Connect with us

Division Honor

Resumen y antesala di Division Honor – Scorenan abulta pero e tabla no a cambia mucho

Sebastian Montoya y su ekipo Dakota ta keda como lider di Division Honor - foto di archivo

Siman 15 den Division di Honor tabatin den su mayoria resultadonan abulta, partidonan di un banda so, tabatin man’e un ‘aire di realidad’ pa algun ekiponan. E partido entre Nacional y La Fama tabata sera y hopi competitivo, te final. E unico otro partido competitivo, y tambe e mihor di siman, sorpresivamente, tabata entre Caravel y Bubali, un gol agonico a dicidi e wega ey.

E tabla no a cambia hopi den e siman aki, mas bien e ekiponan a consolida nan posicion nan.

Dakota t’a keto bai lider cu RCA net trei nan den di dos lugar, e dos puestonan ey ta duidelijk. E race pa e di tercer y cuarto puesto si no ta fijo ainda; Britannia, La Fama, Riverplate y Caravel ta hopi serca di otro. Estrella y United ta parc’e ta bai hunga playoff di degradacion/promocion, except si Bubali lanta cabes y sorprende.

Bubali a demostra cu por utilisa hungadornan hoben, a keda demostra cu nan por duna un bon exhibicion di futbol, of miho dicho esfuerso, man’e tabata e caso contra Caravel, unda cu Bubali a yega stadion c’un ekipo completo, hoben nan motiva, y por poco a bai cas cu punta, elogio na Bubali.

 

Comentario

Pakiko Futbol Aruba t’ey?

Nos meta pa cu Futbol Aruba semper tabata pa yuda nos futbol mehora, primordialmente door di duna atencion y motiva e hungadornan, t’a nan t’e protagonistanan di e show aki cu yama futbol.

Nos a  cuminsa enfoca riba e futbolistanan door di saca nan potret, menciona nan nomber, hou bij nan logro personal, y publica nan storia riba nos website. Un otro meta original tabata pa pon’e e resultadonan y tambe mantene e tabla di posicion y lista di goleadornan, incluso e schedulenan di e partidonan, pero ‘consistentemente’, algo cu mas bien no tabata existi den e tempo ey y sigur no n’un manera asina detaya, y mi ta papiando di tur division nan.

Despues nos a cuminsa duna relato uitgebreid di e weganan mes, cu statistiek y analysis,  tambe cu opinion y comentario. Pakiko? Pa entretene, pero alabes tambe pa mehora nos futbol, pa papia cu otro di kiko a bai bon y kiko no a bai bon, cu ‘critica constructivo’ semper, cu sugerencia.

Si tin algo cu nos por mehora na Aruba ta cuminsa papia stret y duidelijk co otro, sin tum’a cos personal y rabia cu otro, semper si n’un manera apropia, constructivo. Asina nos por mehora, p’aso no ta tur cos ta “tremendo” tur ora, e realidad ta cu no ta tur ora cos ta bai bon, esey ta bida, nos no ta perfecto, pero mester papia cla y papia berdad.

Un ehempel; si bo bisa un hoben cu e ta hunga futbol “tremendo” tur biaha, siendo cu e no ta, e no lo bai mehora nunca, bo mester bis’e kiko ta bon y tambe kiko no ta “mucho bon” (sin husa e termino “malo” cual ta un negativo), si no, e lo keda den un bubble isola pa realidad. Na nos isla nos ta husa e palabra “tremendo” demasiado, tin mucho uso di “hyperbool”, nos mester keda al tanto cu realidad, keda papia e berdad semper, esey ta importante, esey ta honesto.

Mesun cos ora cu reglanan wordo kibra, si nos laga esey bai sin menciona, niun hende nunca lo sa e berdad, nos mester papia berdad, esey ta esensial pa nos mehora como un sociedad. Awendia “papia berdad ta causa problema”, esey no mag, berdad nunca mester ta un problema, semper e berdad mester prevalece p’e bon moral di un pueblo.

 

SV Britannia vs SC United

Esaki ta un partido unda Britannia tabatin un bon oportunidad pa consolida nan mes, mas bien mantene nan mes den e di tres lugar riba tabla, apesar cu United ta un ekipo cu a mehora desde comienso di e di dos half di campeonato.

E pumanan di Piedra Plat por a hunga nan wega di posesion y bon distribucion di bala, nan a hasi esey sin problema for di comienso di e wega y pa henter e partido. Nan no mester a worry mucho pa defende ya cu United a hunga un wega di warda pa sali den ‘counter- attack’ mas bien si y ora nan haya espacio. Hasta e defensor lateralnan di Britannia por a explora y sali den atake na nan kier, man’e William Pardo y tambe Marcus Portier. 

