Connect with us

Division Honor

Resumen Division Honor – Resultadonan sera y otronan hopi abulta – Riverplate, den bataya pa top cuater

Hoben nan ta impactando den Division Honor - Bernard Smolders di Riverplate - foto di archivo

Resumiendo e ultimo siman y comentario

Den siman 11 – Dakota y RCA a keda cabes-cabes den e careda pa number un riba tabla di posicion, e “amarillonan” ta lider pa un chiripa di doel-saldo. Riverplate ta sigui sorprende pero ya nan mester wordo tuma na serio den e bataya pa top cuater, e otro ekiponan ta avisa di esey. United a bira e skina y awor a sali foi bom di e campeonato.

 

Comentario di siman

Mi ta bai hasi un comentario basa riba lo siguiente; algun partido tabata competititvo pero otronan tabata hopi desbalansa cu scorenan hopi abulta, no apto pa mirones, pero, e no ta nada nobo. Ta hopi golnan mes ta wordo anota e campeonato aki, claro cu gol riba su mes no ta malo, pero resultadonan cu hopi gol di diferencia ta inactractivo, ademas di dominio den posesion di bala man’e 80-20%, tabatin hasta score di 11-0, un poco humiliante, y asina tabatin hopi otronan tambe anteriormente den e campeonato aki.

Ta algo cu por mehora? Kizas un liga di ocho ekipo so? Tin otro sugerencia? E diferencia grandi aki entre e ekiponan por afecta e ‘atractividad’ di e campeonato, e “brand”.

‘Paridad’ t’un meta di tur liga na mundo, tin hende ta bisa cu esey ta un “utopia”, ta parti di e sport toch? Pero p’e mirones ta importante, bo kier pa e weganan ta competitivo of “ten minste” decente.

Mi ta bai duna un ehempel. Nos tur ta gusta ‘La Liga’ di Spanje hopi mes, vooral den e ultimo decadanan cu astronan man’e Ronaldinho, Leonel Messi y Cristiano Ronalo etc. E generacion anterior tambe semper a gusta La Liga, for di anjanan 70 caba, pero e focus semper tabata riba Real Madrid y Barcelona so! tin biaha Atletico de Madrid por cai den mencion, e otro ekiponan no necesariamente. Ademas di e “clasico” no tabatin otro rivalidad pa hasi e liga esun mas atractivo ‘p’afor’ di Spanje.

E liga mas exitoso financieramente entre e grandinan te ainda ta e ‘Premier League’ ingles, esun mas cotiza tambe riba mercado y bisto rond mundo, pakiko? P’aso nan tin mas paridad, kizas ‘marketing’ tambe tin algo di haber, pero p’esey bo mester tin un liga (un producto) competitivo y atractivo. Riba cualkier dia un ekipo den bom di tabla ingles, ban bisa Burnley, por gana esun riba top di tabla. 

E campeonato di e Premier League ingles a wordo gana pa cinco (5) diferente ekipo den e ultimo 10 anjanan mientras cu La Liga ta tres (3) den mesun epoca, pero nuebe di diez ta parti entre Real y Barca, nan semper a domina. Den e ‘Bundesliga’ aleman tambe nan tin un problema, ya cu Bayern Munich a gana den 9 di 10 ultimo anjanan, na Italia tambe, Juventus ganando 9 den 10 anja den ‘Serie A’.

Pero no ta solamente e paridad den cantidad di titulonan ta conta (dinastianan man’e Real Madrid of Liverpool por existi den deporte, ta algo acceptabel), ta mas bien e ‘paridad durante e weganan mes’, anotacion sera vs abulta den e weganan. Partidonan competitivo te cu minuut 90, y tambe e diferencia di punta riba tabla etc. por mantene un campeonato interesante pa mas largo y asina mantene interes di e publico.

Algun anja pasa La Liga a realisa y a cuminsa traha riba e problema ey ya cu nan no tabata bende nan liga mesun cos c’e liga ingles riba mercado mundial, Premier League a genera £5.3 Biyon vs £3.7 di La Liga, cu ta den di dos lugar, segun  insideworldfootball.com, den e cyclo 2019-2022, pero esey tabat’e caso tambe den e cyclo 2016-2019, y prome c’esey tambe, apesar cu La Liga tin e dos ekiponan mas popular di mundo y nombernan hopi grandi.

Tabatin fundamentalmente un “gap” financiero grandi tambe entre e clubnan. Awendia ‘La liga’ ta den e mehoramento ey, ekiponan man’e Real Betis, Villareal y tambe Rayo Vallecano ta mas competitivo awor, un ekipo chikito man’e Cadiz por hasta gana di Barcelona y Real Madrid. Cu e cambionan aki, posiblemente awor nan por bende ‘e otro weganan’ tambe riba mercado global y no solamente “el clasico” so!

