Connect with us

Division Honor

Siman 12 – tabla di posicion a sacudi, top dos ta mas defini, pero cinco ekipo ta disputando pa drenta top cuater.

Jhon Silva di RCA - goleador maximo di Division Honor - photo: Nathan Richards

Resumen:

E bataya pa top di tabla a keda defini p’e minimo di margen den e siman aki. Dakota y RCA a keda cabes-cabes den e careda pa number un, no solamente den total di punta pero tambe den diferencia di gol, e “tie breaker” a bira anto ken a score ‘mas gol’ y esey ta Dakota te cu awor, cu tin tres gol mas anota cu e tricolornan. Un cos ta sigur, cu e dos ekiponan aki a bai laga e otronan den “un careda di dos cabay”.

E otro puestonan riba tabla ta “up for grabs” man’e ta bisa na ingles, e careda p’e dos ultimo cuponan pa dicidi ken ta bai playoff ta hopi sera entre cinco ekipo; Britannia, Riverplate, La Fama, Caravel y Nacional, wow!

E careda pa evita degradacion (descenso) ta entre tres ekipo, corda cu e ultimo puesto ta baha di biaha pa Division Uno, te cu awor esey ta Bubali, cu ta empata cu United den punta pero cu’n peor doel-saldo. Si e campeonato caba awe ta Estrella y United lo bai hunga playoff di promocion/degradacion cu dos otro ekipo di Division Uno.

Ta hopi cos por pasa ainda si, tin hopi wega pa hunga y cos por cambia drasticamente, ban wak prome kiko ta pasa den siman 13.

 

Opinion:

Mi kier emfatisa e bon trabou di e cuerpo arbitral den e ultimo siman nan, tambe den fecha 12, un trabou hopi positivo mes, “keep it up”. Ta consistencia ta importante den e ofishi aki, cu no ta nada facil, ban compronde esey.

Cu e situacion di violencia cu a pasa den futbol di Mexico den e partido di Queretaro vs Atlas e siman aki, actonan barbarico sin duda. Ta tempo pa nos cuminsa pon’e atencion na ‘abuso of bullying verbal”, violencia fisico casi semper ta cuminsa cu violencia verbal, eynan problemanan ta cuminsa.

Abuso verbal, por ta hasta tambe di fanaticonan contra oficialnan y trahadonan den e deporte. Na paisnan europeo ya esey ta un tema importante y tin ley den su lugar caba. Na Aruba ta tempo pa nos enfoca riba e cosnan aki.

Niun referee, asistent of otro hendenan merece haya insulto personal contra nan, mas ainda ora cu nan ta eherciendo nan trabou di ‘buena fe’, wowo cu esaki, e por ta ‘contra ley pronto’. Esey no ta nos cultura, y e ta conta pa ‘social media’ tambe, tur esey ta importante pa e mehoracion di e cultura rond di nos deporte rey y nos meta pa mehor’e.

Nos futbol por cambia y mehora, pero mester di un ambiente positivo y sano, no tin duda.

 

Nacional vs Estrella

Esaki ta un partido un poco bou radar, hopi no a realisa con importante e ta. Mi por bisa cu “hopi importante” mes. Estrella ta den peliger pa keda den e tresnan den bom y riesga bai hunga playoff di degradacion, Nacional ta en busca di consistencia, en busca di top cuater y bai playoff.

E dragon nan den control foi cuminsamento, cu hopi energia, cu yegada, pero Estrella defendiendo bon apesar di tin falta di nan defensornan regular. Un ekipo cu no a haya su mes ainda, nan no ta hunga mal futbol, ta ‘cierto momentonan’ ta laga nan na caya.

Leonardo Pulido di Nacional – foto di archivo

Leonardo Pulido, e medio campista cu ta traha duro y core hopi, ta bek den e ekipo nortero, nos a mira tambe algun caranan conoci bek den Nacional, entre otro Deffery Banton mihor conoci como CD. Nacional ta moviendo nan piesanan, net na tempo kizas?

