Connect with us

Division Honor

Resumen y antesala – E clasico a yega, y e cuadro di playoff tambe por bin cla e weekend aki

E Clasico - Dakota vs RCA

 

Despues di e break di futbol debi na festividad di Siman Santo y Pasco Grandi, awor nos ta na drempel di e ultimo dos siman nan den e campeonato. Hopi no a cambia desde prome cu e dianan di fiesta. E dos grandinan, Dakota y RCA, ta keto bai den top dos y ya ta clasifica pa playoffs. Asina mes nan tin un compromiso e weekend aki pa dicidi ken ta keda den prome y ken ta keda den di dos lugar riba tabla bayendo pa playoff, mas bien tambe pa “bragging rights”, sigur ta cu nan dos mes lo keda den top dos riba tabla, laga nos bisa cu e wega aki ta un antesala pa kiko por spera den playoffs for di e dos faboritonan, e diferencia entre nan ta solamente dos punta.

P’e posicion tres tin un bataya entre Britannia y La Fama. Pa hopi siman e puesto ey tabata solido den man di e ekipo di e pumanan di Piedra Plat, pero La Fama a bin ta hunga bon futbol y consistentemente a logra yega serca di Britannia, ban wak kiko ta pasa, pero, tene na cuenta cu Britannia ya a sigura nan mes un puesto pa bai playoff, ta keda di wak si ta como number tres ainda. Matematicamente La Fama no ta cla ainda den top cuater, pero ta hopi serca si, por bisa cu nan ta faborito pa completa e top cuater y clasifica pa playoff, nan rival mas serca cu ta Caravel ya a cai 5  puntra tras di nan, kiermeen cu un victoria,  of un empate di La Fama combina cu un empate of derota di Caravel ta pon’e club di Savaneta den playoff.

Si La Fama logra nan meta e weekend aki contra Riverplate, of sea cu Caravel perde punta, anto e cuater ekiponan cu ta bai playoff lo bai ta conoci; Dakota, RCA, Britannia y La Fama, esey ta e scenario mas probabel, ban wak kiko lo sosode riba cancha.

E situacion di Promocion/Degradacion ta como lo siguiente;

Bubali ta candidato serio pa descende automaticamente for di Division Honor, pero, den ‘theorie’ nan por salba nan mes ganando nan ultimo dos weganan combina cu dos derota di United, nan diferencia di gol ta peor cu United, dus nan no por keda empata den puntuacion cu nan rival nortero. Si Bubali descende automaticamente, United y Estrella lo hunga e playoff contra dos ekipo di Division Uno pa dicidi ken lo ta den Division Honor e siguiente campeonato.

 

Division Honor

 

Ban repasa liher asina kiko a pasa den siman 16 y e antesala pa siman 17.

 

La Fama vs Estrella – ‘Partido di siman’

Esaki tabata un partido hopi clave mes pa La Fama y nan ambicion pa yega playoff, y apesar cu nan a hunga un bon partido te n’e punto ey, halftime a bai aden cu Estrella ganando 2-1 tras di un gol trempan di Edgar Marin na minuut 5 caba, sorprendiendo La Fama cu tabata contolando bala y cancha , pero Estrella cu creatividad ofensivo. Na minuut 25 Sylvester Schwengle ta empata e wega na un gol pa banda, pa despues un biaha mas Estrella bai ariba c’un gol di Trevor Faro na minuut  39.

Den di dos tempo Estrella cu menos bala ainda pero semper peligroso, ta bolbe anota, otro gol di Trevor Faro, bunita gol, pa hasi e wega 3-1 pa Estrella. Di akinan La Fama a demostra cu nan ta un ‘top ekipo’ ora cu nan a sigui hunga nan wega sin bai den paniek, cu pasenshi, y a sigui mas bien pon’e presion riba Estrella cu hopi atakenan un trei otro. E gol di corta bentaha tabat’un ‘auto-gol’ di Naibert Elisabeth, unda cu Chrisler Cicilia a hasi un tiro cu pa malasuerte a dal den pia di Elisabeth y desvia bai den gol p’e 3-2.

La Fama a empata e wega alfin na minuut 66, gol di Davidson Kaarsbaan (3-3). Despues ta Davidson Kaarsbaan mes ta anota e gol di victoria na minuut 90, un pase di Claudio Cavalcante unda cu Kaarsbaan den area penal ta domina cu pecho bah’e bala y pon’e den net, bunita gol. Resultado final tambe, La Fama 4 – Estrella 3.

Partido di siman sin duda, un deleite, y e “King of the Match” ta Davidson Kaarsbaan di La Fama p’e dobbel, un di nan e gol spectacular y agonico na minuut 90.

Den siman 17 La Fama ta hunga contra Riverplate riba Diadomingo anochi, partido cu por dicidi e cuater ekiponan pa bai playoff, y Estrella contra United Diasabra atardi.

 

RCA vs Riverplate

Un partido cu a cuminsa cu hopi promesa pa Riverplate pero despues wordo controla pa RCA.

E prome gol a cai na minuut 37, gol di Albert Francis. Sigui pa gol di Jhon Silva na minuut 46 p’e 2-0, Silva su di 23 gol pa keda como lider di e goleadornan den e campeonato. E di tres gol di RCA a wordo anota pa Albert Francis un biaha mas na minuut 48, su di 13 gol di campeonato pa keda empata cu Denrick Lopez den quinto lugar riba tabla di goleadornan. E utlimo gol di RCA a wordo anota pa Mark Jacobs na minuut 59 p’e 4-0, victoria di RCA.

