Connect with us

AVB

Dakota y La Fama ta pika dilanti y ta ‘un-dos’ riba tabla di playoffs – resumen y antesala

SV Dakota a cuminsa cu dos victoria den playoffs 2022 - foto di archivo

Despues di dos fecha di Playoffs 2022, Dakota ta keda invicto cu dos victoria p’e prome lugar, y La Fama cu tambe ta invicto cu un victoria y un empate den di dos puesto. RCA ta keda den di tercer lugar cu solamente un empate, te cu awor, y mientras cu Britannia ta keto bai sin punta den ultimo lugar. Mester bisa si cu ainda ta hopi trempan y hopi cos por cambia, ya c’e weganan ta un trei otro tambe, pero p’esey mes toch n’un banda ta importante pa acumula punta mas liher posibel den playoffs. E ekiponan cu por keda emocionalmente stabiel, sin mucho alti-baho y tambe cu menos desgaste fisico lo tin mas chens pa clasifica pa final.

Dakota alfin a kibra e hegemonia di RCA saliendo victorioso pa prome biaha e campeonato aki den e clasico Diahuebs anochi na stadion Guillermo Trinidad, dilanti un publico basta significante, di e manera aki tambe e tricolornan di Solito a perde nan invicto pa prome biaha den ful e campeonato 2021-2022, un racha di 19 wega sin perde, te awo!

E weekend aki, riba Diadomingo pa ta exacto, ta hopi cos ta bai ta den wega, ya cu Dakota lo topa La Fama, pa wak ken ta keda den prome lugar, y RCA ta bai contra Britannia pa wak cual di e dos ekiponan aki lo drenta den bataya pa top dos y cual lo keda den ultimo lugar riba tabla.

Division Honor Playoffs

 

Britannia vs La Fama

La Fama a saca un bon punta den e prome fecha di playoffs contra RCA, mientras cu Britannia ta sin punta ainda despues di e derota contra Dakota den nan prome wega. La Fama, un ekipo bastante inspira foi comienso di e di dos parti di e campeonato, a cuminsa e wega cu bon posesion di bala cu hopi disciplina riba cancha, den e sentido cu nan tabata bon para man’e ta nan custumber. E medio campo comanda pa Claudio Cavalcante, cu Sylvester Schwengle semper peligroso tirando dilanti y Joshua Faro solido den gol cu hopi confiansa, y mester menciona tambe e bon wega di Raul Morales, un hungado trei cortina, y recientemente Justin Samson den defensa.

Britannia no tabatin hopi yegada skerpi contra e ekipo di La Fama aki. E pumanan un poco eratico den nan pasenan, vooral den e prome tempo, pa ora cu nan a hasi algun coreccion den nan wega ya La Fama a pika dilanti caba y en busca di mas cu hopi momentum trei nan.

Na minuut 20, Ransey Trimon ta habri marcacion pa La Fama. Britannia 0 – La Fama 1. For di e punto ey e partido a cuminsa bira aspero, poco duro cu bastante carchinan, y apesar di tanto carchi e wega a hera bai foi man den hopi ocasion.

Na minuut 57, Sylvester Schwengle den un sprint na banda robes foi un pase di Claudio Cavalcante y net drentando area penal, schaak un defensor y ta lansa un tiro potente cu ta banja e portero Carlos Geerman di Britannia p’e 2-0 p’e speransa berde di Savaneta.

Sylvester Schwengle – capitan di SV La Fama – foto di archivo

Despues ta sigui un auto-gol di Carl Geerman (foi un cruse di Sylvester Schwengle mes) na minuut 69 cu ta duna La Fama mas bentaha ainda di 3-0 den e partido, un sero basta halto pa subi p’e pumanan di Piedra Plat. Despues di e expulsion di Jeffery Rolston na minuut 71 cos ta bira mas dificil ainda cu Britannia cu diez homber so. La Fama ta probecha mas ainda y Davidson Kaarsbaan ta anota pa hasi e wega, Britannia 0 – La Fama 4.

Britannia toch a sa di responde y a hasta cuminsa hunga mihor bala, pero un poco laat, y na minuut 87 ta anota nan prome gol pa medio di nan goleador Pieter Susebeek, Britannia 1 – La Fama 4.