Tur cos a bin abou p’e naranhadanan na minuut 22 ora cu Aldair Fontalvo a anota e promer gol di wega. Tabata djies un gol di bentaha, pero, el a pisa hopi pa Estrella. Nacional a hasta aumenta nan presion en busca di mas gol.

Na minuut 30 tabata turno di Devis Oliveros pa anota su di 11 gol di campeonato pa hasi e wega 2-0 na fabor di Nacional. Oliveros ta den di tercer lugar riba tabla di goleador.

E partido a sigui cu basta accion pero sin cu ambos ekipo por concretisa. Estrella tabatin masha poco momentonan di peliger pa purba hasi un diferencia. Si djies nan por a anota e gol di corta bentaha, cos por a cambia pa nan, kizas.

Un partido competitivo y deportivo, cu bon conduccion arbitral pa Ricky de Leça y ekipo di asistent nan, t’a un carchi geel so a wordo duna den ful e wega. Pero e resultado mes no a cambia mas despues di e dos golnan di Nacional.

Esey mes tabata e resultado final. Nacional 2 – Estrella 0. Nacional a keda cu 17 punta den di shete lugar, pero, awor solamente 2 punta foi e cuarto lugar tan codicia. Estrella a keda den di 8 lugar riba tabla cu solamente 8 punta.

‘King of the match’ ta Leonardo Pulido cu a bringa tur bala cu por y a core hopi mes, distribuyendo pasenan pa su compañeronan di ekipo.

Den siman 13, Nacional lo hunga contra Riverplate Diadomingo anochi y Estrella contra Dakota Diasabra atardi.

 

RCA vs Caravel

RCA ta den careda cu Dakota p’e top di campeonato y Caravel ta un ekipo cu tabata solido den top cuater, hungando bon futbol den prome rond, pero, awor ta bringa pa nan bida pa keda den contencion pa bai playoff.

E partido aki, man’e tur partido, a cuminsa pareu na un manera di bisa, pero segun e minuut nan a pasa por a cuminsa wak e bentaha cu RCA tabatin riba Caravel, hasta sin gol ainda. E tricolornan hungando cu pasenshi of mas bien cu confiansa den nan mes.

Bon futbol di entre otro e hoben Ludgeneson de Cuba y tambe Alexon Simmons, nan no ta wordo menciona mucho, Mark Jacobs, asina consistente riba rechtsback, cu e manera cu Jacobs ta bai dilanti den atake bo ta lubida cu den esencia e t’un defensor, pero, hopi otronan por wordo menciona den e ekipo di RCA.

E prome y di dos gol a cai, pero un trei otro, na minuut 22 y 24 pa medio di e top goleador di Aruba n’e momentonan aki, Jhon Silva, y tur cos a parce cu e tabatin hopi mas pa hasi den e wega aki. RCA 2 – Caravel 0.

Mark Jacobs – e rechtsback di RCA den atake – photo: Nathan Richards

Na minuut 27, Mark Jacobs ta anota pa hasi e wega 3-0, ta RCA su di tres gol den solamente cinco minuut. Jhon Silva ta haya su hattrick c’un gol despues di halftime na minuut 53 y Albert Francis tambe ta anota na minuut 68, Francis tambe cu un campeonato solido pa su ekipo. RCA 5 – Caravel 0.

Na minuut 71 Evander Nedd, e hoben delantero tricolor, cu por cierto a bin di haya un ‘hattrick’ (3 gol den un partido) den e partido anterior. RCA 6 – Caravel 0.

Golnan ta sigui cai pa RCA, claro, tur gol ta conta p’aso esey por dicidi e top di tabla! Albert (killer) Francis ta anota atrobe pa su dobbel na minuut 84, pa alcansa 9 gol riba tabla pa empata pa e di cinco lugar di tur goleadornan.

Despues a sigui otro gol di Jhon Silva na minuut 86, su “poker”, un biaha mas cuater gol den un wega pa alcansa 18 gol den e campeonato, e tin un average di riba 1.8 gol pa wega (teniendo cuenta cu Silva a perde algun wega debi na lesion). RCA 8 – Caravel 0.

