Connect with us

Division Honor

Resumen y antesala di Division Honor, falta cinco partido mas pa haya sa ken ta bai playoff

Siman 13 den Division Honor tabata hopi competitivo

 

Resumiendo

Locual a resalta mas den siman 13 ta e hecho cu SV La Fama keto asina a pasa bai den di cuarto lugar riba tabla di posicion haciendo e careda pa playoff mas interesante ainda. Pero mientras cu e speransa berde di Savaneta a bula bai ariba, Riverplate a perde den grandi contra Nacional cu tambe ta diki diki den e bataya ey, e hecho cu River a perde den grandi a sorprende hopi. Caravel na su turno si a cai duro, pero duro mes, for di top cuater te di shete lugar riba tabla.

Den e bataya pa evita descenso automatico, Bubali a keda awor den e puesto no desea ey faltando cinco wega so mas pa hunga den e campeonato. Un siman unda nos en berdad a spera cu hopi cambio grandi lo bai pasa, y dicho hecho.

E competencia pa top goleador tambe a bira mas interesante despues cu Sebastian Montoya a yega na solamente dos gol trei Jhon Silva p’e prome puesto, y Ricky Hodge tambe ta empata awor cu Devis Oliveros p’e di tres puesto riba tabla di goleador.

 

Comentario

Nos a bisa siman pasa cu consistencia ta clave pa cu e arbitrahe den Division Honor y tur cos tabata parce riba bon caminda den e fechanan despues di Copa Betico. 

E siman aki arbitrahe tabatin algun oportunidad nan, un fecha cu  incidentenan innecesario, sin lubida cu futbol t’un deporte di contact, no ta tur siman ta bai ta perfecto. Casonan man’e den e partido di Britannia vs RCA, unda un hungador no kier a bandona cancha despues di haya carchi cora, hasta referee a cuminsa e partido di nobo mientras cu e hungado tabata keto bai cerca di e linea lateral, kizas hasta riba tereno mes ainda. 

Den un otro incidente den e partido di Caravel vs La Fama, cu no necesariamente tabata culpa di e referee. Un hungado expulsa na caminda pa kleedkamer a hay’e confronta cu algun “fanatico” contrario cu aparentemente tabata dirigi palabranan vulgar n’e hungado of hasta tirando obhetonan, cos por a bai completamente foi man, polis mester a yega stadion por si acaso, mester check e protocol pa sigui den e situacion nan aki y investiga precies kiko a pasa y con pa evita den futuro.

E partido Nacional vs Riverplate tabata bon te cu casi na final den e di dos tempo, unda el a bira hopi duro. Dakota vs Estrella bou Lambert tabata sin problema y un partido stabiel tambe tabata entre Bubali y United, bon trabou di referee Sandjon, mester nota si cu no ta tur wega tin mesun grado di dificultad.

Ban sigui sostene nos arbitronan. Futbol ta un contact sport cu tin biaha por bai foi man, esey ta sigur. Kizas instituyendo un linea di comunicacion bibo entre e oficialnan acargo y clubnan, y media? Un recap di kiko por hasi pa mehora, con pa evita cierto incidentenan, papiando nos ta yega na hopi, mi ta referi na un sistema di “open communication”, kizas un ‘update semanal’ cortico mes di e head of referees? Pa clarifica cierto cosnan y asina compronde e arbitrahe mihor, e’n ta diferente na con parehanan ta resolve nan malentendimientonan, door di papia n’un manera positivo.

 

Caravel vs La Fama – partido di siman

Caravel cu tabata solido den ‘top cuater’ a bin ta perdiendo nan rumbo den e ultimo simanan caba (despues di Copa Betico) y awor nan ta sintiendo e consequencianan. La Fama t’un ekipo cu a bin ‘di menos pa mas’ durante e campeonato, nan a haya un boost den Copa Betico, bayendo final pa di dos anja sigui, nan sistema di wega y trabou ta pagando dividendo den e campeonato mes tambe, awor nan ta candidato grandi pa bai playoff.

