Connect with us

Division Honor

Resumen y antesala, drentando den siman 15 di Division Honor

Comentario:

Despues di un siman excitante cu e prome partido di nos seleccion nacional riba nos propio suelo, despues di hopi tempo, ata nos aki, un bes mas resumiendo kiko a pasa y kiko ta dilanti nos den Division Honor, cu por cierto ta drentando den e phase critico cu djies cuater fecha mas pa bai prome cu playoffs cuminsa, pero, ken ta bayendo p’e finalnan y ken lo keda afo? Esey ta e icognita. 

Tabatin tambe situacion nan foi cancha cu awor ta afectando e tabla di posicion, net den e momento criticonan aki, varios protest cu a wordo entrega y cu ya a wordo dicidi, afectando mas tanto e ekipo di Nacional, cu tabata den pleno bataya p’e cuarto posicion y nan pas’e pa playoff.

Despues di un deduccion di seis punta valioso (nan por a gana cuater), awor nan ta haya nan mes ta subi un sero mas halto mientras cu tempo ta cabando, pero, nos no por conta nan afo ainda si, e chensnan t’ey toch despues cu nan a reforsa nan mes masha hopi cu e regreso di Leo Pulido y awor parc’e tambe yegada di Ronaldo Valderrama y otronan.

E dos prome puestonan riba tabla ta mustra fiho pa Dakota y RCA, ta djies di keda di wak ken ta keda 1 y 2, pero mi pregunta ta con por compensa e ganado di e top di liga despues di 18 fechanan den campeonato regular? Kiko ta e plan akinan? P’aso con cu bai cu bin ta un logro remarkabel, mester mas claridad den e situacion aki.

Locual a pasa cu Bubali den fecha 14, hungando ful un partido cu 10 homber (sin banki) contra Dakota ta inaceptabel, algo asina no mag di pasa den futbol organisa, ni den Division Honor pero tampoco den ningun otro division. Casi e partido por a wordo cancela, e diez hungadornan ey merece un medaya, pero e bestuur di e club no.

Anyhow, Bubali ta den peliger pa bai abou pa Division Uno, lastima, un club historico di Noord cu bon hendanan haciendo nan best, vooral trahando cu e muchanan jong; Coach Kevin Lake, Joanne y Josie Maduro, entre otro ta bin na mente, “quo vadis’ Bubali?

 

Dakota vs Bubali

Man’e a menciona, den e partido aki, Bubali a yega stadion cu solamente diez hungado pa hunga contra Dakota, e ekipo top riba tabla, y apesar cu e orguyonan di Noord ta den bom di tabla, solamente tres punta aleha foi United, nan a man’e acepta nan destino caba, algo inaceptabel den sport, cu ta existi exactamente p’esey, pa sinja nos competi y esey kiermeen bataya te final.

John Zara di Bubali y Resef Gross di Dakota,  author di e prome gol di e wega – foto: Nathan Richards

Dakota ta hunga pa mantene nan puesto riba tabla y pa ser considera e mihor ekipo den campeonato. 

E partido tabata di un banda so, man’e a spera, y eigenlijk Dakota a hunga mas bien cu hopi pasenshi, djies hungando nan wega, mientras cu Bubali a pon’e casi tur hende den defensa pa evita goleada. 

E prome gol a cai na minuut 10 caba pa medio di Resef Gross, e linksback di e amarillonan.

Dakota 1 – Bubali 0.

Despues Dakota a mas bien circula bala bon, manteniendo posesion di bala, controla e tempo y e wega. Asina mes halftime a bai aden sin mas gol den e prome mitar.

E mesun cos a sigui den di dos tempo, Dakota cu hopi pasenshi pa purba penetra e “bus” cu Bubali a pon’e patras, ya, hungando cu diez homber so, ta kiko mas por hasi. 

Sebastian Montoya di Dakota, co-lider di goleadornan di Division Honor cu 18 gol – foto: Nathan Richards

E siguiente gol a yega te na minuut 68 unda cu e golero Dakotero, Sebastian Montoya a bolbe haya e caminda di gol pa hasi e wega 2-0, su di 17 gol di campeonato pa keda un gol so trei Jhon Silva di RCA, p’e liderato p’e titulo maximo goalgetter di Aruba, un “race” interesante.

Na minuut 78 ta Sebastian Montoya mes ta anota atrobe pa hasi e wega 3-0 na fabor di Dakota. Cu e gol aki tambe, Montoya ta empata p’e top di tabla di goleador cu 18 gol te cu awor den e campeonato, un averahe di mas cu un gol pa wega, y asina mes Montoya no a hunga tur wega.

