Connect with us

AVB

Seleccion di Aruba ta celebra victoria riba nos suela despues di hopi tempo – venciendo ekipo internacional 3-0.

Comentario

Despues di hopi tempo, casi shete anja pa ta specifico, e fanaticada di futbol na Aruba alfin ta haya un chens pa disfruta di e seleccion nacional riba nos mes’un tera, na nos mes’un stadion, cu nos mes’un hendenan. 

Den ocasion nan previo, den e ultimo anjanan, (y den futuro sercano ainda), e seleccion di Aruba tabata hungando su “partido di cas” na stadion Ergilio Hato na Willemstad, Corsow, debi na e situacion relaciona cu e condicion structural di nos stadion nan na Aruba, esaki ainda ta bai ta un “issue”, dus, e situacion ey lo sigui te ora cu e stadion ta cla pa “host” partidonan sanciona pa Concacaf y FIFA.

E evento special aki, atende pa miles di espectadornan, ta un iniciativa di AVB pa reconecta atrobe cu e seguidornan di e deporte rey riba e baranca aki y rebiba e passion pa futbol un biaha mas.

Aruba vs ekipo Internacional – Joshua John, Camilo Peña y Darryl Baly den bataya – foto: Davyne Croes

E contrincante di e seleccion di Aruba den e ocasion aki ta un ekipo “all stars” internacional bou guia di Dreyer Bracho, un di e director tecnico nan mas exitoso na Aruba den e ultimo anjanan. 

E ekipo di estreyanan aki ta consisti di e top hungadornan internacional radica na Aruba, casi tur ta milita den Division Honor. Nos ta papiando di hungadornan di gran caliber, entre e mihornan den e futbol di Aruba, e top goleadornan actual den Division Honor; Jhon Silva, Sebastian Montoya y Devis Oliveros (previo ganado di Balon D’Or) cu lastimamente no por a hunga den a partido aki debi na un lesion di ultimo ora, Oliveros a hasta yega na domina e tabla di goleador den tres campeonato.

Jhon Silva y Darryl Baly – foto: Davyne Croes

Aruba ta hunga cu su ekipo nacional completo den preparacion pa Concacaf Nations League na Juni. Hopi di e convocadonan p’e seleccion nacional a bin te foi Hulanda pa hunga pa nan pais, hopi convocadonan tambe ta milita den Division Honor aki mes, entre nan algun hungado hoben y talentoso, un composicion di ekipo hopi interesante mes efectua p’e bondscoach nobo Marvic Bermudez, un jiu di tera su mes.

Tin un feeling di un ‘comienso nobo’, ‘un mihor futuro pa nos futbol, p’a cuminsa gatia y cana atrobe, y core den futuro, semper reconociendo nos limitacion nan pero tambe emfatisando nos forsanan, reconociendo loke nos tabatin den pasado, glorianan di hopi anjanan pasa, cu “somehow” a bai perdi, cu hopi no sa mes di nan. 

Nos ta biba riba un isla chikito y seco cu toch por ‘produci hopi foi nada’, nos por hasi “milager” cu poco, esey ta den nos DNA, pa crea cosnan grandi riba un pida baranca cu siglonan pasa tabata ser yama “isla inutil” pa cierto conquistadornan Spanjo. Nos no tin niun recurso natural, pero, nos a “prove nan wrong” hopi anja pasa caba, nan no a conta cu e concepto cu yama ‘e rubiano’, e recurso humano, e berdadero “melting pot” di mundo, unda tin asina hopi diferente cultura y lenguahe biniendo hunto pa lucha, produci y busca exito den forma di ‘un solo ekipo’.

Camilo Peña y Jayson Halman – foto: Davyne Croes

 

E partido cu analysis

Den un stadion Guillermo Prospero Trinidad repleto cu fanaticonan di tur edad, e partido den prome instancianan tabata mas den control di Aruba, e combinacion den medio campo di Jeamir Howell y Walter Bennet tabata clave den e prome parti di e wega, mas ainda ora cu nan ‘conecta’ cu Joshua John, Benjamin Maria, Jayson Halman y Terence Groothussen dilanti den atake. 