‘King of the Match’ ta Albert Francis pa su dobbel, un hungador hopi efectivo mes, importante pa RCA.

Den siman 17, RCA lo hunga contra Dakota den e Clasico riba Diadomingo atardi y Riverplate lo hunga contra La Fama den un wega importante riba Diadomingo anochi.

 

United vs Nacional

E derbi nortero tabata di un banda so. Nacional a habri marcacion na minuut 10 pa medio di nan goleador Devis Oliveros, e prome di su cuater golnan di e anochi.

United a logra empata e wega na minuut 16 pa medio di Antonio Fawcett jr. E celebracion di United no a dura mucho, p’aso na minuut 19 caba, Charles de la Cruz a duna Nacional bentaha di 2-1. Despues otro gol di Devis Oliveros na minuut 26 p’e 3-1. Joshua Aguirre a hasi e wega 4-1 na minuut 28. Despues a toca turno na Kenroy Ranger pa cuminsa un racha di golnan su mes, na minuut 32 y 33, sigui pa otro gol di Oliveros na minuut 35 (7-1 pa Nacional).  Joshua Aguirre a bolbe anota pa su dobbel na minuut 43 p’e 8-1 na halftime.

Den di dos tempo Kenroy Ranger a anota tres gol consecutivo na minuut 66, 80, 82 pa su “quintuple”, e unico hungador cu a anota cinco gol den un partido a campeonato aki.  Devis cu no por keda sin anota, a pon’e e bala den net na minuut  94 pa su “poker” tambe (Oliveros su di 15 gol den campeonato), p’e resultado final 12-1 pa Nacional.

‘King of the Match’ ta comparti entre Kenroy Ranger pa su cinco golnan (quintuple) y Devis Oliveros pa nan cuater golnan den e wega.

Siguientemente United ta hunga contra Estrella Diasabra anochi y Nacional ta midi forsa cu Bubali Diamars anochi.

 

Bubali vs Britannia 

Despues di e partido “do or die” contra Caravel riba fecha 14, unda cu Bubali a perde casi na ultimo minuut di wega, a keda Bubali e ultimo partidonan aki contra rivalnan grandi, pero, e bala ta rondo, ainda tin chens pa scapa di descenso pero mester gana e resto di weganan. Contra Britannia, esey ta un reto hopi grandi, e pumanan ta un ekipo top tres casi henter e campeonato.

Britannia a controla e wega aki trempan, sin apuro, sin mester a hasi hopi esfuerso. E prome gol a cai na minuut 33 den pia di Pieter Susebeek cu awor a anota shete gol den e di dos half di e campeonato. E di dos gol di e pumanan a cai na minuut 50 pa medio di e defensor central William Pardo. E ultimo gol di e partido p’e oncena di Piedra Plat ta cai na minuut 90, gol di Brian Susebeek, despues di a drenta algun minuut prome na lugar di su mes ruman Pieter, p’e resultado final tambe, Bubali 0 – Britannia 3.

‘King of the Match’ ta un biaha mas Pieter Susebeek pa su “momentum” y consistencia, y tambe William Pardo, un defensor cu ta anota gol tambe.

Den siman 17, Bubali lo hunga contra Nacional den e derbi nortero riba Diamars anochi 26 di April y Britannia ta bai contra Caravel Diabierna anochi.

 

Dakota vs Caravel

Dakota ta keto bai den prome lugar y Caravel ta den mester di victoria p’asina keda den contencion pa playoff. E partido a cuminsa cu Dakota den control y no a tarda mucho pa bai ariba, gol trempan na minuut 5 caba, ta Sebastian Montoya ta anota atrobe p’e Dakoteronan, Montoya su di 20 gol di campeonato pa keda serca di Jhon Silva (cu tin 23 gol) den e careda pa topscorer di campeonato. E di dos gol di Dakota ta cai na minuut 16 pa Ricky Hodge, su prome di tres p’e 2-0.

Dakota dominado awor, apesar cu halftime a bai aden 2-0. Den di dos tempo ta mesun cos a sigui, y alfin Dakota a bolbe anota na minuut  76, un biaha mas ta Ricky Hodge p’e 3-0. Sigui p’e gol di Nickenson Paul pa hasi e wega 4-0. Finalmente ta Ricky Hodge atrobe, el a anota su di tres gol di e partido (hattrick) na minuut 93, ta Hodge su di 17 gol pa keda den puesto tres riba tabla di goleadornan.

Resultado final tambe Dakota 5 – Caravel 0. ‘King of the Match’ un biaha mas ta Ricky Hodge pa su hattrick y consistencia y tambe Nickenson Paul pa su versatilidad, un defensor cu por lansa den atake man’e ta un volante di creacion of hasta atakante, su gol na minuut 80 tabata fenomenal.

Den siman 17, Dakota lo hunga e Clasico contra RCA riba Diadomingo atardi y Caravel lo hunga contra Britannia riba Diabierna anochi.

 

E partidonan di siman 17:

 

 

 

 

 

 

 

 

Click to comment

Leave a Reply

Your email address will not be published.

More in Division Honor