Biniendo bek n’Aruba. Niun hende kier wak desparidad asina grandi, nan no kier wak humiliacion.

Cuanto hungadornan hoben cu ta milita den un ekipo cu no ta competitivo por soporta y keda cu nan motivacion halto? Nan no por competi toch, nan lo desinfla y bai busca otro ekipo, causando un circulo vicioso, kizas hasta perde smaak den e deporte, esakinan ta causa cu ekiponan ta yega tin biaha sin suficiente hungador riba banki etc. kiko por wordo hasi? Algo pa discuti.

Sigientemente un recap di loke a pasa den siman 11 y antesala di e weganan benidero den siman 12.

 

Caravel vs Riverplate

E dos ekiponan, revelacion e campeonato aki, ta enfrenta otro pa di dos biaha den campeonato, den e prome rond e ekipo di Angochi a gana cu score di 3-2. River tabata den di shete lugar ainda prome cu e rond aki a cuminsa y Caravel ta keto bai den di cuater lugar.

E partido bastante igual, Caravel c’un “edge” chikito, pero, te na minuut 22, ora cu Carlos B Quandt ta anota pa hasi e wega 1-0 pa River, despues di un p’ase for di den profundidat di Siljean Vrolijk, portero di Caravel cu ta sali pa defende su area despues di e pase largo cu ta cai net na rand di su area penal pero e ta faya na rechasa e bala y Quandt ta probecha y anota e gol pa River.

E golnan ta sigui pa River, Caravel a man’e cai plat despues di e gol, pakiko? y na minuut 23 despues di un minimo di diez toke di bala consecutivo, den un bunita combinacion final di ‘un-dos’ entre Julnes Plet y Johndrick Kelly, e ultimo aki ta deposita e bala den net (su di cuater gol den dos wega), Caravel 0 – Riverplate 2.

Wladimir Ramirez di Caravel cu su gol ta corta bentaha na minuut 37, Caravel 1 – Riverplate 2.

Despues di halftime River a sigui hunga rib’un ritmo halto, Bernard Wolters, e hoben volante ta e motor tras di esey. Caravel no por a hunga nan wega di presion di zona y defendiendo bon man’e semper, e intensidad y velocidad di River a destabilisa esey. E siguiente gol tabata di e oncena di Playa p’abou mes, un gol di Rivaldo Pierre na minuut 47 pa hasi e wega 3-1 pa Riverplate.

Victoria y tres punta pa River na final di wega. Awor e oncena di Madiki tin 16 punta (doelsaldo di +10) pa e di cinco lugar, djies 2 punta so for di Caravel pa e di cuarto lugar ta cotiza ey.

‘King of the Match’ ta comparti entre Siljean Vrolijk pa su gran wega di forsa y energia,  y e talento hoben Whilmerd Croes, e portero di Riverplate.

Den siman 12, Riverplate lo enfrenta Britannia riba 5 di Maart, Diasabra anochi. Caravel lo bai contra RCA e Diasabra atardi ey mes.

 

Bubali vs RCA

Prome c’e wega aki RCA tabatin mesun cantidad di punta cu Dakota, pero cu un doelsaldo menos cu e Dakoteronan, p’e di dos lugar riba tabla. Bubali ta den peliger pa degrada automaticamente si nan keda den e ultimo lugar.

E partido a cuminsa di biaha cu dominio di RCA, e norteronan no por a haya mucho di e bala y sin bala ta masha poco mes por hasi, ora cu nan haya e bala mes nan no tabata pasa over di e “midden lijn”.

E prome gol a cai na minuut 23 pa medio di Jhon Silva, e goleador di RCA cu tabata ausente den e ultimo luna debi na lesion y awor alfin ta cuminsa un partido atrobe, asistencia di Juan Villaraga, Bubali 0 – RCA 1.

E di dos gol di RCA pa aumenta bentaha a yega na minuut 42 un biaha mas pa medio di Jhon Silva foi un p’ase di Jean-Pierre Fingal den su wega di regreso den Division Honor.

Asina mes cu tanto dominio di e tricolornan halftime a yega cu e resultado 2-0 so pa RCA.

Den e di dos tempo e mesun cos cu den prome half, RCA riba e bala den tereno di Bubali, e orguyonan cu poco posesion y cu hopi dificultad pa pasa bai den teritorio contrario.

E golnan di RCA a cuminsa cai un trei otro, un diluvio di golnan for di minuut 52, e di tres gol sigui di Jhon Silva pa su hattrick te n’e momento ey. Despues a toca turno na Albert “Killer” Francis cu a drenta den e di dos tempo, Bubali 0 – RCA 4.

