Connect with us

AVB

Division Honor – Playoffs 2022 ta cuminsa – Dakota a gana e campeonato regular y Devis Oliveros di Nacional ta campeon goleador atrobe

Dakota ta gana e campeonato regular di Division Honor 2021-2022 - Foto: cortesia di Hubert de Cuba

 

 Resumen y comentario

Campeonato Division di Honor a yega na su conclusion prome cu bai over p’e playoffs nan. Un siman final di campeonato regular unda “tur-cos-a-wordo-dicidi”…..no necesariamente, wanta un rato! p’aso ainda tabata falta e decision di “hoger beroep” den e caso di protest den e partido di RCA v Nacional di 20 Maart, cu inicialmente a wordo gana pa RCA pero cu despues a wordo apela, te cu awor. Wel, Nacional a gana den hoger beroep ey y a haya nan punta bek y RCA a perde dos punta, ya cu e partido a caba den un empate di 2-2 originalmente, esey mes tabata e resultado final despues di e apelacion, dus, tur cos a keda mescos cu prome c’e prtotesta. P’e rason ey Dakota a caba e campeonato cu un punta so mas cu RCA pa keda como ‘ganado di campeonato regular’, apesar cu awor lo bai hunga playoff pa wak ken ta keda c’e titulo mes. Ta algo pa papia di dje tambe den futuro, ta con ta bai recompensa e ‘ganado di campeonato regular’ y duna e logro ey mas balor, despues di 18 partido hunga den varios luna.

E competencia p’e mihor goleador di campeonato a wordo gana un biaha mas pa Devis Oliveros di Nacional (su di cuater biaha), den e ultimo suspiro di e campeonato el a anota seis gol den e wega aki contra Caravel pa pasa bai riba Sebastian Montoya y Jhon Silva, e lider te n’e momento ey. Oliveros a suma un total di 27 gol den e campeonato, anto e no a ni hunga tur partido. Silva a keda cu 25 gol y Montoya cu 23 gol respectivamente. Un careda hopi interesante henter e campeonato. E bunita di esaki ta cu Devis a haya bon sosten di su companeronan di Nacional p’asina e por a clinch e titulo di goleador ey, un team-work pa logra e meta ey, apesar cu Oliveros por hopi cos riba su mes, pero, e gesto ey ta grandi, e ta indica kiko ‘traha hunto por logra’, ta un ‘team-sport’ e ta con cu bai cu bin.

Bubali a descende pa Division Uno pa di cuarto biaha den nan historia cuminsando c’e prome biaha na anja 1953 y e ultimo biaha na 2001. Estrella y United, cu a keda den di ocho y nuebe lugar respectivamente riba tabla, ta bai hunga e playoff di Promocion/Degradacion contra e di dos y di tres lugar riba tabla di Division Uno. E final di Division Uno mes ta bai wordo hunga entre Unistars y Santa Fe, dus e ganador di e serie final aki ta bai automaticamente pa Division Honor, y e perdedor lo hunga den e playoff menciona cu e di tres clasifica, hunto cu Estrella y United.

E playoff di Division Honor lo cuminsa Diasabra 7 di Mei cu e partidonan Dakota vs Britannia y RCA vs La Fama, e cuater ekiponan cu a clasifica.

 

Division Honor Campeonato Regular

 

E resultadonan di e ultimo siman di partidonan den campeonato regular a bai como lo siguiente:

 

La Fama vs RCA

Un partido unda RCA a domina den un wega cu nan kier a gana pa sigura e prome puesto riba tabla, y La Fama cu tabata falta di nan coordinador den medio campo, Claudio Cavalcante, e ekipo no tabata tin mucho pa hunga p’e except honor deportivo.

E prome gol di RCA a cai na minuut 3 caba pa medio di Steven (Rua) Melchor, cu ta bek n’Aruba desde algun fecha caba pa yuda su club den playoff man’e ta custumber den e ultimo anjanan.  La Fama 0 – RCA 1.

Jhon Silva ta anota su di 25 gol di campeonato na minuut 38 pa sigura un bentaha grandi riba Montoya y Oliveros te n’e momento ey, y caricia e titulo di goleador di campeonato. La Fama 0 – RCA 2. E hoben promesa, Evander Nedd, ta anota e di tres gol di RCA na minuut 55 pa hasi e partido 3-0 y e resultado final tambe. ‘King of the Match’ ta Steven Melchor di e tricolornan.

Na final RCA a keda anto den di dos lugar y La Fama den di cuarto lugar riba tabla. E dos ekiponan aki mes ta enfrenta otro den e prome fecha di playoff Diasabra anochi.