Despues ta Susebeek atrobe ta anota na minuut 90, e biaha aki pa medio di penalty, pa corta bentaha di La Fama na 2-4. Susebeek su di 13 gol den e ultimo 11 partidonan, un racha impresionante di berdad, helaas, e biaha aki den un causa perdi, ya cu no tabatin suficiente tempo pa mas.  Britannia 2 – La Fama 4 tabata e resultado final.

‘King of the Match’ ta Sylvester Schwengle, e capitan di La Fama, pa su esfuerso fisico grandi den e wega, y e gol bunita ey na minuut 57.

Britannia ta topa cu RCA riba Diadomingo anochi y La Fama ta topa cu Dakota riba Diadomingo atardi.

 

RCA vs Dakota

E clasico den dos ocasion den e campeonato aki a favorece e tricolornan, y apesar cu Dakota a gana e campeonato regular, semper e dos derota n’ei na man di RCA tabata man’e un ‘doorn den nan zijde’. Dakota t’ainda sin Joshua Gross y RCA ta sin Stiven Rua Melchor, hungadornan clave pa ambos ekipo. Pero, p’e wega aki Dakota a bin cu un “wild card”, nan a presenta un hungador nobo p’e playoffs aki, un hungador cu nos a wak caba y a keda impresiona den e partido cu e seleccion nacional di Aruba a hunga contra e ekipo internacional na fin di Maart ultimo. Camilo Peña, hungando p’e ekipo internacional a sobresali den e wega ey, awor e ta miembro di e ekipo di Dakota.

Camilo Peña den accion p’e ekipo internacional contra seleccion di Aruba na Maart ultimo – foto di archivo

Un cos cu nos por a observa di biaha cu Peña den alineacion, ta cu el a trece un calmo den medio campo (Peña por hunga tambe riba rechtsback), acoplando bon c’e otronan, reteniendo bala, cu temperamento, cu bon cambio di ritmo, e por contene y recupera bala tambe, esaki por libra Daniel Briceño, un hungado di confiansa y na su turno yuda mas den e aspecto creativo. Dakota tabata diferente den e partido aki, compara cu den e ultimo clasico algun siman atras. Gikay Croes den gol a trece trankilidad, Ricky Hodge ta di regreso tambe, anotando gol atrobe, y Fernando de Sousa ta sigui ta hungando riba un gran nivel den e playoffs aki, pa ta exacto desde fin di Maart, unda c’e tambe a hunga p’e oncena internacional contra Aruba.

E prome gol ta cai na minuut 21 pa medio di Ricky Hodge, RCA 0 – Dakota 1. E gol aki a dicta ‘e pulso di e wega’, cu tabata den man di Dakota casi henter e tempo, a sinti cu RCA tabata “play catch-up” den e partido aki. E di dos gol pa Dakota a cai na minuut 30, Ricky Hodge atrobe, cu su dobbel, RCA 0 – Dakota 2.

Den e di dos tempo Dakota a baha man un poco, claro, despues di a dicta e wega pa largo tempo, pero, asina mes Fernando de Sousa a anota e gol p’e 3-0 na favor di Dakota pa medio di penalty na minuut 71.

RCA a perde un di nan pilarnan den medio campo ora cu Erik Santos ta sali lesiona den e di dos tempo. Despues toch e  tricolornan ta logra haya un gol di penalty na minuut 87 unda cu Jean Luc Bergen, cu a tuma over e rol di Santos, ta anota pa hasi e wega RCA 1 – Dakota 3.

Esey mes tabata e resultado final, tur tres punta pa Dakota e biaha aki, dunando nan e prome lugar riba tabla di playoffs cu seis punta. Un partido competitivo pero deportivo, cu bon conduccion di arbitro Omar Lambert. “King of the Match” ta comparti entre Camilo Peña y portero Gikay Croes, ambos di Dakota.

RCA ta hunga contra Britannia Diadomingo anochi y Dakota lo midi forsa contra La Fama Diadomingo atardi.

Schedule di Playoffs

 

 

 

Click to comment

Leave a Reply

Your email address will not be published.

More in AVB