Connect with us

Division Honor

Ultimo siman di campeonato a yega – resumen y antesala – un clasico aspero ta keda un clasico – playoffs na caminda

E clasico tabata basta complica - foto: Hubert de Cuba

Observacion

E ultimo siman di campeonato 2021-2022 a yega pero e top cuater ekiponan ya ta defini y ta sigura un puesto den playoff, ya tabatin hasta ‘loting’ caba pa dicidi e fecha y wega nan. E cuater ekiponan cu ta bai playoff ta RCA, Dakota, Britannia y La Fama. No tin niun chens matematico mas pa bin un cambio den esaki, esey ta rason cu e ‘loting’ di playoff ya a tuma lugar y e schedule nan ta cla caba.

Siman pasa  Nacional a gana e ‘hoger-beroep’ den un caso di protest di e partido contra Riverplate den di dos rond y a logra haya nan tres puntanan bek (p’e wega ey), pero, no a keda cla ainda cu e otro ‘hoger-beroep’ p’e e wega contra RCA, kiermeen ainda nan por haya un punta bek, y RCA por perde dos punta ainda, cual lo cambia e top di tabla un biaha mas, ban wak.

E clasico entre RCA y Dakota den e fin di siman cu a pasa no a mustra un wega di nivel halto realmente cu nos ta custumbra den e clasico, e tabata mas bien un partido tenso, cu bon cantidad di fanatico na stadion, pero man’e m’a bisa e tabata mas bien un ‘rehearsal’ pa playoff y “bragging rights” di ken tin e “upperhand” entre e dos colosonan aki.

RCA a gana y bon gana, tabatin algun controversia den e partido aki, no grave, pero e no tabata un partido “clean cut”. Tabatin hopi protesta y ‘batimento di boca’ den e transcurso di e wega, hopi complica toch! e no tabata un wega bistoso, cu tur respet p’e referee a cargo, e por a bai foi man si no tabata p’e hecho, y pa suerte, cu e dos ekiponan aki ya tabata clasifica pa playoff. Locual si mi ta puntra ta; dicon no ta pon’e e mihor referee di Aruba fluit e partido aki? y esey ta tambe e di dos biaha e campeonato aki, cu tur dos referee nan cu badge di FIFA tabata parti di e mirones nan. Un clasico toch ta keda un clasico, e mihor dos ekiponan di e campeonato mester bai cu e mihor oficialnan, punt uit.

E partido di siman tabata entre Estrella y United, un partido di banda pa banda, cu hopi golnan, y e magia di Denrick Lopez, electrisante! dos ekipo cu ta bai hunga e playoff di ‘promocion/degradacion’ contra e ekiponan posiciona como 2 y 3 den Division Uno, pa wak ken lo milita den Division Honor e siguiente campeonato. Mientras cu Bubali si a keda oficialmente den ultimo lugar riba tabla y ta descende automaticamente pa Division Uno.

 

Samir Erasmus di RCA y Fernando de Sousa di Dakota den e clasico – foto: Hubert de Cuba

 

Resumen di siman 17 – antesala di 18

 

Britannia vs Caravel

Un partido unda Caravel mester a gana pa ainda keda na bida y tin ainda un chens matematico pa drenta playoff, pero, tabatin mester di dos victoria propio combina cu dos derota di La Fama den e ultimo dos partidonan cu ta keda, pero debi na un doelsaldo inferior mester a gana e weganan ey cu score abulta. Britannia ya ta clasifica, pero, pa keda cu e tercer puesto riba tabla mester evita perde punta.

Un partido balansa unda cu Britannia a sa di probecha di un bon oportunidad na minuut 28, y pa medio di un gol di Pieter Susebeek, un biaha mas cu un bon partido, y ta riba un “hot streak”, ta anota su di ocho gol den mesun cantidad di wega, sigur un di e “uitblinkers” den Division Honor e di dos half di e campeonato aki.

Caravel ta responde cu hopi atake y presion den un partido competitivo y poco aspero, pero no ta logra concretisa, danki na entre otro e labor grandi di e portero Ruben Quero den su debut p’e pumanan di Piedra Plat.

E stokada final pa Caravel a yega na minuut 89 unda cu e substituto Jesus Holguin a pon’e bala den net p’e victoria pa Britannia cu score di 2-0. Cu e resultado aki tambe Caravel ta keda oficialmente elimina foi contencion pa playoff, cementando tambe asina oficialmente e clasificacion di SV La Fama.