 

Jhon Silva di RCA – e di dos riba tabla di goleador cu 25 gol den campeonato – foto di archivo

 

United vs Riverplate

Un partido hunga pa deportivismo so. Riverplate a keda foi top cuater, dus, foi playoff, despues di un bon campeonato unda cu nan a wordo invita foi Division Uno pa participa den e division mas halto, despues cu Caiquetio a dicidi di no competi den Division Honor e campeonato aki. United a keda den penultimo lugar p’asina bai hunga playoff di Promocion/Degradacion.

Un partido di toma y d’ame, di banda pa banda, hopi entreteni mes.  River a bai ariba na minuut 4 caba despues di un auto-gol, pero, United ta responde di biaha cu nan mes un gol pa medio di Miguel Suarez na minuut 8 p’e 1-1.

Na minuut 17, Denrick Lopez ta anota su di 17 gol di campeonato pa keda den di cuarto lugar, empata cu Ricky Hodge di Dakota, riba tabla di goleadornan, United 2 – Riverplate 1. Despues otro auto-gol ta empata e wega pa Riverplate na 2-2 na minuut 35.

Andrew Croes ta bolbe pon’e United den bentaha di 3-2 cu su gol na minuut 37, asina mes halftime a bai aden cu United den bentaha.

Den di dos mitar na minuut 52, Julnes Plet di Riverplate ta anota y ta empata e partido na 3-3, sigui p’e gol di Jason Carolina na minuut 64 pa dun’a River bentaha di 4-3.  Miguel Suarez ta responde cu su gol pa United na minuut 71 p’e empate na cuater gol, resultado final tambe, United 4 – Riverplate 4. ‘King of the Match’ ta comparti entre Miguel Suarez di United y Julnes Plet di Riverplate.

Riverplate ta termina e campeonato den di shete lugar cu 20 punta, mientras cu United ta keda den di nobeno lugar cu 11 punta y ta bai haya nan ta hunga playoff Promocion/Degradacion hunto cu Estrella y e dos ekiponan cu keda den di 2 y 3 lugar riba tabla di Division Uno.

 

Dakota vs Britannia – ‘Partido di Siman’

Den e prome rond di e campeonato aki Britannia a sorprende y a gana di Dakota cu score di 3-2 den un partido interesante. Awor Dakota tin mester di un victoria pa keda cu’n chens pa keda den prome lugar riba tabla na final di e campeonato regular. Britannia na su turno a sigura e di tres puesto riba tabla y a clasifica pa playoffs.

Sebastian Montoya a habri e marcacion na minuut 11 caba pa duna Dakota bentaha trempan. Montoya den di dos puesto di e goleadornan den e campeonato ta den careda cu Jhon Silva pa keda como maximo goleador di e campeonato aki.  Britannia ta responde bon, ora cu Pieter Susebeek, un di e mihor hungadornan den Division Honor den e di dos half di e campeonato, a anota su di 10 gol den 9 wega pa empata e partido na un gol.

Na minuut 31 e partido ta tuma un otro rumbo ora cu Randell Gross ta haya carchi cora lagando Dakota cu dies homber riba cancha. Toch e desbentaha  numerico no a afecta e amarillonan p’aso Sebastian Montoya ta bolbe anota pa duna Dakota bentaha di 2-1 na minuut 36, ta Montoya su di 22 gol n’e momento ey. Britannia no ta keda man crusa y ta Pieter Susebeek mes un biaha mas t empata e wega na minuut 40 p’e 2-2.

Despues di halftime ta Susebeek mes ta anota atrobe na minuut 58 (di penalty), su hattrick den e wega y tambe su di 12 gol den e ultimo 9 weganan! Dakota 2 – Britannia 3.

Tur cos tabata parc’e cu Britannia lo por a probecha di e situacion cu mas hungado riba cancha, y por lo menos wanta e resultado y bai cu e puntanan. Dakota a man’e haya un di dos aire y a bringa bek. Na minuut 83 ta Owen v/d Wijne, cu a drenta di suplente den di dos half, ta anota e gol di empate p’e 3-3.

Casi na final di e partido ora cu ya tabata parc’e cu Dakota apenas por a logra un empate den e partido aki y consola nan mes cu e di dos puesto riba tabla di campeonato regular, na minuut 90+4, casi prome c’e pitaso final, Dakota ta haya un penalty ora cu Sebastian Montoya ta drive den area penal y ta wordo tumba. Montoya mes ta anota pa su hattrick tambe, su di 23 gol di e campeonato, pero mas importante, pa duna Dakota e victoria di 4-3 den e ultimo suspiro pa duna nan un chens mas pa keda como lider riba e tabla di posicion (pa despues haya confirmacion di esaki despues despues di e decision di “hoger-beroep”).