Marcus Portier – homber clave den defensa di Britannia – foto di archivo

E medio campo di Britannia a wordo ‘comanda’ pa Ethan Tromp, cu ‘poco poco pero sigur’ a bin ta tumando e rol ey den su man, man’e a spera, esey ta un ‘plus punt’ grandi p’e pumanan. Tromp ta combina hopi bon cu Luis Estrada y Marcel Kock, tur cu diferente rol pero cu ta acopla bon cu otro, tin un bon flow den e medio campo di Britannia.

E prome gol a cai na minuut 9 caba, unda Pieter Susebeek, cu ta probechando di e bon flow menciona den e ultimo partidonan (6 gol den e ultimo 5 weganan), a pon’e bala den net atrobe. Britannia 1 – United 0.

Sorpresivamente United a lansa den un atake bon pa medio di Denrick Lopez, cu semper t’un menasa ora e haya e bala, sea den un sprint of net p’afor di e area penal contrario. Den un di e poco atakenan United a haya un penalty, Lopez mes ta anota p’e 1-1.

Marcel Kock di Britannia – foto di archivo

William Pardo a anota e di dos gol di Britannia na minuut 21 p’e 2-1. Sigui p’e di dos gol di e anochi di Pieter Susebeek, Britannia 3 – United 1.

Prome cu halftime a bai aden ta David Castro ta anota na minuut 43, pa un contundente 4-1.

Britannia a keda consistente den nan wega, nan no a baha man hasta c’un bentaha grandi, y apesar cu nan a pasa basta rato sin anota atrobe, nan tabata controla e wega.

Asina mes ta Denrick Lopez, cu tabata e unico ‘dolor di cabes’ di Britannia den e wega aki, ta anota un otro gol na minuut 60 pa corta bentaha na 2-4, e di dos gol, e dobbel p’a Lopez riba un anochi cu e no tabata ni 100% fit debi na un kebrante di salud.

Alfin e bon wega di Britannia ta bolbe paga dividendo na minuut 81 unda Daniel Linscheer cu a drenta no mucho prome, t’anota su gol p’e bentaha di 5-2 pa Britannia.

E ultimo gol di e partido a wordo anota pa Juel Balentien na minuut 90+1 pa hasi e wega 6-2. Bon victoria di Britannia pa consolida nan mes den di tres luga riba tabla, hopi serca awor di sigura un puesto den playoff.

“King of the Match” ta comparti entre William Pardo pa su trabou incansabel y Pieter Susebeek pa su dobbel, ambos di Britannia.

Den siman 16, Britannia ta hunga contra Bubali riba Diadomingo atardi y United ta bai contra Nacional Diasabra anochi.

 

Deportivo Nacional vs SV La Fama

E partido aki tabata asina importante pa ambos ekipo. Nacional pa sigui den e lucha pa yega den top cuater despues di nan deduccion di 6 punta y La Fama pa consolida nan mes den top cuater y hasta challenge Britannia p’e puesto tres riba tabla.

E partido entre dos ekipo dedica na recupera y retene bala, bon para riba cancha, bon disciplina, y economico den atake, wega di pasenshi, pero, wega duro sin duda.

Raul Morales di La Fama y Daniel Linscheer di Britannia – foto di archivo

Nacional c’un tiki mas iniciativa ofensivo a bai ariba na minuut 25 pa medio di Fladimy François. Nacional 1 – La Fama 0.

La Fama no ta cai den paniek y ta sigui hunga nan wega di semper. Davidson Kaarsbaan ta anota e gol di empate na minuut 31 caba. Nacional 1 – La Fama 1.

E capitan di e speransa berde di Savaneta, Sylvester Schwengle, ta anota na minuut 41 pa aumenta e bentaha di su ekipo. Nacional 1 – La Fama 2.

Nacional a man’e perde pasenshi n’e momento ey, ta un desbentaha di un gol so e tabata toch? Pa hasi cos mas dificil, nan hungado importante, e pilar den defensa central, Leonardo Colmenarez ta haya dos carchi geel sigui, pa protesta, y ta wordo expulsa na minuut 45, net ora ta tempo pa bai kleedkamer.

La Fama – e Savaneteronan ta den top cuater – foto di archivo

La Fama c’un bentaha numerico a probecha, y na minuut 60 ta Sylvester Schwengle a anota atrobe, su dobbel, pa aumenta bentaha di La Fama na 3-1.

Na minuut 65 e wega ta bolbe coi otro rumbo; Jose Robles de Medina di La Fama ta haya su di dos carchi geel y tambe ta keda expulsa.