P’atras den defensa tambe nan no a permiti mucho yegada di peliger, vooral den prome half, unda cu Darryl Baly y Fernando Lewis a demonstra nan efectividad, e talentoso Nickenson Paul hungando riba lateral drechi, cu no ta su posicion normal, pero, mustrando hopi cos bon, y na banda robes Diedrick Luydens a hunga cu alma y cuerpo, un “power” den tur sentido.

Diederick Luydens – linksback di Aruba – foto: Davyne Croes

Aruba cu mas posesion y tambe cu yegadanan di peliger, pero, tambe teniendo un cierto ‘conservatismo’, mas bien un disciplina pa cu nan wega, man’e coach Bermudez mes a bisa prome cu e partido, cu nan t’ey pa hunga nan wega y no necesariamente djies gana e partido (gana pa gana), “ta un trabou di largo plaza e ta, un project pa futuro”, dus no ta algo di awe pa mayan so, “e mester tin di haber cu consistencia”. 

Jeamir Howell – volante di RCA y Aruba cu Fernando de Sousa di team Internacional, referee De Leça ta vigila – foto: Davyne Croes

Mester admiti si cu e ekipo internacional tambe tabatin bastante bon momentonan, algun di calidad, cu nan bon tecnica di futbol, ancra mei mei cu Daniel Briceño, cu di berdad tabatin un fenomenal partido, hunto cu Leonardo Pulido y Luis Estrada cu tabata bringa tur bala cu por, tratando semper di conecta cu Jhon Silva, Sebastian Montoya y Fernando de Sousa, atakantenan peligroso. 

Joshua John y Leonardo Colmenarez – foto: Davyne Croes

Den e linea defensivo e internacional nan tabatin Claudio Cavalcante di La Fama riba linksback, un volante realmente, pero ya, cu tanto otronan el a hay’e ta hunga un rol ajeno foi su luga. Camilo Peña riba rechts, Enrique Apounza hunto cu Leonardo Colmenarez di Nacional den defensa central, Jesus Fria den gol.

Den algun momentonan nan a sa di controla bala y lansa den atake, pero, e atakenan ey no a duna fruta den e ultimo 16, portero di Aruba Eric Abdul a hay’e cu masha poco trabou den e prome tempo.

Walter Bennet y Leonardo Pulido den bataya pa medio campo – foto: Davyne Croes

Un di e yegadanan mas peligroso di Aruba ta ora cu nan minuut 34, Jeamir Howell mes a ataka riba links, penetra serca di e area penal di e internacional nan, crusa e bala den box pa Benjamin Maria cu tabata den careda na banda drechi, pero, Maria tabata falta ‘milimeters’ pa alcansa e bala y anota e gol pa habri marcacion.

Net un minuut despues alfin e seleccion di Aruba, cu tabata batiendo riba porta, a hay’e caminda di gol. Minuut 35, Joshua John for di distancia a pon’e un bala hopi skerpi den area penal di e team internacional, unda cu Diederick Luydens a alcansa e bala y a hasi un toke suave, baha e bala dilanti e pia di Fernando Lewis na banda drechi, unda e  ta deposita e bala den net. 

Fernando Lewis y Diederick Luydens celebrando e prome gol di Aruba – foto: Davyne Croes

Tabatin reclamo leve di e internacional nan pa off-side, pero parce cu Lewis por tabata casi rib’e mesun linea cu e defensor Enrique Apounza. Asistent di referee Jade Salamatin cu tabatin e mihor angulo y bista cu tur hende n’e momento ey, a laga su bandera abou. Aruba 1 – Internacional 0.

Net despues di e gol di Aruba, na minuut 37, t’e internacional nan a lansa den atake, unda e goalgetter di Division Honor, Jhon Silva, a hay’e den area penal cu bala, foi un pas’e largo, pero Silva ta bai abou, un poco liher, referee Ricky De Leça no a indica nada, no tabatin ningun bandera di asistent Eugene Farro tampoco, e internacional nan tabata pidi penalty, pero, en vano.

