riverplate 2 – Bubali 1.

Asina halftime a bai aden despues cu River a cuminsa tuma e batuta di e partido, dominando te na e punto ey.

Den segundo tempo e consistencia di River a sigui, cu bon toke, rotacion, y dominio tambe, den ambos aspecto, tanto defensivo bou liderato di Carlos L. Quandt y esun ofensivo cu nan energia, causando hopi yegada y tironan riba gol. E combinacion di Bernard Smolders, Julnes Klep, Siljean Vrolijk, y Baten Quandt entre otro, tabata pon’e hopi bala den e zona di peliger di Bubali unda cu nan portero Josthan Maduro a hay’e ta salba su ekipo na varios oportunidad. Esaki ta e Riverplate cu nos a wak den comienso di e campeonato aki, sorprendiendo hopi hende.

 Na minuut 59 alfin e muraya di Bubali ta cai abou atrobe despues di tanto presion di e oncena di Madiki, ora cu e talentoso Julnes Plet mes ta anota pa aumenta bentaha di River na 3-1.

River no ta para keto y e golnan ta sigui, na minuut 70 ta e incansabel motor den medio campo, Bernard Smolders, ta anota pa hasi e wega 4-1 pa Riverplate.

Despues ta sigui e gol di Johndrick Kelly pa completa su “hattrick” p’e anochi y hasi e score final Riverplate 5 – Bubali 1. 

Un exhibicion di tanto forsa di condicion fisico pero tambe creativo bayendo dilanti, e ekipo aki ta bon prepara y por yega leu e campeonato aki, pon’e atencion n’e ekipo di Playa p’abou! Nos King of the Match ta Johndrick Kelly pa su “hattrick”, algo cu no sa pasa hopi den futbol.

Riverplate ta den di seis puesto riba tabla, 5 punta so foi cuarto lugar, y Bubali ta keda cu 4 punta den ultimo lugar riba tabla. 

Sigientemente Riverplate ta hunga contra Caravel Diabierna anochi 18 Februari y Bubali lo bai contra RCA Diasabra atardi 19 Februari.

 

Estrella vs Caravel

E derbi di Santa Cruz entre e clubnan di Angochi y Papilon, Independiente Caravel y Estrella a caba 3-3 den siman 1 di e promer rond October pasa. Un partido unda Caravel a avisa tur hende cu nan ta serio den nan intencion nan e anja aki, Estrella mester a bataya bek y empata e wega ey te den e ultimo minuutnan.

Caravel cu ta den top cuater ta un ekipo cu hopi experencia, de paso, cu varios hungado cu a yega na milita den Estrella den pasado, Estrella en cambio un ekipo hoben cu ta en busca di e gloria di temponan pasa.

Den e partido aki ta Caravel tabatin e bala mayoria biaha, c’un bentaha den posesion basta significante, pero, apesar di hopi yegadanan skerpi, no a sa di probecha. Mester bisa si cu Estrella, ainda sin Pancho Croes den e ekipo, a defende hopi bon y cu bon trabou di Jesus Fria bou di e tres latanan den su debut di regreso, a hasi posibel cu e club di Papilon a sabi di wanta e resultado sera.

Den futbol y deporte en general tin un dicho na Spanjo ta bisa; “el que no hace se le hacen”. Dicho hecho, Caravel cu mas posesion y dominio den e wega no a probecha nan chens nan, nan no tabata skerpi den e ultimo 16, unda ta conta mas. Mientras Estrella cu poco a haya nan ta probecha cada chens y tabata peligroso den contra-golpi cu tironan riba gol. Trevor Faro mes a haya su mes dilanti gol na varios instantenan, e tabata serca na anota gol den algun ocasion caba. 

Despues cu haltime a bai aden sin gol, alfin na minuut 68 ta Trevor Faro mes ta anota un gol di cabes foi un bon pase di Adrian Leon. Estrella 1 – Caravel 0.

Apesar cu Caravel a sigui hunga nan wega di posesion y hasta mas intensidad  ta un autogol di Estrella, un bala cu a rebota foi Egbert Tromp na minuut 72, ta salba nan un punta di oro, Estrella 1 – Caravel 1.

Cu e punta aki Estrella ta mantene e puesto 8 y Caravel ta keda den top cuater riba tabla, sin niun cambio drastico. King of the match ta comparti entre Jesus Fria di Estrella y Donaldo Quintero di Caravel.

Den siman 11 Estrella lo enfrenta Britannia riba Diadomingo anochi y Caravel lo topa cu Riverplate Diabierna anochi.