Un partido conservativo den comienso, unda niun di dos ekipo a risga mucho, cu bon defensa y bon retencion di bala. Caravel tabata ‘pareu-pareu’ cu La Fama, pero, tabatin preocupacion cu nan condicion fisico, cu ya tabata un negativo pa nan den partidonan previo, e pregunta ta te na ki punto den e wega nan por keda competitivo debi na condicion fisico? Lastima,un ekipo cu a demostra cu nan por ta top cuater.

Weimar Galeano di Caravel y Sylvester Schwengle di La Fama – foto: Nathan Richards

Na minuut 44, Sylvester Schwengle, cu ta riba un racha di anota gol, un “poker” den e ultimo partido, t’a hay’e net pa duna La Fama e bentaha net promer cu halftime a bay aden.

Den di dos tempo ta man’e La Fama a cuminsa tene mas posesion di e bala y cu mas yegadan, semper defendiendo bon, na un dado momento a hunga mas bien un wega di control, sin mester risga mucho y tira den atake asina cu haya mas “ruimte”, hopi efectivo mes, por cierto, ekipo economico.

Ta La Fama mes ta anota atrobe na minuut 67. E gol tabata un contra-golpi di ‘poco pasenan’ unda c’e defensa di Caravel a “freeze” sperando un pitaso di arbitro, pero nada u’n pasa ya cu Sylvester Schwengle tabata bon acomoda y no tabata off-side, e ta drenta den area penal y pon’e bala riba teblachi pa Enzon Parra Ramirez na banda drechi unda e ta deposita e bala den net. Caravel 0 – La Fama 2. (nota: mester revisa e documento oficial pa cu e anotador di e gol aki)

Claudio Cavalcante ta den control di medio campo di SV La Fama – foto: Nathan Richards

Pa hasi cos mas pio, net despues di e hugada di gol e portero Jefferey Werleman di Caravel ta haya un carchi cora pa protesta, lagando Caravel cu dies hungador so.

Despues tabata turno di Chrisler Cicilia di La Fama pa bandona cancha debi na un di dos carchi geel na minuut 74, cu despues a conduci n’e incidente cu fanaticonan, jammer p’aso su ekipo tabata den bentaha comodo.

Asina mes Caravel no a logra remonta e anotacion aki. Esey tabata tambe e resultado final, Caravel djies no tabata por a wanta e ritmo di La Fama y hasi un diferencia den e wega. Resultado final Caravel 0 – La Fama 2. 

“King of the Match” ta Sylvester Schwengle atrobe, pa su gol y su asistencia p’e di dos gol tambe, ademas di su “work-rate”.

Germain Stroop di La Fama – foto: Nathan Richards

Caravel awor ta keda cu 18 punta den di shete lugar riba tabla, mientras cu La Fama a captura e di cuarto puesto cu 22 punta. Den siman 14, Caravel ta enfrenta United riba Diadomingo anochi y La Fama lo enfrenta Britannia riba Dialuna anochi, un partido cu por dicidi e di tres puesto riba tabla.

 

Estrella vs Dakota

Un clasico di Aruba di antes cu ya no ta brilla mas. Estrella ta en busca di no ‘baha mas’ for di unda nan ta riba tabla, pero, asina mes ta den e zona di peliger, den di ocho lugar y destina pa hunga playoff di promocion/degradacion e anja aki, te cu awor, ya cu nan ta hopi leu ainda pa alcansa e puesto 7. Dakota prome c’e partido aki tabata den prome lugar, no pa mas punta, ni pa mas miho diferencia di gol, pero debi na mas gol anota cu RCA, e “tie-breaker” pa dicidi e prome puesto entre e dos colosonan aki.

Sebastian Montoya di Dakota contra Estrella – foto: Nathan Richards

Dakota no a perde pa gana y di comienso di e wega caba nos a wak un diferencia grandi caba entre e dos ekiponan aki. 

Ya na minuut 11 Dakota ta anota p’e bentaha trempan di 1-0, gol di Shemar Monticeuex.