Halftime a bai aden cu Aruba den bentaha di 1-0, un bon prome mitar, un partido tecnicamente di bon nivel.

Den di dos tempo, e seleccion internacional a sali cu mas brio, un ekipo talentoso, no lubida esey. Nan a haya un chens grandi na minuut 48 unda cu Jhon Silva, despues di un intercepcion net p’afo di area penal di Aruba a “schaak” portero Eric Abdul cu a sali pa salba e situacion, Silva ta haya su mes cu e gol y un defensor so su dilanti, pero den su apuro y ‘instincto di goleador’, en bes di lanta cabes y wak cu dos otro compañero a alcansa drenta e zona di peliger, a lansa un tiro descumunal su mes cu a pasa halto riba e gol di Aruba.

Daniel Briceño y Jeamir Howell – foto: Davyne Croes

E entrada di Ronaldo Valderrama riba linksback di e internacional nan, a duna nan bon opcion pa tira dilanti riba e flank ey, ademas di esey e gran partido di Camilo Peña den defensa (rechtsback), un forsa sigur, hunto cu Leonardo Colmenarez y Enrique Apounza den defensa central, a duna nan mas trankilidad atras y enfoca riba nan wega di atake den e di dos half. 

E iniciativa ofensivo nobo di Bracho y e seleccion internacional a man’e forsa Aruba pa keda un poco p’atras pa evita algun sorpresa, pero sigur ta cu e partido a balansa hopi mes n’e punto ey. Nos a mira tambe cu Fernando de Sousa a cuminsa drenta mas den e partido aki, cu un bon desempeño.

E bishitantenan seguidamente a cuminsa haya mas yegadanan cu nan no tabatin den e prome half, algun peligroso tambe, y no tabata necesariamente cu Aruba diripiente a cuminsa hunga malo, al contrario, t’e internacional nan a bira mas creativo cu mas vigor, e partido a bira hopi mas interesante, mas bien un “toma y dame” n’e punto ey. 

Fernando de Sousa bou presion di Nickenson Paul, ambos hungado di Dakota – foto: Davyne Croes

Den e siguiente 20 y piko minuut e partido tabata habri pa cualkier di e dos ekiponan saca probecho, un cos si, Aruba toch a sigui defende bon den e zona di peliger, y nan tabatin mester di esey.

Ta man’e cos Aruba a wanta tur e bon momento ey di e internacional nan, pa despues, cu pasenshi cuminsa busca e ‘momento di calidad’ pa defini e wega. Ya, ora bo ta riba 1-0 bo tin un “cushion” pa busca e oportunidad nan ey, atrobe e palabra clave cu coach Bermudez mes a ulitisa, probecha di e “momento di calidad”.

Un di e momentonan ey por a yega na minuut 56 unda cu mas bien den un counter di hopi velocidad, Aruba cu iniciativa di Joshua John atrobe, ta penetra “deep” den teritorio di e internacional nan, hasi un pas’e pa Nickenson Paul cu nan su turno ta hasi un cruse efectivo foi banda drechi, pon’e den doelgebied pa Jayson Halman ful na banda robes, Halman cu cabes ta pasa pa Terence Groothussen cu tabata riba e punto penal, e tabatin chens pa pon’e bala den net, pero e ta cabesa un poco halto, casi gol.

Terence Groothussen di Aruba y Daniel Briceño di team Internacional – foto: Davyne Croes

E internacional nan cu bon posesion di bala ainda, cu penetracion y yegada, trei e bon wega di Daniel Briceño y compania, a hasta man’e tuma over y controla e medio campo. Aruba mas bien tabata keda organisa, “loer” pa lansa den atake, buscando e momento ideal.

Na minuut 58 Fernado de Sousa c’un gran oportunidad pa empata e wega p’e internacional nan, su tiro ta bai na banda di e gol defendi pa Eric Abdul, partido di banda pa banda.