Nacional ta probecha di biaha y ta anota e gol di corta bentaha pa medio di Kenroy Ranger, e  veterano puntero cu a caba di drenta wega den di dos half. Nacional 2 – La Fama 3.

Wega interesante y fisico, e ekiponan a tira ‘todo por todo’ y Nacional den nan afan pa anota e gol di empate mester a lansa den atake, La Fama a warda pa nan chens, mientras cu nan tabata defendiendo bon trei un spectacular desempeño di nan portero Gilbert Bautista cu no a laga nada pasa bai na su banda.

Na minuut 90+4 La Fama ta hasi e stokada final, un gol di Kendrick Kock cu a drenta casi na final di wega. Nacional 2 – La Fama 4.

Resultado final tambe, La Fama a keda cu 26 den di cuater puesto, dos so aleha foi di tres lugar. Nacional ta keda cu 17 punta den si shete lugar, 9 punta aleha foi playoff cu 3 wega so mas pa hunga, pero por hasta gana nan puntanan bek den hoger beroep den e caso di e protest nan, keda pendiente.

“King of the Match” ta comparti entre Sylvester Schwengle y portero Gilbert Bautista di La Fama.

Den siman 16, Nacional ta hunga conta United Diasabra anochi y La Fama contra Estrella Diabierna anochi.

 

ASV Riverplate vs SV Dakota

River ta den pleno bataya p’e puesto cuater riba tabla y pas’e pa playoff, nan tabata solamente un punta foi cuarto puesto. Dakota ta den top di tabla den un careda di dos cabai cu RCA, tur dos ta serca di clinch un spot pa playoff, hopi serca.

Daniel Briceño di Dakota – medio campista importante – foto di archivo

Un partido unda cu Dakota a domina di principio caba y no a tarda mucho pa bai ariba, Fernando de Sousa a anota p’e 1-0 p’e amarillonan.

Na minuut 18 ta Fernando de Sousa ta anota atrobe, su gol number 10 di campeonato. Riverplate 0 – Dakota 2.

Riverplate a sigui purba, cu poco, pero cu poco nan a logra anota un gol toch, na minuut 38, gol di Julnes Plet pa corta bentaha, 1-2.

Dakota a keda sorprendi, tur e dominio, asina mes un bentaha minimo pa Dakota na halftime.

Dakota a sigui domina y a hasta bira mas clinico, ya cu nan punteronan ta anotando di tur angulo. Ricky Hodge cu su gol na minuut 55, Riverplate 1 – Dakota 3.

E golnan ta sigui, e biaha aki di Daniel Briceño, e medio campista Dakotero cu a man’e haya su wega desde comienso di e di dos parti di campeonato , awor ta un volante hopi efectivo, 1-4.

Ricky Hodge ta anota atrobe na minuut 77, su di 14 gol pa posee e puesto tres riba tabla di goleadornan. 1-5.

Fernando de Sousa – un di e goleadornan di Dakota – foto di archivo

Sebastian Montoya cu a drenta den di dos tempo ta anota gol atrobe, na minuut 82, su di 19 gol, n’e momento ey ainda lider di Division Honor. Riverplate 1 – Dakota 6.

Dakota a gana convincentemente cu score di 6-1. Lider absoluto cu 39 punta. Riverplate ta keda cu 22 punta den di seis luga, djies 4 punta foi cuarto lugar.

“King of the Match” ta comparti entre Fernando de Sousa y Ricky Hodge, ambos cu “dobbel” pero tambe wega di hopi esfuerso.

Den siman 16, Riverplate ta enfrenta RCAden e ‘derbi di Playa’ Diasabra atardi y Dakota contra Caravel Diadomingo anochi.

 

SV Estrella vs SV RCA

Estrella a lanta cabes cu e regreso di Pancho Croes den siman 14, y e cuater golnan di Norwin Werleman y tur speransa a bolbe den seno di e club di Papilon, y ainda falta Trevor faro. RCA ta solido den di dos lugar, pero, manteniendo paso cu Dakota.

E siman aki Pancho no tabata disponibel atrobe, y ya Estrella t’e mesun ekipo cu ta den bai playoff, pero playoff di promocion/degradacion.

Partido a cuminsa y ta Estrella a sorprende trempan, gol di Bryaden Koolman. Estrella 1 – RCA 0. Ta man’e cos cu e magia di siman 14 t’ey ainda. RCA no a tuma e sorpresa aki mucho bon, nan a bai all out den atake, un poco hyper, tratando mucho duro, apesar di nan dominio den posesion. Nan punteria a faya hopi den e parti trempan di wega.

Roan Petronia – hungado clave den defensa di RCA – foto di archivo

Na minuut 22 alfin RCA a anota, mereci, un alivio, gol di nan goleador Jhon Silva, p’e 1-1.