Sigui pa gol di Sebastian Montoya na minuut 17, p’e 2-0. Montoya su di 15 gol di e campanja, asercando Jhon Silva di RCA un poco mas riba tabla.

Golnan di Dakota ta sigui cai den prome tempo, Estrella sin contesta. Joshua Gross ta anota na minuut 38, sigui pa gol di Fernando de Sousa na minuut 40. Dakota ariba 4-0 na halftime.

Daniel Briceño di Dakota y Xion Tromp di Estrella – foto: Nathan Richards

Den di dos tempo, Egbert Tromp di Estrella ta haya carchi cora na minuut 67, pa hasi cos mas complica ainda p’e oncena di Santa Cruz. Golnan di Dakota ta cai atrobe ‘un trei otro’, na minuut 71, Sebastian Montoya ta bolbe anota pa su dobbel den e wega, y tambe su di 16 gol di e campeonato pa sera e “gap” entre e y Jhon Silva na dos gol so! Estrella 0 – Dakota 5.

Owen v/d Wijne cu a drenta na minuut 66 ta anota e di seis gol pa Dakota na minuut 81, y despues ta toca turno na Ricky Hodge, cu no por stop di anota gol den e di dos half di e campeonato aki, su di 12 gol, anotando por lo menos un gol of mas den e ultimo cuater weganan (a anota gol den tur wega di dos rond). E gol di Hodge a hasi e wega 7-0 p’e ‘preto cu geel nan’, e resultado final tambe. Estrella 0 – Dakota 7.

“King of the Match” ta comparti entre Sebastian Montoya pa su dobbel y Daniel Briceño pa su rol den un posicion cu e no sa hunga normalmente, riba linksback, pero tambe ademas di su versatilidad el a duna un gran empeño riba cancha.

Dakota keda como lider absoluto riba tabla di posicion cu 33 punta y Estrella den di ocho lugar cu solamente 8 punta. Den siman 14, Estrella lo midi forsa cu Riverplate Diasabra awor anochi y Dakota ta bai contra Bubali e mesun Diasabra atardi.

 

Bubali vs United

E ‘derbi nortero’ aki tabata di bai ta e partido pa dicidi, apesar cu provisional, ken ta keda den ultimo lugar riba tabla. Promer c’e partido ambos ekipo tabatin 4 punta so, pero United cu mihor diferencia di gol, ta keda den di nobeno lugar, lagando Bubali den sotano. Den e wega aki Bubali tabatin mester di un victoria pa pasa bai ocupa e posicion nuebe ey y salbando nan mes di descenso automatico.

E partido no por cuminsa di un peor manera p’e oncena ‘orguyo di Noord’, ora cu na minuut 2 caba, Juan David Geerman ta anota e prome gol di wega pa United p’e 1-0.

Ta man’e un banjo di awa friew pa Bubali su aspiracion nan. Apesar cu tabata hopi trempan ainda, cu ful un wega nan dilanti, nan a wordo afecta hopi mes, un caida psycologico sin duda p’un ekipo cu ta den un “struggle” caba.

Andrew Croes di United, bon desempeño contra Bubali – foto: Nathan Richards

Na minuut 27 e goleador di United, Denrick Lopez, ta anota pa hasi e wega 2-0. Asina halftime a bai aden cu United den bentaha di dos gol.

Na minuut 53, Antonio Fawcet Jr ta hasi e wega 3-0, pa despues, ni dos minuut despues anota otro gol mas p’e 4-0, y bentaha amplio di United. 

Sjon David Pietersz di Bubali ta haya carchi cora y expulsion na minuut 71, lagando Bubali den mas cataclismo. Na minuut 78 Denrick Lopez ta bolbe anota pa su dobbel (dos gol den wega). Bubali 0 – United 5, y e resultado final tambe. 

“King of the Match” ta comparti entre Denrick Lopez y Antonio Fawcet jr. pa nan desempeño y tambe pa nan dobbel den e partido. Lopez awor ta number 5 riba tabla di goleadornan cu 11 gol, un gol so aleha for di tercer puesto.