Na minuut 60, ta Fernando de Sousa un biaha mas cu kizas e mihor oportunidad pa su ekipo, ora cu e ta scapa y penetra den area penal di Aruba, ta los un tiro duro na banda robes, bala ta dal den lata (cu kizas ainda te awe ta temblando), momento grandi cu toch no a resulta den empate ainda p’e internacional nan. 

Ni un minuut despues (’61), den un counter, Jayson Halman di Aruba ta haya su mes dilanti gol na banda drechi unda cu e portero di Estrella, Jesus Fria, ta sera su angulo, y un “puntapie” di Enrique Apounza ta preveni Aruba pa aumenta nan bentaha. 

Benjamin Maria – e velos number diez di Aruba – foto: Davyne Croes

Partido ainda bon balansa n’e momentonan ey, pero, tabatin un feeling cu e ritmo di wega, e chensnan crea p’e internacional nan pa busca e empate, pero sin haya resultado, y e desgaste fisico; “tardi of trempan” lo resulta den un bahada, p’aso Aruba tabata calculando, mirando ki buraco ta keda habri p’e rival den nan afan pa busca e empate.

E momento decisivo den e partido ta yega pa Aruba na minuut 72, ora cu den un counter potente, Benjamin Maria ta sprint, pasa bai laga tur hende, dun’e bala na Noah Harms, cu a caba di drenta wega net un minuut prome, unda e ta hasi un cruse foi banda robes, bala ta cai net p’e corpulento Terence Groothussen dilanti gol, e ta purba domina e bala cu pecho, bala ta bons largo y portero Jesus Fria cu bon intencion y reaccion pa salba su porteria, ta sali blokea e bala, e bala en cambio ta bons riba su pecho, y lastimamente p’e, e bala ta cai lora net riba pia di Joshua John cu tabata den area penal caba, e ta los un tiro den net, gol pa su ekipo. Aruba 2 – Internacional 0.

Joshua John tabata protagonista, akinan cu Fernando de Sousa – foto: Davyne Croes

Despues di e gol (mereci) di John, cu a traha duro p’e momento aki, e ekipo internacional no a “give up”, por cierto nan a lansa di biaha den atake (di berdad un partido di hopi calidad mes).

Ta parce si cu e condicion fisico y velocidad di e ekipo rubiano a cuminsa paga dividendo y ‘poco poco’ tabata imponiendo den e partido n’e haltura aki, laat den e wega.

E ekipo internacional a husa tur su cartuchonan, no tin duda. Aruba a hunga emfatisando nan propio forsanan, cualnan tabata; nan fisico, consistencia, velocidad, cambio di ritmo, y pasenshi, prestando un bon partido dilanti nan fanaticonan. 

Na minuut 81, den un sprint sensacional, Benjamin Maria, ta penetra den area penal cu mal intencion pa busca e gol pa cementa e victoria pa Aruba. Maria ta wordo tumba den area penal pa haya un penalty ‘cla cla’, y trei un bon partido di su parti, ta haya su gol ora e ta anota foi punto penal, apesar cu portero Fria ta tira bon purbando di tapa e tiro di Maria, e bala ta pasa net band’i su man, esaki ta duna Aruba e solido bentaha di 3-0 y mas bien pon’e un broche di oro pa cu e evento aki.

Benjamin Maria cu e gol di penalty p’e 3-0 – foto: Davyne Croes

Na minuut 88, casi Aruba ta bolbe anota, ora cu nan ta gana e bala atrobe, lansa den atake relampago despues di gana e bala, unda Joshua Gross di Dakota ta penetra den zona di peliger, hasi un p’ase pa Benjamin Maria na links, drentando den area penal, e ta saka un tiro potente, pero, e ta haya Jesus Fria cu tabata saliendo caba y ta tapa e tiro aki, salbando e ekipo internacional di bai abou mas ainda, gran hugada di e portero hoben.

Jesus Fria – portero di team Internacional den un stadion yen di fanatico – foto: Davyne Croes

Aruba al fin al cabo a gana e wega cu anotacion di 3-0, bon victoria di e seleccion nacional den un bon partido cu a deleita e miles di aficionadonan, un prestacion decoroso tambe di e ekipo internacional.