Esey tabat’e resultado final tambe, Dakota ta keda lider di campeonato cu 36 punta. ‘King of the Match’ ta Sebastian Montoya pa su dobbel.

Den siman 15, Dakota lo midi forsa cu Riverplate riba Diasabra anochi y Bubali ta bai contra Caravel Diadomingo anochi. 

 

United vs Caravel

Despues cu United a gana Bubali e siman previo pa los foi e ultimo lugar riba tabla, awor nan ta hunga contra Caravel cu a cai foi e top cuater dem forma dramatico y diripiente. Un partido inspira di ambos banda; Caravel dicidi di bons bek y bringa pa purba drenta playoff y United tratando di hunga mihor bala preprando pa playoff di promocion/degradacion y salba nan puesto den Division Honor, cu lo ta den nan mesun man.

Ezra Bosnie y Miguel Vielma di Caravel despues di e prome gol di wega – foto: Nathan Richards

Partido balansa, Caravel cu un “edge” chikito cu mas yegada trempan. E ekipo di Angochi mes ta anota e prome gol di e wega, na minuut 18 pa medio di Ezra Bosnie, su di shete gol di e campeonato. United 0 – Caravel 1.

Miguel Vielma ta anota net prome cu halftime abai aden p’e Piratanan atrobe, pa aumenta nan bentaha na 2-0.

Den di dos tempo e partido a sera mas, United a lanta cabes, e partido a bira hopi bon mes. Pero asina mes ta Caravel ta bolbe anota na minuut 57, gol di Gabriel Alvarez pa hasi e wega 3-0, y tur cos tabata parce solido pa Caravel bai cu tres puntanan si problema.

United a keda positivo, nan a haya un di dos aire y acuminsa ataka y pon’e presion riba Caravel, cu a haya nan mes ta defende nan victoria parcial, y mi kiermeen “defende” di berdad, pas’o United a keda hunga man’e cos nan a igonora e score n’e momentonan ey.

United y Caravel a brinda un bon partido – Foto: Nathan Richards

E recompensa pa nan esfuerso grandi mester a warda si, te cu n’e momentonan final di e partido, pero cu el a yega el a yega! Gol na minuut 83 di Owen Almazo pa corta bentaha, United 1 – Caravel 3.

E presion grandi di United a keda keto bai y na minuut 90+3 ta Cederick Lopez ta anota pa corta e bentaha mas ainda y United den un bon “momentum”. United 2 – Caravel 3.

Caravel ta bek den bataya pa playoff – foto: Nathan Richards

United a bataya te final, y si no tabata p’e holoshi, nan por a hasta empata e partido. Caravel a libra cu victoria minimo aki di 3-2 y awor, despues di e debacle di Nacional perdiendo punta despues di e “protest” nan, e ekipo di Angochi ta cu bida atrobe, y ta den careda pa playoff kedando cu 21 punta, dos so foi e posicion cuater riba tabla, increibel. “King of the Match” ta Ezra Bosnie di Caravel.

Den siman 15, United lo hunga contra Britannia Diabierna anochi y Caravel contra Bubali Diadomingo anochi.

 

RCA vs Nacional

E partido aki a wordo hunga pero protest a wordo entrega di biaha pa RCA  despues di wega unda cu nan a gan’e tambe, dus, e resultado riba cancha no a conta toch. Oficialmente RCA a wordo declara ganado di e partido cu e anotacion di 2-0 (esey ta e anotacion oficial ora gana un protest). Realmente, riba cancha, e partido aki a termina den un empate di 1-1 despues di un bon partido cu tabatin pasta di playoff, no tin sentido pa nos reporta e partido aki ya cu oficialmente e no a sosode y tur record di e wega a wordo kita.

RCA y Nacional a empata riba cancha pero e protest a wordo gana p’e tricolornan – foto: Nathan Richards

T’asina cu Nacional, segun e protesta entrega, a hunga cu cuater hungado stranhero (menos cu cinco anja trahando n’Aruba), na mes’un dado momento riba cancha, esey no mag. Locual si mag ta; por tin cuanto hungado stranhero cu bo kier den bo ekipo, pero, na un dado momento ta tres so por ta ‘riba cancha n’e mes momento’. Esey aparentemente no tabata e caso den e partidonan aki. Nos no a haya informacion si Nacional lo pidi pa bai ‘hoger beroep’ debi cu na nan opinion ta un fout “administratief” e tabata. 