Weimar Galeano di Caravel y Jean-Pierre Fingal di RCA – photo: Nathan Richards

E ultimo gol di RCA tabata debi na un autogol pa hasi e score final RCA 9 – Caravel 0. No ta un sorpresa cu RCA a gana, pero pa gana asina grandi contra Caravel, un team di top cuater tabata sorpresa, dominio di e ekipo di Solito.

RCA a keda den di dos lugar riba tabla di clasificacion apesar cu nan ta empata cu Dakota den punta y tambe doel-saldo, Dakota a keda lider “op het nippertje” debi na tres gol mas anota cu RCA den a campeonato aki. Caravel awor ta den probema serio ya cu Riverplate a pasa nan p’e di cuarto lugar y tin mas presion di otro ekiponan tambe, e competencia ta hopi severo.

‘King of the Match’ un biaha mas ta Jhon Silva pa su “poker”.

Den siman 13, RCA lo midi forsa cu Britannia riba Diadomingo atardi y Caravel lo bai contra La Fama riba Diabierna anochi.

 

Riverplate vs Britannia – E partido di siman

E partido aki tabatin hopi expectativa. Riverplate den prome rond tabata e ekipo sorpresa, den di dos rond nan a cuminsa n’un manera relampago, ganando dos wega sigui, menasando pa subi den top cuater y awor nan ta topa cu ekipo den di tres lugar. Britannia en cambio tabata den e posicion ey, bastante comfortabel y sigur den e top tres.

E wega aki tabatin un elemento di playoff, claro, e resultado lo ta crucial p’e tabla, vooral pa Riverplate en busca di drenta playoff.

E pumanan cu mas posesion, atake y yegada den prome instancia, tabata parce cu River tabata mas bien keda bon para riba cancha, disciplina, tur hungado planta den nan posicion y defendiendo bon, wardando p’e momento oportuno.

Riverplate a duna Britannia tereno y e bala, sperando p’e pumanan riesga y tira dilanti lagando espacio atras unda e velosisimo hungadornan di River por exploita den contra-golpi, cu no ta necesario e manera di hunga di River normalmente, ta nan strategia den parti di e wega aki, locual ta rekeri hopi disciplina mes. River ta un ekipo versatil awor, cu bon planteo tecnico, bon trabou di coach Jomar Boekhoudt, nan por hasi hopi cos.

John-Rick Kelly di Riverplate y Jean Carl Henriquez di Britannia – Photo: Nathan Richards

Den un di e momentonan ey mes River y no Britannia, ta habri marcacion di e partido. E velos Jason Carolina a bolbe bek den onda di gol na minuut 22, ta manera un banjo di awa frieuw pa Britannia, cu di berdad tabatin mas posesion di bala y mas atake, pero, no a sa di probecha, River si a sa di probecha! Riverplate 1 – Britannia 0. Bentaha p’e ekipo di Playa p’abou.

E wega cu ya tabata hopi intenso caba a keda riba un hopi bon nivel, tremendo! Britannia cu hopi posesion ainda, cu yegada, pero ainda sin por concreta, nan no tabata skerpi den caba e hugadanan den area penal, dilanti gol, ten minste no den e ultimo 16.

River a sa di probecha ora nan haya e bala, nan “strength” ta ‘cuida-bala-ora-nan-haya-bala’ y hasi bon pasenan, p’aso nan tabata hasi nan mes liber cu movimientonan liher, e hungadornan di River tabata efectivo den esey, futbol asina fundamental, ademas di nan motivacion.

Ethan Tromp di Britannia y Julnes Plet di Riverplate – photo: Nathan Richards

E partido tabata un toma y dame pa casi henter e 90 minuutnan, un wega bon oficia , solamente dos carchi geel otorga pa referee.

Britannia djies no por a yega n’e gol di empate ey. Victoria minimo di Riverplate y tres punto, p’asina acumula 19 punta y subi den di cuater lugar riba tabla, awor cu gran chens pa bai playoff, pero, ainda falta seis fecha pa bai. Britannia ta keda den di tres lugar ainda cu 23 punta.