“King of the Match” ta e portero di Britannia, Jose Quero, c’un sensacional debut pa su ekipo. Den siman 18, e ultimo siman di campeonato regular, Britannia lo hunga contra Dakota riba Diasabra anochi y Caravel lo midi forsa cu Nacional Diadomingo anochi.

 

Estrella vs United – ‘Partido di Siman’

E oncena di Papilon y e conhunto Nortero ta e dos ekiponan cu ta bai disputa e playoff di Promocion/Degradacion na final di e campeonato hunto cu e di dos y tres clasifica den Division Uno.

Un partido frenetico cu den cuminsamento tabata parce cu Estrella lo a bai cu e tres puntanan. E prome gol ya a cai na minuut 3 caba pa Estrella, pa medio di nan goleador Trevor Faro. Ta Faro mes ta anota atrobe na minuut 9 pa aumenta e bentaha pa e naranhadanan di Santa Cruz, 2-0.

United no a flakea y ta responde bon toch y na minuut 19 t’e volante Cederick Lopez, c’un bon partido, ta anota pa corta e bentaha di Estrella na 1-2.

Na minuut 32 ta toca turno n’e goleador Denrick Lopez, ex Estrella, pa empata e wega pa United, 2-2. Pero, net 7 minuut despues ta Trevor Faro mes t’esun cu ta anota atrobe pa duna Estrella bentaha di 3-2. Hattrick pa Trevor Faro, pa un total di 11 gol pa empata p’e di shete lugar riba tabla di goleadornan.

 

Denrick Lopez di United – foto di archivo

T’asina mes halftime ta bai aden, cu Estrella cu’n bentaha minimo.

Na minuut 58 ta Miguel Dominguez ta anota pa United empata e partido na 3-3, e partido di “toma y dam’e” awor, electricante! Estrella ta anota atrobe na minuut 74 pa medio di Norwin Werleman, pa bai ariba 4-3.

Awor t’e goleador Denrick Lopez ta tuma over e control di e partido, y ta anota su di dos gol di e wega na minuut 79 pa su ekipo United empata e wega na 4-4.

Ora cu a parc’e cu e partido lo bai termina empata na cuater, ta Denrick “Den Den” Lopez mes ta produci un momento di magia y den un tiro liber ta anota den “stoppage time” na minuut 90+4 pa su hattrick, pero mas importante ainda p’e victoria emfatico di 5-4 pa United riba Estrella den e miho partido di siman 17.

“King of the Match” sin ningun duda ta Denrick Lopez cu awor ta number cinco riba tabla di goleadornan cu 16 gol den 17 wega, algun di e golnan ey mas bien ‘piesanan di joya’.

 

 

Erik Santos di RCA comandando den e clasico – foto: Hubert de Cuba

RCA vs Dakota – e Clasico

E clasico tabata mas bien un partido calcula, tenso y traba. Cos por a bai foi man na cualkier momento tambe, un clasico no mucho bistoso. RCA a bin hasi nan business y a bai cu e tres puntanan. Cu business mi kiermeen cu nan sa precies kiko pa hasi pa gan’e wega. Dakota no a sa di responde n’e wega aki, y algun momentonan clave a defini nan derota, pero, asina mes nan tabata tin chens, pero no a probecha ora mester, RCA si a probecha di nan oportunidad nan. Futbol t’asina, tin biaha t’un paar di momentonan chikito ta dicidi un partido di 90 minuut.

E prome gol di wega a cai na minuut 11 caba pa RCA, gol di e rechtsback Marc Jacobs, foi un rebote despues di un tiro liber. E gol aki di biaha a dicta e tempo, e aspecto mental di e partido, unda cu Dakota a cuminsa mas bien purba ‘catch up’ cu RCA, nan semper tabata riba e “back foot”.

Dakota a semi bin bek den di dos tempo y na minuut 49, Fernando de Sousa a haya y a anota un penalty p’e empate na 1-1. Tabata parc’e cu Dakota lo a bons bek n’e momento ey y tabatin hasta chens pa busca e victoria, pero, helaas no tabata asina.

Jeamir Howell di RCA y Derwin Donato di Dakota – foto: Hubert de Cuba

 

 

 

 

 

 

 

 

 

 

Mientras cu Dakota tabata falta definicion den e ultimo 16, faltando punteria na varios ocasion, y tambe debi n’e bon actuacion di Samir Erasmus den gol p’e tricolornan.

RCA a sabi di probecha di dos situacion similar foi tiro liber pa anota, nan di dos gol tambe, na minuut 69; Erik Santos ta anota foi un rebote ora cu e portero hoben Jahmani Eisden no por a controla e tiro, e ‘box out’ di Dakota pa yuda nan portero tampoco a funciona den e ocasion aki, un biaha mas (apesar cu den e prome gol tabatin protesta pa kizas un pushamento prome c’e gol, enfin), RCA 2 – Dakota 1.