Resultato final y oficial te cu awor despues cu no tin peticion pa ‘hoger beroep’, RCA 2 – Nacional 0.

Nota: Nacional a perde un otro protest entrega den nan partido previo, di siman 13, unda cu riba cancha nan a gana di Riverplate cu anotacion di 5-0 pero despues di a perde e protest ey tambe, nan 3 puntanan a wordo cancela y pa regla a perde e partido ey tambe cu score di 0-2.

Den total, Nacional a perde 6 punta (a wordo otorga dos wega perdi pa regla) den e ultimo dos fechanan debi na protest, en bes di e cuater punta cu nan a gana riba cancha, y awor a keda cu 17 punta so riba tabla den di shete lugar, pero, semper seis punta so for di cuater lugar. RCA ta keda den di dos lugar cu 34 punta, 2 so trei Dakota.

RCA ta enfrenta Estrella Diadomingo atardi y Nacional ta bai contra La Fama riba Diasabra atardi.

 

Riverplate vs Estrella – “partido di siman”

Esaki tabata “suppose” di ta un partido clave pa Riverplate den nan intento pa yega top cuater, nan ta algun punta so separa foi esey, pero, e bataya ta candente entre nan cu La Fama, Caravel y Nacional. Estrella tambe tin mester di punta pa purba yega puesto shete riba tabla y salba di hunga playoff promocion/degradacion na final di campeonato, pero, mas bien ta mas importante pa Estrella haya na wega bek, cuminsa hunga e bon futbol cu nan por hunga.

Di cuminsamento di e wega aki caba a nota cu algo tabata diferente den Estrella. Ta hopi remarkabel cu nos tin basta tempo ta puntra pa Pancho Croes, ki dia e ta bolbe, si e lo bolbe mes den futbol at all. Pakiko, pa su leadership, ta algo cu no por splika tin biaha. Tur otro hungado ta mescos, hasta Estrella tabata falta di e goleador Trevor Faro den e wega aki, pero algo tabata diferente, e presencia di Pancho Croes. 

Tur ekipo tin un coach, e persona ey por duna cuanto instruccion cu e kier prome cu wega cuminsa, pero e ta keda na banda di cancha. Mester di un persona riba cancha pa sigui instrui y zorg p’e ekipo hunga di acuerdo cu e plan di wega, hopi importante!

Pancho Croes t’a bek riba cancha pa Estrella – Foto: Nathan Richards

Por ehempel den e ekipo di Ajax di Amsterdam di inicio di anjanan 70, ekipo cu a gana tres Champions League sigui, e director technico Rinus Michels a determina cu e mester di un ‘coach riba cancha’, mas cerca di e hungadornan, mas den e accion di wega. Michels a determina cu Johan Cruijff tabata e persona ey, esun cu mester a sigura cu e plan di wega ta andando corectamente riba cancha, su man drechi. Den e Barcelona di inicio di anjanan 90, e ‘dream team’, unda cu Cruijff mes tabata e DT, el a designa Pep Guardiola pa ta e persona cu tabata su man drechi riba cancha, su asistant coach na un manera di bisa.

Bryaden Koolman di Estrella y Bernard Smolders di Riverplate – foto: Nathan Richards

Pancho Croes ta bek den e alineacion di Estrella y su presencia tabata clave den e wega aki, no solamente clave, pero mas bien impactante, nos por a tende su voz riba cancha, instruyendo, corigiendo, alentando, kiko mas bo kier?

Estrella tabata dominando foi trempan. Riverplate, un bon ekipo, a purba cu hopi esfuerzo, esey nunca no ta falta cu e ekipo ey, pero, riba e anochi aki, nan a topa cu un ekipo hopi inspira.

Un partido competitivo, duro, pero deportivo, bon arbitra pa Eugene Farro y su ekipo. Prome gol a drenta na minuut 9 caba den persona di Norwin Werleman, cu kizas no tabata pensa mes cu e tabata cuminsando un anochi inolvidabel pa su ekipo y su mes persona. Riverplate 0 – Estrella 1.

Portero Jesus Fria di Estrella interceptanto un tiro di Riverplate – foto: Nathan Richards

Na minuut 35 ta Norwin Werleman mes ta bolbe anota pa su dobbel pa hasi e wega 2-0 pa Estrella.

Estrella ta sigui consistente y hayando hopi yegadanan den di dos tempo. Na minuut 69 ta toka turno un biaha mas na Norwin Werleman pa anota y hasi e wega 3-0, y su hattrick.