Silva mes ta anota na minuut 28 atrobe, cuminsando un avalancha di atakenan cu gol di RCA, t’a man’e monster a lanta foi sonjo, Estrella 1 – RCA 2.

Net prome cu halftime Jean Pierre Fingal ta anota pa RCA p’e 3-1.

Mas golnan ta sigui den di dos mitar. E hoben puntero Evander Nedd ta drenta despues di halftime y ta hasi impacto di biaha, gol na minuut 50 p’e 4-1 p’e tricolornan di Solito, sigui p’e gol di Mark Jacobs net un minuut despues (5-1). Albert “killer” Francis ta sigui na minuut 53 (6-1), y Cristian Sinisterra na minuut 56 (7-1).

Albert Francis un biaha mas na minuut 58 pa su dobbel di atardi, Francis su di 11 gol di campanja p’awor empata p’e posicion 5 riba tabla di e mihor goleadornan. Estrella 1 – RCA 8

Albert “killer” Francis – puntero di RCA – foto di archivo

Jhon Silva ta anota atrobe na minuut 60, pa su hattrick y e 9-1. Evander Nedd ta bolbe haya net na minuut 74 p’e 10-1. “Last but not least” Jhon Silva ta bolbe anota na minuut 87 pa su di cuater gol di e partido, un otro “poker” pa Silva cu awor ta lider absoluto di goleadornan di Division Honor cu 22 gol (den 15 wega). 

Resultado final di 11-1 pa RCA, un demostracion di poder y dominio.  RCA ta keto bai den di dos lugar cu 37 punta, invicto ainda den a campeonato aki. Estrella ainda ta den posicion pa hunga playoff di degradacio/promocion na final di e campeonato.

“King of the Match” ta Jhon Silva pa otro “poker” mas, e goleador absoluto di Division Honor.

Jhon Silva – goleador di RCA y top di Division Honor cu 22 gol – foto di archivo

Den siman 16, Estrella lo hunga contra La Fama Diabierna anochi y RCA lo bai contra Riverplate Diasabra atardi.

SV Caravel vs Bubali SC

Den siman 14 Bubali no por a forma un ekipo completo, mester a hunga cu 10 hungador pa ful un wega. E siman aki nan a trece hopi hungadonan hoben tambe pa sigura un ful ekipo y suplente tambe, e reaccion aki di Bubali ta corecto y a duna fruta. Caravel ta den bataya pa top cuater, algo cu tabata parc’e a scapa nan un luna pasa, pero, ata nan ak cu chens. 

Partido balansa, trempan tabata mustra cu Caravel lo a bai domina, pero, segun e partido a sigui evoluciona, Bubali cu su ekipo a cuminsa haya briyo, hopi briyo, y hunga “tet a tet” cu e veteranonan di e Piratanan di Angochi. Segun Caravel no por a anota trempan, nan a cuminsa hunga nervioso, tambe debi na e sorpresa cu nan a haya di e esfuerso di Bubali.

Rauly Wiersma – hungador excepcional di Caravel – foto di archivo

Ken por a kere cu casi na final di e wega ainda Bubali tabata wantando Caravel na sero gol y empatando, pero, Bubali tambe tabata hayando chens trei chens pa bai ariba. Mi mester a wak bon si ta Bubali mes tabata hungando, e esfuerso so tabata hopi mas di loke no a wak den e campeonato te cu awor. 

Lastimamente tabatin un expulsion na minuut 84 di e hungador Jean-Pierre Zimmer, un decision personal sin pensa den cayente di wega, lastima. Caravel djeynan a haya un bida nobo y a sali tur cu tur pa probecha y busca e tres puntanan. Despues di hopi esfuerso di Caravel atakando y Bubali defendiendo pa nan bida, ta te na minuut 90+3 (den tempo extra) alfin e gol di alivio mas bien di caravel a cai, den persona di Miguel Vielma, e salbador di Caravel te cu awor, manteniendonan den e careda pa playoff, ainda tin tempo.

Wlademir Ramirez di Caravel – foto di archivo

Agonia p’e ekipo nortero, gran empeno sin duda, y drama p’e publico. Score final Caravel 1 – Bubali 0.

King of the Match” ta comparti entre Rauly Wiersma y Miguel Vielma pa nan trabou incansabel riba cancha, y Vielma pa salba Caravel cu e gol agonico ey ora cu wega tabata cabando.

Siguientemente den siman 16, Caravel ta topa cu Dakota Diadomingo anochi y Bubali contra Britannia riba Diadomingo atardi.

Te otro siman!  ⚽️

 

Click to comment

Leave a Reply

Your email address will not be published.

More in Division Honor