 

Jhon Silva di RCA ta lider di goleador despues di su “poker” (4 gol) – foto di archivo

Evander Nedd, e hoben delantero, ta sigui e parada di gol na minuut 64 y 68 pa hasi e wega 6-0. Na minuut 72 Jhon Silva ta anota atrobe contra su ex ekipo pa su ‘poker’ den e wega aki, awor sumando 14 gol den campeonato pa bira e lider atrobe riba tabla di goleadornan. E gol di Jhon a hasi e wega 7-0. 

Jeamir Howell-Brokken ta anota na minuut 73 pa hasi e wega 8-0, y Evander Nedd ta bolbe score na minuut 76 pa su ‘hattrick’ den e partido, gran olfato pa gol di e hoben aki. Bubali 0 – RCA 9.

Marc Jacobs cu no por keda sin anota, ta hasi e wega 10-0 na minuut 80 y finalmente ta Jeamir Howell-Brokken ta haya su ‘brace’, su di dos gol den e wega pa hasi e score 11-0 p’e tricolornan y e resultado final tambe. 

RCA asina ta acumula 27 punta den 11 partido y ainda ‘invicto’ pero asina mes ta keda den di dos lugar despues di Dakota door di un doelsaldo di +31 vs +34 di Dakota.

‘King of the Match’ ta Jhon Silva pa su ‘poker’. Siguientemente RCA ta hunga contra Caravel dia 5 di Maart, Diasabra atardi y Bubali lo bai contra La Fama Diadomingo anochi 6 di Maart.

 

Nacional vs Dakota

E encuentro aki semper ta promete hopi, dos ekipo frequentemente den e top tres di Aruba den e ultimo anjanan conhuntamente cu RCA, un rivalidad hopi competitivo sin duda.

E campeonato aki, Nacional a cai un tiki, nan no ta actualmente den top cuater,pero, batayando pa drenta den e careda pa playoff, tur resultado ta crucial pa nan. Dakota ta solido riba caminda p’e siguiente rond (playoffs), hunto cu RCA nan ta alehando mas for di e resto di ekiponan riba tabla.

P’e prome 15 minuutnan ainda tabata parce cu e wega aki lo bai ta hopi preta mes te final. Dakota cu posesion y control di e wega, Nacional solido hasta cu yegadanan tambe.

Cosnan a cambia drastico si, ora cu Dakota a anota e prome gol na minuut 18 pa medio di e volante Daniel Briceño, cu tabatin un bon partido, Nacional 0 – Dakota 1.

Ni cinco minuut despues, ta Ricky Hodge, cu ta riba un “hot-streak”, ta anota atrobe, su di tres gol den dos wega, un asistencia di Fernando de Sousa, c’un bon “opbouw” pa hasi un bunita p’ase pa Hodge den area penal. Nacional 2 – Dakota 0.

E amarillonan ta continua cu nan wega di posesion y bon yegadanan, Nacional awor un poco slap, nan a man’e a keda sin idea. Haltime a bai aden cu Dakota den bentaha di 2-0.

Den di dos tempo, na cuminsamento, Nacional a start cu mas energia y spirit, nan tabatin yegada atrobe. Dakota a defende hopi bon y a kibra tur e atakenan peligroso di e dragon nan.

Pero, tur e esfuerso nan ey di Nacional a haya un banjo di awa frieuw na minuut 57 atrobe ora cu Kendrick Paulina ta intercepta un bala di Nacional na mitar cancha y ta hasi un pase skerpi den area penal pa Ricky Hodge deposita e bala den gol, su di cuarto gol den dos wega, Hodge su di 9 gol di e campeonato pa empata pa number cuater riba  e lista di goleadornan. Nacional 0 – Dakota 3.

 

Ricky Hodge di Dakota – 4 gol den dos wega – foto di archivo

Fernando de Sousa cu tabata di regreso, un hopi bon partido, na minuut 84 a hasi un “one-two” cu Renier Paraez (de Sousa mes a inicia esaki den e half di Dakota), e ta haya e bala bek, penetra den area penal y anota su gol pa hasi e wega Nacional 0 – Dakota 4, esey tabata de Sousa su di 6 gol di e campeonato.

Dakota a gana y bon gana, nos a spera mas di Nacional toch. Dakota ta lider di campeonato keto bai cu 27 punta y mihor doelsaldo cu RCA. Nacional ta keda cu 14 punta den di shete lugar, pero, solamente 4 punta for di e cuarto lugar, ta hopi cos por pasa ainda.

“King of the Match” ta un biaha mas Ricky Hodge, ta dificil pa no scohe e hungado aki, el a hunga mesun bon cu den e partido previo, cu hopi gusto, energia, cu un ‘gara’ enorme.

Dakota ta hunga contra United Diadomingo atardi 6 di Maart y Nacional lo midi forsa cu Estrella Diabierna anochi 4 di Maart.