Pa sera su anochi increibel aki, Norwin Werleman ta anota su di cuater gol pa su “poker”den e wega pa duna Estrella e bentaha parcial di 4-0.

Norwin Werleman di Estrella y Whilmerd Croes di Riverplate – foto: Nathan Richards

Al fin al cabo Riverplate a hunga pa salba cara pa berguensa deportivo, nan a sigui lucha te final, esaki djies no tabata nan anochi, pero, nan a logra e gol di honor na minuut 90, ta Keano Leonora ta anota p’e unico gol di e oncena di playa p’abou. Riverplate 1 – Estrella 4.

Esey mes tabata e resultado final pa Estrella bai cu tur tres punta pa yega un suma di 11 punta pa keda den di ocho lugar keto bai, awor 6 punta foi Nacional den di shete lugar. Riverplate ta keda den di cinco lugar cu 22 punta, 1 punta su foi e di cuarto lugar y playoff.

Ta imposibel pa no duna mencion di merito na Pancho Croes, pa su presencia y leadership den e partido aki. Nos “King of the Match” ta Norwin Werleman pa su cuater golnan den e partido yudando su ekipo den e victoria contundente aki.

Riverplate ta topa cu Dakota riba Diasabra anochi y Estrella cu RCA riba Diadomingo atardi.

 

La Fama vs Britannia

Un partido bastante balansa riba papel, La Fama den un bon racha victorioso, un di e mihor ekiponan den di dos rond di campeonato. Britannia ta “on the bubble” pa keda cu e di tres lugar despues di tabata hopi comfortabel riba e tabla y top tres, pero, recientemente a flakea un poco.

Kiermeen esaki ta un bataya p’e di tres lugar realmente. La Fama sin na capitan y lider di e speransa berde di Savaneta, Sylvester Schwengle y Britannia sin Luis Coco Estrada

Un bon partido competitivo y duro, bon conduccion di Ricky de Leca y crew. La Fama ta anota prome na minuut 6 caba, unda cu Davidson Kaarsbaan ta nota su di quinto gol di campeonato. La Fama 1 – Britannia 0.

Claud

Claudio Cavalcante di La Fama y Ethan Tromp, Jeffery Rolston di Britannia

No mucho despues, na minuut 15, ta Pieter Susebeek ta anota, un bunita gol di sombre, foi un p’ase skerpi di Jorge Aponza, foi leuw den nan mesun half. La Fama 1 – Britannia 1.

E partido a sigui hopi balansa p’e resto di tempo, unda e ekiponan a haya basta yegada sin por a concreta e gol pa bai ariba y hasta cu e victoria. 

Ethan Tromp y Raul Morales – foto: Nathan Richards

Score final ta La Fama 1 – Britannia 1. Un punta pa ambos ekipo unda Britannia ta retene su di tercer posicion cu 25 punta y La Fama ta keda net tras di nan cu 23 punta den di cuarto posicion. “King of the Match” ta comparti entre Jeffrey Rolston di Britannia, e rechtsback puma cu a core masha hopi mes riba e flank drechi, ariba bou, atakando y defendiendo, y Claudio Cavalcante di La Fama, cu tabata den casi tur hugada di su ekipo, un bon desempeno di ambos.

Jeffrey Rolston di Britannia cu bon partido – foto: Nathan Richards

Ironicamente, t’e hungado Rolston tabata e centro di atention den e protest cu La Fama a entrega despues di e partido, indicando cu e hungado menciona ya tabata suppose di tin tres carchi geel acumula, y no tabatin mag di a hunga e partido aki pa regla di acumulacion di carchi.

A resulta cu en berdad e hungado tabatin tres carchi acumula, pero oficialmente e no tabata registra adecuadamente. Parc’e cu den un partido previo di Britannia contra RCA, e hungador a haya un carchi geel foi e arbitro den e partido ey (consultando cu video), pero, riba e wedstrijd formulier di e wega ey e no a wordo indica corectamente, kiemeen e carchi no a bai den record di Rolston. Feit ta cu La Fama no por a gana e protest ya cu e “record” ta indica diferente na nan claim (debi na e fout menciona).

Den siman 15, La Fama lo midi forsa cu Nacional Diasabra atardi y Britannia lo bai contra United Diabierna anochi.

 

Te otro siman! ⚽️

 

Click to comment

Leave a Reply

Your email address will not be published.

More in Division Honor