 

Resumiendo

E resultado aki no a bini facil p’e seleccion, no laga e anotacion final ey gañabo, Aruba mester a bataya duro p’e victoria aki contra un ekipo di experiencia cu hungadornan di hopi tecnica mes. Aruba tabata solido, fiel na nan plan di wega, pa hunga segun nan “strength”, hopi sigur di nan mes, bon prepara. N’un manera di bisa; Aruba tabata “clinico” y no solamente a bai c’e victoria, pero hungando bon na mes’un tempo, man’e a spera, locual coach Bermudez tabata kier a logra den e partido aki.

Nos a wak hopi cos bon, e ekipo di Aruba aki ta diferente, esaki t’un projecto nobo y ya ta pinta positivo, tin oportunidad nan ainda tambe, tin algun cos pa drecha, esey ta normal, pero e positivonan ta hopi.

Nickenson Paul, Benjamin Maria y Jeamir Howell celebrando e 3-0   foto: Davyne Croes

Nos a wak cu den e prome tempo e dupla den medio campo di Walter Bennet y Jeamir Howell a traha hopi bon te na un cierto punto ora nan a perde e control di medio campo den e di dos mitar, pero en general nan a hasi nan trabou, nan mes ta bai ta e anker den medio campo p’a Aruba den futuro, feit ta cu nan ta promete hopi, y nan ta duna tur, Howell mes mester a bandona cancha riba stretcher despues di a core y bataya hopi.  

Fernando Lewis tabata un “rock” den defensa y tambe tirando dilanti, oportunamente el a anota e prome gol, hunto cu Darryl Baly nan a defende hopi bon, nan ta duna hopi siguransa den e ultimo linea. Nickenson Paul a demonstra hopi prospecto den un rol diferente cu e no ta custumbra di hunga, pero su velocidad y maneho di bala ta hopi bon. Benjamin Maria ta un “power” cu su condicion fisico y velocidad, e tabata impactante vooral den e ultimo parti di wega. Diederick Luydens a hunga un partido solido riba linksback, e ta core y gana hopi bala. 

Tin hopi mas positivonan pa menciona, e tabata un wega di ekipo, “team-work” a prevalece. Ta hopi tin pa scirbi, mi ta sigur cu ta bai tin mas oportunidad p’esey den e siguiente etapa di e projecto nobo aki pa cu e seleccion nacional di Aruba. 

Nos “King of the Match” den e partido aki ta Joshua John, nos a lag’e mencion di dje pa ultimo. E hungador atakante aki a demonstra di tin “will”, e mentalidad ganado, e ta core hopi, bataya bala, drenta den casi tur momentonan di wega, y e por anota tambe, por cierto.

Joshua John – e ‘King of the Match’ – a laga tur cos riba cancha – foto: Davyne Croes

Den e partido aki el a laga tur cos riba cancha, el a facilita e prome gol, el a anota e di dos gol di e wega, e tabatin hopi iniciativa, cuminsando atakenan, defendiendo ora tin mester pa recupera bala, e mester a bandona e partido riba “camilla” tambe, mescos cu Howell. El a soda pa su pais, pabien Joshua John.

Pabien Aruba, esaki ta parce cu ta un comienso nobo, un aire fresco ta suplando riba nos futbol. Tin hopi trabou pendiente, t’awor e wiel nan a cuminsa drei, pero e prospecto ta bon.

Niun hende no a promote nada, solamente ta spera esfuerso, bon “planning”, berguensa deportivo, y honestidad, esey mi ta sinti, esey ta bon! Ban sigui traha hunto y positivo, djeynan ta hopi cos bon por pasa, e bon exito no ta di anochi pa mainta, e ta gradual y e ta basa riba consistencia. 

 

Nos resumen y antesala di Division Honor lo continua e siman cu ta bin, te otro biaha ⚽️

 

Click to comment

Leave a Reply

Your email address will not be published.

More in AVB