‘King of the Match’ ta comparti entre Pieter Susebeek y Sebastian Montoya pa nan ‘hattrick’ den e wega aki, spectacular prestacion di ambos hungador den e ‘wega di siman’.

Dakota ta hunga contra Britannia atrobe Diasabra atardi den e prome wega di playoff 2022.

 

Sebastian Montoya di Dakota, a keda den di tres lugar riba tabla di goleador cu 23 gol – foto di archivo

Bubali vs Estrella

Partido di despedida di Bubali foi Division Honor despues di un campeonato hopi dificil mes unda nan a logra solamente 4 punta den 18 wega hunga.  Estrella tampoco tabatin un gran campanja, nan keda den di 8 lugar cu 14 punta so y nan tin cu bai hunga playoff di Promocion/Degradacion.

E partido mes a wordo domina pa Estrella, apesar cu ironicamente Bubali a hunga basta bon compara cu den mayoria di a campeonato, pero, no tabata suficiente. E prome gol di Estrella a cai na minuut 23 pa medio di Bryaden Koolman p’e 1-0. Te na minuut 70, Estrella ta bolbe anota, e biaha aki gol di Norwin Werleman pa duna nan bentaha di 2-0. Na minuut 80, Edgar Marin ta anota pa hasi e wega y resultado final – Bubali 0 – Estrella 3. ‘King of the Match’ den e wega aki ta Norwin Werleman di Estrella.

 

Caravel vs Nacional

Nacional no a logra yega playoffs e anja aki, algo inusual den nos campeonato, e ekipo nortero, e actual campeon di Aruba, ta un ekipo cu ta consistentemente den playoffs, e anja aki ta un excepcion grandi. Caravel pa gran parti di e prome mitar di campeonato tabata den top cuater y candidato pa bai playoff, helaas, no ta e caso pa nan tampoco.

Tabatin un meta importante si den e wega aki, vooral pa Nacional, ademas di orguyo deportivo, pa pon’e nan capitan Devis Oliveros den top di goleadornan p’e campeonato aki, p’e meta aki, Nacional lo mester gana Caravel cu un score grandi ya cu Oliveros tabata cuater gol trei Jhon Silva p’e titulo di maximo goleador di Division Honor, un titulo cu Oliveros a gana tres biaha caba anteriormente, ademas di e galardon di Balon D’Or di Aruba na un ocasion tambe.

E partido tabata completamente domina pa Nacional y nan prome gol a cai caba na minuut 7 pa medio di Fladimy Francois (su di 11 gol pa keda den top 10), sigui p’e gol di Kenroy Ranger na minuut 10, Ranger ta riba un “hotstreak” tambe unda cu ya prome cu e wega aki el a anota 8 gol den e ultimo tres weganan, incluyendo 5 den e partido contra United. Caravel 0 – Nacional 2.

Despues a sigui e cuater golnan un-trei-otro di Devis Oliveros na minuut 12, 18, 34 y 37 p’asina empata cu Jhon Silva p’e prome lugar. Caravel 0 – Nacional 6. Kenroy Ranger ta bolbe anota na minuut 41, y Oliveros mes ta anota atrobe na minuut 45 net prome cu halftime a bai aden, pa bira e ‘solo’ lider goleador. Caravel 0 – Nacional 8.

Den di dos mitar mas gol a sigui cai pa Nacional; Kenroy Ranger atrobe na minuut 64 pa su hattrick y sumando tambe 11 gol den e campeonato (11 gol den tres wega).  Devis Oliveros ta anota su di seis gol di wega na minuut 84 p’asina keda como lider absoluto y campeon goleador sumando 27 gol, dos mas cu Jhon Silva su 25. E capitan di e dragon nan ta keda anto como campeon goleador un biaha mas, pabien na Devis Oliveros!

 

Devis Oliveros di Nacional a keda como campeon goleador di Division Honor atrobe cu 27 gol – foto di archivo

 

Javier Morales ta anota e di 11 gol pa Nacional na minuut 90+1  p’e resultado final, Caravel 0 – Nacional 11. Caravel ta keda den di 6 lugar cu 24 punta y Nacional cu 30 punta den di cinco lugar, net un poco corto di top cuater y playoffs. Devis Oliveros ta nos ‘King of the Match” den e partido aki, niun duda!

Tabla di Goleador – Top 10

Nota: Kenroy Ranger di Nacional tambe tin 11 gol y ta keda empata cu e cuater otronan cu mesun cantidad.

Schedule di Playoffs p’e prome dos fechanan:

 

Te otro siman cu e resumen di e weganan di playoff.

 

Click to comment

Leave a Reply

Your email address will not be published.

More in AVB