Denrick Lopez, e goleador di United – foto: Nathan Richards

Bubali ta hunga contra Dakota riba fecha 14 riba Diasabra atardi y United lo bai contra Caravel Diadomingo anochi.

 

Britannia vs RCA

E partido aki tabata di suma importancia, mas ainda pa Britannia, ya c’un derota lo pon’e nan cerca di perde e di tres puesto riba tabla, RCA en cambio mester a gana di e pumanan cu score abulta pa empata of pasa Dakota p’e prome puesto riba tabla.

E partido aki tabata bastante pareu den comienso, ambos ekipo un poco timido bayendo den atake pa no compremete nan mes atras y regala espacio, pero, tur cos a cambia na minuut 29 ora cu ambos ekipo a perde “piesanan” importante despues di un encontronaso entre Luis Estrada di Britannia y Erik Santos di RCA, apesar cu tabata un incidente chikito y cu masha poco violencia realmente, ambos a haya carchi cora direct, carchi geel mes pa ambos lo por tabata na su lugar tambe, pa aplica un poco sentido comun.

Partido sera entre RCA y Britannia – foto: Nathan Richards

Pero e evento a cambia masha hopi mes cu dies homber pa banda, el a perde su “mojo”, e timides ofensivo a continua mas bien, e ekiponan tabata hunga cu basta cuidou, apesar cu segun e minuut nan tabata core toch a bira un wega interesante hasta cu absencia di gol y mester duna credito na ambos ekipo pa bataya te n’e ultimo minuut di wega.

Enfin, ningun ekipo a logra pon’e e bala den net, resultando den un empate sin gol na final. 

Britannia 0 – RCA 0. Ambos ekipo a mantene p’awo nan mesun puesto riba tabla, RCA a keda den di dos lugar y Britannia ainda den di tres puesto.

Hoben volante di RCA, Ludgeneson de Cuba – foto: Nathan Richards

“King of the Match” ta comparti entre e dos porteronan, Jean-Carl Henriquez di Britannia y Eric Abdul di RCA pa e gran trabou di mantene nan gol limpi den e partido aki.

Britannia lo enfenta La Fama Dialuna anochi y RCA lo bai contra Nacional Diadomingo atardi, ambos partido di alto nivel di importancia, keda pendiente.

 

Nacional vs Riverplate – un analysis

Nacional ta un ekipo cu ta riba bon caminda, subiendo riba tabla y menasando pa drenta den top cuater y kizas mas, un “tradicion” di e ekipo poderoso di Noord. Riverplate ta den bataya pa yega playoff, algo cu niun hende a spera promer cu e campeonato a cuminsa, y mester nota cu e oncena di Playa p’abou a haya un invitacion special pa participa den e campeonato aki (for di Division Uno) ora cu Caiquetio a dicidi di no participa den e top division di Aruba a campeonato aki.

Riverplate man’e normal, hopi energetico, y den e prome minuutnan di e wega sigur. Nacional, en cambio a indica un formacion basta conservativo cu solamente dos puntero (e tabata mustra man’e un 4-1-3-2 of 4-4-2, simpel), mustrando un esquema defensivo, pero, diripiente na pitaso a cuminsa di biaha c’un pressing halto causando hopi problema pa Riverplate, cu no por a haya salida, Nacional en cambio a haya yegada di biaha, ta man’e River a keda sacudi un poco, nan a haya un warning, y algo no tabata bon, nan no tabata comfortabel.

Leonardo Pulido di Nacional – foto: Nathan Richards

Pa ora cu Nacional a stop di press, ainda tabata dificil pa River, p’aso Nacional su medio campo tabatin hopi hende ta warda, nan ta retrocede un poco dunando River un tiki cancha, ta un ‘anzue’ e tabata! Nacional no a lansa mucho den atake cu nan lateralnan defensivo. River tabata lagando espacio atras, vooral riba rechts. E bon di Nacional den e wega aki ta nan habilidad pa switch hungado for di linea defensivo pa bai den atake, bo por hasi esey ora bo tin hungadonan man’e Aldair Fontalvo, Charles de la Cruz y Leo Pulido pa caricia y retene bala den medio campo, nan por hunga “transicion”, ganando tempo p’e otronan subi y bai den atake.

