Connect with us

AVB

Playoffs Division Honor 2022 a cuminsa – ken ta favorito pa bai final?

Juel Balentien di Britannia contra Dakota den e inicio di Playoffs 2022 - Foto: Nathan Richards

Playoff di Division Honor a cuminsa cu dos partido den e prome rond di e “round robin”, unda cu tur e cuater ekiponan clasifica ta bai hunga contra otro dos biaha p’asina determina cual ta e top dos ekiponan cu lo bai enfrenta otro den un serie final di dos partido y dicidi e campeon di Aruba p’e campeonato 2021-2022.

Den e prome fecha di playoff, Dakota a enfrenta Britannia, e mesun dos ekiponan cu a protagonisa un gran partido den e ultimo fecha di campeonato regular unda Dakota a bin gana den e ultimo minuut nan di wega, despues di a hunga gran parti di e wega cu dies hungado so,  y asina consagra nan mes como ‘ganador di e campeonato regular’ cu un punta so mas cu RCA, apesar cu e tricolornan di Solito a caba e campeonato sin perde un solo wega, invicto.

Ferdinant Robert ta ricibi trofeo pa SV Dakota – ganado di campeonato regular 2021-2022 –  Foto: Nathan Richards

Den e otro partido di e “round robin” La Fama a topa cu RCA, e ekiponan cu a termina dos y cuater respectivamente riba tabla final di Division Honor. Den e campeonato regular RCA a sabi di gana dos biaha di e club savanetero, pero semper e speransa berde a sa di duna e tricolornan hopi dolor di cabes.

Tur cos ta parc’e cu e playoffs aki ta bai depende di ken por spaar energia mihor, tambe ta depende di e profundidad di e banki di suplentenan di cada ekipo,  of cual ekipo ta den mihor condicion fisico, kizas hasta “mental strength”, ya cu ta hopi weganan ta bai wordo hunga den un corto tempo, tres partido pa siman cu poco dia pa sosega no ta facil.

 

Dakota vs Britannia

E partido aki, despues di nan “thriller” djies un siman pasa a cuminsa cu hopi bon iniciativa ofensivo di e ekipo Dakotero. E amarillonan sin nan di dos goleador, Ricky Hodge, den e partido. Britannia tabata bou presion trempan caba, vooral di parti di Fernando de Sousa cu tabata un forsa ofensivo den e prome mitar ( y demas wega tambe) cu constante yegada y presion hunto cu Shemar Monticeuex y Sebastian Montoya.

Dakota – Playoffs 2022

Britannia – Playoffs 2022

E prome gol a cai na minuut 8 caba pa medio di Shemar Monticeuex pa duna Dakota e bentaha trempan, un bon asistencia di Fernando de Sousa mes. Dakota 1 – Britannia 0.

Despues e presion dakotero a sigui y de Sousa a sigui duna dolor di cabes n’e pumanan. Na minuut 26 ta un gran iniciativa di Fernando de Sousa mes a manufactura e di dos gol pa Dakota, un bala cu ‘eigenlijk’ a dal den pia di e defensor William Pardo bai den gol ora cu de Sousa kier a a crusa e bala pa Shemar Monticeuex. E record oficial a duna e gol na de Sousa, pakiko no? Dakota 2 – Britannia 0.

Despues di halftime, Britannia a sali foi kleedkamer cu hopi vigor y a cuminsa haya mihor yegada y oportunidad nan di gol. Na minuut 53 e gol di corta bentaha a yega den pia di e ex hungado di Dakota, Juel Balentien. Un hugada cu a termina c’un bon pase di Pieter Susebeek pa Balentien cu a hasi un medio volley p’e bunita gol pa hasi e wega, Dakota 2 – Britannia 1.

Dakota ta responde bon y na minuut 62 Sebastian Montoya, e maximo goleador di e amarillonan den e campeonato, ta anota un bunita gol di distancia largo p’e 3-1 p’e oncena di Dakota.

Fernando de Sousa a domina- Playoffs 2022 – Foto: Nathan Richards

Dakota a maneha e partido dictando nan tempo y preveniendo mas yegadanan peligroso, na minuut 90 e stokada final a yega den e pianan di Fernando de Sousa cu tabatin un monstro di partido, pa hasi e wega Dakota 4 – Britannia 1. Esey tambe tabata e resultado final, Dakota anto a bai cu e tres puntanan den e prome wega di playoff. ‘King of the Match’ ta sin duda y merecidamente, Fernando de Sousa cu dos gol y  un asistencia y un trabou fisico impresionante.

Den e siguiente partido Dakota lo topa RCA den e ‘clasico’ Diahuebs anochi y  Britannia lo topa La Fama Diamars anochi.

 

La Fama vs RCA

E tricolornan a bin di gana La Fama c’e anotacion di 3-0 den e ultimo fecha di campeonato, unda ambos ekipo tabata clasifa caba, pero, mas bien RCA tabata hunga pa keda c’e prome puesto y gana e campeonato regular riba Dakota. La Fama no tabatin mucho mester di saca un bon resultado den e wega ey y a mas bien hunga pa orguyo deportivo y tambe a trata na preveni lesion na su hungadornan net prome cu playoff cuminsa. E ekipo savanetero semper a hunga RCA duro den e ultimo anjanan, esey t’un feit.

La Fama – Playoffs 2022

RCA – Playoffs 2022

E partido aki tambe tabata sera, mehor dicho ‘compacto’, cu ambos ekipo bon posiciona riba cancha, cu disciplina, permitiendo masha poco espacio. Mayoria di e batayanan tabata den medio campo, e ekiponan hungando cu bon defensa tambe, cual a fomenta mas tironan di distancia.

RCA tabatin un poco mas yegada skerpi cu La Fama, esey no kiermeen c’e speransa berde di Savaneta a djies sinta warda atras den defensa, al contrario nan tambe tabatin nan iniciativanan ofensivo, apesar c’e partido mes no tabata un partido cu hopi yegada y weganan bunita, e tabata strategico y aspero na algun momento, apesar cu arbitro principal Eduard Sandjon a duna un carchi geel so pa ambos banda.

Sylvester Schwengle di La Fama y Erik Santos di RCA – Playoffs 2022 – Foto: Nathan Richards

P’a ora cu RCA a haya algun yegadanan, La Fama tabata conta cu un di e mihor porteronan hoben riba e isla aki, Joshua Faro, cu di berdad tabata “on” e anochi aki. Faro a salba La Fama den varios ocasion, vooral den prome tempo. La Fama tambe tabatin algun chens, man’e esun casi na final di wega, na minuut 93, unda cu Enzon Para c’un tiro di distancia, descumunal, ta casi anota pa kizas duna La Fama e victoria, esey ta ilustra con e partido aki a bai.

No tabatin ganador den e wega aki, e ekiponan a parti punta y awor ambos ta keda dos punta trei Dakota cu ta den prome lugar riba tabla cu tres punta. Toch un resultado husto pa ambos ekipo, La Fama y RCA. Resultado final La Fama 0 – RCA 0. ‘King of the Match’ ta Joshua Faro sin duda. Siguientemente La Fama ta topa cu Britannia Diaranson anochi y RCA ta topa cu Dakota Diahuebs anochi. Apenas e “round robin” di playoff a cuminsa, falta hopi ainda, pero, cada wega ta conta hopi mes toch.

 

Division Honor Play-off

 

Schedule

 

 

 

 

Click to comment

Leave a Reply

Your email address will not be published.

More in AVB