Pa ora cu RCA a haya nan prome carchi geel te na minuut 74, ya Dakota tabatin tres geel y un cora caba. E dos carchi coranan cu Dakota a haya den e di dos mitar no a yuda nan esfuerso pa bin bek y busca e empate y kizas mas. Elogio n’e nuebe hunadornan cu a keda riba cancha pa Dakota, nan a duna 110% te na final, e ‘amarillonan’ a mas bien ‘tira nan mes den pia’; pa gana un clasico mester di full concentracion y tambe tur piesa disponibel.

 

RCA vs Dakota – e Clasico – otro salbada di Samir Erasmus – foto: Hubert de Cuba

Resultado final RCA 2 – Dakota 1. “King of the Match” ta comparti entre Samir Erasmus y Erik Santos di RCA.

RCA ta keto bai ‘invicto’ den a campeonato aki y t’awor den prome lugar riba tabla, provisionalmente, pendiente e decision di “hoger-beroep”. Den siman 18, RCA ta topa cu La Fama Diabierna anochi y Dakota cu Britannia Diasabra anochi.

 

Riverplate vs La Fama

E partido aki mester tabata un ‘must win’ pa La Fama den nan afan pa yega playoff, si Caravel a gana nan wega contra Britannia, pero no tabata asina. La Fama a clasifica oficialmente n’e momento cu Caravel a perde nan wega. Asina mes La Fama a bin hunga pa gana, merito pa nan, Riverplate tambe! p’aso apesar cu nan ya a wordo elimina foi contencion pa playoff, nan a bin tur cu tur den e wega aki y brinda nos un bon partido.

E prome gol a cai hopi trempan pa La Fama, na minuut 2 caba, Ransey trimon a habri marcacion, Riverplate 0 – La Fama 1. Ta Ransey Trimon mes ta aumenta e bentaha di La Fama na 2-0 cu su di dos gol na minuut 48.

E partido, hopi interesante den di dos tempo ora cu Riverplate a cuminsa tin mas iniciativa pa bai de atake. Nan prome gol a yega na minuut 62 pa medio di e medio- campista Bernard Smolders y despues nan a hasta empata e wega na minuut 84 pa medio di Siljean Vrolijk.

Tur cos tabata parc’e cu e ekiponan lo bai parti punta, pero na minuut 92 ta Marc Laurence, e rechtsback di La Fama ta dicidi e resultado cu su gol agonico den tempo extra. Riverplate 2 – La Fama 3.

“King of the Match” ta Ransey Trimon pa su dobbel y bon trabou en general den e wega.

Den siman 18, Riverplate ta hunga contra United riba Diasabra atardi y La Fama ta bai contra RCA Diabierna anochi.

 

Nacional vs Bubali

E derbi di Noord no ta e mes’un di antes. Bubali a pasa den un campeonato dificil unda nan ta decendiendo pa Division Uno, mientras cu Nacional tabata hopi serca di yega playoff, pa algun punta nan no ta bai make e.

E partido man’e a spera tabata di un banda so, Nacional a mas bien domina den tur aspecto. E prome gol di Nacional a cai na minuut 7 pa medio di Kenroy Ranger. despues ta Kenroy Ranger mes ta anota atrobe p’e 2-0 na minuut 20, esey tambe tabata Ranger su di shete gol den dos wega! Despues ta sigui e gol di Jose (Leo) Pulido di distancia p’e 3-0.

Den di dos tempo Devis Oliveros, e capitan di Nacional mes ta tuma over y ta score tres gol sigui na minuut 55, 73, y 90 pa su hattrick y victoria di Nacional cu anotacion di 6-0. Cu e hattrick aki, Oliveros ta yega na ocupa e puesto tres riba tabla di goleador cu 19 gol, solamente cuater gol tras di e lider Jhon Silva di RCA y un gol so trei Sebastian Montoya di Dakota, algo cu tabata mustra casi imposibel algun siman pasa, pero Oliveros ta ainda den contencion cu un wega mas pa bai.

“King of the Match” ta Devis Oliveros di Nacional.

Den e ultimo siman di campeonato Nacional lo hunga contra Caravel Diadomingo anochi y Bubali lo despedi di Division Honor den e wega contra Estrella Diadomingo atardi.

 

Te otro siman

 

 

 

 

 

Click to comment

Leave a Reply

Your email address will not be published.

More in Division Honor