 

RCA vs United

E tricolornan di Solito ainda ta lider riba tabla di Division Honor te na e haltura aki, nan a bin di gana e torneo “Copa Betico” 2022, nan di tres consecutivo. United ta un ekipo den ascendencia, nan a caba e prome rond di e campeonato basta solido, hasta acumulando punta den e proceso.

E partido aki a cuminsa na un manera balansa, United no a baha cabes p’e campeon nan den ningun momento, apesar cu RCA tabatin e yegadanan mas skerpi cu mas chens pa gol, pero bon futbol di United sin duda, defendiendo bon y cu Adrian Donayre den su dia, ta hopi cos por pasa.

E promer gol di e wega a cai na minuut 35 pa medio di Marc Jacobs, probablemente e mihor rechtsback actualmente den nos futbol local, dunando RCA e bentaha despues di varios intento previo. RCA 1 – United 0.

Hopi lo a pensa cu awor e wega a habri pa RCA despues di e gol, pero, United a tene duro y keda cu pasenshi, enfocando riba nan plan di wega. E partido a bai den sosiego cu RCA cu e minimo bentaha.

RCA a sigui cu nan wega ofensivo, pero e anochi aki nan a topa cu Adrian Donayre den top form. United a sa di hasi countersnan bastante efectivo despues di defende hopi bon cu un alineacion cu mas bien ta pon’e hopi homber den defensa, un sistema di disciplina y dificil pa penetra.

Na minuut 57 United ta haya un penalty, indica pa arbitro Omar Lambert cu tabatin un bon “desempeño” e anochi aki. Un incursion di Denrick Lopez den area penal pa medio di un bunita “dribble” pasando algun defensor tricolor pa despues wordo tumba abou den e zona cora. Lopez mes ta anota e penalty aki pa su di 8 gol di e campeonato (cuarto riba tabla di goleador). RCA 1 – United 1.

Asina tambe e partido ta termina den un empate unda RCA a sali mas perhudica ya cu Dakota eventualmente lo pasa nan bai cu e liderato di campeonato. United en cambio si a sali di bon cu e punta di oro aki foi di e lidernan riba tabla y a logra sali for di e sotano na final di e siman 10 aki.

King of the Match ta comparti entre Marc Jacobs di RCA y Adrian Donayre di United.

Den siman 11, RCA lo midi forsa cu Bubali Diasabra atardi y United na su turno lo enfrenta La Fama Diadomingo atardi.

 

Nacional vs Britannia

Nacional ta un ekipo cu tin hopi anja sigui ta bai playoffs y a hunga den varios wega final, gana campeonato y tambe Copa ABC entre otro den e ultimo anja nan, awor nan ta haya nan mes ta bataya duro pa escala algun posicion pa drenta den e ‘top cuater’, y pa bisa berdad nan ta mas peligroso cu nunca. 

Britannia ta solido den di tres lugar despues di un comienso dificil den e campeonato aki, nan ta un ekipo cu ta busca na mehora semper, den e prome rond nan a hasta sa di gana di Dakota cu awor ta e lider nobo riba tabla, ban wak kiko nan lo trece pa nos den e di dos rond aki.

E pumanan tabatin tur cos ta bayendo bon pa nan den e prome tempo, bon toke di bala, posesion, yegadanan skerpi, pero niun gol pa mustra pa nan trabou. Nacional tambe a hunga bon, cu pasenshi, cu menos posesion di bala, pero, kizas mas efectivo den e ultimo 16 y den nan punteria.

E trabou ey di Britannia a haya un sla duro net prome cu halftime, e peor momento pa permiti un gol den un wega sera y empata. Un gol net prome cu halftime semper tin un impacto psichologico grandi den un partido.

Na minuut 44, Emerson Leocadio, e ruman di Valdo, ta purba hasi un pase hopi largo mes (casi di banda pa banda), unda cu e defensor di Britannia no por a rechasa e bala y den e desvio Devis Oliveros ta haya e esferico den area penal y ta hasi un ‘sombre’ riba e portero cu tabata saliendo rapido, “quick thinking” di Devis, un goleador di rasa cu no ta pordona nada, Nacional 1 – Britannia 0.

 

Aldair Fontalvo y Devis Oliveros di Nacional – Photo: Hubert De Cuba

Cu e gol di bentaha pa cuminsa e di dos tempo, Nacional tabata trankil y den control di wega, pero mas bien tambe den e aspecto mental. Britannia a sigui hunga nan wega man’e den e prome half, pero mas tempo pasa mas nan tabata frustra ora cu nan no por a anota e gol di empate. Na minuut 67 nan a yega e “boiling point” ora cu den un momento di frustracion nan ta perde nan hungador Glenbert Quandus pa via di su di dos carchi geel y expulsion. For di e momento ey tabata “downhill” p’e ekipo di Piedra Plat.