Siljean Vrolijk y Carlos L. Quandt tabatin bon wega preveniendo Britannia pa hasi mas den e ultimo 16. ‘King of the Match’ ta sin duda Mario Da Silva pa su trabou impecabel den defensa di Riverplate.

Den siman 13, Riverplate lo hunga contra Nacional, Diadomingo anochi, wega importante p’e cuarto lugar. Britannia lo hunga contra RCA riba Diadomingo atardi, Britannia lo purba wanta e posicion tres.

 

Dakota vs United

Dakota tratando na mantene nan mes como e number un riba tabla di Division Honor den e careda cu RCA, United ta buscando na scapa foi e zona di peliger y evita descenso automatico.

Den e partido aki ta Dakota a cuminsa y a keda cu e bala pa mas di 70% di tempo, United kedando bastante disciplina cu un formacion 4-5-1 cu mas bien tabata cambia di biaha pa pon’e dos homber mas den defensa si mester, e medio campo firme y defensivo lagando solamente Denrick Lopez dilanti den delantero.

Asina mes, United, door di nan disciplina y hungando mas bien pa evita derota en bes di busca victoria (un systema preventivo), a tene e marcador mas sera cu a spera den e prome half, e prome gol di Dakota a yega na minuut 18 pa medio di Resef Gross, e linksback di e amarillonan.

Asina mes cu dominio di Dakota den e partido, ta United a anota e siguiente gol na minuut 29 pa empata e wega, gol di Antonio Fawcett Jr. Dakota 1 – United.

Dakota ta sigui e partido cu hopi pasenshi despues cu United a empata, semper cu dominio di bala. Ta te na minuut 44, net prome cu halftime, ta Sebastian Montoya ta anota e gol di bai riba. Dakota 2 – United 1.

Nickenson Paul di Dakota lansando den atake – photo: Nathan Richards

Despues di halftime si e porta grandi a habri pa Dakota. Ora bo wak Nickenson Paul bai dilanti, asina facil p’e, ta gol nan ta bai busca, p’aso tin confiansa den su compañeronan y cu Ferdinand Robert solido riba e linea defensivo, pakiko no?

Dakota a cuminsa anota gol trei gol, e dam di United a kibra alfin. Fernando de Sousa na minuut 54 p’e 3-1, cu e gol aki de Sousa ta drenta den e top 10 di goleadornan cu su di shete gol. Dakota 3 – United 1.

Ricky Hodge ta sigui anota gol den e campeonato aki, dos gol trei otro na minuut 73 y 75, p’acumula 11 gol pa empata Devis Oliveros den di tres lugar riba tabla, Hodge su di tres wega sigui cu dos gol. Dakota 5 – United 1.

Na minuut 80 ta Resef Gross ta anota atrobe pa su dobbel pa hasi e wega 6-1, y Owen v/d Wijne cu a drenta como substituto den di dos tempo ta anota na minuut 88 p’e 7-1 y score final tambe.

Dakota ta defende su liderato riba tabla, y apesar cu nan ta empata cu RCA den punta (30) y doel-saldo (+40), nan ta prome ainda debi na mas gol anota (50 vs 47) cu RCA te cu awor (RCA asina mes a permiti tres gol menos cu Dakota te ne punto aki).

Ferdinand Robert di Dakota – photo: Nathan Richards

‘King of the Match’ ta comparti entre Ferdinand Robert y Nickenson Paul pa nan trabou den e linea defensivo di Dakota y tambe Ricky Hodge, un biaha mas, pa su golnan, otro dobbel p’e.

Den siman 13, Dakota ta topa cu Estrella Diasabra atardi y United ta bai hunga un partido hopi importante cu Bubali, esey por dicidi ken ta keda den e ultimo lugar y descende automaticamente pa Division Uno.

 

La Fama vs Bubali

La Fama ta un ekipo solido, semper den e “mix” di e ekiponan mas importante, no lubida cu nan tin ta bai tres final consecutivo den e torneonan grandi akinan den e ultimo anja, man’e a bisa hopi biaha, un ekipo cu ta bon plantea riba cancha, un mix di hungadornan veterano y tambe hoben nan, nan ta acepta nan limitenan pero tambe por emfatisa nan forsanan, bon direccion di coach Roderick Rodriguez y nan bestuur tambe. Bubali ta den problema serio y mester di punta urgentemente pa evita descenso automatico, y awor ta hasta hasi un cambio urgentemente den e direccion tecnico den e ulitmo fase di a campeonato, pa purba scapa di bai abou.