Asina e prome gol a yega na minuut 26 den pia di Leonardo Pulido mes. Riverplate tabata atakando cu basta hende, un poco di “overreach” cu hasta seis hungado dilanti, lagando espacio atras den nan banda robes. Emerson Leocadio a intercepta e bala na rand di area penal di Nacional, e ta lague bala pa De la Cruz cu bon vision ta lansa den profundidad pa Pulido, cu tabata habri na su man drechi, Pulido ta hasi un sombre riba portero Whilmerd Croes cu tabata saliendo, p’e 1-0 pa Nacional. E accion ey cu a resulta den gol tabata e modelo pa sigui di Nacional riba e anochi aki.

Nacional celebrando cu nan capitan Devis Oliveros – foto: Nathan Richards

River a keda yen di vigor toch, lansando den atake, yegando bon den e ultimo 16, ta djies den e curason di area penal ta unda cos tabata preta, sin por a hasi hopi tiro di peliger, y si no portero Jose Cruz tabat’ey. Nacional tabata djies defendiendo hopi bon mes. Asina mes halftime a bai aden, partido hopi sera. Nacional 1 – Riverplate 0.

Den di dos half e partido a sigui hopi competitivo vooral den comienso, River hungando bon atrobe, hasta cu algun yegada di peliger, pero, un banjo di awa friew na minuut 48. Un hugada di dos p’ase so di Nacional; Emerson Leocadio den su mesun area penal ta haya Joshua Aguirre den circulo central, e na su turno ta lansa dilanti hayando Devis Oliveros mei mei di tres defensor di River, Devis ta yega prome y gana e bala, drenta area penal y anota e di dos gol p’e dragon nan. Nacional 2 – Riverplate 0. Ta Devis su di 12 gol den campeonato, e number tres riba tabla di goleadornan. 

Mas River sali den atake, mas sorpresa nan a keda haya, na minuut 52, den solamente tres p’ase Nacional ta ataka y anota gol atrobe. Cuminsando cu portero Jose Cruz cu ta pasa pa Pulido cu ta ricibi falta, pero pa ley di bentaha ta laga e bala pa Leonardo Colmenarez, cu ta hasi un p’ase largo y (atrobe) ta haya Devis Oliveros na banda robes cerca di area penal di Riverplate, e ta dribble drenta y crusa pa Fladimy Francois cu tabata coriendo na su banda drechi, y e ta deposita e bala den net, Nacional 3 – Riverplate 0. Defensa di River a keda un biaha mas un stap atras.

Na minuut 60 cu e expulsion di nan linksback Darnell Severino, di dos carchi geel den e partido, e wega practicamente a keda den man di Nacional, c’un bentaha grandi asina, ta con por remonta e resultado asina cu dies hungador so? River a purba toch, pluimpje p’anan.

Golnan di Nacional a sigui cai; na minuut 76 pa medio di Charles de la Cruz y na minuut 87 ta toca turno na Leonardo Pulido un biaha mas, un “golaso” di distancia pa su dobbel. Resultado final Nacional 5 – Riverplate 0. Nacional a keda cu 20 punta den di cinco lugar riba tabla, dos so foi top cuater y playoff. Riverplate ta keda awor cu 19 punta den di seis lugar.

Riverplate c’un bunita gesto di aliento y apoyo pa Pedro Gomez, ex hungado di River – foto: Nathan Richards

“King of the Match” ta comparti entre Leonardo Pulido pa su dobbel y tambe un bon wega den medio campo y Devis Oliveros, cu tabatin un gol y un assist tambe na su nomber.

Den siman 14, Nacional ta hunga contra RCA riba Diadomingo atardi y Riverplate ta bai contra Estrella Diasabra atardi.

Te aki anto y te otro siman 🔥⚽️

 

 

 

 

 

 

2 Comments

2 Comments

Leave a Reply

Your email address will not be published.

More in Division Honor