Gol di Devis Oliveros, su di dos di wega na minuut 74 y su di 10 gol di campeonato pa empata p’e di dos lugar riba tabla di goleador, sigui p’e gol di Joshua Aguirre na minuut 79, p’a hasi e wega 3-0 pa Nacional.

Un Britannia completamente desinfla na final a hunga mas bien djies pa anota e gol di honor, y nan a logra esey na minuut 90+6, un gol di Castro Mattos. Y asina mes e partido a termina, Nacional 3 – Britannia 1.

Nacional awor ta solido den di cinco lugar riba tabla, dijes cuater punta so menos cu Caravel p’e cuarto lugar, Britannia toch ta logra keda den di tres lugar cu dos punta di bentaha riba Caravel. King of the Match ta Devis Oliveros di Nacional.

Den siman 11, Nacional lo enfrenta Dakota Diasabra anochi y Britannia lo bai contra Estrella Diadomingo anochi.

 

Dakota vs La Fama

E abehanan di Dakota y e speransa berde di Savaneta tin un “toma y dame” andando entre nan. Dakota a gana 3-1 den e prome rond di e campeonato ki, mientras cu La Fama a elimina Dakota den semi final di Copa Betico luna pasa. E wega aki tabatin un cierto tension sin duda.

Dakota a cuminsa e wega rotando y teniendo e bala, cu algun yegada skerpi, pero toch bastante conservativo ya cu La Fama ta un ekipo bon para riba cancha, defendiendo bon c’un portero man’e Joshua Faro, ademas di nan veterania y condicion fisico, nan por sorprendebo na cualquier momento, no ta facil pa hunga La Fama.

E wega di pasenshi di Dakota mas bien a trece hopi cos bon, nan no a riesga dimas, nan no a perde cabes, un Dakota trankil cu focus. La Fama kizas a spera Dakota mas agresivo den ofensiva, tirando dilanti tin biaha cu mucho por tin su consequencia, esey no a pasa.

E partido duro, pero deportivo den su mayoria, e wega a hasta bai sin carchi te minuut 86. Referee Eugene Farro a controla e wega bon.

 

Futbol fisico – Nickenson Paul y Davidson Kaarsbaan – Photo: Hubert De Cuba

E portero Joshua Farro di La Fama a salba su ekipo na hopi ocasion durante henter e partido, un biaha hasta a hasi tres salbada sigui, un trei otro, man’e ta machine. Helaas, Farro so no por hasi milager, y na minuut 23, na un manera hopi stranjo, debi na un “hustle” di Ricky Hodge cu prome a bai laga dos defensa na entrada di area penal, pa despues e bala bai lague y un otro defensor controlando e esferico, pero Hodge no a give up y a hinka pia, mas bien punta di pia, y horta e bala mande stret den gol….”never give up”. Dakota 1 – La Fama 0.

Prome cu halftime Dakota ta anota atrobe, un biaha mas pa medio di Ricky Hodge, e biaha aki el a bai laga por lo menos tres defensor te den area penal pa fusila portero Farro pa hasi e wega Dakota 2 – La Fama 0.

Den di dos tempo e partido a sigui nivela, La Fama nunca a baha cabes, y a sigui hunga man’e cos e wega ta keto bai empata, Dakota en cambio wardando e ‘speransa berde’ tira mas den atake, ya cu nan tabata den bentaha toch, e ‘full ofensiva’ ey di La Fama nunca a yega y ora Dakota a sinti bon nan a sali en busca pa amplia e bentaha ainda mas den e parti final di e wega, pakiko no? pa sigura e tres puntanan y bai top den e campeonato.

E energetico Joshua Gross den un yegada na rand di area penal di La Fama ta los un tiro potente di distancia cu su pia drechi, den 90 graden, pa hasi e wega Dakota 3 – La Fama 0.

Dakota awor cu e luho di hasi hopi cambio y hasta laga nan hungadornan mas hoben drenta den partido y mustra kiko nan por. Na minuut 90+3 ta e hoben Shaundry Vrolijk cu a drenta pa Ricky Hodge ta anota un gol for di un bon assist di Guyverson Grandin.

 

Dakota ta lider di Division Honor atrobe – Photo: Hubert De Cuba

Esey tambe tabata e score final, Dakota 4 – La Fama 0. Asina Dakota a tuma posesion di e prome lugar riba tabla debi na un mihor “doelsaldo” cu RCA. Ricky Hodge di Dakota ta e King of the Match.

Den siman 11, Dakota lo enfrenta Nacional riba Diasabra anochi y La Fama lo hunga contra United Diadomingo atardi.

Te otro siman!

 

 

 

Click to comment

Leave a Reply

Your email address will not be published.

More in Division Honor