Den e promer rond di e campeonato e dos ekiponan aki a empata 2-2 den un hopi bon partido, pero, foi e tempo ey, La Fama a cuminsa hunga mihor futbol atrobe, hasta bayendo final di Copa Betico e anja aki trobe, e biaha aki ganado Dakota den semi final.

Ransey Trimon di La Fama rondona pa Jianfranco Burgos y Michael Tromp di Bubali  –  photo: Nathan Richards

La Fama desde e pitaso inicial tabata e miho ekipo riba cancha, Bubali a demonstra “fighting spirit”, y dos hungado cu semper ta bin na mente ta Michael Tromp (cu a regresa den e planteo despues di varios wega) y Jianfranco Burgos, un hungado di hopi capacidad y un “work-rate” enorme, esfuerso tin di e hungadornan di Bubali, pero e no ta suficiente ainda pa gana punta.

Davidson Kaarsbaan, e corpulento delantero di e speransa berde di Savaneta, ta habri marcador cu su gol na minuut 14 caba. La Fama 1 – Bubali 0.

La Fama a hunga un futbol di bon maneho y cuido di e bala, nan tabata skerpi cu nan pasenan, y nan sa di mantene nan marcacion nan hopi sera.

Na minuut 34 ta Sylvester Schwengle, e capitan di La Fama ta anota pa hasi e wega 2-0 p’e savaneteronan.

Schwengle t’un hungador cu ta “no non-sense”, e ta hopi deportivo, keremi, pero e ta hungabo fisico, e por core y tin bon condicion, sigur un mentalidad fuerte, apto pa un capitan di un ekipo ganador. E mes ta anota e siguiente gol tres minuut despues na minuut 37, tur e dos golnan aki tabata excepcional, tur dos net p’afor di e area penal contrario. La Fama 3 – Bubali 0.

Sylvester Schwengle, capitan di La Fama – cla pa anota un di su cuater golnan – Photo: Nathan Richards

Despues La Fama a baha e ritmo un poco, pakiko no? c’un bon bentaha, a cuminsa purba algo diferente, hungando trankil, buscando aperturanan cu Bubali laga pa bai den atake. Ta te na minuut 77 nan a bolbe anota pa medio di e bon hungador di medio campo, Raul Morales, cu ta hunga su rol hopi bon mes. La Fama 4 – Bubali 0.

Sylvester Schwengle mes ta anota un biaha mas pa su hattrick na minuut 85, y Enzon Parra, cu tabatin un bon wega ora cu el a drenta como substituto, a haya e net na minuut 87, La Fama 6 – Bubali 0.

E anochi a sera cu “broche de oro” pa Sylvester Schwengle cu su di cuater gol den e wega, un “poker” pa Schwengle na minuut 90+5 prome cu e final di e wega.

Resultado final La Fama 7 – Bubali 0.

La Fama awor ta contendiente serio pa playoff, nan tin 19 punta, mesun cantidad cu Riverplate, pero pa doel-saldo ta keda den di cinco lugar riba tabla, p’awo, pero, tin hopi wega pa hunga ainda. Bubali ta keda den sotano cu solamente 4 punta, igual cu United, pero cu menos doel-saldo.

‘King of the Match’ ta Sylvester Schwengle di La Fama pa su trabou incansabel riba cancha y pa su “poker” (cuater gol) riba e anochi aki.

Den siman 13, La Fama ta hunga contra Caravel riba Diabierna anochi y Bubali lo bai contra United den e ‘derbi di Nort’ riba Diasabra anochi, un wega crucial pa ambos ekipo, e partido por dicidi ken ta keda den bom di tabla y kizas descende pa Division Uno.

 

Te otro siman!

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

2 Comments

2 Comments

Leave a Reply

Your email address will not be published.

More in Division Honor