 

Britannia vs Estrella

Britannia ta den di tres lugar riba tabla y Estrella tin mester di puntanan y urgentemente, p’asina sali for di e ultimo lugarnan riba e tabla.

E partido bastante pareu, den cuminsamento, e prome 10 minuutnan, pero ya, pa ora cu David Castro di Britannia a horta un bala foi e defensor di Estrella na rand di area penal y hasi un p’ase perfecto pa Pieter Susebeek anota e gol di bai ariba asina trempan, Estrella a sak masha liher mes. Britannia 1 – Estrella 0.

Pa hasi cos mas complica pa Estrella ata Jean “Zaga” Ullyse ta haya carchi cora na minuut 17 caba ora cu el a foul David Castro net na rand di area penal, un momento cu Zaga sigur lo kier trek bek.

Estrella cu 10 homber so, a a hay’e hopi dificil mes pa nan logra un bon resultado y logra puntanan necesario. 

David Castro mes ta anota e di dos gol di Britannia na minuut 44, Britannia 2 – Estrella 0.

Despues di halftime ta mesun disco a sigui lora, un partido un poco anti-climatico, Britannia a cuminsa haya hopi mas gol. E lateral William Pardo cu gol na minuut 59 p’e di tres gol di e pumanan.

 

Pieter Susebeek di Britannia – hattrick den siman 11 – foto di archivo

Na minuut 70 y 73 ta Pieter Susebeek atrobe ta anota p’e 5-0, pa su “hattrick” den e partido.

Despues ta turno di Luis “Coco” Estrada, anotando p’e 6-0, Coco su di 8 gol pa empata p’e puesto seis riba tabla di goleadornan.

Estrella ta haya e gol di honor casi na final di e wega na minuut 87 pa medio di Egbert Tromp. Britannia 6 – Estrella 1, esey tambe tabata e resultado final.

“King of the Match” ta comparti entre Pieter Susebeek pa su hattrick y David Castro cu un gran wega p’e pumanan.

Britannia a keda firme cu 23 punta den di tres lugar riba tabla y Estrella den di ocho lugar cu 8 punta. Siguientemente Britannia ta hunga contra Riverplate Diasabra anochi 5 di Maart y Caravel lo midi forsa cu RCA Diasabra atardi tambe 5 di Maart.

 

United vs La Fama

La Fama ta conoci den e ultimo anjanan pa ta un ekipo bon para riba cancha, c’un futbol economico cu bon defensa y ta probecha tur loke nan haya, un formula hopi efectivo ya cu e ‘speransa berde’ di Savaneta a bai tres final den e ultimo ‘anja calendario’ logrando dos subcampeonato den Copa Betico y un den e torneo AVB 2021.

United a “struggle” den e prome rond di campeonato aki pero a mehora hopi mes na final di prome rond y a cuminsa e di dos rond cu un empate cu RCA. esaki no ta e United cu tabata perde cu score abulta man’e tabata e caso un dos anja pasa ainda. Un ekipo compacto cu por defende dilanti un golero solido.

Un partido igual-igual pa gran parti di tempo, aspero, duro, pero competitivo, mi no a spera otro.

Trempan caba ta La Fama ta habri marcador na minuut 11 pa medio di Ransey Trimon cu a regresa den ‘onda di gol’, su prome foi November di 2021.

United ta keda bataya bek y tras di un wega hopi aceptabel ta anota e gol di empate na minuut 24 pa medio di nan goleador e anja aki, Denrick Lopez, cu awor ta empata pa e di cuater puesto (cu nuebe gol total) p’e titulo di goleador di e campeonato aki.

E empate no ta dura mucho si ya cu La Fama a sali bai busca e bentaha atrobe, y nan a logr’e na minuut 33. Ta Ransey Trimon atrobe ta anota pa su ekipo La Fama, ta su di dos gol den e partido y di cinco gol di campeonato. United 1 – La Fama 2.

 

La Fama den e prome rond di campeonato – foto di archivo

Esey tabata tur e golnan tambe den e partido, tu den e prome half. Despues a sigui un bataya pa supremacia den e wega, fisico, pero mayoriamente dinter di e reglanan, un toma y d’ame, pero, cu La Fama a sabi di defende e resultado y bai cu e tres puntanan, un partido tenso y hopi competitivo.

“King of the Match” ta Ransey Trimon di La Fama pa su ‘brace’ di golnan. 

La Fama awor tin 16 punta, dos so aleha foi top cuater y United a keda cu 4 punta pero evitando e ultimo lugar debi na mihor diferencia di gol cu Bubali.

Sigientemente La Fama ta hunga contra Bubali riba Diadomingo anochi 6 di Maart y United lo bai contra Dakota riba Diadomingo atardi 6 di Maart.

 

Te otro siman  ⚽️

 

 

 

 

Click to comment

Leave a Reply

Your email address will not be published.

More in Division Honor